Hi kutsala ka Johani

1 Kusanguleni ku wa hi Gezu,+ a Gezu gi wa hi na Nungungulu,+ niku a Gezu gi wa hi nungungulu.+ 2 Kusanguleni i wa hi na Nungungulu. 3 A zvilo zvontlhe zvive kona ha yena.+ Ci hava ni cin’we ci vangilweko na ku nga tirisiwi yena.

Lezvi zvi vileko kona 4 na ku tiriswa yena wutomi, ni wutomi gi wa hi kuwonekela ka vanhu.+ 5 A kuwonekela ka woninga munyameni,+ ni munyama a wu ku hluli.

6 Ku nota munhu a nga rumilwe hi Nungungulu; a vito gakwe i wa hi Johani.+ 7 A wanuna loyi i nota kota kustumunyu, lezvaku a ta kustumunya hi kuwonekela+ kasi a vanhu va tixaka tontlhe va fela ku kholwa ha yena. 8 Yena i wa nga hi kuwonekela,+ kanilezvi i wa tela ku ta kustumunya hi kuwonekela loko.

9 A kuwonekela ka lisine loku ku woningelako a vanhu va tixaka tontlhe ku wa hi kusuhani ni kuta tikweni.+ 10 I wa hi tikweni,+ niku a tiko give kona ha yena,+ kanilezvi a gi mu tivangi. 11 I nota mutini wakwe, kanilezvi a vanhu vakwe a va mu amukelangi. 12 Kanilezvi, vontlhe lava va nga mu amukela i no va nyika ntamu wa lezvaku va maha vana va Nungungulu,+ hakuva va wa kombisa kukholwa vitweni gakwe.+ 13 A vanhu lava a va pswaliwangi hi nkhata kutani hi kurandza ka nyama hambu hi kurandza ka munhu, kanilezvi hi Nungungulu.+

14 Hikwalaho, a Gezu gi nova nyama,+ gi tshama cikari ka hina, niku hi wonile a kungangamela ka gona, ku nga kungangamela loku papayi a nyikako a n’wana wakwe a pswalilweko yece,+ na a tele hi tipswalo ta Nungungulu ni lisine. 15 (Johani i no kustumunya hi yena, a wula hi gezu ga hombe, aku: “Hi yena loyi ndzi nga wulawula ha yena, ndziku: ‘Loyi a tako hi lendzhako ka mina hi yena wo ranga, hakuva i wa hi kona mina na ndzi nga seva kona.’”)+ 16 Hakuva hontlheni hi amukele hi ka kutala kakwe, hambu a tipswalo hehla ka tipswalo. 17 Hakuva a Nayo wu nyikilwe hi ku tirisa Mosi,+ kanilezvi a tipswalo+ ni lisine zvi tile hi ku tirisa Jesu Kristu.+ 18 I hava a tshukileko a wona Nungungulu;+ a nungungulu a pswalilweko yece,+ loyi a nga reveni ga Papayi,*+ hi yena a tlhamuseleko lezvi Nungungulu a nga tshamisa zvona.+

19 Legi hi wukustumunyu legi Johani a nga gi nyika a cikhati leci a vaJudha va nga ruma a vapristi ni vaLevhi hi le Jerusalema va ya mu wutisa, vaku: “Hi wena mani?”+ 20 A nga kanetangi, i no tekela ku va hlamula, aku: “A hi mina Kristu.” 21 Va no mu wutisa, vaku: “Makunu hi wena mani? Hi wena Elija?”+ I no hlamula, aku: “A hi mina.” Vaku: “Hi wena Muphrofeti+ ke?” Aku: “Ahihi!” 22 Hikwalaho, va te ngalo kakwe: “Hi wena mani? Hi byele hi fela ku ya hlamula lava va nga hi ruma. U hi wena mani?” 23 Aku: “Ndzi gezu ga loyi a huwelelako lomu ciwuleni, aku: ‘Lulametani a ndlela ya Jehovha’,*+ a ku khwatsi hi lezvi muphrofeti Isaya a wulileko.”+ 24 A vanhu lavo va wa rumilwe hi vaFarisi. 25 Hikwalaho, va no mu wutisa, vaku: “Makunu hikuyini u bhabhatisako na u nga hi wena Kristu kutani Elija kutani Muphrofeti?” 26 Johani i no va hlamula, aku: “Mina ndzi bhabhatisa hi mati. Kanilezvi i kona a yimileko cikari ka n’wina, loyi mu nga mu tiviko, 27 a tako hi ndzhako ka mina, wa ku ne a ndzi ringani ku tlhatlha a tingoti ta masandalia yakwe.”+ 28 A zvilo lezvi zvi mahekile Bhetaniya, le tlhatuko wa Jordhani, laha Johani a nga bhabhatisa kona.+

29 Hi mandziko wa kona, i no wona Jesu na ata kakwe, aku: “Hi nga wonani a Yivhana+ ya Nungungulu leyi yi susako a ciwonho+ ca tiko!+ 30 Hi yena loyi ndzi nga wulawula ha yena, ndziku: ‘Lendzhako ka mina kuta munhu a rangileko mahlweni ka mina, hakuva i wa hi kona mina na ndzi nga seva kona.’+ 31 Hambu mina ndzi wa nga mu tivi, kanilezvi ndzi tile ndzi ta bhabhatisa hi mati kasi a fela ku wonekeliswa ka Izrayeli.”+ 32 Johani i kustumunyile kambe, aku: “Ndzi wonile a moya na wu relela hi le tilweni na wu ku khwatsi cipomba wu ta tshama hehla kakwe.+ 33 Hambu mina ndzi wa nga mu tivi, kanilezvi Loyi a ndzi rumileko ku ta bhabhatisa hi mati i te ngalo ka mina: ‘Loyi u to wona moya na wu relela wu ta tshama kakwe,+ hi yena a bhabhatisako hi moya wo basa.’+ 34 Ndzi zvi wonile, niku ndza kustumunya lezvaku loyi i N’wana wa Nungungulu.”+

35 Hi mandziko wa kona kambe, Johani i wa yimile zvin’we ni vambiri va vapizani vakwe. 36 Laha a nga wona Jesu na a famba, i te ngalo: “Hi nga wonani a Yivhana+ ya Nungungulu!” 37 A cikhati leci a vapizani lava va vambiri va nga muzwa na a wula lezvo, va no landzela Jesu. 38 Laha Jesu a nga hundzuluka a va wona na va mu landzela, i te ngalo kabye: “Mu lava yini?” Vaku kakwe: “Rabi (lezvi loku zvi hundzuluselwa zvi wulako ku: “Mugondzisi”), u tshama kwihi?” 39 Yena aku kabye: “Tanani mu ta ku wona.” Hikwalaho, va no famba va ya wona laha a nga tshama kona, va tshama naye ka siku lego; zvi wa hi kwalomu ka hora ya wu 10.* 40 Andrewu,+ a makabye wa Simoni Pedro, ive mun’we wa lava va vambiri va ngazwa lezvi Johani a nga wula, va landzela Jesu. 41 A kusangula i no kuma makabye wakwe Simoni, aku kakwe: “Hi mu kumile Mesiya”+ (lezvi loku zvi hundzuluselwa zvi wulako ku: “Kristu”); 42 i no famba naye ka Jesu. Jesu i no mu cuwuka, aku ngalo: “Hi wena Simoni,+ a n’wana wa Johani; u ta vitaniwa ku hi wena Khefasi” (lezvi loku zvi hundzuluselwa, zvi wulako ku: “Pedro”).+

43 Ka siku gi nga landzela, Jesu na a lava kuya Galileya, i no kuma Filipu,+ aku kakwe: “Maha mulandzeli wa mina.” 44 Filipu i wa hi wa le Bhetsayidha, dhoropeni ga Andrewu na Pedro. 45 Filipu i no kuma Nataneli,+ aku kakwe: “Hi mu kumile loyi Mosi a nga tsala xungetano hi yena Nayweni, loyi a Vaphrofeti va nga tsalawu ha yena, ku nga Jesu, a n’wana wa Josefa+ wa le Nazareta.” 46 Kanilezvi Nataneli i te ngalo kakwe: “Ku nga huma cilo ca cinene hi Nazareta?” Filipu aku kakwe: “Tana u ta zvi wona.” 47 Jesu i no wona Nataneli na ata kakwe, aku ngalo: “Hi nga wonani a muIzrayeli wa lisine a nga hiko na kukanganyisa!”+ 48 Nataneli aku kakwe: “U ndzi tivisa kuyini?” Jesu i no mu hlamula, aku: “Na u nga se vitaniwa hi Filipu, ndzi ku wonile na u hi lahasi ka nkuwu.” 49 Nataneli aku: “Rabi, wena u N’wana wa Nungungulu, u Hosi ya Izrayeli.”+ 50 Jesu aku kakwe: “U kholwa hi lezvi ndzi nga ku byela ku ndzi ku wonile na u hi lahasi ka nkuwu? U ta wona zvilo zva hombe zvo hundza lezvi.” 51 I no engeta, aku kakwe: “Vavanuna, ndza tiyisisa ka n’wina, ndziku: Mu ta wona tilo na gi vhululekile ni tingilozi ta Nungungulu na ti kandziha ni ku relela tita ka N’wana wa munhu.”+