Jeremiya

36 Hi lembe ga wumune ga Jehoyakimu,+ a n’wana wa Josiya, a hosi ya Judha, a mhaka ya Jehovha yi nota ka Jeremiya, yi taku: 2 “Teka bhuku go songiwa u tsala timhaka tontlhe leti ndzi ku byelileko xungetano hi Izrayeli, na Judha,+ ni wontlhe matiko,+ kusukela siku go sangula legi ndzi wulawulileko na wena masikwini ya Josiya kala nyamutlha.+ 3 Kuzvilava a cikhati leci lava va yindlu ya ka Judha va tozwa a khombo gontlhe legi ndzi lavako ku va nehela va ta hundzuluka tindleleni tabye ta kubiha kasi ndzi va tsetselela a cigoho cabye ni ciwonho cabye.”+

4 Jeremiya i no vitana Bharuke,+ a n’wana wa Neriya, a ta mu dhitara a timhaka tontlhe leti Jehovha a nga mu byelile. Bharuke i no ti tsala lomu bhukwini go songiwa.+ 5 Jeremiya i no byela Bharuke, aku: “Ndza betelwa ku nghena ndlwini ya Jehovha. 6 Hikwalaho, hi wena u to nghena u lera hi gezu ga hombe a timhaka ta Jehovha leti ti nga lomu bhukwini, leti ndzi nga ku dhitara u tsala. Ti lere ti zwiwa hi vanhu ndlwini ya Jehovha hi siku ga kupfhunga.* U ta ti lera ti zwiwa hi vanhu vontlhe va ka Judha va tako hi madhoropeni yabye. 7 Kuzvilava Jehovha i tazwa a cikombelo cabye ca ku lava ku mahelwa wuxinji, a mun’we ni mun’wani a hundzuluka tindleleni takwe ta kubiha, hakuva a zanga ya Jehovha ni khulo legi a gi wulileko xungetano hi vanhu lava ga hombe.”

8 Hikwalaho, Bharuke, a n’wana wa Neriya, i no maha zvontlhe lezvi muphrofeti Jeremiya a nga mu ruma. I no lera hi gezu ga hombe a bhuku ga timhaka ta Jehovha lomu ndlwini ya Jehovha.+

9 Makunu hi lembe ga wutlhanu ga Jehoyakimu,+ a n’wana wa Josiya, a hosi ya Judha, hi hweti ya wu 9, vontlhe a vanhu va Jerusalema ni vontlhe a vanhu va nga tile Jerusalema hi madhoropeni ya Judha va no huwelela kupfhunga* mahlweni ka Jehovha.+ 10 Bharuke i no lera hi gezu ga hombe a timhaka ta Jeremiya bhukwini go songiwa. I no lera lomu ndlwini ya Jehovha, saleni* ya Gemariya,+ a n’wana wa Xafani,+ a mukopiyi,* tsendzeleni* wa le hehla, kusuhani ni nyangwa yiswa ya yindlu ya Jehovha,+ mahlweni ka vanhu vontlhe.

11 Laha Mikaya, a n’wana wa Gemariya, a n’wana wa Xafani, a ngazwa a timhaka tontlhe ta Jehovha leti ti nga hi lomu bhukwini go songiwa, 12 i no relela ndlwini* ya hosi, saleni ya matsalani. Tontlhe a tihosana* ti wa tshamile lomo: Elixama,+ a matsalani, na Dhelaya, a n’wana wa Xemaya, na Elnatani,+ a n’wana wa Akbhori,+ na Gemariya, a n’wana wa Xafani, na Zedhekiya, a n’wana wa Hananiya, ni tontlhe a tihosana leti tin’wani. 13 Mikaya i no va byela a timhaka tontlhe leti a ti zwileko a cikhati leci Bharuke a nga lera bhuku tindleveni ta vanhu.

14 A tihosana tontlhe ti no rumela Jehudhi, a n’wana wa Netaniya, a n’wana wa Xelemiya, a n’wana wa Kuxi, ka Bharuke, a yaku: “Ngone ni bhuku legi u lerileko gi zwiwa hi vanhu.” Bharuke, a n’wana wa Neriya, i no teka bhuku a famba nago kabye. 15 Va no mu byela lezvi: “Tshama u hi lerela hi gezu ga hombe.” Hikwalaho, Bharuke i no va lerela.

16 Zvalezvi va ngazwa a timhaka tontlhe, va no cuwukana na va chava, va byela Bharuke, vaku: “Hi fanele ku byela hosi a timhaka tontlhe leti.” 17 Va no wutisa Bharuke, vaku: “Hi nga hi byela, u ti tsalisile kuyini a timhaka tontlhe leti? Hi yena a nga ku dhitara ke?” 18 Bharuke i no va hlamula, aku: “Hi yena a nga ndzi dhitara a timhaka tontlhe leti, mina ndzi ti tsala hi tinta lomu bhukwini legi.” 19 A tihosana ti no byela Bharuke, tiku: “Famba u ya fihlala, wena na Jeremiya, mu nga byeli munhu laha mu tova kona.”+

20 Andzhako ka lezvo, va noya ka hosi le tsendzeleni, va ya veka bhuku lomu saleni ya Elixama, a matsalani, va byela hosi zvontlhe lezvi va nga zvi zwile.

21 Hikwalaho, a hosi yi no ruma Jehudhi+ a ya teka bhuku saleni ya Elixama, a matsalani, a wuya nago. Jehudhi i no sangula ku gi lera na zvi zwiwa hi hosi ni tontlhe a tihosana leti ti nga yimile tlhelweni ga hosi. 22 A hosi yi wa tshamile lomu ndlwini ya nguva ya cirami, hi hweti ya wu 9,* na ku hi ni ndzilo wu nga vhura laha khumbarini mahlweni ka yona. 23 Loku Jehudhi a mbheta ku lera a tindzima tinharu kutani mune, a hosi yi wo tsema cipandze leco hi mukwana wa matsalani yi ci hoxela ndzilweni lowu wu nga vhura laha khumbarini kala a bhuku gontlhe gi mbhela laha ndzilweni. 24 A hosi ni wontlhe a malandza ya yona, lawa ma ngazwa a timhaka leti tontlhe, a va chavangi ne a va handzulangi a tinguwo tabye. 25 Hambu lezvi Elnatani,+ na Dhelaya,+ na Gemariya+ va nga khongotela hosi lezvaku yi nga hisi bhuku, a hosi a yi va ingisangi. 26 Ahandle ka lezvo, a hosi yi no ruma Jerameeli, a n’wana wa hosi; na Seraya, a n’wana wa Azriyeli; na Xelemiya, a n’wana wa Abdheyeli kasi va ya khoma Bharuke, a matsalani, na muphrofeti Jeremiya. Kanilezvi Jehovha i no va fihla.+

27 A mhaka ya Jehovha yi nota kambe ka+ Jeremiya andzhako ka loku a hosi yi hisile a bhuku legi gi nga hi ni timhaka leti Jeremiya a nga dhitarile Bharuke a ti tsala, yi taku: 28 “Teka gin’wani bhuku u tsala a timhaka tontlhe leti ti nga hi lomu bhukwini go sangula, legi Jehoyakimu, a hosi ya Judha, a nga gi hisa.+ 29 U ta byela Jehoyakimu, a hosi ya Judha, uku: ‘Jehovha i ngalo: “Wena u hisile a bhuku, uku: ‘Hikuyini u tsalileko ku: “A hosi ya Bhabhuloni yi tata yi ta lovisa tiko legi yi gi swiyela ku nga sali munhu ne ni cihari” ke?’+ 30 Hikwalaho, Jehovha i wula lezvi hi Jehoyakimu, a hosi ya Judha: ‘A nga tava ni munhu wa ku tshama citshan’wini ca wuhosi ca Dhavhidha.+ A cirumbi cakwe ci ta tsikiwa lahandle ciswa hi mumu ni hlikanhi ci tlhela ci biwa hi civera ni wusiku.+ 31 Ndzi ta mu tsayisa, yena, ni pswalo* wakwe, ni malandza yakwe hi kota ya cigoho cabye. Ndzi ta neha hehla kabye, ni ka vahanyi va Jerusalema, ni ka vanhu va ka Judha gontlhe a khombo legi ndzi gi wulileko hi vona+ kanilezvi va nga ingisi.’”’”+

32 Jeremiya i no teka gin’wani bhuku a nyika Bharuke, a n’wana wa Neriya, a matsalani.+ Bharuke i no tsala a timhaka tontlhe leti a nga dhitariwa hi Jeremiya leti ti nga hi lomu bhukwini legi Jehoyakimu, a hosi ya Judha, a gi hisileko ndzilweni.+ Ku no tlhela ku engetelwa a timhaka tin’wani to tala to fana ni leto.