Jeremiya

44 Leyi i mhaka yi tileko ka Jeremiya kasi a byela vaJudha vontlhe va nga hanya tikweni ga Gibhite,+ ni lava va nga hanya Migdhole,+ ni le Tahpanesi,+ ni le Nofe,*+ ni tikweni ga Patrosi,+ yi taku: 2 “Jehovha wa mabutho, a Nungungulu wa Izrayeli, i ngalo: ‘Mu gi wonile a khombo gontlhe legi ndzi gi nehileko hehla ka Jerusalema+ ni ka madhoropa wontlhe ya Judha, niku nyamutlha marumbi, a ka ha tshami munhu.+ 3 Lezvo zvi mahekile hi kota ya zvilo zva kubiha lezvi va zvi mahileko kasi va ndzi zangarisa, hi ku famba va maha miphahlo+ ni ku tirela van’wani vanungungulu va nga kala va nga va tivi, ne n’wina hambu vakokwani va n’wina.+ 4 Ndzi no simama ku mu rumelela wontlhe a malandza ya mina, a vaphrofeti, ndzi ma rumela hi kuphindaphinda,* ndziku: “Mu nga mahi a zvilo lezvi zvo nyenyeza, lezvi ndzi zvi vengako.”+ 5 Kanilezvi a va ingisangi kutani ku demba ndleve yabye kasi va hundzuluka kubiheni kabye va nga ha mahi miphahlo ka van’wani vanungungulu.+ 6 Hikwalaho, a khulo ga mina ni zanga ya mina zvi no chululiwa zvi vhura madhoropeni ya Judha ni maruweni ya Jerusalema, ma maha rumbi ni ciwula a ku khwatsi hi lezvi ma nga tshamisa zvona nyamutlha.’+

7 “Makunu Jehovha, a Nungungulu wa mabutho, a Nungungulu wa Izrayeli, i ngalo: ‘Hikuyini mu ti nehelako a khombo ga hombe ha n’wece,* laha ka ku a vavanuna vontlhe, ni vavasati, ni zvivanana, ni tinyamani* va lova cikari ka Judha, ku nga sali munhu ni mun’we ke? 8 Mu wa ta ndzi zangarisela yini hi mitiro ya mandla ya n’wina hi ku maha miphahlo ka van’wani vanungungulu tikweni ga Gibhite lomu mu tileko mu ta hanya kona ke? Mu ta lova muva ciruko mu tlhela mu chepetiwa cikari ka matiko wontlhe ya misava.+ 9 Kasi mu no yi rivala a mitiro ya kubiha ya vakokwani va n’wina, ni mitiro ya kubiha ya tihosi ta ka Judha,+ ni mitiro ya kubiha ya vasati vabye,+ zvin’we ni mitiro ya kubiha ya n’wina wutsumbu, ni mitiro ya kubiha ya vasati va n’wina+ leyi yi mahilweko tikweni ga ka Judha ni lomu maruweni ya Jerusalema ke? 10 Kala nyamutlha a va ti koramisangi* ne hambu ku chava+ kutani ku famba hi nayo wa mina ni zvileletelo zva mina lezvi ndzi zvi vekileko mahlweni ka n’wina ni ka vakokwani va n’wina.’+

11 “Hikwalaho, Jehovha wa mabutho, a Nungungulu wa Izrayeli, i ngalo: ‘Ndzi bohile ku mu nehela khombo kasi ku lovisa a tiko gontlhe ga Judha. 12 Mina ndzi ta khoma a misalela ya Judha, leyi yi nga maha a cikanikani yiya tikweni ga Gibhite yi ya hanya kona, niku yontlhe yi ta lova tikweni ga Gibhite.+ Va ta wisiwa hi cipadha, va lova hi ndlala; kusukela ka loyi wa mutsongwani kala ka loyi wahombe, va ta dawa hi cipadha ni ndlala. Va tava ciruko ni nchumu wo tshisa; va ta chepetiwa va rukatelwa.+ 13 Ndzi ta tsayisa lava va hanyako tikweni ga Gibhite a ku khwatsi hi lezvi ndzi nga tsayisa Jerusalema hi cipadha, ni ndlala, ni ntungu.*+ 14 A misalela ya Judha leyi yi nga famba yi ya hanya tikweni ga Gibhite yi nga ta huluka kutani ku pona kasi yi wuya tikweni ga Judha. Va ta navela ku wuya kasi va ta hanya kona kanilezvi va nga ta wuya. Va tsongwani basi va to pona.’”

15 A vavanuna vontlhe lava va nga zvi tiva lezvaku a vasati vabye va mahile miphahlo ka vanungungulu van’wani, ni vasati vontlhe lava va nga yimile laho va maha ntlawa wa hombe, ni vanhu vontlhe va nga hanya tikweni ga Gibhite+ ni Patrosi,+ va no hlamula Jeremiya, vaku: 16 “Hi nga ta ingisa a mhaka leyi u hi byelileko hi vito ga Jehovha. 17 Kanilezvi, hina hi ta maha zvontlhe lezvi hi wulileko hi minomu ya hina, hi maha miphahlo ka Muzindza wa Tilo* ni ku mu chululela a minyikelo ya zvakunwa+ a ku khwatsi hi lezvi hina, ni vakokwani va hina, ni tihosi ta hina, ni tihosana ta hina hi mahileko madhoropeni ya Judha ni lomu maruweni ya Jerusalema a cikhati leci hi nga haga hi xura zvi hi fambela khwatsi, hi nga woni khombo ni gin’we. 18 Kanilezvi cima hi nyima ku mu mahela miphahlo a Muzindza wa Tilo* ni ku mu chululela minyikelo ya zvakunwa, hi vhumala zvontlhe niku ha lova hi cipadha ni ndlala.”

19 A vavasati va no engeta, vaku: “Kona a cikhati leci hi nga mu mahela miphahlo a Muzindza wa Tilo* ni ku mu chululela a minyikelo ya zvakunwa a hi no vhumelelwa hi vanuna va hina a ku maha tibholu* ta miphahlo ta cifananiso cakwe ni ku mu chululela a minyikelo ya zvakunwa ke?”

20 Jeremiya i no byela vanhu vontlhe, a vavanuna ni vasati vabye, ni vanhu vontlhe lava va nga wulawula naye, aku: 21 “A miphahlo leyi n’wina, ni vakokwani va n’wina, ni tihosi ta n’wina, ni tihosana ta n’wina, ni vanhu va tiko mu yi mahileko madhoropeni ya Judha ni maruweni ya Jerusalema,+ Jehovha i yi alakanyile yi wuya mbilwini yakwe! 22 Jehovha a nga ha zvi kotangi ku timisela a mitiro ya n’wina ya kubiha ni zvilo zvo nyenyeza lezvi mu nga kari mu maha. Hikwalaho, a tiko ga n’wina gi nova ciwula, ni nchumu wo tshisa ni ciruko gi nga ha tshami munhu, kota lezvi mu zvi wonako nyamutlha.+ 23 Kota lezvi mu nga maha miphahlo leyi, ni lezvi mu wonheleko Jehovha hi ku nga ingisi a gezu ga Jehovha, mu nga landzi a nayo wakwe ni zvileletelo zvakwe ni zvikhumbuxeto zvakwe, mu welwe hi khombo legi kota lezvi mu zvi wonako nyamutlha.”+

24 Jeremiya i no engeta a byela vanhu vontlhe ni vavasati vontlhe, aku: “Zwanani a mhaka ya Jehovha, n’wentlhe n’wina vanhu va ka Judha mu nga tikweni ga Gibhite. 25 Jehovha wa mabutho, a Nungungulu wa Izrayeli, i ngalo: ‘Lezvi n’wina ni vasati va n’wina mu nga zvi wula hi minomu ya n’wina, mu zvi tatisile hi mandla ya n’wina, hakuva mu te ngalo: “Kunene hi ta tatisa a zvifungo zva hina zva ku mu mahela a miphahlo a Muzindza wa Tilo* ni ku mu chululela a minyikelo ya zvakunwa.”+ Hakunene n’wina vavasati mu ta tatisa a zvifungo zva n’wina mu maha lezvi mu nga tsumbisa.’

26 “Hikwalaho, zwanani mhaka ya Jehovha, n’wina n’wentlhe va ka Judha mu hanyako tikweni ga Gibhite: ‘“Ndza hlambanya hi vito ga mina ga hombe”, ku wula Jehovha, “lezvaku a ku na munhu wa ka Judha+ tikweni gontlhe ga Gibhite a ha to hlambanya hi vito ga mina, aku: ‘Ndza hlambanya hi Jehovha a hanyako, a Hosi ya Hombe!’+ 27 Makunu ndza va cuwukela kasi ku va nehela khombo, na ku nga hi zvilo zva zvinene.+ Vontlhe a vanhu va ka Judha va nga tikweni ga Gibhite va ta lova hi cipadha ni ndlala kala va mbhela va ku bhi.+ 28 Va tsongwani basi va to pona cipadha va huma tikweni ga Gibhite va tlhela tikweni ga Judha.+ Makunu a misalela yontlhe ya Judha leyi yi tileko ku ta hanya tikweni ga Gibhite yi ta zvi tiva lezvaku i gezu ga mani gi nga tatiseka: Hi legi ga mina kutani hi legi gabye ke!”’”

29 “‘A cikombiso ndzi mu nyikako hi leci’, ku wula Jehovha, ‘ca lezvaku ndzi ta mu tsayisa wutshan’wini legi kasi mu zvi tiva lezvaku a citsumbiso ca mina ca ku mu nehela khombo ci ta tatiseka. 30 Jehovha i ngalo: “Ndzi ta nyikela Faro Hofra, a hosi ya Gibhite, canjeni ga valala vakwe ni lava va hlotako a wutomi* gakwe, a ku fana ni lezvi ndzi nga nyikela Zedhekiya, a hosi ya Judha, canjeni ga Nebhukadnezare,* a hosi ya Bhabhuloni, loyi a nga hi nala wakwe, a nga hlota a wutomi* gakwe.”’”+