Ezekiyeli

8 Hi lembe ga wu 6, ka hweti ya wu 6, hi siku ga wutlhanu ga hweti, laha ndzi nga tshamile lomu ndlwini ya mina, a madhota ya ka Judha na ma tshamile mahlweni ka mina, a canja ga Jehovha, a Hosi ya Hombe, gi nota hehla ka mina. 2 Laha ndzi nga kari ndzi cuwuka, ndzi no wona ciwumbeko ca munhu ci nga wonekisa ku khwatsi i ndzilo; a kusukela ka leci ci nga wonekisa ku khwatsi ciwunu ca cona+ zviya hasi ku wa hi ni ndzilo niku a kusukela ciwunwini ca cona zviya hehla ci wa hi co phatima, a ku khwatsi i simbi yo phatima.*+ 3 Makunu i no nawuluta leci ci nga wonekisa ku khwatsi i canja a ndzi khoma hi misisi, ni moya wu no ndzi tlakula ndziva laha cikari ka misava ni matilo, wu famba na mina Jerusalema hi miwoniso ya Nungungulu kala nyangweni ya lomu ndzeni+ yi cuwukileko n’walungu* laha ku nga hi ni cifananiso ca ciluse ci vhuxako ciluse.+ 4 Kwalaho, ndzi no wona a kungangamela ka Nungungulu wa Izrayeli+ ka ku fana ni loku ndzi nga ku wonile le nkoveni.+

5 Andzhako ka lezvo, i te ngalo ka mina: “N’wana wa munhu, ndzi kombela ku u tlakusa matihlo ya wena u cuwuka n’walungu.” Hikwalaho, ndzi no tlakusa matihlo ndzi cuwuka n’walungu ndzi wona a cifananiso leco ca ciluse hi tlhelo ga n’walungu ga nyangwa ya alati. 6 Aku ka mina: “N’wana wa munhu, wa zvi wona a zvilo lezvi zvo nyenyeza ni zva manyala lezvi a yindlu ya ka Izrayeli yi zvi mahako laha,+ a zvilo lezvi zvi ndzi mahako ndziva kule ni wutshamu ga mina go basa ke?+ Kanilezvi wa ha ta wona a zvilo zvo nyenyeza zva kutshisa nguvhu a ku hundza lezvi.”

7 Andzhako ka lezvo, i no ndzi yisa laha nyangweni ya tsendzele.* Laha ndzi nga cuwuka, ndzi no wona a vanga laha khurisini. 8 I te ngalo ka mina: “N’wana wa munhu, ndzi kombela ku u bhoxa khurisi.” Ndzi no bhoxa khurisi ndzi wona nyangwa. 9 I te ngalo ka mina: “Nghena u wona zvilo zva kubiha ni zvo nyenyeza lezvi va mahako laha.” 10 Hikwalaho, ndzi no nghena ndzi cuwuka, ndzi wona a tixaka tontlhe ta zvifananiso zva zvikokakoka* ni zva zvihari zvo nyenyeza+ ni zvifananiso zvontlhe zva manyala* zva yindlu ya ka Izrayeli;+ zvi wa kehlilwe laha khurisini matlhelweni wontlhe. 11 Mahlweni ka zvona, ku wa yimile a 70 wa madhota ya yindlu ya ka Izrayeli zvin’we na Jaazaniya, a n’wana wa Xafani.+ A mun’we ni mun’wani wabye i wa hi ni cibya cakwe ca ku hisela ka cona libani canjeni gakwe, ni musi wo nuhela wa libani wu wa tuvika wuya hehla.+ 12 I te ngalo ka mina: “N’wana wa munhu, wa zvi wona lezvi a madhota ya yindlu ya ka Izrayeli ma mahako lomu munyameni, a mun’we ni mun’wani tikwartwini leti a zvifananiso zvakwe zvi kombiswako ka tona ke? Hakuva ve ngalo: ‘Jehovha a nga hi woni. Jehovha i tsikile tiko.’”+

13 I no engeta, aku ka mina: “Wa ha ta wona a zvilo zvo nyenyeza va mahako zva kutshisa nguvhu a ku hundza lezvi.” 14 Hikwalaho, i no ndzi yisa nyangweni ya tlhelo ga n’walungu ya yindlu ya Jehovha. Kwalaho, ndzi no wona vavasati na va tshamile va rilela nungungulu Tamuza.

15 I no engeta, aku ka mina: “N’wana wa munhu, wa zvi wona lezvi ke? Wa ha ta wona a zvilo zvo nyenyeza, zva kutshisa nguvhu a ku hundza lezvi.”+ 16 Hikwalaho, i no ndzi nghenisa lomu tsendzeleni wa lomu cikari wa yindlu ya Jehovha.+ Makunu laha nyangweni ya tempeli ya Jehovha, cikari ka ligumbagumba ni alati, ku wa hi ni 25 wa vavanuna va nga fularele a tempeli ya Jehovha, a tinghohe tabye na ti cuwukile mutsuwuka-gambo; va wa kari va khizamela gambo hi tlhelo ga mutsuwuka-gambo.+

17 I te ngalo ka mina: “N’wana wa munhu, wa zvi wona lezvi ke? Xana cilo citsongwani ka yindlu ya ka Judha a ku maha zvilo lezvi zvo nyenyeza, va tata tiko hi tihanyi+ ni ku simama ku ndzi khunguvanyisa ke? Hi lava, va nawuluta dhavi* gita nhovhini ya mina. 18 Hikwalaho, ndzi ta va zangarela. A tihlo ga mina gi nga ta va tsetsa ne ndzi nga ta va zwela wusiwana.+ Hambu loku va rila hi gezu ga hombe tindleveni ta mina, ndzi nga ta vazwa.”+