Ezekiyeli

45 “‘A cikhati leci mu to avelela a tiko kota tshomba,+ nyikelani a cipandze co basa ca tiko kota munyikelo ka Jehovha.+ A kuleha ka cona ku wave 25 000 wa mikono,* ni kuanama ka cona ku wave 10 000 wa mikono.+ A wutshamu lego gontlhe gi tava cipandze co basa. 2 Cikari ka wutshamu lego, ku tava ni cipandzana ca kwadradho ca 500 wa mikono a kuleha ni 500 wa mikono a kuanama;+ a cipandzana leco ci ta rendzelekelwa hi wutshamu ga 50 wa mikono a kuanama matlhelweni wontlhe kasi giva wuriselo.+ 3 Ka wutshamu lego, pima cipandze ca 25 000 wa mikono a kuleha, ni 10 000 wa mikono a kuanama niku ndzeni ka cona ku tava ni wutshamu go basa, gi nga nchumu wo basabasa. 4 Gi tava cipandze co basa ca tiko ca vapristi,+ a malandza ya wutshamu go basa, lava va tshinelako kasi ku tirela Jehovha.+ Gi tava wutshamu ga tiyindlu tabye, ni wutshamu go basa ga tempeli.

5 “‘Ku tava ni cipandze ca 25 000 wa mikono a kuleha, ni 10 000 wa mikono a kuanama+ ci to lumba a vaLevhi, va nga malandza ya tempeli. Va tava ni 20 wa tisala to gela ka tona+ kota tshomba.

6 “‘Mu fanele ku tsema a cipandze ca 25 000 wa mikono a kuleha kota tshomba ya dhoropa (ci ringanako ni munyikelo wo basa hi kuleha) ni 5000 wa mikono a kuanama.+ Ci tava ca yindlu yontlhe ya ka Izrayeli.

7 “‘Ku tava ni wutshamu ga hosana ka matlhelo mambiri ya munyikelo wo basa ni ya cipandze leci ci tsemelweko dhoropa. Gi tava kusuhani ni munyikelo wo basa ni tshomba ya dhoropa. Gi tava tlhelweni ga mupela-gambo ni tlhelweni ga mutsuwuka-gambo. A kuleha ka gona, kusukela mbhinganweni wa mupela-gambo kala mbhinganweni wa mutsuwuka-gambo, ku ta ringana ni cipandze ca lin’we la tixaka.+ 8 A cipandze leci ci tava tshomba ya yona lomu Izrayeli. A tihosana ta mina ti nga ta ha va xanisa kambe a vanhu va mina;+ ti ta nyikela a cipandze leci ci seleko ca tiko ka yindlu ya ka Izrayeli hi kuya hi tixaka tabye.’+

9 “Jehovha, a Hosi ya Hombe, i ngalo: ‘Mu hundzeletile, n’wina tihosana ta ka Izrayeli!’

“‘Tsikani a tihanyi ta n’wina ni kuxanisa ka n’wina, mu hanya hi nongameto mu tlhela mu maha kululama.+ Nyimani ku wutla zvipandze zva vanhu va mina’,+ ku wula Jehovha, a Hosi ya Hombe. 10 ‘Tirisani a zvikalo zvo tsumbeka, ni efa* yo tsumbeka, ni bhatu* go tsumbeka.+ 11 Ku fanele kuva ni lipimo li nga ciciko la efa ni la bhatu. A bhatu gi fanele kuya a cipandze ca wukhume ca homeri,* ni efa yi fanele kuya cipandze ca wukhume ca homeri. A homeri yi tava yona lipimo la kona. 12 A xekeli*+ gi tava 20 wa magera.* A kupatsa 20 wa maxekeli, ni 25 wa maxekeli, ni 15 wa maxekeli yi tava mane* yin’we ka n’wina.’

13 “‘A munyikelo lowu mu to humesa hi lowu: cipandze ca wu 6 ca efa ka homeri yin’we ni yin’wani ya trigo, ni cipandze ca wu 6 ca efa ka homeri yin’we ni yin’wani ya sevhadha. 14 A mpimo wa mafura ma nyikelwako wu ta pimiwa hi bhatu. A bhatu cipandze ca wukhume ca kore,* ni 10 wa mabhatu i homeri, hakuva a 10 wa mabhatu ma ringana homeri. 15 Nyikelani yivhu yin’we ka ntlawa wun’we ni wun’wani wa 200 wa tiyivhu ta ntlhambi wa Izrayeli. Zvi tava zva munyikelo wa tindzhoho,+ ni munyikelo wa kuhiswa wa murumba,+ ni miphahlo ya kuhlengela,+ kasi ku mahela vanhu a muphahlo wa ku kombela ku tsetselelwa zviwonho’,+ ku wula Jehovha, a Hosi ya Hombe.

16 “‘A vanhu vontlhe va tiko va ta humesela a hosana ya ka Izrayeli a munyikelo lowu.+ 17 Kanilezvi a hosana yi ta humesa a minyikelo ya kuhiswa ya mirumba,+ ni munyikelo wa tindzhoho,+ ni munyikelo wa zvakunwa cikhatini ca mibuzo,+ ni ca tihweti tiswa, ni ca masabhadho,+ ni ca mibuzo yontlhe yi yimisilweko ya yindlu ya ka Izrayeli.+ Hi yena a to humesa a munyikelo wa ciwonho, ni munyikelo wa tindzhoho, ni munyikelo wa kuhiswa wa murumba, ni miphahlo ya kuhlengela kasi ku yi mahela muphahlo wa ku kombela ku tsetselelwa zviwonho a yindlu ya ka Izrayeli.’

18 “Jehovha, a Hosi ya Hombe, i ngalo: ‘Ka hweti yo sangula, hi siku go sangula ga hweti, teka a cidhunana ca cinene ca homu ca lomu ntlhambini u basisa a wutshamu go basa ka ciwonho.+ 19 A mupristi i ta teka a nkhata wo kari wa munyikelo wa ciwonho a tota a aro ya tempeli,+ ni mune wa makhona ya citubhu ca alati, ni aro ya nyangwa ya tsendzele* wa lomu cikari. 20 U ta maha zvalezvo kambe hi siku ga wu 7 ga hweti, u mahela ni wihi a wonhako hi kuphazama kutani hi kungativi;+ u ta mahela tempeli a muphahlo wa ku kombela ku tsetselelwa zviwonho.+

21 “‘Ka hweti yo sangula, hi siku ga wu 14 ga hweti, mu ta maha mubuzo wa Phasika.+ Mu taga tipawa to kala comelo hi 7 wa masiku.+ 22 Ka siku lego, a hosana yi ta humesa cidhunana ca homu kota munyikelo wa ciwonho, wa yona wutsumbu ni wa vanhu vontlhe va tiko.+ 23 Ka 7 wa masiku ya mubuzo, ka siku gin’we ni gin’wani ga lawa ya 7, i ta humesa kota munyikelo wa kuhiswa wa murumba ka Jehovha a 7 wa zvidhunana zva zvinene zva tihomu, ni 7 wa tiyivhu ta tinene ta vamatsune,+ zvin’we ni mhongo yin’we hi siku, kota munyikelo wa ciwonho. 24 I ta humesa kambe kota munyikelo wa tindzhoho a efa yin’we ka cidhunana cin’we ni cin’wani ca homu, ni efa yin’we ka yivhu yin’we ni yin’wani ya matsune, zvin’we ni hini* ya mafura ka efa yin’we ni yin’wani.

25 “‘Ka hweti ya wu 7, hi siku ga wu 15 ga hweti, ka 7 wa masiku ya mubuzo,+ i fanele ku humesa a munyikelo walowu wa wun’we wa ciwonho, ni munyikelo wa kuhiswa wa murumba, ni munyikelo wa tindzhoho, ni mafura.’”