Mitsengo

27 Makunu ku no tshinela a vanhanyana va Zelofehadhe,+ a n’wana wa Heferi, a n’wana wa Gileyadhe, a n’wana wa Makira, a n’wana wa Manase, wa mingango ya va ka Manase, a n’wana wa Josefa. A mavito ya vanhanyana va Zelofehadhe ku wa hi Mahla, na Nowa, na Hogla, na Milka, na Tirza. 2 Va no ya yima mahlweni ka Mosi, ni ka mupristi Eleyazari, ni ka tihosana,+ ni ka hlengeletano yontlhe laha nyangweni ya tenda ga mutlhangano, vaku: 3 “A papayi wa hina i fele ciwuleni, kanilezvi i wa nga hi cikari ka ntlawa lowu wu boheneko wu vhukela Jehovha, a vaseketeli va Kora.+ Kanilezvi i file hi ciwonho ca yena n’winyi, na a nga hi na vana va vafana. 4 A vito ga papayi wa hina gi ta fuvela yini cikari ka lixaka lakwe hi lezvi a nga kala kuva ni n’wana wa mufana ke? Hi nyike tshomba cikari ka vamakabye va papayi wa hina.” 5 Hikwalaho, Mosi i no yisa a mhaka yabye ka Jehovha.+

6 Makunu Jehovha i no byela Mosi, aku: 7 “A vanhanyana va Zelofehadhe va wula zvona. Va nyike a cipandze kota tshomba yabye cikari ka vamakabye va papayi wabye, u va hundzisela a tshomba ya papayi wabye.+ 8 Byela a vaIzrayeli, uku: ‘Loku a wanuna afa na a nga hi na n’wana wa mufana, mu fanele ku hundzisa a tshomba yakwe yiya ka nhanyana wakwe. 9 Loku a nga hi na n’wana wa nhanyana, nyikelani a tshomba yakwe ka vamakabye vakwe va cinuna. 10 Loku a nga hi na vamakabye va cinuna, nyikelani a tshomba yakwe ka vamakabye va cinuna va papayi wakwe. 11 Loku ku hi lezvaku a papayi wakwe i wa nga hi na vamakabye va cinuna, nyikelani a tshomba yakwe ka xaka ga laha kusuhani ga laha lixakeni lakwe, yiva ya gona. A ciboho leci ca kulamula ci tava nayo ka vaIzrayeli, kota lezvi Jehovha a leleteleko Mosi.’”

12 Hi kulandzela, Jehovha i no byela Mosi, aku: “Kandziha citsunga leci ca Abharime,+ u wona a tiko legi ndzi to nyika vaIzrayeli.+ 13 Andzhako ka loku u gi wonile, wenawu u ta hlengeletwa ka vanhu va wena,*+ a ku khwatsi hi Aroni, a makabye wa wena,+ 14 hakuva laha a hlengeletano yi nga ndzi holovisa ciwuleni ca Zini, n’wina mu no hluwukela a cileletelo ca mina ca ku ndzi basisa mahlweni kabye mhakeni ya mati,+ a mati ya Meribha,+ le Kadhexe,+ ciwuleni ca Zini.”+

15 Makunu Mosi i no byela Jehovha, aku: 16 “Jehovha, a Nungungulu wa moya wa vanhu vontlhe,* i wa yimise a wanuna hehla ka hlengeletano 17 loyi a to huma ni ku nghena mahlweni kabye a tlhela a va rangela va huma ni ku nghena, kasi a hlengeletano ya Jehovha yi nga mahi ku khwatsi tiyivhu to kala murisi.” 18 Hikwalaho, Jehovha i no byela Mosi, aku: “Teka Joxuwa, a n’wana wa Nuni, a wanuna loyi a nga ni moya, u tlhateka canja ga wena hehla kakwe.+ 19 Hi kulandzela, mu yimise mahlweni ka mupristi Eleyazari ni mahlweni ka yontlhe a hlengeletano, u mu yimisa kota murangeli mahlweni kabye.+ 20 U ta mu nyika ntamu* wo kari wa wena+ kasi a hlengeletano yontlhe ya ka Izrayeli yi mu ingisa.+ 21 I ta yima mahlweni ka mupristi Eleyazari, loyi a to mu wutisela ka Jehovha, hi kulamula ka Urima.+ Va ta huma hi kulaya kakwe, va nghena hi kulaya kakwe, yena ni vontlhe a vaIzrayeli lava va nga na yena zvin’we ni yontlhe a hlengeletano.”

22 Hikwalaho, Mosi i no maha zvalezvi Jehovha a nga mu leletele. I no teka Joxuwa a mu yimisa mahlweni ka mupristi Eleyazari ni ka hlengeletano yontlhe. 23 I no mu tlhateka mandla, a mu yimisa kuva murangeli,+ kota lezvi Jehovha a nga wulile hi nomu wa Mosi.+