Kronekele wa wumbiri

33 Manase+ i wa hi ni 12 wa malembe a cikhati leci a nga maha hosi, niku i no fuma a 55 wa malembe Jerusalema.+

2 I no maha zvakubiha mahlweni ka Jehovha, a landzela a mitiro yo nyenyeza ya matiko lawa Jehovha a nga ma hlongolile mahlweni ka vaIzrayeli.+ 3 I no aketa a matshamu yo tlakuka lawa a papayi wakwe Hezekiya a nga ma khungumulele;+ i no yimisa maalati ya Bhaali, a maha a tisinya to basa* a tlhela a khizamela a butho gontlhe ga matilo, a gi tirela.+ 4 I no aka ni maalati lomu ndlwini ya Jehovha,+ leyi Jehovha a nga wulile xungetano hi yona, aku: “A vito ga mina gi ta tshama Jerusalema kala kupindzuka.”+ 5 I no gi akela maalati a butho gontlhe ga matilo lomu ka mitsendzele* yimbiri ya yindlu ya Jehovha.+ 6 I no hundzisa a vafana vakwe hi lomu ndzilweni+ Nkoveni wa N’wana wa Hinome,+ a maha masalamuso,+ a vhumba, a tirisa wuloyi a tlhela a yimisa a tin’anga ni vavhumbi.+ I no maha zvakubiha mahlweni ka Jehovha hi mpimo wa hombe nguvhu kasi a mu zangarisa.

7 I no maha a cifananiso ci kehlilweko a ci veka lomu ndlwini ya Nungungulu wa lisine,+ leyi Nungungulu a nga byelile Dhavhidha ni n’wana wakwe, Solomoni, xungetano hi yona, aku: “Lomu ka yindlu leyi ni Jerusalema, legi ndzi gi hlawulileko cikari ka tixaka tontlhe ta ka Izrayeli, ndzi ta veka kona a vito ga mina kala kupindzuka.+ 8 Ndzi nga ta ha tshuka ndzi susa mikondzo ya vaIzrayeli tikweni legi ndzi nyikileko a vakokwani vabye, ntsena lezvaku va fanele ku hlayisa zvontlhe lezvi ndzi va layileko, a Nayo wontlhe, ni milayo, ni zviboho zva kulamula lezvi ndzi va nyikileko hi ku tirisa Mosi.” 9 Manase i no simama ku hambukisa vaJudha ni vahanyi va Jerusalema, a va kucetela ku maha zvakubiha nguvhu a ku hundza a matiko lawa Jehovha a nga ma lovisile mahlweni ka vaIzrayeli.+

10 Jehovha i no simama ku wulawula na Manase ni vanhu vakwe, kanilezvi a va chelangi kota.+ 11 Hikwalaho, Jehovha i no va rumelela a varangeli va butho ga hosi ya Asiriya. Va no khoma Manase hi zviove va mu boha hi machini mambiri ya kobre va famba naye Bhabhuloni. 12 Kukaratekeni kakwe, i no khongotela Jehovha, a Nungungulu wakwe, lezvaku a mu mahela wuxinji; i no simama ku ti koramisa nguvhu mahlweni ka Nungungulu wa vakokwani vakwe. 13 Manase i no simama ku khongela ka Nungungulu; Nungungulu i no khumbiwa hi kukhongotela kakwe ni cikombelo cakwe ca ku lava ku mahelwa wuxinji, a se mu tlhelisa Jerusalema mufun’weni wakwe.+ Makunu i no zvi tiva lezvaku Jehovha i Nungungulu wa lisine.+

14 Andzhako ka lezvo, i no aka muro wa le handle wa Dhoropa ga Dhavhidha+ hi tlhelo ga mupela-gambo wa Gihoni+ le nkoveni kala Nyangweni ya Tinjhanjhi.+ I no simama ku aka muro wu rendzeleka dhoropa kala le Ofeli+ a tlhela a wu tlakusa nguvhu. Ahandle ka lezvo, i no yimisa a varangeli va butho madhoropeni wontlhe ya Judha ma vhikelweko khwatsi. 15 Hi kulandzela, i no suselela vanungungulu va man’wani matiko ni cifananiso lomu ndlwini ya Jehovha,+ ni maalati lawa a nga akile citsungeni ca yindlu ya Jehovha+ ni Jerusalema, a gumesa a laya lezvaku zvi hoxiwa le handle ka dhoropa. 16 I no tlhela a vhuxeta a alati ga Jehovha+ a sangula ku nyikela hehla ka gona a miphahlo ya kuhlengela+ ni miphahlo ya kubonga,+ a tlhela a byela vaJudha lezvaku va tirela Jehovha, a Nungungulu wa Izrayeli. 17 Hambulezvo, a vanhu va wa ha simama ku maha miphahlo lomu matshan’wini yo tlakuka, hambu lezvi va nga kari va mahela Jehovha yece, a Nungungulu wabye.

18 A man’wani matimu ya Manase, a mukhongelo wakwe ka Nungungulu wakwe, ni magezu ya vawoni lava va wulawulileko naye hi vito ga Jehovha, a Nungungulu wa Izrayeli, ma tsalilwe ka matimu ya tihosi ta ka Izrayeli. 19 Ahandle ka lezvo, a mukhongelo wakwe+ ni lezvi a kukhongotela kakwe ku nga hlamuliswa zvona, ni zviwonho zvakwe zvontlhe, ni kungatsumbeki kakwe,+ ni lomu a nga akile kona a matshamu yo tlakuka, ni lomu a nga yimisile kona a tisinya to basa+ ni zvifananiso zvi kehlilweko, na a nga se ti koramisa, zvi tsalilwe lomu ka magezu ya vawoni vakwe va miwoniso. 20 Hi kugumesa, Manase i no etlela a humula ni vakokwani vakwe; va no mu lahla mutini wakwe. Amoni, a n’wana wakwe, i no maha hosi cikhundleni cakwe.+

21 Amoni+ i wa hi ni 22 wa malembe a cikhati leci a nga maha hosi, niku i no fuma a malembe mambiri Jerusalema.+ 22 I no simama ku maha zvakubiha mahlweni ka Jehovha a ku khwatsi hi lezvi Manase, a papayi wakwe, a mahileko.+ Amoni i no maha miphahlo a mahela zvifananiso zvontlhe zvi kehlilweko lezvi zvi nga mahilwe hi Manase,+ a papayi wakwe, niku i no simama ku zvi tirela. 23 Kanilezvi a nga ti koramisangi mahlweni ka Jehovha+ a ku khwatsi hi lezvi Manase, a papayi wakwe, a nga ti koramisile;+ wutshan’wini ga lezvo, Amoni i no engetela nguvhu a nandzu wakwe. 24 Hi kugumesa, a malandza yakwe ma no mu xuxela cikungo,+ ma mu daya lomu ndlwini yakwe. 25 Kanilezvi a vanhu va lomu tikweni va no daya vontlhe lava va nga mu xuxela cikungo hosi Amoni,+ va yimisa Josiya,+ a n’wana wakwe, a kuva hosi cikhundleni cakwe.