Mitsengo

11 A vanhu va no sangula ku khala nguvhu mahlweni ka Jehovha. Laha Jehovha a nga zvizwa, a zanga yakwe yi no vhura; a ndzilo wu tako hi ka Jehovha wu no sangula ku vhura cikari kabye wu hisa vokari va nga hi lomu timbhirini ta wugovelo. 2 A cikhati leci a vanhu va nga sangula ku rila mahlweni ka Mosi, Mosi i no khongotela Jehovha,+ a ndzilo wu timeka. 3 Hikwalaho, a wutshamu lego gi no chuliwa ku Tabhera,* hakuva va no vhurelwa hi ndzilo wa kuta hi ka Jehovha.+

4 A citshungu ca vanhu va tixakaxaka,*+ leci ci nga hi cikari kabye, ci no kombisa a kunavela ka makangwa,+ ni vaIzrayeli vonawu va no sangula ku rila kambe, vaku: “Himani a to hi nyika nyama higa?+ 5 Hi na ni ndomba ya tinjhanjhi leti hi nga kari higa mahala le Gibhite, ni pepino, ni makhalavatla, ni sebhola ya matluka, ni sebhola, ni ayi!+ 6 Kanilezvi zvezvi ho* mbhela ntamu. A ku na cin’wani hi ci wonako ahandle ka mana lawa.”+

7 A mana+ ma wa fana ni tinyungi ta kowentro+ niku ma wa wonekisa ku khwatsi i hlakati ya bhedhelio. 8 A vanhu va wa hangalaka va ma rolela, va ma gaya hi zvigayo zva mandla kutani ku ma dula lomu churini. Andzhako ka lezvo, va wa ma bhika lomu ka mabhota kutani ku maha hi wona tipawa ta redhonda.+ Ma wa nandzihisa ku khwatsi i bholu yo mahiwa ni mafura. 9 A cikhati leci ku nga kari kuwa civera lomu wugovelweni ni wusiku, a mana wonawu ma wowa.+

10 Mosi i nozwa a vanhu va mingango yontlhe na va rila, a wanuna mun’we ni mun’wani na a hi laha nyangweni ya tenda gakwe. Jehovha i no zangara nguvhu,+ Mosi yenawu a swireka nguvhu. 11 Makunu Mosi i no wutisa Jehovha, aku: “Hikuyini u xanisako a nandza ga wena? Hikuyini ndzi nga kala ku kuma thomo mahlweni ka wena laha ka kuza u ndzi rwexa a ndzhwalo wa vanhu lava vontlhe ke?+ 12 Kasi kova mina ndzi nga xura nyimba ya vanhu lava vontlhe? Kona kova mina ndzi nga va pswala laha ka kuza uku: ‘Va beleke, a ku khwatsi hi lezvi a yayi* yi belekako a n’wanana a ha an’wako’, kala ka tiko legi u hlambanyileko ku nyika a vakokwani vabye ke?+ 13 Ndzi ta yi kuma kwihi a nyama ya ku nyika vanhu lava vontlhe ke? Hakuva va tshamela ku rila mahlweni ka mina, vaku: ‘Hi nyike nyama higa!’ 14 A ndzi zvi koti ku rwala vanhu lava vontlhe ndzoce; va bindza ku hundza ntamu wa mina.+ 15 Loku ku hi ku u ta ndzi khomisa lezvi, ndzi kombela ku u ndzi daya zvalezvi.+ Loku ndzi kumile thomo mahlweni ka wena, u nga ha ndzi tsiki ndzi wona a hlomulo kambe.”

16 Jehovha i no hlamula Mosi, aku: “Tsombanisa 70 wa vavanuna cikari ka madhota ya ka Izrayeli, a vavanuna lava u va tivako na va hi* madhota tlhelo tihosana ta vanhu,+ u famba navo tendeni ga mutlhangano, u ya yima navo laho. 17 Ndzi ta relela+ ndzi ta wulawula na wena laho.+ Ndzi ta pambula a moya wo kari+ lowu wu nga hehla ka wena ndzi wu chela hehla kabye. Va ta ku vhuna ku rwala a ndzhwalo wa vanhu lava kasi u nga rwali wece.+ 18 Byela vanhu, uku: ‘Ti basiseleni ga mandziko,+ hakuva hakunene mu taga nyama hi lezvi mu nga rila tindleveni ta Jehovha,+ muku: “Himani a to hi nyika nyama higa? Le Gibhite ku wa hi chukwana ka hina.”+ Hakunene Jehovha i ta mu nyika nyama muga.+ 19 Mu nga taga siku gin’we basi, ne masiku mambiri, ne ntlhanu wa masiku, ne 10 wa masiku, ne 20 wa masiku, 20 kanilezvi mu taga nyama a hweti yontlhe kala yi huma hi tinhovhu yi tlhela yi mu nyenyeza,+ hakuva mu alile Jehovha loyi a nga cikari ka n’wina, mu rila mahlweni kakwe, muku: “Hi wa humela yini hi Gibhite?”’”+

21 Hi kulandzela, Mosi i te: “A vanhu lava ndzi nga cikari kabye va ringana 600 000 wa vavanuna+ va yimileko hi minenge, hambulezvo u ngalo: ‘Ndzi ta va nyika nyama vaga hweti yontlhe’! 22 Hambu loku ku wo dawa a tiyivhu tontlhe ni tihomu tontlhe, xana ti wa ta va eneta ke? Kona hambu loku ku wo phasiwa a tinjhanjhi tontlhe ta bimbi, ti wa ta va eneta ke?”

23 Jehovha i no byela Mosi, aku: “A canja ga Jehovha gi no koma nguvhu ke?+ Makunu u ta zvi wona lezvaku lezvi ndzi wulako zvi ta maheka kutani zvi nga ta maheka.”

24 Hikwalaho, Mosi i no huma a ya byela vanhu a magezu ya Jehovha. I no tsombanisa a 70 wa vavanuna cikari ka madhota ya vanhu a ya va yimisa va randzela tenda.+ 25 Jehovha i no relela hi lomu ka refu+ a ta wulawula naye.+ I no pambula moya wo kari+ wu nga hi hehla ka Mosi a wu chela hehla ka dhota gin’we ni gin’wani ka lawa ya 70. Zvalezvi a moya wu nga nghena kabye, va no sangula ku mahisa ku khwatsi vaphrofeti*+ kanilezvi va no zvi maha siku galegiyani basi.

26 Ku wa ha sele a vavanuna vambiri lomu wugovelweni. A mavito yabye ku wa hi Eldhadhe na Medhadhe. A moya wu no nghena kabye kota lezvi va nga hi cikari ka lava a mavito yabye ma nga tsalilwe kanilezvi va wa nga se huma vaya tendeni. Hikwalaho, va no sangula ku mahisa ku khwatsi vaphrofeti lomu wugovelweni. 27 A jaha go kari gi no tsutsuma gi ya byela Mosi, giku: “Eldhadhe na Medhadhe vo mahisa ku khwatsi vaphrofeti lomu wugovelweni!” 28 Makunu Joxuwa,+ a n’wana wa Nuni, a muvhuneteli wa Mosi kusukela wusweni gakwe, i no hlamula, aku: “Mosi, hosi yanga, va betele!”+ 29 Kanilezvi Mosi i no mu hlamula, aku: “U lava ku lusa wena hi khati ga mina ke? Mayiwako loku a vanhu vontlhe va Jehovha va wa hi vaphrofeti ni loku Jehovha i wo chela a moya wakwe hehla kabye!” 30 Andzhako ka lezvo, Mosi i no tlhela wugovelweni zvin’we ni madhota ya ka Izrayeli.

31 Ku noba moya wa kuta hi ka Jehovha, wu sangula ku tisa tihwari hi le bimbini wu ta ti wisa ti randzela wugovelo;+ ka tlhelo gin’we, ti no fenengeta cipandze co ringana pfhuka wa siku niku ka tlhelo legi gin’wani konawu ti no fenengeta cipandze co ringana pfhuka wa siku, ti randzela a wugovelo gontlhe. Kusukela lahasi zviya hehla ti wa tlhatekelene cipimo ca mikono* yimbiri. 32 Hikwalaho, gontlhe siku lego, ni gontlhe a wusiku ga kona, ni gontlhe a siku legi gi nga landzela, a vanhu a va etlelangi hi ku rolela tihwari. I hava a nga rolela to kala ti nga tati a 10 wa tihomeri* niku va no simama ku anekela ti randzela wugovelo gontlhe. 33 Kanilezvi a nyama na ya ha hi lomu ka matino yabye, na yi nga se cakunyiwa, a zanga ya Jehovha yi no vhurela vanhu. Jehovha i noba vanhu hi ntungu wu dayako nguvhu.+

34 Hikwalaho, va no chula a wutshamu lego ku i Kibrot-Hatava,*+ hakuva ka wutshamu lego, va no lahla vanhu va kunavela ka makangwa.+ 35 A vanhu va no suka hi le Kibrot-Hatava vaya Hazerote. Va no tshama le Hazerote.+