Ezekiyeli

36 “Wena n’wana wa munhu, phrofetela a zvitsunga zva Izrayeli, uku: ‘N’wina zvitsunga zva Izrayeli, zwanani a mhaka ya Jehovha. 2 Jehovha, a Hosi ya Hombe, i ngalo: “A nala i ku hlekile, aku: ‘Aha! Hambu a zvitsunga zva kale zvi mahile a tshomba ya hina!’”’+

3 “Hikwalaho, phrofeta, uku: ‘Jehovha, a Hosi ya Hombe, i ngalo: “Kota lezvi va mu hahlulileko ni ku mu dhumela hi matlhelo wontlhe, kasi muva tshomba ya lava va ponileko cikari ka matiko, ni lezvi a vanhu va simamako ku wulawula hi n’wina ni ku mu hleva,+ 4 hikwalaho, n’wina zvitsunga zva Izrayeli, zwanani a mhaka ya Jehovha, a Hosi ya Hombe! Lezvi hi lezvi Jehovha, a Hosi ya Hombe, a wulako ka zvitsunga ni zvitsungana, ni ka micongo ni mikova, ni ka marumbi lawa ma hahlulilweko,+ ni ka madhoropa ma bhangulilweko, lawa ma phangilweko ni ku tseketselwa hi lava va ponileko va matiko ma nga matlhelweni ya zvona;+ 5 ka lezvi, Jehovha, a Hosi ya Hombe, i ngalo: ‘Ndzilweni wa kutitsitsirita ka mina,+ ndzi ta wulawula ndzi vhukela lava va ponileko va matiko ni Edhomi yentlhe, lava hi kutsaka ka hombe ni kuchepeta ka hombe+ va ti byelako ku a tiko ga mina i tshomba yabye, kasi ku teka wuriselo ga gona ni ku gi phanga.’”’+

6 “Hikwalaho, phrofeta xungetano hi tiko ga Izrayeli, u wula ka zvitsunga ni ka zvitsungana, ka micongo ni ka mikova, uku: ‘Jehovha, a Hosi ya Hombe, i ngalo: “Ndzi ta wulawula kupinyameni ka mina ni khulweni ga mina hi kota ya lezvi mu wisilweko tingana hi matiko.”’+

7 “Hikwalaho, Jehovha, a Hosi ya Hombe, i ngalo: ‘Ndza tlakusa a canja ga mina ndzi hlambanya lezvaku a matiko ya wuakelwani ma ta rwala tingana ta wona.+ 8 Kanilezvi, n’wina zvitsunga zva Izrayeli, mu ta pandza madhavi mu va pswalela mihandzu a vanhu va mina va ka Izrayeli,+ hakuva va ta wuya zvezvi. 9 Hakuva ndzi na n’wina, ndzi ta jikisa kupima ka mina kuya ka n’wina niku mu ta rimiwa mu byaliwa timbewu. 10 Ndzi ta andzisa a vanhu va wena — a yindlu yontlhe ya ka Izrayeli, yona yontlhe —, a madhoropa ma tava ni vaaki,+ ni marumbi ma ta aketwa.+ 11 Ina, ndzi ta andzisa a vanhu va wena ni zvifuyo zva wena;+ va ta andza va pswalelana. Ndzi ta maha lezvaku muva ni vaaki a ku fana ni kusanguleni,+ ndzi tlhela ndzi mu vhuvhumisa nguvhu a ku hundza kale;+ mu ta zvi tiva lezvaku hi mina Jehovha.+ 12 Ndzi ta maha lezvaku a vanhu — a vanhu va mina va ka Izrayeli — va famba hehla ka n’wina, niku va ta mu fumela.+ Mu tava tshomba yabye niku mu nga ta ha tshuka mu va maha va vhumala vana.’”+

13 “Jehovha, a Hosi ya Hombe, i ngalo: ‘Kota lezvi va ku byelako, vaku: “U tiko gi khadamulako vanhu ni ku maha matiko ya wena ma vhumala vana”’, 14 ‘hikwalaho, u nga ta ha khadamula vanhu kambe ne ku maha matiko ya wena ma vhumala vana’, ku wula Jehovha, a Hosi ya Hombe. 15 ‘Ndzi nga ta ha ku tsika u rukiwa kambe hi matiko ne ku ku rwalisa a zvipoyilo zva vanhu,+ ne u nga ta ha tshuka u khunguvanyisa matiko ya wena’, ku wula Jehovha, a Hosi ya Hombe.”

16 A mhaka ya Jehovha yi nota kambe ka mina, yi taku: 17 “N’wana wa munhu, a cikhati leci a yindlu ya ka Izrayeli yi nga hanya tikweni gabye, va gi nyenyezisile hi tindlela tabye ni mitiro yabye.+ Ka mina, a tindlela tabye ti wa ku khwatsi kungahlazveki ka wasati a nga lomu ka ku wona masiku.+ 18 Hikwalaho, ndzi no chulula khulo ga mina hehla kabye hi kota ya nkhata lowu va nga halatile tikweni+ ni hi kota ya lezvi va nga nyenyezisile tiko hi zvifananiso zvabye zva manyala.*+ 19 Hi cigelo leco, ndzi no va hangalasa cikari ka mifumo ndzi tlhela ndzi va xwanya cikari ka matiko.+ Ndzi no va lamula hi kuya hi ndlela yabye ni mitiro yabye. 20 Kanilezvi laha va nga chikela ka mifumo leyo, a vanhu va no nyenyezisa vito ga mina go basa+ hi ku wula lezvi xungetano hi vona: ‘Lava vanhu va Jehovha, kanilezvi va humile tikweni gakwe.’ 21 Hikwalaho, ndzi ta khatalela a vito ga mina go basa legi a yindlu ya ka Izrayeli yi gi nyenyezisileko cikari ka matiko lawa va yileko ka wona.”+

22 “Hi cigelo leco, byela a yindlu ya ka Izrayeli, uku: ‘Jehovha, a Hosi ya Hombe, i ngalo: “Lezvi ndzi mahako a ndzi zvi mahi hi kota ya n’wina, n’wina va yindlu ya ka Izrayeli, kanilezvi ndzi zvi maha hi kota ya vito ga mina go basa legi mu gi nyenyezisileko cikari ka matiko lawa mu yileko ka wona.”’+ 23 ‘Hakunene ndzi ta basisa a vito ga mina ga hombe,+ legi gi nyenyezisilweko cikari ka matiko, legi n’wina mu gi nyenyezisileko cikari ka wona; a matiko ma ta zvi tiva lezvaku hi mina Jehovha’,+ ku wula Jehovha, a Hosi ya Hombe, ‘laha ndzi to basiswa cikari ka n’wina mahlweni kabye. 24 Ndzi ta mu humesa cikari ka mifumo, ndzi mu hlengeleta hi ka matiko wontlhe ndzi tlhela ndzi mu wuyisa tikweni ga n’wina.+ 25 Ndzi ta mu n’watsekela mati yo basa, niku mu ta basa;+ ndzi ta mu basisa ka kungahlazveki ka n’wina kontlhe+ ni ka zvontlhe a zvifananiso zva n’wina zva manyala.+ 26 Ndzi ta mu nyika mbilu yiswa+ ndzi tlhela ndzi chela moya wuswa ndzeni ka n’wina.+ Ndzi ta susa mbilu ya ribye+ mirini wa n’wina, ndzi mu nyika a mbilu ya nyama.* 27 Ndzi ta chela moya wa mina ndzeni ka n’wina, ndzi mu fambisa zvileletelweni zva mina.+ Mu ta hlayisa ni ku landzela a zviboho zva mina zva kulamula. 28 Makunu mu ta hanya tikweni legi ndzi nyikileko a vakokwani va n’wina. Mu tava vanhu va mina, mina ndziva Nungungulu wa n’wina.’+

29 “‘Ndzi ta mu tlhatlhisa ka kungahlazveki ka n’wina kontlhe. Ndzi ta vitana timbewu ndzi ta ti pfunisa, ndzi nga ha mu neheli ndlala kambe.+ 30 Ndzi ta pfunisa mihandzu ya tisinya ni timbewu ta lomu masin’wini kasi mu nga ha tshuki muwa tingana hi ku xoka hi ndlala cikari ka matiko.+ 31 Makunu mu ta alakanya a tindlela ta n’wina to biha ni mitiro ya n’wina ya hava, mu tlhela mu ti nyenya n’wina wutsumbu hi kota ya nandzu wa n’wina ni mitiro ya n’wina yo nyenyeza.+ 32 Kanilezvi tivani lezvi: A ndzi mahi lezvi hi kota ya n’wina’,+ ku wula Jehovha, a Hosi ya Hombe. ‘Wutshan’wini ga lezvo, dhanani muwa tingana hi kota ya tindlela ta n’wina, n’wina va yindlu ya ka Izrayeli.’

33 “Jehovha, a Hosi ya Hombe, i ngalo: ‘Ka siku legi ndzi to mu basisa ka nandzu wa n’wina wontlhe, ndzi ta maha ku a madhoropa mava ni vaaki,+ ni lezvaku a marumbi ma aketwa.+ 34 A tiko legi gi nga hahlulilwe gi sala gi hi ciwula kuwoneni ka vahundzi vontlhe, gi ta rimiwa. 35 A vanhu va taku: “A tiko legi gi nga hahlulilwe gi khwatsi i jardhim ya Edheni,+ ni madhoropa lawa ma nga hi marumbi na ma hahlulilwe ni ku khungumulelwa, makunu makhokhola niku ma na ni vaaki.”+ 36 A matiko lawa ma to sala matlhelweni ya n’wina ma ta zvi tiva lezvaku hi mina, Jehovha, ndzi nga aketa leci ci nga khungumulilwe ni ku byala leci ci nga hahlulilwe. Hi mina, Jehovha, ha ndzoce ndzi nga wula ndzi tlhela ndzi zvi maha.’+

37 “Jehovha, a Hosi ya Hombe, i ngalo: ‘A ku tsika lezvo, ndzi ta vhumelela a yindlu ya ka Izrayeli a ku yi ndzi kombela lezvaku ndzi va mahela lezvi: Ndzi ta andzisa vanhu vabye a ku fana ni ntlhambi. 38 A ku fana ni ntlhambi wa vabasileko, a ku fana ni ntlhambi wa Jerusalema* cikhatini ca mibuzo yakwe,+ a madhoropa lawa ma nga hi marumbi ma ta tala hi mitlhambi ya vanhu;+ va ta zvi tiva lezvaku hi mina Jehovha.’”