Papilo go sangula ka Va Le Korinte

3 Hikwalaho, vamakabye, a ndzi zvi kotangi ku wulawula na n’wina a ku khwatsi hi loku ndzi wulawula ni vanhu va moya,+ kanilezvi ndzi no wulawula na n’wina a ku khwatsi hi loku ndzi wulawula ni vanhu va nyama, ni zvihlangi+ ka Kristu. 2 Ndzi mu nwisile masi, a ndzi mu phamelangi zvakuga zvo tiya, hakuva mu wa nga se tiyela. Kunene, hambu ni zvalezvi a mu se tiyela,+ 3 hakuva ma hi va nyama.+ Kota lezvi ku nga ni ciluse ni kuholovisana cikari ka n’wina, xana a hi lisine ku mu va nyama,+ niku mu fambisa ku khwatsi hi lezvi a vanhu va fambisako zvona ke? 4 Hakuva loku loyi aku: “Mina ndzi wa Pawule”, kanilezvi a mun’wani aku: “Mina ndzi wa Apolosi”,+ a mo hanyisa ku khwatsi mu va nyama ke?

5 Kasi Apolosi ova mani? Ahati Pawule ke, ova mani? Malandza ntsena+ ma mu vhunileko ku kholwa, a ku khwatsi hi lezvi a Hosi yi nyikileko a mun’we ni mun’wani. 6 Mina ndzi no byala,+ Apolosi a regara,+ kanilezvi hi Nungungulu a nga simama a ku kulisa. 7 Hikwalaho, loyi a byalako a hi wa nchumu, hambu loyi a regarako, saseka Nungungulu loyi a kulisako.+ 8 Makunu loyi a byalako ni loyi a regarako van’we,* kanilezvi a mun’we ni mun’wani wabye i ta amukela a nchachazelo wakwe hi kuya hi ntiro wakwe.+ 9 Hakuva hina hi zvitiri-kulori na Nungungulu. N’wina mu simu ga Nungungulu, a yindlu ya Nungungulu.+

10 Hi tipswalo ta Nungungulu leti ndzi kombisilweko, ndzi no aka ciseketelo+ kota meseri wa munene, kanilezvi a mun’wani i aka hehla ka cona. Kanilezvi a mun’we ni mun’wani i wa chele kota hi lezvi a akisako zvona ka cona. 11 Hakuva i hava a zvi kotako ku aka cin’wani ciseketelo ahandle ka leci ci sinako ci akilwe, ku nga Jesu Kristu.+ 12 Makunu loku a munhu a aka ciseketelweni leci hi ouro, ni prata, ni maribye ya lisima, kutani hi tisinya, ni byanyi, ni hlanga; 13 a ntiro wa mun’we ni mun’wani wu ta kombisiwa lezvaku wu tshamisile kuyini, hakuva a siku lego gi ta wu kombisa kubaseni, hi ku wu ta kombekiswa hi ndzilo;+ a ndzilo wu ta hlola a ntiro wa mun’we ni mun’wani lezvaku wa lixaka muni. 14 Loku a ntiro lowu munhu a wu akileko ciseketelweni leci wu pona kuswa ndzilweni, i ta chachazelwa; 15 loku a ntiro wa munhu wuswa, i ta luzekelwa, kanilezvi yena n’winyi i ta pona, hambulezvo na a ku khwatsi i huma hi lomu ndzilweni.

16 Kasi a mu zvi tivi lezvaku n’wina mu tempeli ya Nungungulu+ ni lezvaku a moya wa Nungungulu wu tshama ka n’wina ke?+ 17 Loku a wokari a hohlola a tempeli ya Nungungulu, Nungungulu i ta mu lovisa; hakuva a tempeli ya Nungungulu yi basile, niku n’wina mu tempeli leyo.+

18 Ku ngavi ni loyi a ti kalavelako: Loku a wokari cikari ka n’wina a alakanya ku i tlhari tikweni legi,* i wa mahe cipumbu kasi a fela ku tlhariha. 19 Hakuva a wutlhari ga tiko legi wupumbu ka Nungungulu, hakuva ku tsalilwe ku ngalo: “I phasa titlhari manweni ya tona.”+ 20 Niku: “Jehovha* wa zvi tiva lezvaku a maalakanyo ya titlhari a ma vhuni nchumu.”+ 21 Hikwalaho, ku ngavi na loyi a ti kulisako hi vanhu, hakuva zvontlhe zva n’wina, 22 kani hi Pawule, kani hi Apolosi, kani hi Khefasi,*+ kutani i tiko, kutani wutomi, kutani kufa, kutani zvilo zvi nga kona, kutani zvilo zva ha tako, zvontlhe zva n’wina; 23 kasi lezvo n’wina mu va Kristu;+ Kristu wa Nungungulu.