Hi kutsala ka Luka

18 I no engeta a va hlawutela mufananiso xungetano hi lezvaku va fanele ku khongela contlhe cikhati va nga karali,+ 2 aku: “Ka dhoropa go kari, ku wa hi ni mulamuli a nga chaviko Nungungulu ne ku khatala hi munhu. 3 Ku wa hi ni noni* kambe dhoropeni lego yi nga tshamela kuya kakwe, yi yaku: ‘Ndzi lulamisele a mhaka ya mina ni loyi a ndzi wonheleko.’ 4 Ku no hundza cikhati co kari na a nga vhumeli, kanilezvi hi kugumesa i no wula mbilwini yakwe, aku: ‘Hambu lezvi ndzi nga chaviko Nungungulu ne ku khatala hi munhu, 5 lezvi a noni leyi yi tshamelako ku ndzi karata, ndzi ta yi xuxela a mhaka ya yona hi kululama, kasi yi nga ha simami kuta ka mina yi ta ndzi karata hi cikombelo ca yona laha ka kuza ndzi rereka hi zvona.’”+ 6 A Hosi yiku: “Zwanani lezvi a mulamuli a nga wula, hambu lezvi a nga lulamangiko! 7 Makunu Nungungulu a nga ta va mahela kululama a vahlawulilweko vakwe, lava va rilako kakwe mumu ni wusiku,+ na a kombisa lihlazva-mbilu hi vona ke?+ 8 Ndza mu byela, ndziku: I ta hatlisa a va mahela kululama. Hambulezvo, a cikhati leci a N’wana wa munhu a to chikela, i ta ku kuma a kukholwa loku* misaveni ke?”

9 I no hlawutela mufananiso lowu ka vokari va nga ti tsumba vaku va lulamile, va tlhela va chepeta van’wani, aku: 10 “A vavanuna vambiri va noya tempeleni va ya khongela; a mun’we i wa hi muFarisi, loyi mun’wani i wa hi mukhupisi. 11 A muFarisi i no yima a sangula ku khongela a wula lezvi mbilwini yakwe: ‘Nungungulu, ndza ku bonga hakuva a ndzi fani ni van’wani vanhu — va nga makhamba, vangalulamangiko, ni zvibhayi — ne hambu ku fana ni mukhupisi loyi. 12 Ndzi pfhunga* kumbiri hi vhiki; ndzi nyikela zva wukhume ka zvontlhe ndzi zvi kumako.’+ 13 Kanilezvi a mukhupisi i no yima hi le kule na a nga zvi koti ne ku tlakusa matihlo yakwe ma cuwuka tilweni, na a tiba cifuva, aku: ‘Nungungulu, ndzi mahele wuxinji mina ndzi nga muwonhi.’+ 14 Ndza mu byela, ndziku: A wanuna loyi i tlhelile kaya na a wuliwa wo lulama nguvhu ku hundza a muFarisi.+ Hakuva ni wihi loyi a ti tlakusako i ta koramiswa, kanilezvi loyi a ti koramisako i ta tlakuswa.”+

15 A vanhu va no mu tela ni vanana vabye kasi a ta va henya, kanilezvi laha a vapizani va nga wona lezvo, va no sangula ku va bhongela.+ 16 Kanilezvi Jesu i no vitana vanana vata kakwe, aku: “Tsikani vanana vata ka mina, mu nga va beteli, hakuva a Mufumo wa Nungungulu wu lumba vanhu vo kota vona.+ 17 Ndza tiyisa ka n’wina, ndziku: Ni wihi loyi a nga amukeliko a Mufumo wa Nungungulu a ku khwatsi i n’wanana, a nga ta tshuka a nghena ka wona.”+

18 A mun’we wa vafumeli i no mu wutisa, aku: “Mugondzisi wa Munene, zvini ndzi faneleko ku maha kasi ndziga tshomba ya wutomi ga pindzukelwa?”+ 19 Jesu aku kakwe: “Hikuyini u ndzi vitanako wa munene? A ku na munhu wa munene saseka mun’we basi, ku nga Nungungulu.+ 20 Wa yi tiva a milayo leyi yaku: ‘U nga mahi wubhayi,+ u nga dayi,+ u nga yivi,+ u nga nyiki wukustumunyu ga mawunwa,+ kombisa cichavo ka papayi wa wena ni ka mamani wa wena.’”+ 21 I no mu hlamula, aku: “Ndza maha zvontlhe lezvo kusukela wun’wananeni ga mina.” 22 Andzhako ka kuzwa lezvo, Jesu i te ngalo kakwe: “Wa ha kiyelelwa hi nchumu wun’we: Xavisa zvontlhe u nga nazvo u teka mali ya kona u avela zvisiwana, u tava ni tshomba matilweni; tana u ta maha mulandzeli wa mina.”+ 23 A cikhati leci a mufumeli a ngazwa lezvo, i no bayiseka nguvhu hakuva i wa ganyile nguvhu.+

24 Jesu i no mu cuwuka, aku: “Zvi ta karata nguvhu ka lava va nga ni mali a ku nghena Mufun’weni wa Nungungulu!+ 25 Kunene, zva olova ku a kameli gi hundza hi laha non’wini wa chingani a ku hundza ku a munhu wo ganya a nghena Mufun’weni wa Nungungulu.”+ 26 Lava va nga zvizwa va te: “Himani wa ku a nga ponisiwa?”+ 27 Yena aku: “Lezvi zvi nga kotekiko ka vanhu zva koteka ka Nungungulu.”+ 28 Kanilezvi Pedro i te: “Hi siyile lezvi hi nga hi nazvo hi ku landzela.”+ 29 Yena aku kabye: “Ndza tiyisa ka n’wina, ndziku: A ku na munhu a siyileko muti, kutani sati, kutani vamakabye, kutani vapswali, kutani vana, hi kota ya Mufumo wa Nungungulu+ 30 a to kala ku kuma zvotala nguvhu ka cikhati leci, ni wutomi ga pindzukelwa cikhatini ci tako.”*+

31 Makunu i no koka lava va 12 hi tlhelo, aku kabye: “Ma zvi wona, lezvi ho kandziha hiya Jerusalema. Zvontlhe lezvi zvi tsalilweko hi vaphrofeti xungetano hi N’wana wa munhu zvi ta tatiseka.*+ 32 Hi cikombiso, i ta nyikelwa mandleni ya vamatiko,+ a poyiliwa,+ a xaniswa ni ku phelelwa.+ 33 Andzhako ka ku muba, va ta mu daya,+ kanilezvi hi siku ga wunharu i ta vhuka.”+ 34 Hambulezvo, a va zwisisangi ne cin’we ka zvilo lezvi, hakuva a timhaka leti ti wa fihlilwe kabye, hikwalaho a va zvi zwisisangi lezvi a nga wula.

35 Laha Jesu a nga hi kusuhani ni ku chikela Jeriko, ku wa hi ni wanuna wa cikhumu a nga tshamile mbhirini ya ruwa a kombela zomola.+ 36 Kota lezvi a ngazwa citshungu na ci kari ci hundza, i no sangula ku wutisa ku zvini zvi mahekako. 37 Va no mu hlamula, vaku: “Hi Jesu wa le Nazareta a hundzako!” 38 Laha a ngazwa lezvo, i no vitana hi gezu ga hombe, aku: “Jesu, N’wana wa Dhavhidha, ndzi mahele wuxinji!” 39 Lava va nga hi phambeni va no mu kawuka vaku i wa miyele; kanilezvi yena i no engeta a vitana hi gezu ga hombe nguvhu, aku: “N’wana wa Dhavhidha, ndzi mahele wuxinji!” 40 Jesu i no nyima a laya lezvaku vata naye kakwe. Loku a chikele, Jesu i no mu wutisa, aku: 41 “U lava ku ndzi ku mahela yini?” Aku: “Hosi, ndzi tlhelisele kuwona ka mina.” 42 Jesu aku kakwe: “Tlhela u wona; a kukholwa ka wena ku ku hanyisile.”+ 43 Zvalezvo a wanuna loye i no tlhela a wona, a sangula ku mu landzela,+ a dhumisa Nungungulu. Vontlhe lava va nga zvi wona vonawu va no dhumisa Nungungulu.+