Hi kutsala ka Luka

19 Andzhako ka lezvo, i no nghena Jeriko a sangula ku tsemakanya dhoropa. 2 Laho ku wa hi ni wanuna a vitaniwako ku hi Zakewu a nga hi hosana ya vakhupisi niku i wa ganyile. 3 I wa zametela ku wona Jesu, kanilezvi i wa nga zvi koti hi kota ya citshungu hakuva i wa komile. 4 Hikwalaho, i no tsutsuma a ranga phambeni a ya noma ka nkuwu wa khwati kasi a mu wona hakuva i wa lava ku hundza hi ndlela leyo. 5 A cikhati leci Jesu a nga chikela ka wutshamu lego, i no cuwuka hehla, aku kakwe: “Zakewu, hatlisa u chika hakuva nyamutlha ndziya mutini wa wena.” 6 Laha a ngazwa lezvo, i no hatlisa a chika a mu amukela hi kutsaka kota mupfhumba wakwe. 7 A cikhati leci va nga wona lezvo, vontlhe va no sangula ku ngurangura, vaku: “I yile a ya tshama mutini wa munhu a nga muwonhi.”+ 8 Kanilezvi Zakewu i no suka a yima, aku ka Hosi: “Hosi, ndzi ta nyika zvisiwana a khihlanya ga lezvi ndzi nga nazvo; ni loku ndzi yivele munhu* ndzi ta mu tlhelisela na zvi phindilwe mune wa makhati.”+ 9 Laha Jesu a ngazwa lezvo, i te ngalo kakwe: “Nyamutlha a kuhanyiswa ku tile mutini lowu, kota lezvi yenawu a nga n’wana wa Abrahama. 10 Hakuva a N’wana wa munhu i tele ku ta lavetela ni ku hanyisa lezvi zvi lahlekileko.”+

11 Na va ha ingisela timhaka leti, i no va hlawutela wun’wani mufananiso, hakuva i wa hi kusuhani ni Jerusalema niku va wa alakanya lezvaku a Mufumo wa Nungungulu wu wa ta woneka ka cikhati caleco.+ 12 Hikwalaho, i te: “A wanuna wo kari a pswalelweko ngangweni wa wuhosi i no endza aya tikweni ga le kule+ kasi ku ya amukela wuhosi a gumesa a wuya. 13 I no vitana a 10 wa malandza a ta ma nyika a 10 wa tipondo,* aku ka wona: ‘Salani mu bhindzulisa a tipondo leti kala ndzi wuya.’+ 14 Kanilezvi a vanhu va tiko gakwe va wa mu venga, hikwalaho, va no ruma vaembaxadhori* va mu landza, va yaku: ‘A hi zvi lavi ku fumelwa hi wanuna loyi.’

15 “Hi kugumesa, loku a wuyile na a amukele wuhosi,* i no vitana a malandza lawa a nga ma nyikile mali* kasi ku ta tiva lezvi ma nga sala ma bhindzula.+ 16 Loyi wo ranga i nota a taku: ‘Hosi, a pondo ya wena yi bhindzulile a 10 wa tipondo.’+ 17 Aku kakwe: ‘U tirile, nandza ga ginene! Kota lezvi u nga tsumbeka ka zvilo zva zvitsongwani nguvhu, fumela a 10 wa madhoropa.’+ 18 Loyi wa wumbiri i nota, a taku: ‘A pondo ya wena Hosi yi bhindzulile a ntlhanu wa tipondo.’+ 19 I no byela loyi kambe, aku: ‘Wenawu fumela a ntlhanu wa madhoropa.’ 20 Kanilezvi ku nota loyi mun’wani, a taku: ‘Hosi, hi leyi a pondo ya wena ndzi nga fihlile lomu ka nguwo. 21 Ndzi no chava hakuva u munhu wo karata; u teka lezvi u nga kala ku veka ni ku tshovela lezvi u nga kala ku byala.’+ 22 Aku kakwe: ‘Nandza go biha! Ndza ku lamula hi magezu ya wena n’winyi. Kasi u wa zvi tiva ku ndzi munhu wo karata, a tekako lezvi a nga kala ku veka ni ku tshovela lezvi a nga kala ku byala?+ 23 Makunu hikuyini u nga kala ku veka mali* ya mina bhanko? Kuwuyeni ka mina ndzi wa ta yi teka ni majuro.’

24 “Hikwalaho, i no byela lava va nga yimile laho, aku: ‘Tekani pondo leyi a nga nayo mu nyika loyi a nga ni 10 wa tipondo.’+ 25 Kanilezvi vona vaku kakwe: ‘Hosi, i sina a hi ni 10 wa tipondo!’ 26 Aku: ‘Ndza mu byela ndziku ni wihi loyi a nga nazvo i ta nyikwa zvin’wani, kanilezvi loyi a nga hava nchumu, ni lezvi a nga nazvo i ta tekelwa.+ 27 Tanani ni valala va mina lava va nga kala va nga zvi lavi ku ndzi va fumela mu ta va daya mahlweni ka mina.’”

28 Andzhako ka ku wula timhaka leti, i no simama ku kandziha aya Jerusalema. 29 A cikhati leci a nga hi kusuhani ni Bhetfaje ni Bhetaniya, citsungeni ci vitaniwako ku Citsunga ca maOlivha,+ i no ruma vapizani vambiri,+ 30 aku: “Fambani cidhoropaneni leci ci nga mahlweni ka n’wina, loku mu nghenile mu ta ya kuma a cimbongolana na ci bohilwe ca ku a ci se khilelwa hi munhu. Ci tlhatlheni muta naco. 31 Kanilezvi loku a wokari a mu wutisa, aku: ‘Mu ci tlhatlhela yini?’ Hlamulani muku: ‘A Hosi ya ci lava.’” 32 Lava va nga rumilwe va no famba va ya ci kumisa zvalezvi a nga va byelisile zvona.+ 33 Kanilezvi laha va nga kari va tlhatlha cimbongolana, a venyi va cona va no va wutisa, vaku: “Mu ci tlhatlhela yini a cimbongolana leco?” 34 Va no va hlamula, vaku: “A Hosi ya ci lava.” 35 Va no famba naco ka Jesu, va andlalela a tinguwo tabye hehla ka cimbongolana, va khilelisa Jesu hehla ka cona.+

36 Laha a nga kari a famba, va no andlalela tinguwo tabye laha ruweni.+ 37 Zvalezvi a nga tshinela ka ruwa legi gi relelako hi le Citsungeni ca maOlivha, a citshungu contlhe ca vapizani ci no sangula ku tsaka ni ku dhumisa Nungungulu hi gezu ga hombe hi kota ya mitiro yontlhe ya ntamu leyi va yi wonileko, 38 vaku: “I katekile loyi a tako kota Hosi vitweni ga Jehovha!* A kurula a kuve tilweni, ni wudzundzo ka Nungungulu loyi a nga le hehla matilweni!”+ 39 Kanilezvi, a vaFarisi vo kari va nga hi lomu ka citshungu va te ngalo kakwe: “Mugondzisi, kawuka vapizani va wena.”+ 40 I no hlamula, aku: “Ndza mu byela, ndziku: Loku lava va miyela, a maribye ma ta huwelela.”

41 A cikhati leci a nga chikela kusuhani, i no cuwuka dhoropa a gi rilela,+ 42 aku: “Loku wena u wa zvi tivile nyamutlha a zvilo lezvi zvi nehako kurula . . . kanilezvi zvi fihlilwe matihlweni ya wena.+ 43 Hakuva mata a masiku lawa a valala va wena va to ku bhiyela hi tisinya ta mitlonga, va ku randzela ni ku ku dhumela hi matlhelo wontlhe.+ 44 Va ta ku wisa lahasi zvin’we ni vana va wena lava va nga cikari ka wena;+ va nga ta siya ka wena ne ribye gin’we hehla ka gin’wani,+ hakuva a wu ci tivangi cikhati ca kuhloliwa ka wena.”

45 Andzhako ka lezvo, i no nghena tempeleni a hlongola lava va nga kari va xavisa,+ 46 aku kabye: “Ku tsalilwe ku: ‘A yindlu ya mina yi tava yindlu ya mukhongelo’,+ kanilezvi n’wina mu yi maha mhako ya vaphangi.”+

47 I no simama ku gondzisa tempeleni siku ni siku. Kanilezvi a vapristi lava va tihosana ni vatsali ni vahombe va wa hlota ndlela ya ku mu daya;+ 48 hambulezvo a va yi kumangi, hakuva a vanhu vontlhe va wa tshama kakwe va mu ingisela, va nga suki.+