Hi kutsala ka Luka

23 Hikwalaho, a citshungu contlhe ci no suka ci famba naye ka Pilatu.+ 2 Va no sangula ku mu lumbeta,+ vaku: “Hi kumile a wanuna loyi na a hambukisa tiko ga hina, a betela vanhu ku hakhela mikhupo ka Khezari,+ a tlhela aku hi yena Kristu a hosi.”+ 3 Makunu Pilatu i no mu wutisa ku: “Hi wena Hosi ya vaJudha ke?” I no hlamula, aku: “U wula zvona.”+ 4 Pilatu i no byela vapristi lava va tihosana ni zvitshungu, aku: “A ndzi kumi nandzu ka wanuna loyi.”+ 5 Kanilezvi va no phikiza, vaku: “I vhuxa vhilinganya cikari ka vanhu hi ku gondzisa tikweni gontlhe ga Judhiya, kusukela Galileya kala ni kwaseno.” 6 A cikhati leci Pilatu a ngazwa lezvo, i no wutisa lezvaku a wanuna loyi i wa hi wa le Galileya ke. 7 Loku a tivile lezvaku i wa hi wa cipandze leci ci nga fumelwa hi Herodhi,+ i no mu rumela ka Herodhi, loyi a nga hi Jerusalema ka lawo masiku.

8 A cikhati leci Herodhi a nga wona Jesu, i no tsaka nguvhu. Hakuva ku wa hundza cikhati co leha na a lava ku wona Jesu hakuva i wa zwile zvotala hi yena,+ niku i wa xuva ku mu wona na a maha ciwoniso. 9 Hikwalaho, i no mu wutisela timhaka to tala, kanilezvi a nga mu hlamulangi nchumu.+ 10 Kanilezvi a vapristi lava va tihosana ni vatsali va no simama va yimile va mu lumbeta na va zangarile nguvhu. 11 Herodhi, zvin’we ni masochwa yakwe, i no mu chepeta,+ a tlhela a mu poyila+ hi ku mu bohisa nguwo yo saseka nguvhu a gumesa a mu tlhelisa ka Pilatu. 12 Ka siku lego, Herodhi na Pilatu, lava va nga hi valala, va no maha vanghana.

13 Pilatu i no tlhanganisa vapristi lava va tihosana ni tihosi ni vafumeli ni vanhu, 14 aku kabye: “Mu ndzi tisele wanuna loyi na muku i kucetela vanhu ku vhukela mufumo. Ndzi mu hlolile mahlweni ka n’wina kanilezvi a ndzi kumangi nandzu ka lezvi mu mu lumbetako.+ 15 Kunene, hambu Herodhi a nga kumangi nandzu ka yena, hakuva i mu wuyisile ka hina. A munhu loyi a nga mahangi nchumu wu ringanako ku a dawa. 16 Hikwalaho, ndzi ta mu tsayisa+ ndzi gumesa ndzi mu tlhatlha.” 17 *—— 18 Kanilezvi a citshungu contlhe ci no banguleka ciku: “Daya wanuna loyi,* u hi tlhatlhela Bharabhasi!”+ 19 (Bharabhasi i wa vhalelwe paxweni hi kota ya ku vhukela mufumo loku ku nga mahekile dhoropeni ni kudaya.) 20 Pilatu i no wulawula navo kambe hakuva i wa lava ku tlhatlha Jesu.+ 21 Kanilezvi va no banguleka nguvhu, vaku: “I waye mhandzeni! I waye mhandzeni!”*+ 22 I no va wutisa hi khati ga wunharu, aku: “Hikuyini? Cini a nga goha a wanuna loyi? A ndzi kumangi nchumu kakwe wu ringanako ku a dawa. Hikwalaho, ndzi ta mu tsayisa ndzi gumesa ndzi mu tlhatlha.” 23 Kanilezvi va no kurumeta va banguleka nguvhu va ku i wa dawe.* A magezu yabye ma no mu hlula.+ 24 Hikwalaho, Pilatu i no tsema mhaka, a va mahela lezvi va nga zvi lava. 25 I no va tlhatlhela a wanuna loyi va nga mu lava, a nga vhalelwe paxweni hi kota ya ku vhukela mufumo ni kudaya, a gumesa a va nyika Jesu kota kurandza kabye.

26 Laha va nga kari va huma naye, va no khoma wanuna wo kari a vitaniwako ku hi Simoni wa le Kirene, a ngata hi le handle ka dhoropa, va mu rwexa a mhandze ya hlomulo,* a landza Jesu.+ 27 Ku wa hi ni citshungu ca hombe ca vanhu ci nga mu landzela, a ku patsa ni vavasati lava va nga tiba zvifuva hi kubayiseka, va mu rilela. 28 Jesu i no hundzuluka a cuwuka vavasati lavo, aku: “Vanhanyana va Jerusalema, tsikani ku ndzi rilela. Kanilezvi ti rileleni ga n’wina ni vana va n’wina;+ 29 hakuva mata masiku lawa a vanhu va to wula, vaku: ‘Va tsaka a vavasati lava va nga tingon’wa, ni marumbu lawa ma nga kala ku pswala, ni mavele lawa ma nga kala ku an’wisa!’+ 30 Makunu va ta sangula ku byela zvitsunga, vaku: ‘Wanani hehla ka hina’, ni zvitsungana, vaku: ‘Hi khubhunyeteni!’+ 31 Loku va maha lezvi a sinya na ya ha nyukile, ku ta humelela yini a cikhati leci yi to woma?”

32 Ku wa hi ni vavanuna vambiri va zvigevenga, lava vonawu va ngaya va ya dawa zvin’we naye.+ 33 A cikhati va nga chikela ka wutshamu gi vitaniwako ku Cirwarwa,*+ va no mu belela laha mhandzeni zvin’we ni zvigevenga matlhelweni yakwe, a cin’we reveni gakwe ga cinene ni cin’wani reveni gakwe ga cibhabha.+ 34 Kanilezvi Jesu i waku: “Papayi, va tsetselele, hakuva a va zvi tivi lezvi va mahako.” Ahandle ka lezvo, va noba tihlolo kasi va avelana tinguwo takwe.+ 35 A vanhu va no yima va cuwukela. Kanilezvi a vafumeli va wo mu poyila, vaku: “I hanyisile van’wani; makunu i wa ti hanyise loku a hi yena Kristu wa Nungungulu, Loyi a Hlawulilweko.”+ 36 Hambu a masochwa ma no mu poyila, mata kakwe ma ta mu nyika vhinyo yo dzunga,+ 37 maku: “Loku u hi Hosi ya vaJudha, ti ponise.” 38 Ku wa hi ni mutsalo hehla kakwe, waku: “Leyi i Hosi ya vaJudha.”+

39 A cin’we ca zvigevenga ci nga hayekilwe laho ci no sangula ku mu ruka,+ ciku: “A hi wena Kristu ke? Ti ponise u tlhela u ponisa na hinawu!” 40 Leci cin’wani ci no mu kawuka, ciku: “A wu chavi Nungungulu ne ni kutsongwani, lezvi u tsayisilweko a ku fana na yena? 41 Hina zva hi ringana, hakuva ho amukela a nchachazelo wa lezvi hi nga maha; kanilezvi a wanuna loyi a nga gohangi nchumu.” 42 Ci no engeta, ciku: “Jesu, ndzi alakanye a cikhati leci u to nghena Mufun’weni wa wena.”+ 43 I te ngalo kakwe: “Ndza tiyisa ka wena nyamutlha, ndziku: U tava na mina Paradhiseni.”+

44 Kunene, zvi wa hi kwalomu ka hora ya wu 6;* hambulezvo, ku nova ni munyama misaveni yontlhe kala ka hora ya wu 9,*+ 45 hakuva a gambo gi no timeka; ni kortina ga wutshamu go basa+ gi no handzuka hi laha cikari.+ 46 Jesu i no vitana hi gezu ga hombe, aku: “Papayi, ndza nyikela a moya wa mina mandleni ya wena.”+ Andzhako ka ku wula timhaka leti, i nofa.*+ 47 Laha a hosana ya masochwa yi nga wona lezvi zvi nga maheka, yi no dhumisa Nungungulu, yiku: “Hakunene, a wanuna loyi i wa lulamile.”+ 48 A cikhati leci a zvitshungu zvontlhe zvi nga hi laho kasi ku wona kudawa kakwe zvi nga wona lezvi zvi nga maheka, zvi no tlhela kaya na zvi tiba zvifuva. 49 Vontlhe lava va nga tolovelene naye, zvin’we ni vavasati lava va nga tile naye hi Galileya, va no yima hi le kule va wona zvilo lezvi.+

50 Ku wa hi ni wanuna a vitaniwako ku hi Josefa, a ciro ca Tribhunali ya Hombe ya vaJudha, a nga hi munhu wa munene ni wo lulama.+ 51 (A wanuna loyi i wa nga seketelangi a cikungo cabye ni zvimaho zvabye.) I wa hi wa le Arimateya, a dhoropa ga Judhiya, niku i wa rindzela a Mufumo wa Nungungulu. 52 A wanuna loyi i noya ka Pilatu a ya kombela cirumbi ca Jesu. 53 I no chisa cirumbi,+ a ci phutsela ka nguwo ya yinene ya wukene,* a gumesa a ci lata ka cilahla ci nga kehlilwe* laha ribyeni,+ lomu ku nga kala ku nga se lahliwa munhu. 54 Makunu ku wa hi siku ga Kulongisela;+ a sabhadho+ gi wa lava ku sangula. 55 Kanilezvi a vavasati lava va nga tile naye hi le Galileya va no mu landza va ya wona cilahla ni lezvi a cirumbi cakwe ci nga latisilwe zvona.+ 56 Va no tlhela va ya longisela a powa yo nuhela ni mafura yo nuhela. Kanilezvi va no humula hi sabhadho+ kota kulaya ka nayo.