Papilo go sangula ka Va Le Korinte

9 Kasi a ndzi tlhatlhekangi? A ndzi mupostoli? A ndzi wonangi Jesu, a Hosi ya hina ke?+ N’wina a mu ntiro wa mina Hosini ke? 2 Hambu loku ndzi nga hi mupostoli ka van’wani, hakunene ndzi mupostoli ka n’wina! Hakuva n’wina mu karimbo yi tiyisako a wupostoli ga mina Hosini.

3 A kutiyimela ka mina ka lava va ndzi hlolako hi loku: 4 Kasi a hi na fanelo* ya kuga ni kunwa ke? 5 A hi na fanelo ya ku fambafamba ni sati a kholwako,+ a ku fana ni lezvi a van’wani vapostoli, ni vamakabye va Hosi,+ na Khefasi,*+ va mahako ke? 6 Kutani hi mina ndzoce na Bharnabhasi,+ lava hi nga hiko na fanelo ya ku tsika a ku ti tirela ke? 7 Hi wihi musochwa a tirako yimpini hi mali yakwe? Himani a byalako a civhina* a gumesa a ngagi mihandzu ya kona?+ Kutani himani a risako ntlhambi a ngagi a masi ya ntlhambi ke?

8 Kasi lezvi ndzi zvi wulako zvova mawonela ya vanhu? A hi zvona lezvi a Nayo wu wulako ke? 9 Hakuva Nayweni wa Mosi ku tsalilwe lezvi: “U nga bohi nomu wa homu a cikhati leci yi hulako timbewu.”+ Mu alakanya ku Nungungulu o zwela tihomu basi? 10 A nga wuli lezvo hi kota ya hina kambe ke? Kunene zvi tsalilwe hi kota ya hina, hakuva loyi a rimako ni loyi a hulako va fanele ku tira na va tsumba lezvaku va ta amukela ciavelo.

11 Loku hina hi byalile zvilo zva moya cikari ka n’wina, xana kuhundzeleta loku hi tshovela ka n’wina a ku vhuniwa hi ka nyama?+ 12 Loku a van’wani va hi ni fanelo* leyo cikari ka n’wina, a ha ha wuli hi hina! Hambulezvo, a hi yi londzowotangi a fanelo leyo,+ kanilezvi ha timisela zvilweni zvontlhe kasi ni ka gihi tshamela hi nga veki nchumu wu vhalelako a mahungu ya manene xungetano hi Kristu.+ 13 Kasi a mu zvi tivi lezvaku lava va tirako tempeleni vaga zvilo zva lomu tempeleni, ni lezvaku lava va tirako alatini va amukela ciavelo hi alatini ke?+ 14 Hikwalaho, a Hosi yonawu yi leletele lezvaku lava va kanelako mahungu ya manene va hanya hi mahungu ya manene.+

15 Kanilezvi mina a ndzi londzowotangi ne cin’we ca zvilo lezvi.+ Kunene, a ndzi tsali timhaka leti hi ku fela ku mahelwa lezvo, hakuva zvi wa tava chukwana kufa a ku hundza ku . . . I hava a to ndzi tekela a zvigelo lezvi zvi ndzi mahako ndzi ti dzundza!+ 16 Makunu loku ndzi chumayela a mahungu ya manene, a hi cigelo ca kuva ndzi ti kulisa, hakuva hi zvalezvo futsi ndzi faneleko ku maha. Kunene i khombo ka mina loku ndzi nga chumayeli a mahungu ya manene!+ 17 Loku ndzi maha lezvo hi kuzvirandza, ndzi na ni nchachazelo; kanilezvi hambu loku ndzi maha na ndzi nga zvi randzi, a ntiro wona ndzi sina ndzi nyikilwe.+ 18 Makunu hi wihi a nchachazelo wa mina? Hi lezvaku loku ndzi chumayela mahungu ya manene, ndzi nyikela a mahungu ya manene na ndzi nga xavisi, kasi ndzi nga mu xololi hi ntamu* lowu ndzi nga nawo ka mahungu ya manene.

19 Hakuva hambu lezvi ndzi nga tlhatlhekile ka vanhu vontlhe, ndzi no ti maha khumbi ya vontlhe, kasi ndzi fela ku kuma votala. 20 Ka vaJudha ndzi wa ku khwatsi ndzi muJudha, kasi ndzi fela ku kuma vaJudha;+ ka lava va nga lahasi ka nayo, ndzi wa ku khwatsi ndzi lahasi ka nayo, kanilezvi na ndzi nga hi lahasi ka nayo, kasi ndzi fela ku kuma lava va nga lahasi ka nayo.+ 21 Ka lava vo kala nayo, ndzi wa ku khwatsi a ndzi na nayo, na ndzi nga hi loyi wo kala nayo ka Nungungulu, kanilezvi na ndzi hi ni nayo ka Kristu,+ kasi ndzi fela ku kuma lava vo kala nayo. 22 Ka lava va gome, ndzi wa ku khwatsi ndzi na ni gome, kasi ndzi kuma lava va gome.+ Ndzi no ti maha zvontlhe ka vanhu vontlhe, kasi hi ku maha lezvo ndzi fela ku hanyisa vokari. 23 Kanilezvi ndzi maha zvontlhe lezvo hi kota ya mahungu ya manene, kasi ndzi ma kanela ka van’wani.+

24 A mu zvi tivi lezvaku ka mapalisana vontlhe va tsutsuma kanilezvi mun’we basi a kumako nchachazelo ke? Tsutsumani a ku fana na yena kasi mu fela ku wu kuma.+ 25 Vontlhe lava va palisanako va ti khoma zvilweni zvontlhe. Kunene, va maha lezvo kasi va kuma cidlodlo* ci lovako,+ kanilezvi hina hi tirela leci ci nga loviko.+ 26 Hikwalaho, a ndzi tsutsumi nyamutsutsume;+ ni zvibhakela zva mina a ndzi zvi hoxeli kuba moya; 27 kanilezvi ndza tsayisa* miri wa mina,+ ndzi wu fambisa kota khumbi, kasi ku andzhako ka loku ndzi chumayele van’wani, mina wutsumbu ndzi nga aliwi.