Ezekiyeli

17 A mhaka ya Jehovha yi nota kambe ka mina, yi taku: 2 “N’wana wa munhu, wula litekatekani u tlhela u hlawutela vingu xungetano hi yindlu ya ka Izrayeli.+ 3 Uku: ‘Jehovha, a Hosi ya Hombe, i ngalo: “A gama ga hombe,+ ga tipapa ta hombe, ni timbavi to leha, ni mawoya yo tlhuma ni ya mivalavala, gi nota Lebhanoni+ gi ta khatlula a nhovhu ya le magumo ya sedhare.+ 4 Gi no khatlula dhavi ga wona ga le madembeleni gi famba nago tikweni ga Khanani gi ya gi byala dhoropeni ga vaxavisi.+ 5 Hi kulandzela, gi no teka mbewu ya tiko+ gi ya yi byala sin’wini go nona. Gi no yi byalisa ku khwatsi i salgeiro mbhirini ya mati yo tala. 6 Hikwalaho, yi no baleka yiva vhina* wo koma ni wo nyuka,+ a matluka ya wona na ma cuwukile lomu cikari, ni timitsu ta wona ti kula lomu hasi ka wona. Hi ndlela leyo, yi nova vhina, yi baleka zvikhuzo yi tlhela yi phaka madhavi.+

7 “‘“Ku nota gin’wani gama ga hombe,+ ga tipapa ta hombe ni timbavi to leha.+ Hi kulandzela, a vhina lowu wu no nava timitsu ta wona na wu lambile ti cuwuka kakwe tiya kule ni misava leyi wu nga byalilwe ka yona. Wu no nava madhavi ya wona ma cuwuka kakwe a fela ku wu regara.+ 8 Wu wa sina wu byalilwe ka misava yo nona kusuhani ni mati yo tala kasi wu phaka madhavi, wu pswala mihandzu wu tlhela wuva vhina wa hombe.”’+

9 “Wula uku: ‘Jehovha, a Hosi ya Hombe, i ngalo: “Wu ta humelela? A wokari a nga ta tsuwula timitsu ta wona,+ a bolisa mihandzu ya wona a tlhela a wunisa a mahluke ya wona ke?+ Wu ta woma nguvhu laha kaku ku nga taza ku laveka woko ga ntamu ne vanhu vo tala kasi ku wu tsuwula ni timitsu ta wona. 10 Hambu lezvi wu similweko, wu ta humelela ke? Wu nga ta womela magumo laha wu to biwa hi moya wa cikobani* ke? Wu ta woma ka misava leyi wu balekileko ka yona.”’”

11 A mhaka ya Jehovha yi nota kambe ka mina, yi taku: 12 “Ndzi kombela ku u byela a yindlu ya kuhluwuka, uku: ‘A mu zvi zwisisi a ku a zvilo lezvi zvi wula yini ke?’ Wula lezvi: ‘A hosi ya Bhabhuloni yi noya Jerusalema yi ya khoma hosi ya kona ni tihosana ta kona yi tlhela navo Bhabhuloni.+ 13 Ahandle ka lezvo, i no hlawula wokari wa pswalo* wa wuhosi+ a maha naye civhumelwano a tlhela a mu hlambanyisa.+ Andzhako ka lezvo, i no teka vahombe va tiko a famba navo,+ 14 kasi a mufumo wu tsongahatiwa, wu nga ha zvi koti a ku suka wu yima. Wu wa to simama wuva kona ntsena loku ku hlayisiwa a civhumelwano ca yona.+ 15 Kanilezvi hi kugumesa, a hosi yi no mu hluwukela+ hi ku ruma zvirun’wa zva yona zviya Gibhite kasi ku kuma mahaxi+ ni butho ga hombe.+ Ina i ta humelela? Loyi a mahako a zvilo lezvi i ta pona kutsayisiwa ke? Ina a nga tshova civhumelwano a pona ke?’+

16 “‘“A ku khwatsi hi lezvi ndzi hanyako”, ku wula Jehovha, a Hosi ya Hombe, “i ta fela Bhabhuloni laha ku hanyako a hosi* leyi yi nga mu maha hosi,* leyi a kanyisileko a cihlambanyo ca yona a tlhela a tshova a civhumelwano ca yona.+ 17 A butho ga hombe ni masochwa yo tala ya Faro ma nga ta vhuna nchumu yimpini,+ a cikhati leci va to yimisa marampa ya ku dhumela hi wona va tlhela va aka mimuro ya ku randzela kasi ku lovisa mihefemulo* yo tala. 18 I kanyisile a cihlambanyo a tlhela a tshova civhumelwano. Hambu lezvi a nga tsumbisile* i mahile a zvilo lezvi zvontlhe, hikwalaho a nga ta pona.”’

19 “‘Hikwalaho, Jehovha, a Hosi ya Hombe, i ngalo: “A ku khwatsi hi lezvi ndzi hanyako, ndzi ta neha hehla ka hloko yakwe a mawuyawuya ya lezvi a nga kanyisa a cihlambanyo ca mina+ ni ku tshova civhumelwano ca mina. 20 Ndzi ta hoxela likoka la mina hehla kakwe, i ta phasiwa hi likoka la mina la ku hlota hi lona.+ Ndzi ta mu yisa Bhabhuloni ndzi ya mu lamula seyo hi kota ya lezvi a nga kala ku tsumbeka ka mina.+ 21 Vontlhe lava va to tsutsuma ka mabutho yakwe va ta dawa hi cipadha, ni lava va to sala va ta hangalaswa matlhelweni wontlhe.*+ Makunu mu ta zvi tiva lezvaku hi mina, Jehovha, ha ndzoce ndzi nga wula.”’+

22 “‘Jehovha, a Hosi ya Hombe, i ngalo: “Ndzi ta teka dhavi madembeleni ya sedhare+ wo leha ndzi gi byala. Cikari ka zvidhavana zva wona zva le madembeleni, ndzi ta khatlula a hluke ga neke,+ niku mina wutsumbu ndzi ta gi byala citsungeni co leha ni co tlakuka.+ 23 Ndzi ta gi byala citsungeni co tlakuka ca Izrayeli; a madhavi ya wona ma ta kula niku wu ta pswala mihandzu wuva sedhare wa hombe. A zvinyanyani zva tixaka tontlhe zvi ta hanya lahasi ka wona zvi tlhela zvi zumba ndzhutini wa matluka ya wona. 24 A tisinya tontlhe ta khwati ti ta zvi tiva lezvaku mina, Jehovha, ndzi tsongahatile a sinya yo tlakuka, ndzi tlakusa a sinya ya yitsongwani;+ ndzi womisile a sinya yo nyuka, ndzi pfepfisa a sinya yo woma.+ Hi mina Jehovha ha ndzoce ndzi nga wula ndzi tlhela ndzi zvi maha.”’”