Zakariya

5 Ndzi no tlhela ndzi tlakusa matihlo, ndzi wona a bhuku go songiwa na gi haha. 2 A ngilozi leyo yi no ndzi wutisa, yiku: “Cini u ci wonako?”

Mina ndziku: “Ndzi wona a bhuku go songiwa gi hahako, ga 20 wa mikono* a kuleha ni 10 wa mikono a kuanama.”

3 Hi kulandzela yi te ngalo ka mina: “Leci ciruko ci yako hehla ka misava yontlhe, hakuva ni wihi loyi a yivako,+ kota lezvi zvi tsalilweko ka tlhelo gin’we ga bhuku, a nga tsayisiwi; ni wihi loyi a hlambanyako,+ kota lezvi zvi tsalilweko ka tlhelo legi gin’wani ga bhuku, a nga tsayisiwi. 4 ‘Ndzi ci rumele’, ku wula Jehovha wa mabutho, ‘ci ta nghena lomu ndlwini ya khamba ni lomu ndlwini ya loyi a hlambanyako mawunwa hi vito ga mina; ci ta tshama lomu ndlwini leyo ci yiga, ci tlhela ciga ni mapulango ya yona ni maribye ya yona.’”

5 A ngilozi leyi yi nga kari yi wulawula na mina yi no tshinela, yiku ka mina: “Hi nga tlakusa matihlo, u wona leci ci humako.”

6 Ndzi no wutisa, ndziku: “Cini caleci?”

Yiku: “Leci cibya ca efa* ci humako.” Yi engeta, yiku: “Va wonekisa lezvo misaveni yontlhe.” 7 Ndzi no wona lezvaku a tapa ya muthovhu yi wa tlakusilwe; ku wa hi ni wasati a nga tshamile lomu ndzeni ka cibya leco. 8 A ngilozi yiku ka mina: “Loyi hi Kubiha.” Yi no mu tlhelisa lomu ka cibya ca efa, yi vhala nomu wa cona hi tapa yo bindza ya muthovhu.

9 Hi kulandzela, ndzi no tlakusa matihlo ndzi wona vavasati vambiri na vata hi le hehla hi kuhaha lomu moyeni, na va hi ni tipapa to fana ni ta sekwa. Va no tlakula cibya cikari ka misava ni tilo. 10 Ndzi no wutisa a ngilozi leyi yi nga kari yi wulawula na mina, ndziku: “Vaya naco kwihi a cibya ca efa?”

11 Yi no hlamula, yiku: “Vaya naco tikweni ga Xinari*+ kasi ku ya mu akela yindlu a wasati; loku yi mbhelile, i ta cheliwa lomo ka wutshamu gakwe gi mu fanelako.”