Ndlela ya ku tsakisa Nungungulu

HI NGA maha yini kasi hi tsakisa Nungungulu? Hi nga mu nyika nchumu wo kari? — Jehova i wula lezi: “Zontlhe zihari za khwati za mina.” I tlhela a wula lezi: ‘A siliva ya mina, ni nzalama ya mina.’ (Tisimu 24:1; 50:10; Hagai 2:8) Hambulezo, ku na ni nchumu wo kari hi nga nyikako Nungungulu. I nchumu muni? —

Jehova i hi tsika hi ti hlawulela ha hoce lezaku ha zi lava ku mu tirela kutani a hi zi lavi. A nga hi kurumeti ku maha lezi a zi lavako. Hikuyini Nungungulu a nga hi maha hi ndlela ya kuva hi zi kota ku hlawula ku mu tirela kutani ku nga mu tireli? A hi zi wone.

Kuzilava wa tiva michini yo kari yi mahako zilo zi tolovelako ku mahiwa hi vanhu. A michini leyo yi mahiwa hi ndlela ya ku yi zi kota ku maha ni xihi lexi a mumahi wa yona a lavako lezaku yi zi maha. Hikwalaho, a michini leyo a yi hlawuli ha woce lezi yi faneleko ku maha. Jehova na a hi vangile hi ndlela yo fana ni michini leyo. Na a zi kotile ku hi vanga hi ndlela ya ku hi maha lezi a lavako lezaku hi zi maha basi. Kanilezi, Nungungulu a nga mahangi lezo. Wa zi tiva a ku hikuyini? — A zibhonekana zo kari zi fana ni michini leyi hi wulawulako hi yona. Loku u thitha a butawu yo kari, zi maha lezi zi nga mahelwa ku maha zona ntsena. Wa tshuka u wona a xibhonekana xo fana ni lexo ke? — A vanhu vo tala va tolovela ku hatlisa va karala a ku hlakana hi xibhonekana xi nga mahiko zilo zinwani zo hambana ni lezi xi nga mahelwa zona. Nungungulu a nga lavi lezaku hi mu ingisa hi tlhela hi mu tirelisa ku khwatsi hi zibhonekana zi nga mahelwa ku mu ingisa ni ku mu tirela basi. Nungungulu i lava lezaku hi mu tirela hi ku mu ranza ni kuva hi lava ku mu ingisa.

U alakanya lezaku a Papai wa hina wa le tilweni i ti zwisa kuyini loku hi mu ingisa hi kuziranza? — Hi nga nzi byela: Loku papai na mamani va wona mahanyela ya wena, va ti zwisa kuyini? — A Biblia gi wula lezaku ‘a n’wana a tlharihileko i tsakisa papai wakwe, kanilezi a n’wana loyi a nga xipumbu i maha a mamani wakwe a bayiseka.’ (Mavingu 10:1) Wa tshuka u zi wona lezaku loku u maha lezi mamani na papai va ku byelako, va tsaka? — Kanilezi, va ti zwisa kuyini loku u nga va ingisi? —

Zezi a hi alakanyele Jehova, a Papai wa hina wa le tilweni. I hi byela lezi hi nga mahako kasi hi mu tsakisa. Teka a Biblia ga wena u vulula Mavingu 27:11. Ka vesi legi, Nungungulu i hi byela lezi: “Nwananga, tlhariha u maha a mbilu ya mina yi tsaka; kasi nza fela ku mu hlamula loyi a nzi rukako.” Wa zi tiva a ku zi wula kuyini a ku ruka munhu? — Xana Satani i mu rukisa kuyini Jehova? — A hi zi wone.

Alakanya lezaku lomu ka Xipimo 8 xa bhuku legi, hi gonzile lezaku Satani i lava kuva wa lisima a ku hunza vontlhe ni lezaku i lava ku a vanhu vontlhe va ingisa yena. Satani i wula lezaku a vanhu va khozela Jehova ntsena hi lezi a to va nyika wutomi ga pinzukelwa loku va mu khozela. Anzhako ka kuva Satani a mahile Adamu na Eva va tsika ku ingisa Nungungulu, Satani i lo kanetisana na Nungungulu. I lo byela Nungungulu aku: ‘A vanhu va tirela wena hi kota ya zilo lezi u va nyikako. Nzi nyike xikhati, loku u vumela nzi ta ku komba lezaku nzi nga maha vanhu vontlhe va nga ku tireli.’

Hi lisine, a magezu lawa a ma kona hi kukongoma lomu ka Biblia. Kanilezi, loku hi gonza matimu ya Joba lomu ka Biblia, za dlunyateka lezaku Satani i wulile zilo zo khwatsi hi lezo a byela Nungungulu. Hakunene, yi wa hi mhaka ya lisima ka Satani na Jehova lezaku Joba i ta simama ku tsumbeka ka Nungungulu kutani ahihi. A hi vulule a maBiblia ya hina hi lera Joba xipimo 1 ni 2 kasi hi wona lezi zi nga humelela.

Lomu ka Joba xipimo 1, hi wona lezaku Satani i wa hi konawu le tilweni a xikhati lexi a tingelosi ti ngaya ka Jehova kasi ti ya wonana naye. Hikwalaho, Jehova i lo wutisa Satani aku: “Uta hi kwihi wena ke?” Satani i lo hlamula lezaku i wa hi lomu ka ku wona lezi zi nga kari zi maheka misaveni. Hikwalaho, Jehova i lo tlhela a mu wutisa lezi: ‘U wa kari u wona lezi Joba a nzi tirelisako zona ni lezi a kalako a nga mahi za kubiha?’ — Joba 1:6-8.

Satani i lo tekela ku ti yimelela, a hlamula Jehova aku: ‘Joba i tirela wena hi lezi a kalako a nga hi na zikarato. Loku u tsika ku mu vikela u tlhela u nga ha mu katekisi, i ta ku rukatela na u zi wona hi mahlo.’ Hikwalaho, Jehova i lo mu hlamula lezi: ‘Eyo, Satani, mu mahe ni xihi u xi lavako, ntsena lezaku u nga mu bayisi a miri wakwe.’ — Joba 1:9-12.

Zini lezi Satani a nga maha? — I lo maha lezaku ku yiviwa a tihomu ni timbongola ta Joba va tlhela va daya lava va nga kari va ti hlayisa. Anzhako ka lezo, ku lowa xingwalangwanza xi daya a tiyivu ni varisi va tona. Hi nzhako ka xikhati, ku lota vanhu va ta yiva a makameli va tlhela va daya lava va nga ma hlayisa. Hi kugumesa, Satani i lo vanga moya wa hombe, wu wisa yindlu yi nga hi ni 10 wa vana va Joba, zonake vafa vontlhe. Hambu lezi ku nga humelela zontlhe lezo, Joba i lo simama a tirela Jehova. — Joba 1:13-22.

A xikhati lexi Jehova a nga wonana kambe na Satani, Jehova i lo byela Satani lezaku Joba i wa ha simama a tsumbekile. Satani i lo ti yimelela kambe aku: ‘Loku u nzi tsika nzi bayisa a miri wakwe, i ta ku rukatela na u zi wona hi mahlo.’ Hikwalaho, Jehova i lo tsika Satani a bayisa miri wa Joba, kanilezi i lo mu byela lezaku a nga mu dayi.

Satani i lo sangula ku xanisa Joba hi zidlayi zi nga sangula ku tata a miri wakwe wontlhe. Zi lo nuha nguvu laha ka ku ne munhu munwe a nga zi lavi ku tshama laha kusuhani na Joba. Ni sati wakwe i lo mu byela lezi: “Rukatela Nungungulu, ufa!” Lava va nga kari va ti maha vanghana vakwe va lota va ta mu vuxela. Laha va nga chikele, va lo mu nyika nanzu va tlhela va mu maha a tizwa na a bihile hi ku mu byela lezaku xi kona a nga mahile lexi xi nga maha lezaku a kumana ni zikarato lezo. Hambu lezi Satani a nga mu vangele zikarato zontlhe lezo Joba, a tlhela a mu zwisa kubayisa, Joba i lo simama a tirela Jehova hi kutsumbeka. — Joba 2:1-13; 7:5; 19:13-20.

U alakanya lezaku Jehova i ti zwisile kuyini hi ku wona Joba na a tsumbeka? — Jehova i tsakile nguvu hakuva makunu i wa ta mu byela lezi Satani: ‘Wa mu wona Joba! I nzi tirela hi lezi a zi lavako.’ Wa zi lava ku fana na Joba, uva munhu loyi Jehova a zi kotako ku kombisa hi yena lezaku Satani muhembi? — Hi lisine, i lungelo ga hombe nguvu a ku tirela Jehova, hi komba lezaku Satani i wo hemba a xikhati lexi a nga wula lezaku a nga zi kota ku maha vanhu vontlhe va nga tireli Jehova. Kunene, Jesu i zi wonile kota lungelo a ku maha lezo.

Mugonzisi wa Hombe a nga zangi a vumela ku maha za kubiha hi ku kucetelwa hi Satani. Hi nga alakanyela lezi a xikombiso xakwe xi nga mu tsakisisa zona a Papai wakwe! Hi ndlela leyo, Jehova i zi kotile ku xungeta Jesu hi kutsaka a hlamula Satani aku: ‘Wa mu wona a N’wana wa mina! I simama a kombisa kutsumbeka ko mbhelela hi kota ya lezi a nzi ranzako!’ Jesu yenawu i tsakile nguvu hi ku tsakisa mbilu ya Papai wakwe. Hi kota ya kutsaka loko, Jesu i zile a timisela ni kufa laha mhanzeni ya xanisa. — Maheberu 12:2.

Wa zi lava ku fana na Mugonzisi wa Hombe u tsakisa Jehova? — Simama ku gonza u tiva lezi Jehova a lavako lezaku u maha, u mu tsakisa hi ku maha lezi a zi lavako!