Maha wunghana ni lava va ranzako Nungungulu

A VANGHANA hi lava hi ranzako ku bhula navo ni ku tshama navo. Kanilezi, a xa lisima kuva ni vanghana va va nene. U alakanya lezaku hi mani a munghana wa mu nene a ku hunza vontlhe lava hi nga va kumako? — Hi zona, hi Jehova Nungungulu.

Hi nga maha vanghana va Nungungulu futsi? — A Biblia gi wula lezaku Abrahama, ku nga wanuna a hanyileko ka xikhati xa kale nguvu, i wa hi “munghana wa Jehova.” (Jakobe 2:23, Tradução do Novo Mundo) Wa zi tiva a ku hikuyini a nga hi munghana wa Nungungulu? — A Biblia gi wula lezaku Abrahama i lo ingisa Nungungulu. I wa ingisa hambu loku lezi a nga kombeliwa ku maha zi karata. Hikwalaho, kasi hi maha vanghana va Jehova, hi fanele ku mu tsakisa, a ku fana ni lezi Abrahama a nga maha, ni lezi Mugonzisi wa Hombe a mahileko, loyi xontlhe xikhati a tsakisako Jehova. — Genesisi 22:1-14; Johani 8:28, 29; Maheberu 11:8, 17-19.

Jesu i lo byela a vapizani vakwe aku: “Nwina mu vanghana va mina, loku mu maha lezi nzi mu leletelako.” (Johani 15:14) Kota lezi a zilo zontlhe lezi Jesu a nga zi wula zi tako hi ka Jehova, Jesu i wa wula lezaku a vanghana vakwe ku wa hi lava va nga maha lezi Nungungulu a nga va byela ku maha. Hi lisine, vontlhe a vanghana vakwe va wa ranza Nungungulu.

A vanghana va hombe va Mugonzisi wa Hombe ku wa hi vapostoli vakwe, lava a mifota yabye yi nga ka phajina 75 ga bhuku legi. Va wa enza naye va tlhela va mu vuna ntirweni wa kuxumayela. Jesu i wa mbheta xikhati xo leha ni vavanuna lava. Va waga zinwe, va tlhela va bhula zinwe xungetano hi Nungungulu. Niku va wa maha zilo zinwani na va hi zinwe. Kanilezi, Jesu i wa hi ni vanghana vanwani vo tala. I wa tshama navo, va tsaka zinwe.

Hi xikombiso, Jesu i wa ranza nguvu a ngango wo kari wu nga tshama ka xidoropana xa xi tsongwani xa Betania, xi nga hi kusuhani ni doropa ga hombe ga Jerusalema. Wa zi alakanya a ku hi vamani lava va nga lumba a ngango lowo? — Ku wa hi Maria, Marta ni makabye wabye Lazaru. Jesu i wulile lezaku Lazaru munghana wakwe. (Johani 11:1, 5, 11) Lexi xi nga maha Jesu a wu ranza nguvu a ngango lowo, ni ku ranza ku tshama navo, hi lezi va nga ranza Jehova va tlhela va mu tirela.

Kanilezi, lezo a zi wuli lezaku Jesu i wa nga kombisi wunene ka lava va nga kala va nga tireli Nungungulu. Vonawu i wa va mahela wunene. Jesu i waya mitini yabye a tlhela aga navo. Lezo zi mahile vokari va wula lezaku Jesu i wa hi ‘munghana wa vahlengisi va mali ya khupo ni vaonhi!’ (Mateu 11:19) A lisine hi lezaku Jesu i wa ngayi mitini ya vanhu lavo hi ku tsakisiwa hi mahanyela yabye. I wa va enzela hi ku lava ku wulawula navo xungetano hi Jehova. I wa zama ku va vuna lezaku va tsika ku maha zilo za kubiha va tirela Nungungulu.

Lezo zi humelele ka siku go kari doropeni ga Jeriko. Jesu i wa hunza hi laha doropeni lego na aya Jerusalema. Ku wa hi ni vanhu vo tala, niku xikari ka vanhu lavo ku wa hi ni wanuna a vito gakwe a nga hi Zakeu. I wa lava ku wona Jesu. Kanilezi Zakeu i wa komile, niku i wa nga ta zi kota a ku mu wona hi kota ya vanhu vo tala va nga hi mahlweni kakwe. Hikwalaho, i lo va rangela a tsutsuma a ya kanziha ka sinya yo kari kasi a zi kota ku wona Jesu a xikhati lexi a nga wa ta hunza hi laho.

A xikhati lexi Jesu a nga chikela laha ka sinya leyo, i lo cuwuka hehla aku: “Hatlisa u chika hakuva inyamutlha nzi fanele ku ya tshama ndlwini ya wena.” Kanilezi, Zakeu i wa hi munhu wo ganya, loyi a nga mahile zilo zo biha nguvu. Hikuyini Jesu a nga lava kuya kaya ka wanuna loye wo biha? —

A hi lezaku Jesu i wo tsakisiwa hi mahanyela ya wanuna loye. I yile kaya kakwe kasi ku ya wulawula naye xungetano hi Nungungulu. I wa wonile lezi Zakeu a nga ti karatisile zona kasi aza a mu wona. Hikwalaho, i zi tivile lezaku kuzilava Zakeu i wa ta ingisela. Lexo xi wa hi xikhati xa xi nene kasi ku wulawula naye xungetano hi lezi Nungungulu a lavako lezaku a vanhu va hanyisa zona.

Makunu gi vile gihi a wuyelo ga lezo? — Zakeu i lo tsakisiwa hi lezi Jesu a nga zi gonzisa. I lo ti sola nguvu hi lezi a nga kalavele vanhu, niku i lo tsumbisa ku va tlhelisela a mali yabye leyi a nga va kalavele. I lo gumesa a maha mulanzeli wa Jesu. Ntsena anzhako ka lezo, hi kona Jesu na Zakeu va nga maha vanghana. — Luka 19:1-10.

Loku hi pimanyisa a xikombiso xa Mugonzisi wa Hombe, xana hi nga ta enzela vanhu va kalako va nga hi vanghana va hina ke? — Hi zona, hi ta va enzela. Kanilezi, hi nga taya mitini yabye hi kota ya ku tsakisiwa hi mahanyela yabye. Niku hi nga ta maha navo zilo za kubiha. Hi ta va enzela kasi hi ya wulawula navo xungetano hi Nungungulu.

Kanilezi, a vanghana va hina va hombe hi vona hi ranzako ku mbheta xikhati xo leha navo. A munghana wa mu nene, hi loyi a ranziwako hi Nungungulu. A vanhu vo kari kuzilava ne a va zi tivi a ku himani Jehova. Kanilezi loku va zi lava ku mu tiva, hi nga va vuna. Niku loku hi kufamba ka xikhati va mu ranza Jehova a ku fana na hina, hi kona va tova vanghana va hina va hombe.

A ndlela yinwani ya ku pola ku a munhu loye munghana wa mu nene kutani ahihi, ku wona lezi a zi mahako. Xana a munhu loye wa maha zakubiha ka vanwani a gumesa a va hleka? Lezo a hi zi nene, a hi zona? — Xana munhu wo tshama hi ku ti vangela zikarato? A hi lavi ku ti nghenisela ka zikarato hi kota ya kuva zinwe naye, a hi zona? — Zama ku wona kambe lezaku a munhu loye wa maha zilo za kubiha ha womu a gumesa aku i tlharihile nguvu hi lezi a nga kala ku kumiwa ke. Hambu loku a nga kumiwi, Nungungulu i zi wonile lezi a zi mahileko, a hi zona? — U alakanya lezaku a munhu wo khwatsi hi loye a nga maha munghana wa mu nene? —

Teka a Biblia ga wena. A hi wone lezi a vanghana va nga khumbisako zona a wutomi ga hina. A mutsalo wa kona i 1 Va Le Korinte xipimo 15, a vesi ga 33. U vululile? — Wu wula lezi: “Mu nga kohliswi; a ku tolovelana ni vakubiha ka bihisa a mahanyela ma nene.” Lezo zi wula ku loku hi mbheta xikhati xo leha ni vanhu va kubiha, hi nga gumesa hi mahawo va kubiha. Niku lisine kambe lezaku a vanghana va va nene va hi vuna ku kombisa matshamela ya ma nene.

Hi nga tshuki hi rivakelwa lezaku a Munhu wa lisima nguvu wutomini ga hina hi Jehova. A hi lavi ku onha a wunghana ga hina naye, ha zi lava ke? — Hi fanele ku maha wunghana ntsena ni lava va ranzako Nungungulu.