A wulawula hi maranga ya tiyivhu ni murisi nene

Laha Jesu a nga kari gondzisa lomu Judhiya, i no wulawula hi zvilo zvi nga tiviwa khwatsi hi lava va nga mu ingisela — ku nga tiyivhu ni maranga kutani zvibala. Kanilezvi, zvi wa hi zvo fananisa. Kuzvilava a vaJudha va alakanyile magezu ya Dhavhidha yaku: “Jehovha hi murisi wa mina, ndzi nga ta vhumala nchumu. Wa ndzi etlelisa mikoveni yo nyuka”. (Lisimu 23:1, 2) Ka lisimu yin’wani Dhavhidha i rambile va ka Izrayeli aku: “A hi khizameleni Jehovha, a mumahi wa hina. Hakuva yena i Nungungulu wa hina, hina hi tiko ga wuriselo gakwe”. (Lisimu 95:6, 7) Kunene, a vaIzrayeli lavo ku nga hundza cikhati co leha na va nyikilwe Nayo wa Mosi kasi va hanya hi wona, va wa fananisiwa ni ntlhambi wa tiyivhu.

A tiyivhu leto — ku nga vaIzrayeli — ti wa hi lomu rangeni kutani cibaleni co fananisa hakuva va wa hi ka civhumelwano ca Nayo wa Mosi. A Nayo wa Mosi wu wa tira kota libhiyo, li nga va vhikela mikhuwo yo biha ya vanhu lava va nga kala va nga hi hasi ka lulamiselo lego. Kanilezvi, a vaIzrayeli vo kari va wa xanisa ntlhambi wa Nungungulu. Jesu i te: ‘Loyi a nga ngheniko hi nyangwa le rangeni ga tiyivhu, kanilezvi a kandziha hi yin’wani ndlela, loyi . . . muyivi ni khamba. Kanilezvi loyi a nghenako hi laha nyangweni hi murisi wa tiyivhu.’ — Johani 10:1, 2.

Kuzvilava a vanhu va alakanyile lava va nga ti wulile ku va wa hi Mesiya kutani Kristu. Lavo va wa fana ni makhamba, niku a vanhu va wa nga faneli ku landzela vakanganyisi lavo. Kanilezvi, va wa fanele ku landzela “murisi wa tiyivhu” loyi Jesu a nga wulawula hi yena.

I te: “A murindzeli wa nyangwa wa mu vhululela; a tiyivhu ti ingisa a gezu gakwe; a vitana a tiyivhu takwe hi mavito ya tona, a ti humesa lahandle. Loku a humesile tiyivhu takwe tontlhe, i ranga mahlweni ka tona, ni tiyivhu ti mu landzela, hakuva ta gi tiva a gezu gakwe. A mun’wani a ti na ku mu landzela, kanilezvi ti ta mu chava; hakuva a ti gi tivi a gezu ga van’wani.” — Johani 10:3-5.

Ka malembe ma nga hundzile, Johani Mubhabhatisi i tirile kota murindzeli wa nyangwa, a tivekisa Jesu kota loyi a tiyivhu leto to fananisa ti nga hi hasi ka Nayo wa Mosi ti nga fanele ku mu landzela. A tiyivhu to kari ta le Galileya hambu ta kwalomuya Judhiya futsi, ti wa gi tivile gezu ga Jesu. Makunu Jesu i wa ta ti “humesa” a ti yisa kwihi, niku zvini zvi nga wa ta humelela loku ti mu landzela? Kuzvilava a vokari ka lava va ngazwa mufananiso lowo va karatekile, hakuva va wa nga zvi zwisisi ‘lezvi a nga va byela’. — Johani 10:6.

Jesu i no tlhamusela aku: ‘Mina ndzi nyangwa ya tiyivhu. Vontlhe lava va ndzi rangeleko vayivi ni makhamba; kanilezvi a tiyivhu a ti va ingisangi. Mina ndzi nyangwa, loku munhu a nghena ha mina, i ta hanyiswa; i ta nghena a huma, a kuma’ wutshamu gi nga ni byanyi ga gi nene. — Johani 10:7-9.

Zva dlunyateka ku Jesu i wo sangulisa zvilo zva zviswa. Va wa zvi tiva ku Jesu i wa nga hi nyangwa ya civhumelwano va Nayo, leci ku nga hundza malembe na ci tira. Zva woneka ku i wo va byela lezvaku a tiyivhu leti a nga ti “humesa lahandle” ti wa fanele ku nghena ka ranga kutani ka cibala cin’wani. Makunu ti wa ta kuma yini?

Jesu i no simama ku tlhamusela ntiro wakwe, aku: “Mina ndzi tile kasi ti fela ku kuma wutomi, tiva nago hi kuteleko. Mina ndzi murisi nene. A murisi loyi nene i nyikela kuhanya kakwe hi kota ya tiyivhu.” (Johani 10:10, 11) Ka khati go kari, Jesu i wa tiyisile vapizani vakwe aku: “N’wina ntlhambi wu tsongwani, mu nga chavi; hakuva kurandza ka . . . [Papayi] wa n’wina a ku mu nyika Mufumo.” (Luka 12:32) Kunene, lava va “ntlhambi wu tsongwani” hi vona va to rangelwa hi Jesu a va yisa lomu ka ranga kutani cibala ca ciswa, kasi va ‘fela ku kuma wutomi, vava nago hi kuteleko’. Hakunene, i thomo ga hombe a kuva ka ntlhambi lowo!

Hambulezvo Jesu a nga nyimangi laho. I no engeta aku: “Ndzi na ni tiyivhu tin’wani, leti ti nga hiko ta . . . [ranga legi]; na tona kambe ndzi fanele ku ti neha, ti ta ingisa a gezu ga mina. Zvonake ku tava ni ntlhambi mun’we ni murisi mun’we.” (Johani 10:16) Jesu i te a ‘tiyivhu leto tin’wani’ a hi ta ranga legi. Lezvo zvi komba ku ku na ni ranga gin’wani go hambana ni legi ga leti ta “ntlhambi wu tsongwani”, leti ti to nyikiwa Mufumo. A tiyivhu ta maranga lawo ya mambiri, kutani zvibala, ti ta chachazelwa hi tindlela to hambana. Hambulezvo, tontlhe ti ta vhuneka hi ntiro wa Jesu. I te: Papayi “wa ndzi randza, hakuva ndzi nyikela a kuhanya ka mina”. — Johani 10:17.

A kutala ka lava va nga muzwa va no wula lezvi: “I na ni dhimoni, i hungukile”. Kanilezvi a van’wani va no komba lezvaku va wa ingisela hi ku khatala futsi niku va wa lava ku landzela yena Murisi Nene, vaku: ‘A magezu lawa a hi ya munhu wo ngha a hi ni dhimoni. Kunene a dhimoni ga zvi kota ku hanyisa mahlo ya zvikhumu ke?’ (Johani 10:20, 21) Zvi komba ku va wa wula cikhati leci Jesu a nga hanyisa wanuna a nga pswalilwe na a hi cikhumu.