WA HA ZI ALAKANYA KE?

U gonzile zi buva a marevista A Murinzeli ma ha hi ku hunzako? Loku zi hi tano, zama ku hlamula a ziwutiso lezi zi lanzelako:

Hi rini laha Jesu a nga ‘kanela ka mimoya leyi yi nga makhotsweni’? (1 Ped. 3:19)

Zi wonekisa ku khwatsi xikhatanyana nzhako ka kuvuxiwa kakwe, Jesu i lo kanela ka mimoya leyi ya kubiha lezaku a kulamula yi faneleko ku lamulwa ha kona ku wa tata hehla ka yona. — 15/6, phajina 23.

Zikarato muni za zinharu lezi a vanhu va lwisanako nazo kasi ku kuma litsako wukatini ga wumbiri?

Hi lezi: ku nga tsiki wukati ga wena go sangula gi tlimba a wukati ga wena ga giswa; ku hanyisana ni vanghana va kale lava va nga mu tiviko a sati kutani nuna wa wena wa muswa; ku tsumba sati wa wena hi lezi loyi wo sangula a nga kala ku tsumbeka. — 1/7, maphajina 9-10.

Hi rini laha Jesu a lamulako vanhu kota tiyivu kutani timbuti? (Mat. 25:32)

Ku tava ka xikhati lexi a tota lamula vanhu kuxanisekeni ka hombe, anzhako ka kuloviswa ka wukhongeli ga mawunwa. — 15/7, phajina 6.

Hi rini laha a vamahi va kubiha va kumbukiwako ka mufananiso wa mavele ni nyasavari va rilako ni ku getsela meno? (Mat. 13:36, 41, 42)

Va ta maha lezo kuxanisekeni ka hombe a xikhati lexi va to wona lezaku a ku na ndlela yo pona ku loviswa. — 15/7, phajina 13.

Xana a magezu ya Jesu xungetano hi nanza gi tsumbekileko ni go tlhariha ma tatiseka rini? (Mat. 24:45-47)

Ma sangulile ku tatiseka, na ku nga hi hi Pentekosta wa 33 Nguveni ya Hina, kanilezi anzhako ka 1914. Hi 1919, a nanza gi lo yimiswa hehla ka malanza, ku nga maKristu wontlhe ma gisiwako hi tlhelo ga moya. — 15/7, maphajina 21-23.

Hi rini laha Jesu a yimisako a nanza gi tsumbekileko hehla ka zontlhe a nga nazo?

I ta zi maha ka masiku ma ha tako, kuxanisekeni ka hombe, a xikhati lexi a nanza gi tsumbekileko gi amukelako a nchachazelo wa le tilweni. — 15/7, phajina 25.

Xana a vanhu lava va nga kumbukiwiko hi mavito lomu ka Biblia va no maha zo biha kutani kuva vanhu va nga vuniko nchumu ke?

Ku na ni vanhu va va nene ni vo biha va kalako va nga kumbukiwi hi mavito lomu ka Biblia. (Rute 4:1-3; Mat. 26:18) Ka tingelosi tontlhe to tsumbeka leti ti nga kona, timbiri ntsena ti kumbukiwako hi mavito. — 1/8, phajina 10.

Ahandle ka ntamu wa Nungungulu, xini xi vunileko a 230 wa Timboni lezaku ti pona ka lipfhumba lo leha la ku suka hi livaleni la xanisa la Sachsenhausen?

Hambu lezi va nga rerekile hi mababyi ni ku tsoniwa zakuga, va lo simama ku tiyisana kasi va zi kota ku timisela. — 15/8, phajina 18.

Hikuyini a matimu lawa ma wulawulako hi vaIsraeli na va tsemakanya a Congo wa Jordani va nghena Tikweni gi Tsumbisilweko ma hi tiyisako hlana?

Hambu lezi a congo wu nga tele nguvu hi mati, Jehova i lo wu nyimisa kasi a vanhu vakwe va zi kota ku tsemakanya. Lezo zi fanele ku ngha zi tiyisile kukholwa kabye ni ku mu tsumba kabye. A matimu lawa ma nga tiyisa a kukholwa ka hinawu. — 15/9, phajina 16.

A kuva a Biblia gi kumbuka nguvu mivala zi komba yini?

A ndlela leyi a Biblia gi tirisako hi yona mivala yi komba lezaku Nungungulu wa zi zwisisa ku a mivala yi nga khumba a kutizwa ka hina niku yi nga hi vuna ku alakanya zilo. — 1/10, maphajina 14-15.

Xana a xiprofeto xa Mika 5:5 xungetano hi varisi ni tihosana xi tatisekisa kuyini nyamutlha?

Hi zwisisa lezaku a ‘7 wa varisi ni 8 wa tihosana’ va kumbukiwako ka Mika 5:5 ku wuliwa a madota ma yimisilweko lomu bandleni, lawa ma tiyisako a vanhu va Nungungulu lezaku va nga hluliwi laha va to vukelwa xikhatini xi tako. — 15/11, phajina 20.

Hi zihi zigelo zo kari zi mahako Nungungulu a laveka wutomini ga hina?

Hi lava wurangeli gi nene ni ku tiva ku hikuyini a wutomi gi teleko hi zikarato, ku nga zilo lezi Nungungulu a hi tlhamuselako ziku dlunya. I hi komba ndlela ya kuva hi hanya khwatsi ni kuva ni litsako, niku i ta tatisa a zitsumbiso zi nga Mhakeni yakwe kasi ku tatisa a kungo legi. — 1/12, maphajina 4-6.