A xitsumbiso xa paradise laha misaveni xi cicile wutomi ga mina!

Nzi pswalilwe le Riga, ku nga doropa legi gi nga tsinza ga Letônia. Mina ni makabye wa mina wa nhanyana hi wundlilwe hi mamani. Hambu lezi mamani a nga wa Katolika, hi woya chechini hi masiku yo hlawuleka ntsena. Nzi wa kholwa kusukela wunwananeni lezaku ku na ni wokari wa ntamu wu hunzeleleko kutlakuka, kanilezi kota muswa, nzi wa colopetelwa hi zilo zinwani zo tala nzi nga zi ranza ku maha.

Laha nzi ngaya nzi kula, mamani wa mina i lo wona lezaku nza ranza ku gwawulela zilo nzi gumesa nzi zi fasela kambe. Lezi laha mutini ku nga hi ni zilo zo tala za ku u nga zi gwawulela u tlhela u zi fasela kambe, mamani i wa chava nguvu ku nzi siya nzoce kaya. Hikwalaho i lo nzi xavela ntlawa wa zilo zaku u nga zi fasela zi maha zimovana kutani zilo zinwani. Nzi wa zi ranza nguvu ku fasela zilo lezo nzi tlhela nzi zi gwawulela. Lezo zi wa zwanana khwatsi ni nchumu wunwani nzi nga wu ranza — ku nga ku fambisa mota. Mamani i lo nzi tsalelisa ka mapalisana ya mimota ma nga vitanwa ku Zelta Mopēds (Mimota ya nzalama). Nzi sangulile ku maha mapalisana hi mimota yaku wa yi fambisisa ku khwatsi i bhasikeni kambe, nzi guma hi kufamba ka xikhati nzi sangula ku tirisa a mimota ya lisine.

Nzi wa gonza hi xihatla, hikwalaho nzi lo sangula ku vuvuma hi xikhatanyana mapalisaneni lawo ya mhango. Nzi palile makhati manharu ka mapalisana ya Letônia, nzi tlhela nzi pala kumbiri ka mapalisana ya matiko ya Báltico.

Ka xikhati lexi nzi nga kari nzi vuvuma nguvu ka ntiro wa mina, a xigango xa mina Evija (loyi hi kufamba ka xikhati a nga maha sati wa mina) i lo sangula ku bhulisana ni Timboni ta Jehova. I wa kumile mabhuku yo kari ya tona, lawa ma nga hi ni wutshamu ga ku kombela xigonzo xa Biblia. I lo tsala a mahungu lawa ma nga laveka, zonake a rumela. Anzhako ka xikhati xi tsongwani, i lo enzelwa hi Timboni timbiri, zonake a sangula ku gonza Biblia nato. Nzi wa nga soli nchumu ka lezo, kanilezi ka xikhati lexo, mina nzi wa nga khatali nguvu hi zilo za wukhongeli.

Anzhako ka xikhati xo kari, a Timboni leto ti lo nzi ramba lezaku nzi tshama nzi ingisela a xigonzo xa Evija. Nzi lo ya tshama nzi ingisela, nzi tsakiswa hi lezi nzi nga zizwa. A xinwe xa zilo zi nga khumba nguvu a mbilu ya mina xi vile xitsumbiso xa Biblia xa paradise laha misaveni. Hi xikombiso, va nzi kombile a magezu ma nga ka Tisimu 37:10, 11, ma nge ngalo: “Ka ha hi xikhatanyana, zonake a wakubiha a nga ta kuva kona, loku u languta wutshamu gakwe i tava hava. Kanilezi lava va rulako va taga tshomba ya tiko, va ta xalaliswa hi kurula ka hombe.” A xitsumbiso lexo xi nzi tsakisile nguvu.

A kuxuva ka mina ka moya ku loya ku kula. Nzi lo sangula ku zwisisa lezaku ku na ni mawunwa yo tala ya wukhongeli. Kanilezi a tigonzo ta Biblia ti lo nzi khumba nguvu hakuva ti wa dlunyateka ti tlhela ti zwisiseka.

Laha nzi ngaya nzi simama ku gonza a Biblia, nzi lo tiva lezi Jehova a gi nyikisako zona lisima wutomi. (Tisimu 36:9) Lezo zi nzi mahile nzi ehleketa hi mapalisana ya mina — nzi wa nga ha lavi ku veka wutomi ga mina mhangweni. Nzi wa lava ku tirisa a wutomi ga mina kasi ku dumisa Jehova. Hikwalaho, a nduma, wudzunzo, ni litsako leli nzi nga li kuma mapalisaneni lawo zi wa nga ha hi za lisima ka mina.

Hi 1996, nzi loya ka gotsovanyano wa matiko manyingi wa Timboni ta Jehova le Tallinn, Estônia, kusuhani ni laha nzi nga tolovela ku maha kona mapalisana ya mimota. Laha gotsovanyanweni, nzi lo wona vanhu va matiko yo hambanahambana na va tlhangana hi kuzwanana ni kurula. Hi xikombiso, a xikhati lexi a Mboni yo kari yi nga lahla xipachi xa yona, nzi waku yi nga ta ha xi kuma kambe. Kanilezi, na zi nga seya kule, xi lo kunwa hi Mboni yinwani, yi xi tlhelisa na xi nga kiyeli nchumu. Nzi lo hlamala nguvu! Nzi lo zi zwisisa makunu lezaku a Timboni hakunene ti hanya hi matshinya ya milayo yo tlakuka ya Biblia. Mina na Evija hi lo simama ku kula xigonzweni xa hina, zonake hi 1997 hi bapatizwa kota Timboni ta Jehova.

A vokari va nga hi vanghana va mina va file hi kota ya wutomi gabye go tshisa hehla ka mimota. Hi ku gonza Biblia, nzi lo zwisisa lezaku nzi na ni wutihlamuleli mahlweni ka Jehova, a Munyiki wa wutomi. Ko khwatsi a ku zwisisa lezo zi ponisile a wutomi ga mina.

Hi malembe yo tala, mina na Evija hi vile ni lungelo ga kuva vatireli va xikhati xontlhe hofiseni ya ravi ya Timboni ta Jehova le Riga. Zalezi hi kuma litsako kuwundleni ka n’wana wa hina Alise, ni ku mu gonzisa ku ranza Jehova. Nzi na ni lungelo kambe ga ku ya tira siku ginwe hi viki hofiseni ya wuhunzuluseli, na nzi lungisa mimova ni zilo zinwani zi onhekako. Nzi tsaka nguvu hi ku tirisa khwatsi a wutlhari legi nzi gi gonzileko na nza ha hi nwanana! Kunene, nza ha gwawulela zilo nzi tlhela nzi zi fasela kambe.

Nzi gi nyika nguvu lisima a lungelo ga ku nyika wukustumunyu zinwe ni ngango wa mina xungetano hi Nungungulu wa lisine, zontlhe lezo hi kota ya lezi nzi nga zi gonza ka Biblia. Hakunene, a xitsumbiso xa paradise laha misaveni xi cicile wutomi ga mina!