Xipimo Xa Wumakume Mambiri Ni Xinwe

A Khungo Ga Jehova Gi Ya Gi Tatiseka Hi Ndlela Yo Hlamalisa

1, 2. (a) Hi gihi a khungo ga Jehova xungetano hi zivangwa zakwe zi pimisako? (b) Hi vamani lava va nga kari va patseka ngangweni wa vakhozeli va Nungungulu lowu wu nga hi ni wumunwe?

A KHUNGO ga Jehova ga liranzo hi lezaku a zivangwa zontlhe zi pimisako ziva ni wumunwe kukhozeleni ka Nungungulu munwe wa zinene niku zona zontlhe zi fanele ku ti buza hi kutlhatlheka ko ngangamela kota vana va Nungungulu. Lezo hi zona kambe lezi zi laviwako nguvu hi varanzi va kululama.

² Jehova i lo sangula ku tatisa a khungo lego ga hombe a xikhati lexi a sangulileko a mitiro yakwe ya kuvanga. A xivangwa xakwe xo ranga xive N’wana loyi a nga “kungangamela ka wudumo [ga Nungungulu], a nga mu tekelela yena wutsumbu” kusukela kuvuxiweni kakwe hi ka vafileko. (Maheberu 1:1-3) A N’wana loyi i wa hambene ni vontlhe hakuva i vangilwe hi Nungungulu wutsumbu. Hi kulanzela, a zinwani zivangwa zi wa ta tumbuluxiwa hi kutiriswa a N’wana loye: na ku sangula hi tingelosi le tilweni, zonake ku lanzela vanhu laha misaveni. (Joba 38:7; Luka 3:38) Vontlhe lavo va wa wumba a ngango wunwe wuakweni gontlhe. A ka vontlhe lavo, Jehova i wa hi Nungungulu, a Hosi ya Hombe Wuakweni Gontlhe, ni Dadani wabye wa liranzo.

 3. (a) Xini lexi hina hontlhe hi pswalilweko naxo? (b) Hi gihi a lulamiselo ga liranzo legi Jehova a maheleko a pswalo wa Adamu?

³ A xikhati lexi a vapswali va hina va nyama va nga konelwa kufa kota vaonhi va ku zi ranza, va lo hlongolwa le Edeni va tlhela va aliwa hi Nungungulu. A va ha simamangi akuva xipanze xa ngango wakwe wa wuako gontlhe. (Genesisi 3:22-24; Deuteronome 32:4, 5) Hina hontlhe hi vana vabye, hikwalaho hi pswalilwe na hi hi ni kubyekelela ka kuonha. Kanilezi Jehova i wa zi tiva lezaku a vo kari xikari ka vana va Adamu na Eva va wa ta ranza kululama. Hi liranzo, Yena i lo maha lulamiselo legi ha gona a vanhu lavo va nga wa ta nghena “kutlhatlhekeni ka kungangamela ka vana va Nungungulu.” — Va Le Roma 8:20, 21.

Israeli A Luza Xiyimeko Xo Amukeleka

 4. Xana Jehova i nyikile lungelo muni a va ka Israeli va kale?

⁴ A xipimo xa 2.500 wa malembe anzhako ka kuvangiwa ka Adamu, Jehova i lo nyika vanhu vo kari a lungelo ga kuva ni kuzwanana ko hlawuleka na Yena. I lo hlawula a va ka Israeli va kale lezaku vava vanhu vakwe a tlhela a va nyika a Milayo yakwe. (Genesisi 12:1, 2) Yena i lo va maha vava tiko a tlhela a va tirisa zilweni zi yelanako ni khungo gakwe. (Deuteronome 14:1, 2; Isaya 43:1) Hambulezo, vona va wa ha hi wukhumbini ga xionho ni kufa, hikwalaho va wa nga hi kutlhatlhekeni ka kungangamela loku Adamu na Eva va nga hi nako kusanguleni.

 5. Xana a vaIsraeli va luzisile kuyini a xiyimeko xabye xo hlawuleka mahlweni ka Nungungulu?

⁵ Hambulezo, a vaIsraeli va wa hi ni xiyimeko xo amukeleka mahlweni ka Nungungulu. Va wa hi ni wutihlamuleli ga ku kombisa xichawo ka Jehova kota Dadani wabye ni ku tira hi kuyelana ni khungo gakwe. Jesu i khanyisile a lisima la kuva vona va tatisa wutihlamuleli gabye. (Mateu 5:43-48) Kanilezi, a tiko ga Israeli gi tsikile ku maha lezo. Laha a vaJuda lavo va nga wula lezaku “hi na ni Dadani munwe, yena Nungungulu,” Jesu i lo tiyisa lezaku a mitiro yabye ni moya lowu va nga wu komba zi wa kaneta lezi va nga zi wula. (Johani 8:41, 44, 47) Hi 33 Nguveni ya Hina, Nungungulu i wa fuvisile Nayo, niku a kuzwanana ko hlawuleka ka yena na Israeli ku wa chikele magumo. Kanilezi, xana lezo zi wa wula lezaku a vanhu cima va wa nga ta ti buza hi kuzwanana ko amukeleka na Nungungulu?

A Kutlhanganyiswa Ka “Zilo Za Le Matilweni”

 6. Hi gihi a khungo ga “xaxameto” kutani wurangeli legi Paule a gi kumbukileko lomu ka Va Le Efesusi 1:9, 10?

⁶ Mupostoli Paule i lo komba lezaku a vo kari xikari ka vanhu va wa ta ti buza hi kuzwanana ko hlawuleka na Nungungulu. Hi xikombiso, xungetano hi lulamiselo ga Jehova legi ha gona lava va kholwako va nga wa ta zi kota kuva ziro za ngango Wakwe, Paule i lo tsala: “[Nungungulu] i lo hi tivisa a mifihlakalo ya kuranza kakwe kukotisa a kuxuva kakwe loku a ku xuvileko, lezaku a yimisa a xaxameto a kumbheleni ka xikhati, lowu ha wona a ta nga tlhanganyisa zilo zontlhe ka Kristu, a zilo za le matilweni ni lezi za laha misaveni.” (Va Le Efesusi 1:9, 10) A “xaxameto” kutani wurangeli legi gi khegela ka Jesu Kristu. Ha yena, a vanhu va nehiwa xiyinweni xo amukeleka mahlweni ka Nungungulu. A vanhu lavo va ntsengo wu pimilweko va na ni kutsumba ka ku hanya le tilweni. A vanhu va ntsengo wa hombe nguvu wa ku hunza lowo va ta hanya laha misaveni kala kupinzuka.

 7. Hi vamani lava va nga “zilo za le matilweni”?

⁷ A kusangula, ku lo hlengeletwa a “zilo za le matilweni” kusukela hi Pentekosta wa lembe ga 33 Nguveni ya Hina, ku nga lava va nga wa tava ziga-tshomba zinwe na Kristu le Mufunweni wa le tilweni. A xiseketelweni xa kukholwa kabye ka lisima la muphahlo wa Jesu, va lo hlayelwa kululama hi Nungungulu. (Va Le Roma 5:1, 2) Hi kufamba ka xikhati, ku lo patswa vaJuda ni Vamatiko, niku a “zilo za le matilweni” zi wa ta chikela a ntsengo wa 144.000. (Va Le Galatia 3:26-29; Kuvululelwa 14:1) Laha misaveni ku lo sala a misalela ya vona ntsena.

A Kutlhanganyiswa Ka ‘Zilo Za Laha Misaveni’

 8. Hi vamani lava va nga ‘zilo za laha misaveni,’ niku kuzwanana muni va nga nako na Jehova?

⁸ A wurangeli gwalego ga ginwe gi tlhanganyisa kambe a ‘zilo za laha misaveni.’ A vanhu va timiliyoni zalezi va tlhanganyiswa na va hi ni kutsumba ka ku hanya laha misaveni kala kupinzuka. Vona zinwe ni misalela ya ziga-tshomba za Mufumo va dumisa vito ga Jehova va tlhela va kulisa a wukhozeli gakwe hi wumunwe. (Isaya 2:2, 3; Zefania 3:9) Vona kambe va wona Jehova kota “Dadani” hakuva va mu tiva kota xibuka xa wutomi. Niku vona va na ni xiyimeko xo amukeleka mahlweni ka yena xiseketelweni xa kukholwa kabye nkhateni wa Jesu wu halatilweko. (Kuvululelwa 7:9, 14) Kanilezi kota lezi va simamako va nga mbhelelangi, a ku vumelwa hi kumbhelela kota vana va Nungungulu ka ha hi ka xikhati xi tako.

 9. Hi xihi xitsumbiso lexi a bhuku ga Va Le Roma 8:21 gi xi nyikako vanhu?

⁹ Zalezi, lava va nga ni kutsumba ka laha misaveni va rinzela hi kuxuva ka hombe a xikhati lexi a vanhu va ta nga “tirulwa wukhumbini ga kubola.” (Va Le Roma 8:21) A kutlhatlhiswa loko ku ta sangula anzhako ka kuva Kristu ni mabutho yakwe ya le tilweni va nehile magumo ya kuxaniseka ka hombe hi Har–Magedoni. Lezo zi ta wula a kuloviswa ka mafambisela ya zilo ya kubiha ya Satani, loku ku ta nga lanzelwa hi makatekwa ya Kufuma ka Kristu ka 1.000 wa Malembe ntanwini wa Mufumo. — Kuvululelwa 19:17-21; 20:6.

10. Xana a malanza ya Jehova ma ta yimbelela lisimu muni la kudumisa?

¹⁰ A hi kutsakisa ka xikhati lexi a malanza ya Jehova ya laha misaveni ma ta nga phindaphinda a magezu ya malanza yakwe ya le tilweni, lawa ma huwelelako hi kutsaka maku: “A mitiro ya wena nja hombe ya hlamalisa, Hosi Nungungulu Nyamintamu, a tindlela ta wena ti lulamile ti nene, wena Hosi ya matiko. Himani a ta nga kala ku ku chava, wena Hosi, a nga dzunzeleti a vito ga wena ke? Hakuva hi wena wece u basileko, a matiko wontlhe ma tata ma ta ku khizamela; hakuva a mitiro ya wena yi lulamileko yi wonekelisilwe.” (Kuvululelwa 15:3, 4) Ina, a malanza wontlhe ya Jehova ma ta patsana kukhozeleni ka Nungungulu munwe wa zinene. Hambu a vafileko va ta vuxiwa va tlhela va nyikwa a lungelo ga ku ti patsa ni vanwani kutlakuseni ka magezu yabye kasi ku dumisa Jehova. — Mitiro 24:15.

A Kutlhatlheka Ko Hlamalisa Ku Le Mahlweni

11. Kutlhatlheka muni loku ku to buziwa hi lava va to pona a kuxaniseka ka hombe?

¹¹ Anzhako ka kuva a kuxaniseka ka hombe, ni Har–Magedoni wa kona zi basisile misava hi ka wubihi, Satani a nga ta hava “nungungulu wa misava leyi.” A vakhozeli va Jehova va nga ta ha lwisana ni kucetelo wo biha wa Satani. (2 Va Le Korinte 4:4; Kuvululelwa 20:1, 2) A wukhongeli ga mawunwa gi nga ta ha chakisa Jehova ni ku tira kota kucetelo wa ku hambanyisa vanhu. A malanza ya Nungungulu wa lisine ma nga ta ha mahelwa zo biha ni ku xololwa hi vafumeli. A hi kutlhatlheka ko hlamalisa loku ku to buziwa!

12. Xana a vanhu vontlhe va ta tlhatlhisiswa kuyini ka kuonha ni ka mitiro ya kona?

¹² Kota “Yivana ya Nungungulu, leyi yi susako zionho za tiko,” Jesu i ta tirisa a lisima la muphahlo wakwe lezaku a fuvisa a zionho za vanhu. (Johani 1:29) A xikhati lexi Jesu a nga hi laha misaveni na a tsetselela a zionho za vanhu, i lo chuma lava a nga va tsetselela kota xikombiso xa lezo. (Mateu 9:1-7; 15:30, 31) Hi kufanana, Kristu Jesu, kota Hosi ya Mufumo wa le tilweni wa Nungungulu, hi ndlela yo hlamalisa i ta chuma zikhumu, a timbeveve, a ziwiri, a zilema, lava va babyako hi lihuhe, ni lava va babyako hi tinghumbe tinwani. (Kuvululelwa 21:3, 4) A “nayo wa kuonha” wu ta fuvisiwa ka vontlhe lava va ingisako lezaku a maalakanyo ni mitiro yabye zi hi lezi zi xalalisako, ka vona venyi ni ka Nungungulu. (Va Le Roma 7:21-23) A kumbheleni ka 1.000 wa Malembe, vona va tava vanhu vo mbhelela, va “fanana” ni Nungungulu munwe wa zinene. — Genesisi 1:26.

13. A kumbheleni ka Kufuma ka 1.000 wa Malembe, zini lezi Kristu a to zi maha, niku xana zi ta guma hi yini?

¹³ A xikhati lexi Kristu a to mbhelelisa vanhu, i ta guma a tlhelisela a wuhosi legi Dadani wakwe a nga mu nyikile lezaku a maha hi gona a ntiro lowo: I “tlhelisela a mufumo ka Nungungulu Dadani; anzhako ka kuva na a hetisile a kufuma kontlhe, ni wuhosi gontlhe ni mintamu. Hakuva i yimelwe hi ku fuma a kala a veka a valala vakwe vontlhe lahasi ka mikonzo yakwe.” (1 Va Le Korinte 15:24, 25) A Kufuma ka Mufumo ka 1.000 wa Malembe ku ta ngha ku tatisile a khungo ga kona hi kumbhelela; hikwalaho ku nga ta ha laveka lezaku a mufumo lowu wu simama xikari ka Jehova ni vanhu. Niku kota lezi a xionho ni kufa zi to ngha zi fuvisilwe hi kumbhelela, na vanhu va tirulwe, a xilaveko xa Jesu kota Mutiruli xi ta mbhela. A Biblia gi tlhamusela giku: “Zonake na yena N’wana i ta vekiwa lahasi ka loyi a vekileko zilo zontlhe lahasi kakwe, lezaku kasi Nungungulu ava zontlhe ka vontlhe.” — 1 Va Le Korinte 15:28.

14. Xana a vanhu vontlhe vo mbhelela va ta tsikiwa lezaku va hunza hi ka yini, niku hikuyini?

¹⁴ Anzhako ka lezo, a vanhu va mbheleleko va ta nyikiwa a lungelo ga ku komba lezaku va hlawulile ku tirela Nungungulu munwe wa zinene kala kupinzuka. Hikwalaho, mahlweni ka kuva Jehova a va amukela hi kumbhelela kota vana vakwe, i ta tsika vanhu vontlhe vo mbhelela lezaku va hunza hi ka xiringo xo gumesa. Satani ni madimoni yakwe va ta tlhatlhiwa hi lomu nkeleni wa lieswila. Lezo zi nga ta neha khombo ga simasima ka lava hakunene va ranzako Jehova. Kanilezi vontlhe lava va to kala ku ingisa Jehova va ta loviselwa magumo, zinwe ni muhluwuki wo sangula ni madimoni yakwe. — Kuvululelwa 20:7-10.

15. Zini lezi zi to tlhela zi kumeka xikari ka zivangwa zontlhe za Jehova lezi zi pimisako?

¹⁵ Kutanike, Jehova i ta amukela a vanhu vontlhe vo mbhelela kota vana vakwe lava va seketeleko a wuhosi ga Nungungulu nzeni ka xiringo xo gumesa. A kusukela ka xikhati lexo kuya mahlweni, vona va ta ti buza nguvu hi kutlhatlheka ko ngangamela ka vana va Nungungulu kota xipanze xa ngango wa Nungungulu wa wuako gontlhe. Zontlhe a zivangwa lezi zi pimisako le tilweni ni laha misaveni zi ta tlhela zi khozela Nungungulu munwe wa zinene hi wumunwe. A khungo ga Jehova gi ta ngha gi tatisekile hi ndlela yo hlamalisa! Xana wa zi lava kuva xipanze xa ngango lowo wa kutsaka, ni wa pinzukelwa, ni wa wuako gontlhe? Loku zi hi tano, ha ku kuca lezaku u veka mbilwini ya wena lezi a Biblia gi zi wulako lomu ka 1 Johani 2:17: “A tiko ga hunza, ni kunavela ka gona; kanilezi loyi a mahako kuranza ka Nungungulu i ta tshama kala kupinzuka.”

Ziwutiso Za Kuvuxeta

• A mahlweni ka wuhluwuki ga le Edeni, kuzwanana muni loku a vakhozeli vontlhe va Jehova va nga hi nako na yena?

• Hi gihi a wutihlamuleli legi gi nga ni malanza ya Nungungulu?

• Hi vamani lava va ha to maha vana va Nungungulu, niku xana lezo zi zwananisa kuyini ni khungo ga Jehova xungetano hi wumunwe wukhozelini?

[Mufota ka phajina 190]

A vanhu va ingisako va ta ti buza hi ku hanya paradiseni legi gi to ngha gi enetile misava