Jesu a nga hi vikela

A XIKHATI lexi Jesu a nga maha munhu wa hombe zonake a tiva lezi a nga vikeliswa zona na a ha hi nwanana, u alakanya lezaku i khongelile ka Jehova a mu bonga? — Hi mawonela ya wena zini lezi Jesu a nga byela Maria na Josefa a xikhati lexi a nga kula a tiva lezaku va wa ponisile wutomi gakwe hi ku mu teka va famba naye Gipite? —

Zezi Jesu a nga ha hi nwanana ne a nga ha hanyi laha misaveni a ku fana ni kale. Kanilezi, wa zi tiva lezaku inyamutlha a vanhu vo kari va alakanyela Jesu na a hi nwanana lomu ka xigowolo ke? — Lezo zi woneka nguvu hi xikhati xa Khisimuso laha a vanhu va tolovelako ku kombisa Jesu na a hi nwanana.

Hambu lezi Jesu a kalako a nga ha hanyi laha misaveni, wa kholwa lezaku wa hanya? — Hi zona, wa hanya. I vuxilwe hi ka vafileko niku zalezi i Hosi ya ntamu le tilweni. U alakanya lezaku zini a zi kotako ku maha kasi ku vikela lava va mu tirelako? — A xikhati lexi Jesu a nga hi laha misaveni, i kombile lezaku wa zi kota ku vikela lava va mu ranzako. A hi wone lezi a zi mahileko ka siku go kari na a hi lomu ka ngalava ni vapizani vakwe.

Ku wa hi xikhati xa ni gambo, anzhako ka kuva Jesu a gonzisile siku gontlhe lomu mbhirini ya Bimbi ga Galilea, gi nga hi tiva ga hombe ga 20 wa tikilometro hi ku leha ni 12 wa tona hi ku anama. I lo byela a vapizani vakwe aku: “A hi yeni tlhatuko wa tiva.” Makunu, va lo nghena lomu ngalaveni va sangula ku tsemakanya a tiva. Jesu i wa karele nguvu, hikwalaho i loya le nzhako ka ngalava a ya etlela. Zalezo i lo khonwa hi wurongo ga hombe.

A vapizani va lo simama ku hanyanya kasi va fambisa ngalava. Hi xikhati xo kari, a zilo zontlhe zi wa famba khwatsi, kanilezi ku lo sangula kuba moya. A moya lowo wu lo sangula kuba nguvu, wu engetela zonake a mati ma kukumuka nguvu. A mabyandlati ma lo sangula kuba ngalava zonake yi sangula ku tala hi mati.

A vapizani va lo sangula ku chava hi ku wona lezaku va wa lava ku mbombomela. Kanilezi, Jesu i wa nga chavi. I wa ha simama ku etlela lenzhako ka ngalava. Hi kugumesa a vapizani vakwe va lo mu vuxa vaku: ‘Mugonzisi, Mugonzisi, hi ponise; hi lava ku dawa hi bhubhutsa.’ Jesu i lo vuka a kawuka mheho ni mabyandlati, aku: “Miyela, uku hwi!”

A moya wu lo tekela ku nyima, zonake a tiva gi rula. A vapizani vakwe va lo hlamala. Va wa nga se tshuka va wona a nchumu wo fana ni lowo. Hikwalaho, va lo sangula ku byelana lezi: “Kasi himani loyi, waku hambu mheho ni bimbi zi mu ingisa ke?” — Luka 8:22-25; Marku 4:35-41.

Wa zi tiva ku himani Jesu? — Wa zi tiva ku i wa wu kuma kwihi a ntamu lowo wa hombe? — A vapizani vakwe va wa nga faneli ku chava loku Jesu a hi zinwe navo, hakuva Jesu i wa hi munhu wo hlamalisa. I wa maha zilo zo hlamalisa lezi a vanhu vanwani va nga kala va nga zi koti ku zi maha. Nza ha ku byela a zilo zinwani a nga tshuka a zi maha ka moya wa hombe wu ngaba lomu bimbini.

Hi nzhako ka xikhati, ka siku ginwani. Gi lo phuma, zonake Jesu a byela a vapizani vakwe lezaku va fambisa a ngalava vaya ka tlhelo ginwani ga bimbi. Zonake Jesu i lo suka na a hi yece aya xitsungeni. Gi wa hi wutshamu go rula kasi a khongela ka Papai wakwe, Jehova Nungungulu.

A vapizani va lo nghena lomu ngalaveni zonake va sangula ku tlhatuka bimbi. Kanilezi ku lo sangula kuba moya. A moya lowo wu loba nguvu. Niku gi wa hi wusiku. A vavanuna lavo va lo wisela a matanga yabye va sangula ku fambisa ngalava. Kanilezi, va wa ngayi kule hakuva a moya wu wata hi le mahlweni kabye. A ngalava yi lo ndlengandlengiswa hi mabyandlati ya hombe, zonake a mati ma sangula ku nghena. A vavanuna lavo va lo tirisa a ntamu wabye wontlhe kasi va huma ni ngalava yabye, kanilezi a va zi kotangi.

Jesu i wa ha hi yece le xitsungeni. I lo tshama leyo hi xikhati xo leha. Kanilezi, i wa va wona a vapizani vakwe lezaku va wa hi mhangweni ya moya wa hombe wu nga kari wuba lomu bimbini. Hikwalaho, i lo suka le xitsungeni aya le xikari ka bimbi. Jesu i wa lava ku vuna a vapizani vakwe, hikwalaho, i lo sangula ku va yela hambu lezi ku nga kari kuba a moya wa hombe lomu bimbini!

Zini zi nga humelelako loku u zama ku famba hehla ka mati? — U nga mbombomela zonake uya hasi ka mati. Kanilezi Jesu i wa hambene na wena. Yena i wa hi ni ntamu wo hlawuleka. Jesu i lo famba pfhuka wo leha kasi a kuma ngalava. A xikhati lexi a vapizani va nga wona Jesu na ata ka vona hi le hehla ka mati, gi wa hi phinzulani. Kanilezi va wa nga kholwi lezi va nga kari va zi wona. Va lo chava nguvu, va tlhela vaba nyandha hi kuchava. Zonake Jesu aku ka vona: “Tiyani-hlana, hi mina; mu nga chavi.”

Ka xikhati xalexo Jesu a nga nghena lomu ngalaveni a moya wu lo nyima. A vapizani vakwe va lo hlamala kambe. Va lo khizamela Jesu va wula lezi: ‘Hakunene u N’wana wa Nungungulu.’ — Mateu 14:22-33; Johani 6:16-21.

Zi wa ta tsakisa a ku tlhela u ya hanya ka xikhati lexo xo tsakisa, kasi ku wona Jesu na a maha zilo zo khwatsi hi lezo ke? — Wa zi tiva a ku hikuyini Jesu a nga maha zihlamaliso lezo? — I mahile lezo hakuva i wa ranza a vapizani vakwe niku i wa lava ku va vuna. Kanilezi, i mahile a zihlamaliso lezo kambe kasi ku komba a ntamu wa hombe lowu a nga hi nawo, ni lowu a to wu tirisa ka masiku ma ha tako kota Hosi ya Mufumo wa Nungungulu.

Hambu inyamutlha, Jesu wa ha wu tirisa a ntamu wakwe hi zikhati zo tala. Hi xikombiso, wa vikela a valanzeli vakwe ka mizamo ya Satani ya ku va tsikisa ku bhula ni vanwani xungetano hi Mufumo wa Nungungulu. Kanilezi, Jesu a nga tirisi a ntamu wakwe kasi ku va vikela mababyi a vapizani vakwe kutani ku va hanyisa loku va babya. Hambu a vapostoli va Jesu va gumesile vafa. Jakobe a makabye wa Johani i lo dawa, niku yenawu Johani i lo valelwa paxweni. — Mitiro 12:2; Kuvululelwa 1:9.

Za fana ni inyamutlha. Kani a vanhu lavo va mu tirela Jehova kutani ahihi, vontlhe va babya va tlhela vafa. Kanilezi, a xikhati lexi Jesu a to fuma kota Hosi Mufunweni wa Nungungulu, a zilo zi nga ta tshamisa lezo. I hava a to chava hakuva Jesu i ta tirisa a ntamu wakwe kasi ku vuna lava va mu ingisako. — Isaya 9:6, 7.