Johani a wutisa Jesu a ku hi yena Mesiya ke

Makunu ku wa hundza cipimo ca lembe Johani na a vhalelwe paxweni. Hambulezvo, i wa kari azwa mahungu ya zvihlamaliso zva Jesu. Hi nga alakanyela lezvi a nga ti zwisa zvona a cikhati a vapizani vakwe va nga mu byela ku Jesu i vhuxile n’wana wa noni le Nayine! Hambulezvo, Johani i wa lava ku Jesu a wula hi yece a ku hi yena mani. Hikwalaho, i no ruma vapizani vakwe va vambiri lezvaku vaya ka Jesu va ya mu wutisa a ku: ‘Hi wena Loyi a Tako ke, kutani ha ha rindzela mun’wani?’ — Luka 7:19.

U nga ha alakanya lezvaku zvi wa nga ringani ku Johani a wutisa zvo khwatsi hi lezvo, hakuva i wa hi wanuna wa kukholwa. A cikhati a nga bhabhatisa Jesu kambe, kwalomo ka malembe mambiri ma nga hundzile, i wonile moya wa Nungungulu na wu relela hehla ka Jesu, a tlhela azwa gezu ga Nungungulu ga ku kombisa ku mu tsakela. Hambulezvo, a hi na cigelo ca ku pimisa ku Johani i wa no hola hi tlhelo ga moya. Loku zvi wa hi tano, Jesu na a nga mu dzundzisangi lezvi a nga mu dzundzisa zvona. Makunu hikuyini Johani a nga mu wutisa lezvo Jesu, kuveni i wa nga kanakani?

Johani i wo lava ku Jesu a mu tiyisekisa hi yece lezvaku hi yena Mesiya. Lezvo zvi wa ta mu tiyisa lomu paxweni a nga xaniseka kona. Johani i wa lava ku tiva zvin’wani kambe hi ciwutiso cakwe. I wa ci tiva ciphrofeto ca Bhibhiliya ci nga komba lezvaku Loyi a Totilweko wa Nungungulu i wa tava hosi a tlhela a tlhatlhisa vanhu. Hambulezvo, makunu ku wa hundza tihweti to hlaya Jesu na a bhabhatisilwe, niku Johani i wa ha hi lomu paxweni. Makunu Johani i wa lava ku tiva ku ku wa hata mun’wani ke, loyi a to vhaleta Jesu hi ndlela yo kari, a tatisa zviphrofeto zvontlhe zvi nga ha sele xungetano hi Mesiya.

Jesu a nga byelangi vapizani va Johani aku: ‘Lisine, hi Mina Loyi a nga fanele kuta.’ Kanilezvi, i no hanyisa vanhu va nga hi ni mababyi ya tixakaxaka, a komba lezvaku i wa vhuniwa hi Nungungulu. I no guma a byela vapizani va Johani aku: “Fambani mu ya hlawutela Johani lezvi mu zvi zwako ni lezvi mu zvi wonako: A zvikhumu zva tlhela zvi wona, a zvikhurubu zva famba, a tihlokonho ta basiswa, a zviwiri zvazwa, a vafileko va vhuxiwa, ni zvisiwana zva kanelwa a mahungu yo saseka.” — Matewu 11:4, 5.

Ka ciwutiso cakwe, ko khwatsi Johani i wa lava ku tiva ni lezvaku Jesu i wa ha ta maha zvin’wani zvo hundza lezvi a nga maha ka cikhati leco — kuzvilava a patsa ni ku mu humesa paxweni. Hambulezvo, Jesu i no byela Johani lezvaku a nga rindzeli zvo hundza zvihlamaliso lezvi a nga kari a zvizwa.

Laha a vapizani va Johani va nga suka, Jesu i no byela vanhu lezvaku Johani i wa nga hi muphrofeti basi. Kanilezvi, i wa hi “ntsumi” kutani mubiki wa mahungu a rumelweko hi Jehovha, loyi a nga phrofetilwe ka Malaki 3:1. I wa hi yena muphrofeti Elija kambe, loyi a nga phrofetilwe ka Malaki 4:5, 6. Jesu i no tlhamusela aku: ‘Hizvinene ndziku ka n’wina: Cikari ka lava va belekilweko hi vavasati, a ku humangi wa hombe ku hundza Johani Mubhabhatisi; hambulezvo, loyi a nga tsongwanyani Mufun’weni wa tilo wa hombe ku hundza yena.’ — Matewu 11:11.

Hi ku wula lezvaku loyi a nga tsongwanyani Mufun’weni wa tilo wa hombe ku hundza Johani, Jesu i wo komba lezvaku Johani a nga taya Fuma naye le tilweni. Johani i longisele ndlela kasi Jesu ata. Kanilezvi i file Kristu na a nga se vhulula ndlela kasi a vanhu vaya tilweni. (Mahebheru 10:19, 20) Johani ive muphrofeti wo tsumbeka wa Jehovha, niku i ta hanya kwalaha misaveni a fumelwa hi Mufumo wa Nungungulu.