CIGONDZO 46
Hikuyini u faneleko ku ti nyikela ka Jehovha u tlhela u bhabhatiswa?
U ti nyikela ka Jehovha hi ku maha mukhongelo kakwe u mu tsumbisa lezvaku u ta khozela yena yece u tlhela u rangisa ku maha kurandza kakwe wutomini ga wena. (Lisimu 40:8) Hi kulandzela, u bhabhatiswa. A cikhati leci u bhabhatiswako, u komba van’wani lezvaku u ti nyikele ka Jehovha. A ku ti nyikela ka Jehovha hi cona ciboho ca lisima ka zvontlhe u nga mahako wutomini. Kanilezvi, cini ci nga ku kucako a ku maha ciboho leco ca lisima nguvhu ci cicako wutomi ga munhu?
1. Cini ci kucako munhu a ku ti nyikela ka Jehovha?
Leci ci hi kucako ku ti nyikela ka Jehovha lirandzo. (1 Johani 4:10, 19) A Bhibhiliya ga hi kuca, giku: “Randza Jehovha, a Nungungulu wa wena, hi mbilu ya wena yontlhe, ni muhefemulo wa wena wontlhe, ni kupima ka wena kontlhe, ni ntamu wa wena wontlhe”. (Marku 12:30) Hi kombisa lezvaku ha mu randza Jehovha na ku nga hi magezu ntsena kanilezvi hi lezvi hi zvi mahako. A ku khwatsi hi lezvi a wanuna ni wasati va randzanako zva lisine va gumesako hi ku chadha, a lirandzo la hina hi Jehovha li hi kuca a ku ti nyikela kakwe hi tlhela hi bhabhatiswa.
2. Makatekwa muni lawa Jehovha a nyikako a Vakustumunyu vakwe va bhabhatisilweko?
Loku u bhabhatiswa, u ta maha ciro ca ngango wa Jehovha wo tsaka. Andzhako ka lezvo, u ta ti buza hi lirandzo la Jehovha hi tindlela to tala u tlhela uva munghana wakwe wa hombe a ku hundza lezvi u nga ha zvona nyamutlha. (Lera Malaki 3:16-18.) Jehovha i tava papayi wa wena, niku u tava ni vamakabye misaveni yontlhe lava va randzako Jehovha va tlhela va ku randzawu. (Lera Marku 10:29, 30.) Hi lisine, u fanele kuba mazambo yo kari na u nga se bhabhatiswa. U fanele ku gondza xungetano hi Jehovha, u mu randza u tlhela u kholwa ka N’wana wakwe. Hi kugumesa, u nga nyikela wutomi ga wena ka Jehovha. Loku u maha zvilo lezvo u gumesa u bhabhatiswa, u tava ni thomo ga ku ti buza hi wutomi kala kupindzuka. A mhaka ya Nungungulu, yi wula lezvi: “A kubhabhatisa . . . konawu ka mu ponisa ka cikhati leci”. — 1 Pedro 3:21.
GONDZA ZVI ETA
Wona ku hikuyini zvi nga zva lisima a ku wena u ti nyikela ka Jehovha u tlhela u bhabhatiswa.
3. Hontlheni hi fanele ku hlawula loyi hi to mu khozela
Cikhatini ca vaIzrayeli, a vokari va wa alakanya ku va nga khozela Jehovha lezvo na va khozela a nungungulu wa mawunwa, Bhaali. Kanilezvi Jehovha i rumele muphrofeti kasi a ta lulamisa a mawonela yabye ya hava. Lerani 1 Tihosi 18:21, mu gumesa mu bhula hi ciwutiso leci:
Zvini lezvi a vaIzrayeli va nga fanele ku zvi hlawula?
A ku fana ni vaIzrayeli, hinawu hi fanele ku hlawula loyi hi to mu khozela. Lerani Luka 16:13, mu gumesa mu bhula hi zviwutiso lezvi:
Hikuyini zvi nga kotekiko ku khozela Jehovha lezvo na hi khozela munhu mun’wani kutani nchumu wun’wani?
Hi zvi kombisa kuyini lezvaku hi hlawulile ku khozela Jehovha?
4. Ehleketa hi lezvi Jehovha a ku randzisako zvona
Jehovha i hi nyikile a zvinyikiwo zvo tala zva zvi nene nguvhu. Zvini lezvi hina hi nga mu nyikako? Bisani VHIDHIO.
Hi tihi tindlela to kari leti Jehovha a zvi kombisako hi tona lezvaku wa ku randza? Lerani Lisimu 104:14, 15 na 1 Johani 4:9, 10, mu gumesa mu bhula hi zviwutiso lezvi:
Ka lezvi Jehovha a nga ku nyika, zvilo muni u mu bongako nguvhu hi kuva a ku nyikile?
U ti zwisa kuyini hi Jehovha hi kota ya zvinyikiwo lezvi a ku nyikileko?
Loku hi nyikiwa cinyikiwo ci hi tsakisako nguvhu, hi hlota tindlela ta ku bonga loyi a hi nyikileko. Lerani Dhewuteronome 16:17, mu gumesa mu bhula hi ciwutiso leci:
Laha u alakanyelako a zvinyikiwo lezvi Jehovha a ku nyikileko, u gumesa u xuva ku mu mahela yini?
5. A ku ti nyikela ka Jehovha zvi hi nehela makatekwa yo tala
A vanhu vo tala va alakanya lezvaku a kuva ni nduma, ni ntiro wa wu nene, ni mali hi zvona zvi nyikako litsako. A ku lisine lelo? Bisani VHIDHIO, mu gumesa mu bhula hi zviwutiso zvi landzelako.
Hambu lezvi Andrey a nga zvi randza nguvhu ku bela bhola, hikuyini a nga zvi tsika?
I no boha a ku nyikela wutomi gakwe ka Jehovha na ku nga hi ka bhola. U alakanya ku i mahile ciboho ca cinene? Hikuyini?
Na a nga se maha muKristu, mupostoli Pawule i wa hi ni zvontlhe zvi nga laveka kasi ava ni ntiro wa nduma. I wa gondzisilwe a nayo wa ciJudha hi mugondzisi wa nduma. Kanilezvi, i tsikile zvontlhe lezvo kasi a maha muKristu. A ku Pawule i gumesile a ti laya? Lerani Va Le Filipi 3:8, mu gumesa mu bhula hi zviwutiso lezvi:
Hikuyini Pawule a nga wula lezvaku lezvi a nga kari a maha na a nga seva muKristu zvi wa hi “nhulu ya chaka”?
Makatekwa muni a ma kumileko?
U alakanya ku u tava ni wutomi ga gi nene loku u boha ku tirela Jehovha? Hikuyini u wulako lezvo?
A cikhati leci Pawule a nga maha muKristu i kumile zvilo zvo tala nguvhu zvo hundza lezvi a nga zvi luza
A VOKARI VE: “Ndza zvi tiva ku leli lisine, kanilezvi a ndzi se longa a ku maha ciboho leci ca hombe.”
U alakanya ku hikuyini zvi nga zvi nene a ku u ti nyikela ka Jehovha?
LEZVI HI NGA GONDZA
A lirandzo li hi kuca a ku ti nyikela ka Jehovha hi tlhela hi bhabhatiswa.
Zviwutiso zva kuvhuxeta
Hikuyini Jehovha a ringanelwako hi ku hi mu randza hi mbilu ya hina yontlhe hi tlhela hi mu khozela?
Makatekwa muni lawa Jehovha a nyikako a Vakustumunyu vakwe va bhabhatisilweko?
Wa zvi lava ku ti nyikela ka Jehovha?
GONDZA ZVIN’WANI
Wona ku cini ci kucileko a muchayi ni mubeli wa bhola lezvaku va nyikela wutomi gabye ka Jehovha.
Wona zvigelo zvin’wani zva ku u ti nyikela ka Jehovha.
“Hikuyini u faneleko ku ti nyikela ka Jehovha?” (A Murindzeli wa 15 ka Janeiro wa 2010)
Ka muzka lowu, wona a litsako leli va li kumako lava va ti nyikelako ka Jehovha.
Ka matimu ma nge: “Hi malembe yo tala ndzi wa ti wutisa ku: ‘Kasi hi hanyela yini?’” wona leci ci kucileko a wasati wo kari lezvaku a hlola lezvi a nga zvi rangisa wutomini gakwe.
“A Bhibhiliya ga cica wutomi ga vanhu” (A Murindzeli wa 1 ka Novembro wa 2012)