Elixa i lo wona tikareta ta nzilo wena ke, u wona yini?

A Hosi ya Siria yi wa hlota Elixa, a muprofeti wa Nungungulu, yi tlhela yi mu lanzelela kala Dotani, gi nga hi doropa ga zitsunga. Loku gi phumile, a hosi ya Siria yi lo rumela mahaxi, tikareta ta yimpi, ni masochwa le Dotani. Laha gi ngaya kuceni, a masochwa lawo makunu ma wa ranzele doropa. — 2 Tih. 6:13, 14.

A xikhati lexi a nanza ga Elixa gi nga vuka zonake gi huma lahandle, gi lo wona a butho lego gi nga lava ku khoma muprofeti. A nanza gi lo rila giku: “Hosi yanga, hi ta maha yini?” Elixa aku ngalo: “U nga chavi, hakuva lava va nga na hina va tele ku hunza lava va nga na vona.” Zonake a muprofeti i lo khongela aku: “Jehova, vulula a mahlo yakwe, kasi a fela ku zi wona.” A matimu lawa maya mahlweni maku: “Jehova i lo vulula a mahlo ya nanza gi wona a xitsunga na xi tele hi mahaxi ni tikareta ta nzilo na zi ranzele Elixa.” (2 Tih. 6:15-17) Hi gonza yini ka ximaho lexi ni ka zinwani zi mahekileko wutomini ga Elixa ke?

Elixa a nga karatekangi a xikhati lexi a nga ranzelwa hi butho ga Siria hakuva i wa tsumba Jehova. Tlhatakumbiri, i zi wonile lezi Nungungulu a nga mu vikelisa zona hi ntamu wakwe. A hi rinzeli ku wona zihlamaliso nyamutlha, kanilezi ha zi tiva lezaku Jehova wa vikela a vanhu vakwe kota ntlawa. Hinawu hi ranzelwe hi mahaxi ni tikareta ta nzilo. Loku hi zi “wona” hi mahlo ya hina ya kukholwa ni loku xontlhe xikhati hi tsumba Nungungulu, hi ta “tshama kuponeni” hi tlhela hi katekisiwa hi Jehova. (Tis. 4:8) A hi woneni a xivuno hi xi kumako ka zilo zinwani zi mahekileko wutomini ga Elixa.

Ka siku go kari, Elixa na a kari a rima, muprofeti Elija i lota kakwe a ta mu hoxela a kumba wakwe. Elixa i wa zi tiva ku lezo zi wula yini. I lo maha mubuzo, a salisa papai ni mamani wakwe, zonake a ya tirela Elija. (1 Tih. 19:16, 19-21) Kota lezi Elixa a nga longile ku tirela Nungungulu kala laha a nga zi kota, i lova xibya canjeni ga Jehova niku hi kugumesa i lo valeta Elija ntirweni wa wuprofeti.

Elixa i lo tirela Elija hi xipimo xa ntlhanu wa malembe ni ginwe. Nzeni ka xikhati lexo, Elixa hi yena ‘a nga chela mati mandleni ya Elija.’ (2 Tih. 3:11) Ka masiku lawo, a vanhu va wa tolovela kuga hi mandla hakuva ku wa nga hi na ziponi, magarfu, mikwana, ge hambu zilo zinwani za kuga hi zona. Anzhako ka kuga, a nanza gi wa chela mati mandleni ya hosi ya gona kasi ku yi hlambisa mandla. Hikwalaho, a mitiro yo kari ya Elixa yi wa hi ya lahasi. Hambulezo, a kuva nanza ga Elija i wa zi wona kota lungelo ga lisima.

Hi kufanana, a maKristu yo tala nyamutlha ma maha zilo zo tsalangana ntirweni wa xikhati xontlhe. Ma maha lezo hi ku kuciwa hi kukholwa ni kuxuva ku tirela Jehova hi ntamu wabye wontlhe. A yo kari xikari ka mitiro leyo yi lava lezaku va suka kaya va ya tira Beteli, kuakeni ka tiSalawu ni zinwani, ku nga mitiro leyi a votala va alakanyako ku ya lahasi. A ku na muKristu a faneleko ku wona mitiro leyo kota ya lahasi, hakuva Jehova wa yi nyika nguvu lisima. — Maheb. 6:10.

Na Nungungulu a nga se “teka Elija a mu yisa tilweni hi xipupuri,” i lo mu ruma lezaku a suka le Gilgali aya Beteli. Elija i lo byela nanza gakwe lezaku gi sala, kanilezi Elixa i lo hlamula aku: “Cima nzi nga ta ku tsika.” Na va ha famba, Elija i lo khongotela Elixa makhati mambiri lezaku a sala, kanilezi a nga vumelangi. (2 Tih. 2:1-6) Khwatsi hi lezi Rute a nga namarele ka Naomi, Elixa i lo namarelawu ka Elija. (Rute 1:8, 16, 17) Hikuyini? Hi lezaku Elixa i wa nyika lisima a xiavelo xakwe a nga nyikilwe hi Nungungulu xa ku tirela Elija.

Elixa i hi vekele xikombiso xi nene. Loku hi nyikiwa a lungelo go kari ga ntiro hlengeletanweni ya Nungungulu, hi ta gi nyika nguvu lisima loku hi zi tiva lezaku hi tirela Jehova. A ku na wudzunzo ga hombe go hunza lego. — Tis. 65:4; 84:10.

A xikhati lexi a vavanuna lava va vambiri va nga ha famba, Elija i te ngalo ka Elixa: “Kombela lezi u zi lavako a kuva nzi ku mahela zona na nzi nga se ku tekiwa mahlweni ka wena.” Khwatsi hi lezi a xikombelo lexi Solomoni a nga xi mahile ka malembe mahlweni ka lezo xi nga hi xa ka moya, a xa Elixa xonawu xi wa hi xa ka moya. I lo kombela lezaku ‘a xiavelo xa moya wa Elija xi wuyetilweko kumbiri’ xi nyikwa yena. (1 Tih. 3:5, 9; 2 Tih. 2:9) Le Israeli, a n’wana wa matewula wa xinuna hi yena a nga hi ni fanelo ya ku amukela a xiavelo xa tshomba xi wuyetilweko kumbiri. (Deut. 21:15-17) Hi ndlela leyi, Elixa i wo kombela ku sala ni xiavelo xa Elija xa wuprofeti. Tlhatakumbiri, zi wonekisa ku khwatsi Elixa i wa lava kuva munhu wo tiya hlana khwatsi hi Elija, loyi a nga “pangamele Jehova.” — 1 Tih. 19:13, 14.

Xana Elija i xi hlamulisile kuyini a xikombelo xa nanza gakwe? I te ngalo: “U kombele a xilo xo tsanza. . . Loku wa nga nzi wona ni ku tekiwa, u ta mahelwa lezo. Kanilezi loku u nga nzi woni ni ku tekiwa, lezo zi nga ta maheka.” (2 Tih. 2:10) Zi wonekisa ku khwatsi a hlamulo wa Elija wu wa wula zilo zimbiri. A xo ranga, ntsena Nungungulu hi yena a nga wa ta gema lezaku lezi Elixa a zi kombeleko i wa ta zi kuma ke. A xa wumbiri, kasi Elixa a amukela lezi a zi kombeleko, i wa fanele ku tshama na Elija a nga mu tsiki hambu loku ku humelela yini.

Xana Nungungulu i xi wonisile kuyini a xikombelo xa Elixa xo kombela moya wa Elija wu wuyetilweko kumbiri? A matimu me ngalo: “Laha va nga ha famba, na va kari va wulawula, ku lo woneka a kareta ya nzilo ni mahaxi ya nzilo; yi lo ta va hambanyisa, Elija a tlakuselwa tilweni hi xipupuri. Elixa i wa kari a mu wona.”a Lowo ku’ve hlamulo wa Jehova ka xikombelo xa Elixa. Elixa i lo wona Elija ni ku tekiwa, a amukela a xiavelo xa moya wa Elija xi wuyetilweko kumbiri a tlhela a valeta Elija ntirweni wa wuprofeti. — 2 Tih. 2:11-14.

Elixa i lo teka nguwo leyi yi nga siyilwe hi Elija a boha. Kusukela kwalaho, a nguwo leyo yi lo tivekisa Elixa kota muprofeti wa Nungungulu. Lezaku Elixa i kumile a xiavelo hi ka Nungungulu zi wonekile kambe a xikhati lexi a nga maha a xihlamaliso hi ku avanyisa mati ya Congo wa Jordani.

Lezi Elixa a nga zi wona a xikhati lexi Elija a nga tlakuselwa tilweni hi xipupuri, handle ko kanakana zi mu khumbile nguvu. Zi tano hakuva a munhu a nga toloveli ku wona a kareta ya yimpi ya nzilo ni mahaxi ya nzilo siku ni siku! A zilo lezo zi lo komba lezaku Jehova i hlamulile a xikombelo xa Elixa. Loku Nungungulu a hlamula mikhongelo ya hina a nga hi kombi muwoniso wa kareta ya nzilo ge hambu mahaxi ya nzilo. Hambulezo, ha zi wona lezaku Nungungulu i tirisa a ntamu wa hombe kasi ku maha kuranza kakwe. Niku, a xikhati lexi hi wonako lezaku Jehova wa katekisa a xipanze xa laha misaveni xa hlengeletano yakwe, hi lisine hi “wona” a kareta yakwe ya le tilweni na yi famba. — Ezek. 10:9-13.

Elixa i mahekelwe hi zilo zo tala wutomini gakwe lezi zi nga mu kholwisa lezaku Jehova i na ni ntamu wa hombe. Kunene, a moya wa ku basa wa Nungungulu wu vunile a muprofeti loyi lezaku a maha a 16 wa zihlamaliso. A ntsengo lowu wu’ve wa hombe ku hunza a zihlamaliso lezi Elija a nga zi maha.b A khati ga wumbiri legi Elixa a nga wona a mahaxi ni tikareta ta nzilo ta yimpi ku’ve xikhatini xa kuxaniseka le Dotani xi kumbukilweko kusanguleni ka nzima leyi.

Hambu lezi a nga ranzelwe hi valala le Dotani, Elixa a nga karatekangi. Hikuyini? Hakuva i wa hi ni kukholwa ko tiya mahlweni ka Jehova. Hinawu hi lava kukholwa ko tiya ko fana ni loko. Hikwalaho, a hi kombeleni a moya wa ku basa wa Nungungulu kasi hiva ni kukholwa ni manwani matshamela ya mbhanzu wa moya. — Luka 11:13; Gal. 5:22, 23.

Lezi zi nga mahekela Elixa le Dotani zonawu zi mu nyikile xigelo xo tiya xa ku tsumba Jehova ni mabutho yakwe ya wuvikeli ma nga wonekiko. A muprofeti loyi i zi wonile lezaku Nungungulu i wa rumele a mabutho ya tingelosi lezaku ti ta ranzela a doropa ni valala lava va nga gi ranzele. Laha Nungungulu a nga lamata a mahlo ya vanhu lava hi wukhumu, i lo ponisa Elixa ni nanza gakwe. (2 Tih. 6:17-23) Ka xikhati lexo xo nonoha, zinwe ni ka zimaho zinwani, Elixa i lo kombisa kukholwa ka Nungungulu a tlhela a tsumba Jehova hi kumbhelela.

A Ku fana na Elixa, a hi tsumbeni Jehova Nungungulu. (Mav. 3:5, 6) Loku hi maha lezo, ‘Nungungulu, i ta hi mahela wuxinji ni ku hi katekisa.’ (Tis. 67:1) Lisine lezaku a hi ranzelwangi hi tikareta ta nzilo ni mahaxi ya nzilo ya xiviri. Hambulezo, xikhatini xa “kuxaniseka ka hombe,” Jehova i ta hi vikela hontlheni kota malanza yakwe misaveni yontlhe. (Mat. 24:21; Kuv. 7:9, 14) Kala xikhatini lexo, a hi tshameni na hi alakanya lezaku “Nungungulu hi wuchavelo ga hina.” — Tis. 62:8.