Mu tava “tiko ga vapristi”

1, 2. A pswalo wa wasati wu wa fanele ku vikelwa ka yini, niku hikuyini?

A XIPROFETO xo sangula xi tsalilweko lomu ka Biblia xi na ni tlhamuselo wa hombe kutatisekeni ka kungo ga Jehova. A xikhati lexi a nga maha xitsumbiso xa le Edeni, a Nungungulu wa lisine i wulile lezi: “Nzi ta veka livengo xikari ka wena [Satani] ni wasati, ni xikari ka pswalo wa wena ni pswalo wa wasati.” A livengo lelo li wa tava la hombe ku ya chikela kwihi? Jehova i te ngalo: “[A pswalo wa wasati] i ta ku gandla a hloko [wena Satani], na wenawu u ta mu luma a xirenze xakwe.” (Gen. 3:15) A livengo xikari ka nyoka ni wasati li wa tava la hombe nguvu laha ka kuza Satani a maha mizamo yontlhe kasi ku lovisa a pswalo wa wasati.

² A zi hlamalisi a kuva a mutsali wa tisimu a rilele Nungungulu hi mukhongelo xungetano hi vanhu vakwe aku: “A valala va wena va maha guwa, ni lava va ku vengako va tlakusa hloko. Va maha gujeguje go vukela a vanhu va wena, va tsema xikungo xo vukela lava u va lonzowotako. Vaku ngalo: Ngonani hi ta va lovisa va nga have tiko.” (Tis. 83:2-4) Ku lavekile lezaku a lixaka la pswalo wa wasati li vikelwa kasi li nga hihiritwi li tlhela li nga nyenyeziswi. Kasi ku maha lezo, Jehova i lo maha malulamiselo manwani ya nayo ma nga wa ta vikela kutatiseka ka kungo gakwe.

3, 4. a) A xivumelwano xa nayo xi sangulile rini ku tira, niku zini lezi a tiko ga Israeli gi vumeleko lezaku gi wa ta maha? b) A xivumelwano xa Nayo xi wa mahelwa ku vikela yini?

³ Laha a vana va Abrahama, Isaka, na Jakobe va ngaya va tala va maha timiliyoni, Jehova i lo wumba tiko hi vona — gi nga tiko ga Israeli. Hi ku tirisa Mosi, Jehova i lo maha xivumelwano xo hlawuleka navo hi ku va nyika a Nayo. A tiko ga Israeli gi lo vumela lezi a xivumelwano lexo xi nga lava zona. A Biblia gi ngalo: “[Mosi] i lo teka ni bhuku ga xivumelwano a gi gonza mahlweni ka vanhu; zonake a vanhu vaku: Zontlhe lezi Jehova a wulileko hi ta zi ingisa, hi zi maha. Zinghaho Mosi i lo teka a nkhata [wa tikuzi leti ti nga delwe kota miphahlelo] a nwatsekela vanhu ha wona, aku: Lowu hi nkhata wa xivumelwano lexi Jehova a mahileko zinwe na nwina hi tontlhe leti timhaka.” — Ekso. 24:3-8.

⁴ A xivumelwano xa Nayo xi sangulile ku tira xitsungeni xa Sinai hi 1513 Mahlweni ka Nguva ya Hina. Hi xivumelwano lexi, a tiko ga kale ga Israeli gi lo maha tiko gi hlawulilweko ga Nungungulu. Makunu Jehova i lo maha ‘Mulamuli wabye, Munyiki wa nayo wabye, ni Hosi yabye.’ (Isa. 33:22) A matimu ya vaIsraeli ma komba lezi zi humelelako loku a milayo ya Nungungulu yi ingiswa ni loku yi nga ingiswi. Kota lezi a nayo wu nga beletela ku tekana ni vamatiko ni ku hlengela wukhozelini ga mawunwa, wu wa mahelwa ku vikela a lixaka la pswalo wa Abrahama lezaku li nga nyenyeziswi. — Ekso. 20:4-6; 34:12-16.

 5. a) A xivumelwano xa Nayo xi wa nyika lungelo muni a vaIsraeli? b) Hikuyini Nungungulu a nga tsukula a tiko ga Israeli?

⁵ A xivumelwano xa Nayo xonawu xi wa hi ni lulamiselo ga wupristi, legi gi nga yimela a lulamiselo ga hombe legi gi nga hata. (Maheb. 7:11; 10:1) Kunene, hi xivumelwano lexo, a tiko ga Israeli gi wa hi ni lungelo go hlawuleka ga ku wumba “tiko ga vapristi;” lexi xi nga laveka ku wa hi ku ingisa a milayo ya Jehova. (Gonza Eksodusi 19:5, 6.) Kanilezi, Israeli i lo tsanzeka ku maha lezo. Wutshanwini ga ku nyika lisima a kuta ka Messia, loyi a nga xipanze xo sangula xa pswalo wa Abrahama, a tiko ga Israeli gi lo mu ala. Hi kota ya lezo, Nungungulu i lo va tsukula.

 6. I kungo muni legi a Nayo wu gi tatisileko?

⁶ A kuva a tiko ga Israeli gi tsanzekile ku simama gi tsumbekile ka Jehova zonake gi humesa lava va nga wa ta wumba a tiko ga vapristi, a zi wuli lezaku a Nayo wu tsanzekile. A kungo ga Nayo ku wa hi ku vikela a pswalo ni ku heleketa a vanhu ka Messia. Laha Kristu a nga chikela a tlhela a tiviwa, a kungo ga wona gi lo tatiseka. A Biblia gi ngalo: “Kristu hi magumeso ya Nayo.” (Rom. 10:4) Hambulezo, ku sala xiwutiso lexi: Hi vamani makunu va nga wa ta kuma lungelo ga ku wumba a mufumo wa vapristi ke? Jehova Nungungulu i lo maha xivumelwano xinwani xa ku wumba a tiko ga giswa.

 7. Zini lezi Jehova a nga profeta hi ku tirisa Jeremia xungetano hi xivumelwano xiswa?

⁷ Na za ha hi kule ni ku a xivumelwano xa Nayo xi fuviswa, Jehova i lo profeta hi ku tirisa muprofeti Jeremia lezaku i wa ta maha “xivumelwano xiswa” ni tiko ga Israeli. (Gonza Jeremia 31:31-33.) A xivumelwano lexo xi wa ta hambana ni xivumelwano xa Nayo hakuva xona xi wa ta vulula ndlela ya ku tsetselelwa zionho na ku nga hi na xilaveko xa miphahlelo ya zihari. Xi wa ta mahisa kuyini lezo?

8, 9. a) Zini zi kotekako hi kota ya nkhata wu halatilweko wa Jesu? b) I lungelo muni gi kumiwako hi lava va nga ka xivumelwano xiswa? (Wona mufota kusanguleni ka nzima.)

⁸ Anzhako ka mazana ya malembe, Jesu i lo yimisa a Xilalelo xa Hosi hi 14 ka Nisani wa 33 Nguveni ya Hina. Na a wulawula hi gombe ga vinya, i lo byela vapostoli vakwe vo tsumbeka va khume ni munwe aku: “Legi gombe hi xivumelwano xiswa nkhateni wa mina, lowu wu halatelwako nwina.” (Luka 22:20) A matimu ya Mateu ma tshaha Jesu na a wula lezi xungetano hi vinya: “Lexi hi nkhata wa mina wa xivumelwano xiswa, lowu wu halatelwako a vanyingi a kutsetselelweni ka zionho.” — Mat. 26:27, 28.

⁹ A nkhata wu halatilweko wa Jesu wu tiyisa a xivumelwano xiswa. A  nkhata lowu wu vulula a ndlela kambe ya ku tsetselelwa zionho hi khati ginwe zi mbhela. Jesu a nga patseki ka xivumelwano xiswa. Kota lezi a nga hiko na xionho, a nga na xilaveko xa ku tsetselelwa. Kanilezi Nungungulu i wa ta tirisa a ntsengo wa nkhata wu halatilweko wa Jesu ka vana va Adamu. I wa ta tlhela a amukela vanhu vo kari kota “vana” vakwe hi ku va tota hi moya wa ku basa. (Gonza Va Le Roma 8:14-17.) Kota lezi va woniwako na va nga hi na xionho mahlweni ka Nungungulu, hi ndlela yo kari va wa ta fana na Jesu, loyi a nga N’wana wa Nungungulu a nga hiko na xionho. A vatotilweko lavo va wa tava “zigatshomba zinwe na Kristu” va tlhela va kuma lungelo ga ku wumba “tiko ga vapristi.” Legi i lungelo legi a tiko ga Israeli gi nga wa tava nago hasi ka Nayo. Xungetano hi “zigatshomba zinwe na Kristu,” mupostoli Pedro i te ngalo: “Nwina mu lixaka li hlawulilweko, a vapristi va wuhosi, a tiko gi basileko, a vanhu va lumbako Nungungulu, kasi mu fela a kuba hungu hi mitiro yi rewukisako ya yena loyi a nga mu vitana mu huma munyameni, muta kuwonekeleni kakwe ku hlamalisako.” (1 Ped. 2:9) Hi nga wona a lisima la xivumelwano xiswa! Xi vulula ndlela ya lezaku a vapizani va Jesu va maha xipanze xa wumbiri xa pswalo wa Abrahama.

10. A xivumelwano xiswa xi sangulile rini ku tira, niku hikuyini xi nga kala ku sangula mahlweni ka lezo?

¹⁰ A xivumelwano xiswa xi sangulile rini ku tira? A xi sangulangi ka wusiku go gumesa ga wutomi ga Jesu laha misaveni. Kasi xi sangula ku tira, ku wa laveka lezaku a nkhata wa Jesu wu halatiwa ku tlhela ku hendleletwa ntsengo wa wona ka Jehova le tilweni. Tlhatakumbiri, ku wa laveka lezaku a moya wa ku basa wu chululwa ka lava va nga wa tava “zigatshomba zinwe na Kristu.” Hikwalaho, a xivumelwano xiswa xi sangulile ku tira hi Pentekosta wa 33 Nguveni ya Hina, a xikhati lexi a vapizani vo tsumbeka va Jesu va nga totiwa hi moya wa ku basa.

11. A xivumelwano xiswa xi vululisile kuyini ndlela ya lezaku a vaJuda ni vaMatiko vava xipanze xa Israeli wa moya, niku va wa tava vangani ka xivumelwano lexo?

¹¹ Hambu lezi a xivumelwano xa Nayo xi nga maha “xa kale” a xikhati lexi Jehova a nga tivisa hi ku tirisa Jeremia lezaku i wa ta maha xivumelwano xiswa na Israeli, hi lisine a xi fuvangi kala laha a xivumelwano xiswa xi nga sangula ku tira. (Maheb. 8:13) A xikhati lexi lezo zi nga humelela, Nungungulu i lo wona makholwa ya vaJuda ni ya vaMatiko va makhuna hi ndlela yo fana, hakuva “a wutshiva [gabye] hi legi gi nga ga mbilu, legi gi mahiwako moyeni, na ku nga hi kota ya kutsala.” (Rom. 2:29) Hi ku maha navo xivumelwano xiswa, Nungungulu i wa ta veka milayo yakwe “kupimeni kabye, [a] yi tsala timbilwini tabye.” A ntsengo wontlhe wa lava va nga ka xivumelwano xiswa wu wa tava 144.000, va wumbako a tiko giswa — ku nga ‘Israeli wa Nungungulu’ — ​a nga Israeli wa moya. — Gal. 6:16; Kuv. 14:1, 4.

12. Kufana muni ku nga kona xikari ka xivumelwano xa Nayo ni xivumelwano xiswa?

¹² Kufana muni ku nga kona xikari ka xivumelwano xa Nayo ni xivumelwano xiswa? A xivumelwano xa Nayo xi wa hi xa Jehova ni Israeli wa mabeleko; a xivumelwano xiswa xi mahiwa hi Jehova ni Israeli wa moya. Mosi i wa hi mutlhanganyisi ka xivumelwano xa Nayo; Jesu hi yena Mutlhanganyisi ka lexi xa xiswa. A xivumelwano xa Nayo xi wa tiyisiwa hi nkhata wa zihari; a xivumelwano xiswa xi tiyisiwa hi nkhata wa Jesu wu halatilweko. A tiko ga Israeli gi wa xaxametilwe hi xivumelwano xa Nayo mandleni ya Mosi; lava va nga ka xivumelwano xiswa va xaxametilwe mandleni ya Jesu — a Hloko ya bandla. — Efe. 1:22.

13, 14. a) A xivumelwano xiswa xi yelanisa kuyini ni Mufumo? b) Xini xi lavekako kasi ku a Israeli wa moya a fuma na Kristu le tilweni?

¹³ A xivumelwano xiswa xa yelana ni Mufumo hakuva xi humesa tiko gi basileko legi gi nga ni lungelo ga kuva tihosi ni vapristi ka Mufumo walowo wa le tilweni. A tiko lego gi wumba xipanze xa wumbiri xa pswalo wa Abrahama. (Gal. 3:29) Hi ndlela leyo, a xivumelwano xiswa xi tiyisa a xivumelwano xa Abrahama.

¹⁴ A xivumelwano xiswa xi pswala a Israeli wa moya xi tlhela xi maha xiseketelo xa lezaku a ziro zakwe zi maha “zigatshomba zinwe na Kristu.” Hambulezo, zi wa ta kotekisa kuyini lezaku va fuma zinwe na Jesu kota tihosi ni vapristi Mufunweni wakwe le tilweni ke? Ku wa laveka lulamiselo ginwani ga nayo.

15. Xivumelwano muni lexi Jesu a xi mahileko yece ni vapostoli vakwe vo tsumbeka?

¹⁵ Anzhako ka ku yimisa a Xilalelo xa Hosi, Jesu i lo maha xivumelwano ni vapizani vakwe vo tsumbeka, lexi a kutala ka zikhati xi wuliwako lezaku xivumelwano xa Mufumo. (Gonza Luka 22:28-30.) A kuhambana ni zivumelwano lezi zinwani, lezi Jehova a nga munwe wa lava va patsekako ka zona, lexi xivumelwano xi wumbiwako hi Jesu ni valanzeli vakwe va totilweko. Loku aku, “Nza mu nyika kufuma [“nza maha xivumelwano,” NM] kota lezi Dadani a nzi nyikileko kona,” zi wonekisa ku khwatsi Jesu i wa wulawula hi xivumelwano lexi Jehova a xi mahileko naye xaku ava “mupristi kala kupinzuka hi tshamela ga Melkizedeki.” — Maheb. 5:5, 6.

16. A xivumelwano xa Mufumo xi ma nyika lungelo muni a maKristu ma totilweko?

¹⁶ A vapostoli vakwe vo tsumbeka va 11 va wa ‘simamile naye kuringweni kakwe.’ A xivumelwano xa Mufumo xi va tiyisile lezaku va wa tava zinwe naye le tilweni, va tshama zitshanwini za wuhosi kasi ku fuma naye kota tihosi ni ku tira kota vapristi. Hambulezo, a vapostoli lavo va 11 a hi vona voce va tova ni lungelo lego. Jesu loyi a tlakusilweko i lo woneka ka mupostoli Johani hi muwoniso aku: “Loyi a hlulako nzi ta mu nyika a kuva a tshama zinwe na mina xitshanwini xa mina xa wuhosi, kota lezi mina nzi nga hlula, nzi tshamile na Dadani wa mina xitshanwini xakwe xa wuhosi.” (Kuv. 3:21) Hikwalaho, a xivumelwano xa Mufumo xi mahiwa ni wontlhe maKristu ma totilweko ya 144.000. (Kuv. 5:9, 10; 7:4) A xivumelwano lexi hi xona xi wumbako a xiseketelo xa nayo xa lezaku va fuma na Jesu le tilweni. Lezi zi fana ni muswika wa ngango wo hlawuleka loyi a chadako ni hosi yi fumako, zonake ava ka xiyimo xa ku fuma zinwe naye. Kunene, a Mitsalo yi wulawula hi maKristu ma totilweko kota “muswika” wa Kristu, a “nhwana a basileko” loyi a tsumbisilweko ku chada na Kristu. — Kuv. 19:7, 8; 21:9; 2 Kor. 11:2.

17, 18. a) Tlhamusela a ntlhanu wa zivumelwano ni xinwe hi wulawulileko hi zona lezi zi yelanako ni Mufumo. b) Hikuyini hi nga vako ni kutsumba ko tiya ka Mufumo?

¹⁷ A zivumelwano zontlhe lezi hi wulawulileko hi zona ka tinzima leti ta timbiri zi yelana ni nchumu wunwe hi wutsongwani ga kona xungetano hi Mufumo. (Wona a kwadru “Lezi Nungungulu a to tatisisa zona kungo gakwe.”) A mhaka leyi yi khanyisa lezaku a lulamiselo ga mufumo gi seketelwe giku nde ka zivumelwano za nayo. Hikwalaho, hi na ni xigelo xo zwala xa ku tsumba hi kumbhelela a Mufumo wa wuMessia kota wona lowu Nungungulu a wu tirisako kasi ku tatisa kungo gakwe go sangula xungetano hi misava ni vanhu. — Kuv. 11:15.

¹⁸ Xana ku ngava ni xigelo xo kanakana lezaku a zimaho za Mufumo zi ta neha makatekwa ya pinzukelwa? Hi kutsumba kontlhe, hi xumayela hi kutiya lezaku a Mufumo wa Nungungulu hi wona woce wu to mbheta a zikarato zontlhe za vanhu. Ngha hi xumayela lisine leli ka vanwani hi kuhiseka! — Mat. 24:14.