Pimanyisa kutimisela ka Jehovha

1-2. A magezu ya Jehovha ma nga ka Isaya 65:16, 17 ma hi vhunisa kuyini ku simama hi timisela?

“U NGA TSIKI KU TIMISELA!” Leyi yive hloko ya mhaka yo tsakisa nguvhu ya gotsovanyano wa muganga wa 2017. A gotsovanyano lowo wu hi kombile lezvi hi nga timiselisako zvona zvikarato lezvi hi kumanako nazvo. Zvezvi ku hundza 4 wa malembe, niku hi hina lava, ha ha timisela zvikarato tikweni legi go biha.

² Zvikarato muni u kumeneko nazvo zvezvanyana? U felwe hi xaka kutani munghana u mu randzako? Wa babya zva ku a wu zvi tivi ku zvi ta gumesisa kuyini? Wa xaniswa hi wukhosana? U welwe hi khombo ga ntumbuluko, u kumene ni zvigevenga, kutani wa xanisiwa? U lwisana ni zvikarato zvi vangiwako hi mababyi yo kota ntungu wa COVID-19? Vasan’wina! Ca hlwela a cikhati leci a zvilo zvontlhe zvakubiha zvi to mbhela — laha zvi to kala zvi nga ha maheki ne ku tshuka hi zvi alakanya kambe! — Lera Isaya 65:16, 17.

 3. Zvini hi faneleko ku maha zvezvi niku hikuyini?

³ A wutomi tikweni legi ga bindza, niku cikhatini ci tako, zva koteka ku hi kumana ni zvikarato zvo bindza ku hundza lezvi. (Mat. 24:21) Hi cigelo leco, hi fanele ku simama hi ti yimisela ku timisela. Hikuyini? Hakuva Jesu i te: “Hi kutimisela ka n’wina mu ta ponisa wutomi ga n’wina.” (Luka 21:19) A ku ehleketa hi lezvi a van’wani va timiselisako zvona a zvikarato zvo fana ni lezvi zva hina, zvi nga hi nyika ntamu wa ku hinawu hi timisela.

 4. Hikuyini hi nga wulako lezvaku Jehovha cikombiso ci nene mhakeni ya ku timisela?

⁴ Himani a nga cikombiso ci nene mhakeni ya ku timisela? Hi Jehovha Nungungulu. Kuzvilava zva ku hlamalisa a kuzwa ku Jehovha wa timisela. Kanilezvi, loku u nyima u ehleketa khwatsi, zvi nga ta ku hlamalisa. A tiko legi gi fumelwa hi Sathani niku gi tele hi zvikarato. Jehovha i ni ntamu wa ku zvi mbheta hi kutsopeta ka tihlo. Kanilezvi, wa ha rindzela siku legi a gi yimisileko. (Rom. 9:22) Ni nyamutlha lezvi, Nungungulu wa hina wa ha simama ku timisela kala gi chikela siku lego. Zvezvi, a hi woneni a 9 wa zvilo lezvi Jehovha a zvi timiselako.

 5. A vito ga Nungungulu gi chakisiwa hi ndlela muni, niku wena u ti zwisa kuyini hi lezvo?

⁵ Kuchakisiwa ka vito gakwe. Jehovha wa gi randza nguvhu a vito gakwe, niku i lava ku vontlhe va gi kombisa cichavo. (Isa. 42:8) Hambulezvo, ku hundza cipimo ca 6000 wa malembe na gi chakisiwa. (Lis. 74:10, 18, 23) Lezvo zvi sangulile le Jardhim ya Edheni a cikhati leci Dhiyabhu (zvi wulako ku “Mulumbeti”) a nga lumbeta Nungungulu aku i tsona Adhamu na Evha lezvi va zvi lavako kasi va tsaka. (Gen. 3:1-5) Kusukela kwalaho, Jehovha i kari a lumbetiwa ku a vanhu wa va tsona lezvi zvi lavekako ka vona kasi va tsaka. Jesu i wa karateka hi lezvi a vito ga Papayi wakwe gi nga kari gi chakisiwa. Hi cigelo leco a nga gondzisa vapizani vakwe a ku va khongela vaku: “Papayi wa hina wa le tilweni, a vito ga wena a gi basisiwe.” — Mat. 6:9.

 6. Hikuyini Jehovha a tsikako cikhati co leha ci hundza na a nga se lulamisa mhaka ya loyi a nga ni fanelo ya ku fuma?

⁶ Kuvhukelwa ka fanelo yakwe ya ku fuma. Jehovha hi yena a nga ni fanelo ya ku fuma laha misaveni ni le tilweni, a ku na mun’wani, niku i fuma hi ndlela ya yi nene a ku hundza vontlhe. (Kuv. 4:11) Kanilezvi, Sathani i kho a zama ku kalavela vanhu kasi va alakanya ku Nungungulu a nga na fanelo ya ku fuma. Zvi wa nga ta koteka a ku zvi woneka hi siku gin’we a ku hakunene Jehovha hi yena a nga ni fanelo ya ku fuma niku hi yena a zvi tivako ku fuma khwatsi a ku hundza vontlhe; zvi wa lava cikhati. Hikwalaho, Nungungulu i no kombisa wutlhari, a va nyika cikhati co tala vanhu kasi va zvi wona khwatsi a ku loku va zama ku ti fumela hi voce, va nga ingisi yena Muvangi wabye, a zvi koteki a ku zvi va fambela khwatsi. (Jer. 10:23) Lezvi Jehovha a kombisako lihlazva-mbilu, laha makunu a to lulamisa a mhaka leyi, a ku na munhu a ha to kanakana ku hi yena a nga ni fanelo ya ku fuma laha misaveni ni le tilweni. Vontlhe va ta zvi tiva lezvaku Jehovha hi yena a zvi kotako ku fuma khwatsi ku hundza vontlhe niku a Mufumo wakwe hi wona woce wu to neha kurula ni kutshamiseka laha misaveni.

 7. Hi vamani va tsikileko ku ingisa Jehovha? Zvini a to va maha?

⁷ Ku nga ingisi ka vana vo kari. Jehovha i vangile tingilozi ni vanhu na va mbhelele. Kanilezvi, a cikhati leci Sathani (zvi wulako ku “Mukaneti”) a nga jikela Jehovha a tsika ku mu ingisa, i no kalavela Adhamu na Evha, a vanhu vo mbhelela, vonawu va jikela Jehovha va tsika ku mu ingisa. A tingilozi ni vanhu van’wani va no ti patsa navo, va jikela Jehovha va tsika ku mu ingisa. (Jud. 6) Hi ndzhako ka cikhati, hambu vanhu lava Nungungulu a nga va hlawulile, a vaIzrayeli, vonawu va no mu tsika va sangula ku khozela vanungungulu va mawunwa. (Isa. 63:8, 10) Jehovha a nga tsakangi hi lezvi va nga mu jikela. Hambulezvo i no timisela, niku i ta simama ku timisela kala ci chikela a cikhati leci a to lovisa vontlhe va tsikako ku mu ingisa. Ka cikhati leco, Jehovha ni malandza yakwe wontlhe yo tsumbeka va ta tsaka nguvhu hakuva zvi nga ta ha lava ku va timisela zvilo zvo biha zva tiko legi!

8-9. Mawunwa muni ma wuliwako xungetano hi Jehovha? Zvini hi nga mahako hina xungetano hi mawunwa lawo?

⁸ Mawunwa ya Sathani. Sathani i lumbetile Joba ni malandza wontlhe yo tsumbeka ya Jehovha aku ma mu tirela hi ku fela ku wuyelwa. (Joba 1:8-11; 2:3-5) Kala nyamutlha Sathani wa ha lumbeta vanhu. (Kuv. 12:10) Hina hi nga maha cipandze ca hina, hi komba ku lezvi Sathani a nga wula o hemba, hi kuva hi timisela zvikarato hi kumanako nazvo, hi simama ku tsumbeka ka Jehovha hi ku mu randza. A ku fana na Joba, Jehovha i ta hi katekisa hinawu loku hi timisela. — Jak. 5:11.

⁹ Sathani i tirisa varangeli va wukhongeli ga mawunwa kasi ku lumbeta Jehovha lezvaku i na ni xapi niku hi yena a xanisako vanhu. Ni loku kufa cin’wanana, a van’wani vaza va xinyata vaku hi Nungungulu a nga ci teka hakuva i wa lava ngilozi yin’wani! A wu zvizwi ku i hlamba ya hombe leyo! Kanilezvi hina ha zvi tiva ku Jehovha i Papayi wa lirandzo nguvhu. Hambu loku ho babya zva hombe nguvhu kutani loku hi felwa hi munhu hi mu randzako, a hi tshuki hi lumbeta Jehovha. Wutshan’wini ga lezvo, hi kholwa lezvaku cikhatini ci tako, a vanhu vontlhe va nga ta ha babya niku i ta vhuxa lava va fileko. Makunu, hi nga byela ni wihi a lavako ku zwisa kasi yenawu a zvi tiva ku Jehovha i Nungungulu wa lirandzo la hombe nguvhu. Lezvo zvi maha ku a zvi kota ku hlamula loyi a mu rukako.— Mav. 27:11.

10. A Lisimu 22:23, 24 li komba yini hi Jehovha?

¹⁰ Ku wona malandza yakwe a ma randzako na ma xaniseka. Jehovha i Nungungulu wo zwela wusiwana. I zvi nyenya nguvhu a ku hi wona na hi rila hi kota ya zvikarato lezvi zvi hi xanisako— ku ngava ku vhukelwa, mababyi, kutani kungambheleli ka hina. (Lera Lisimu 22:23, 24.) Jehovha wa ku zwisisa a kubayisa loku hi ku zwako; i lava ku ku mbheta, niku i ta ku mbheta futsi. (Wona ni mongo wa Eksodusi 3:7, 8; Isaya 63:9.) Ga hata, niku gi ta chikela futsi a siku legi a to ‘kulula mihloti yontlhe matihlweni ya hina, ku nga havi ni kufa, hambu ni hlomulo, kutani kurila, ni kubayisa.’ — Kuv. 21:4.

11. Zvini a zvi xuvako Jehovha hi malandza yakwe yo tsumbeka ma fileko?

¹¹ Ku xuva a vanghana vakwe va fileko. Jehovha i ti zwisa kuyini hi malandza yakwe yo tsumbeka lawa ma fileko? I va xuva nguvhu; i zvi lava nguvhu a ku va wona kambe! (Joba 14:15) Hi nga alakanyela lezvi a mu xuvisako zvona a munghana wakwe Abrahama! (Jak. 2:23) Kutani Mosi, loyi a nga wulawula naye “na va cuwukene”! (Ekso. 33:11) Ne a ha ha wuli lezvi a zvi xuvisako zvona a kuzwa Dhavhidha ni van’wani na va yimbelela tisimu tabye ta sasekela ga cima ta ku dhumisa Jehovha! (Lis. 104:33) Hambu lezvi a vanghana lava va Nungungulu va fileko, a nga va rivali. (Isa. 49:15) Wa va alakanya khwatsi ni wumunhu gabye gontlhe. A Bhibhiliya gi ‘kuwoneni ka yena vontlhe va hanya.’ (Luka 20:38, tlhamuselo wa lahasi.) Ka siku go kari i ta va vhuxa, a yizwa kambe a mikhongelo yabye yo huma mbilwini a tlhela a tsaka hi ku va mu khozela. Loku u felwe hi munhu u nga mu randza, hi xuva ku a ku tiva lezvo zvi ku chavelela ni ku ku tangalisa.

12. Cini ci mu swirako nguvhu Jehovha masikwini lawa yo gumesa yo biha?

¹² Ku wona vanhu na va xanisa van’wani. A cikhati leci a zvilo zvi nga wonheka le Edheni, Jehovha i wa zvi tiva ku na a nga se lulamisa ciyimo, a zvilo zvi wa ta ranga hi ku bindza nguvhu. Phela Jehovha wa gi nyenya wubihi, wukanganyisi, ni xapi yontlhe yi nga kona laha misaveni. Kusukela kale, i khatala nguvhu hi lava va nga hava muvhuni, vo kota lava vo felwa hi vanuna ni vo felwa hi vapswali. (Zak. 7:9, 10) Jehovha i swireka nguvhu loku a wona malandza yakwe yo tsumbeka na ma xanisiwa ma tlhela ma vhalelwa. Tiyiseka lezvaku wa mu randza n’wina n’wentlhe mu timiselako a ku fana na yena.

13. Mahanyela muni ya tingana lawa Jehovha a ma wonako ka vanhu?

¹³ Mahanyela yo nyenyeza hi tlhelo ga masango. A vanhu va mahilwe hi mufananiso wa Nungungulu. Kanilezvi Sathani i zvi randza nguvhu a ku va kucetela vava ni mahanyela ya chaka. A cikhati leci Jehovha va nga wona ‘kuwonha ka vanhu lezvaku ku kulile’ masikwini ya Nowa, ‘i no ti laya hi lezvi a vangileko a munhu misaveni, a xaniseka mbilwini yakwe’. (Gen. 6:5, 6, 11) Ahati nyamutlha ke, ku ngava lezvaku a zvilo zvi chukwatile? A ku kala ni ku vala! Sathani a ngo ku tsaka lezvi a wubhayi ga tixaka tontlhe gi tatileko misava, laha a wasati a etlelako ni wasati-kuloni, a wanuna a etlela ni wanuna-kuloni, a wanuna ni wasati va maha zvilo zvo nyenyeza! (Efe. 4:18, 19) Loku Sathani aza a zvi kota ku phasa lava va khozelako Jehovha va maha ciwonho, i tsaka a khoma ni tilo. Laha Jehovha a to karala ku timisela, zvi ta woneka khwatsi lezvi a mahanyela lawo ya chaka a ma nyenyisako zvona.

14. Zvini lezvi a vanhu va mahako hi zvivangwa zva Nungungulu?

¹⁴ Zvivangwa zvakwe zvi wonhiwako. A munhu a hi ku o xanisa van’wani basi hi lezvi a va fumelisako zvona; kanilezvi i wonha ni misava ni zvihari lezvi Jehovha a zvi vekileko mandleni yakwe kasi a zvi hlayisa. (Mutsh. 8:9; Gen. 1:28) A titlhari to kari ti wula lezvaku ka malembe ma tako, lezvi a vanhu va zvi mahako zvi ta maha ku laha misaveni ku fuva 1 000 000 wa tixaka ta zvihari ni tisinya. Zva zwisiseka lezvi a van’wani va karatekako loku va wona lezvi a ntumbuluko wu nga ha zvona. A ya ku tsakisa hi ku Jehovha i tsumbisile ku “lovisa lava va wonhako misava” ni ku cica misava yontlhe yiva paradhise. — Kuv. 11:18; Isa. 35:1.

15-16. Cini ci faneleko ku hi kuca ku timisela na Jehovha? Nyika mufananiso.

¹⁵ Ku hundza malembe yo tala nguvhu Jehovha na a timisela zvilo zvo bayisa nguvhu. (Wona kwadru “Lezvi Jehovha a timiselako.”) Phela loku Jehovha i wa no zvi lava, na a fuvisile tiko legi go biha ni ka cihi cikhati. Hambulezvo, ha vhuneka nguvhu hi kutimisela kakwe. Ehleketa hi mufananiso lowu: A wanuna wo kari ni sati wakwe a nga ni nyimba, va byeliwa hi dhokodhela lezvaku a n’wana loyi a nga lomu ndzeni i ta pswaliwa ni mababyi ya hombe a tlhela afa na a nga kulangi. Hambu lezvi va zvi tivako ku ti ta wuya laha ku ku mu hlayisa, va tsaka a cikhati leci a pswaliwako. A lirandzo va nga nalo hi n’wana wabye li va kuca ku timisela ni cihi cikarato va tlhela va maha zvontlhe va zvi kotako kasi a n’wana wabye a hanya khwatsi hi laha zvi kotekako hi kona.

¹⁶ Vontlhe a vana va Adhamu na Evha vonawu va pswaliwa na va nga mbhelelangi. Hambulezvo, Jehovha wa va randza a tlhela a va hlayisa. (1 Joh. 4:19) A vapswali laha ka mufananiso wa hina a va nge zvi koti ku susa cikarato ca n’wana wakwe, kanilezvi Jehovha i ni ntamu wa ku mbheta kuxaniseka ka vana vakwe. I sina a yimisile siku legi a to mbheta wubihi gontlhe legi gi xanisako vanhu vontlhe. (Mat. 24:36) Lezvi hi tivako ku Jehovha wa hi randza, a hi chukwana hi ti yimisela ku timisela naye kala laha zvi lavekako hi kona?

17. Lezvi zvi wuliwako ka Mahebheru 12:2, 3 xungetano hi Jesu zvi hi kucisa kuyini a ku simama hi timisela?

¹⁷ Jehovha i hi vekela cikombiso ci nene mhakeni ya ku timisela. Jesu i ku pimanyisile khwatsi a kutimisela ka Papayi wakwe. A cikhati a nga hi laha misaveni, i rukatelwe, a mahiwa zvilo zvo dhanisa, a guma a belelwa laha mhandzeni ya hlomulo. Zvontlhe lezvo i zvi timisele kasi ku vhuneka hina. (Lera Mahebheru 12:2, 3.) Handle ko kanakana, a cikombiso ca Jehovha ci mu nyikile ntamu wa ku timisela Jesu. Hinawu ci nga hi nyika ntamu wa ku timisela.

18. 2 Pedro 3:9 i hi vhunisa kuyini ku wona mabhindzu ma nga kona hi lezvi Jehovha a kombisako lihlazva-mbilu?

¹⁸ Lera 2 Pedro 3:9. Jehovha wa ci tiva a cikhati ca ci nene ca ku lovisa a tiko legi go biha. Lezvi a kombisako lihlazva-mbilu, zvi vhulula ndlela ya ku a vanhu vo tala va mu tiva, niku zvezvi ku na ni vanhu va talela ga cima va mu khozelako. Vontlhe a vanhu lavo va mu bonga nguvhu Jehovha hi lezvi a timiseleko kala kuza va pswaliwa, va gondza ku mu randza va tlhela va nyikela wutomi gabye ka yena. A cikhati leci Jehovha a to chachazela a kutala ka hina hi to timisela kala magumo, zvi ta woneka khwatsi ku i mahile khwatsi hi lezvi a nga timisela.

19. Zvini hi ti yimiseleko ku maha niku i nchachazelo muni hi to wu kuma?

¹⁹ A ka Jehovha hi gondza ndlela ya ku timisela na hi tsakile kambe. Hambu lezvi Sathani a vangako zvikarato ni tixanisa to tala, Jehovha wa ha simama kuva “Nungungulu wo tsaka”. (1 Tim. 1:11) Hinawu hi nga simama hi tsakile laha hi kombisako lihlazva-mbilu hi rindzela ku Jehovha a basisa vito gakwe, a kombisa ku hi yena a nga ni fanelo ya ku fuma, a mbheta wubihi gontlhe ni zvikarato zva hina zvontlhe. A hi ti yimiseleni a ku simama hi timisela hi tlhela hi chaveleleka hi ku tiva lezvaku, Jehovha, a Papayi wa hina wa le tilweni, yenawu o timisela. Loku hi maha lezvo, ka mun’we ni mun’wani wa hina, ku ta tatiseka a magezu lawa yaku: “I katekile a munhu loyi a simamako ku timisela mindzhingo, hakuva loku a yi hlula i ta kuma a cidlodlo ca wutomi, leci Jehovha a tsumbisako lava va simamako ku mu randza.” — Jak. 1:12.