Kulungelani Kristu, a Hosi ya kungangamela!

1, 2. Hikuyini hi faneleko ku chela kota hi Tisimu 45 ke?

A HOSI ya kungangamela yi khilela haxi yi lwela a lisine ni kululama yi tlhela yi ya hlula a valala va yona. Anzhako ka kuhlula ko gumesa, yi chada ni muswika yi mu ranzako nguvu. A hosi leyi yi alakanyiwa ni ku kulungelwa hi zizukulwana zontlhe za ha tako. Leyo hi yona a mhaka-tshinya ya Tisimu 45.

² Hambulezo, a Lisimu la wu 45 li na ni timhaka ta hombe nguvu ku hunza ku hlawutela zilo zo tsakisa zi gumesako hi ndlela yi nene. A zimaho lezi zi kumbukiwako ka lisimu leli zi wula xokari ha hina. Zi khumba wutomi ga hina zalezi ni ka xikhati xi tako. Na zi hi tano, a hi hloleni khwatsi a lisimu leli.

3, 4. (a) Zilo muni zo “saseka” lezi hi chelako kota ka zona, niku zi yi khumbisa kuyini a mbilu ya hina? (b) ‘A lisimu la hina li xungeta a hosi’ hi ndlela muni, niku xana a lirimi la hina li fanisa kuyini ni peni?

³ Gonza Tisimu 45:1. ‘A zilo zo saseka’ lezi zi khumbako a mbilu ya muyimbeleli wa tisimu zi tlhela zi yi maha yi “pupuma” zi koka kupima ka hosi. A gezu ga xiHeberu gi hunzuluselweko ku “ya pupuma” gi wula “ku vila.” A mhaka leyi yi mahile a mbilu ya muyimbeleli wa tisimu lezaku yi vila yi halakela hi manyawunyawu yi tlhela yi maha a lirimi lakwe li fana ni “peni ya mutsali a tlharihileko.”

⁴ Ahati hina ke? A mahungu yo saseka xungetano hi Mufumo wa wuMessia i nchumu wo saseka wu khumbako a mbilu ya hina. A mahungu ya Mufumo ma lova yo “saseka” nguvu hi 1914. Kusukela kwalaho, a mahungu lawo a ma ha vangi ya Mufumo wu to yimiswa xikhatini xi tako, kanilezi ma lo wulawula hi mufumo wa lisine lowu makunu wu tirako le tilweni. “A ivangeli leyi ya mufumo” kutani mahungu yo saseka hi yona hi kanelako “misaveni yontlhe, kasi yiva wukustumunyu ka matiko wontlhe.” (Mat. 24:14) Xana a mbilu ya hina ya “pupuma” hi kota ya mahungu lawa ya Mufumo? Ha xumayela a mahungu yo saseka ya Mufumo hi kuhiseka ke? A ku fana ni muyimbeleli wa tisimu, ‘a lisimu la hinawu li xungeta a hosi’ — Hosi ya hina Jesu Kristu. Hi mu huwelela kota Hosi ya Mufumo wa wuMessia yi yimisilweko le tilweni. Ahandle ka lezo, hi ramba vontlhe — a tihosi ni vafumelwi — ​lezaku va ti veka hasi ka wuhosi gakwe. (Tis. 2:1, 2, 4-12) A xinwani kambe, a lirimi la hina li fana ni “peni ya mutsali a tlharihileko” hi lezi hi tirisako nguvu a Mhaka ya Nungungulu yi tsalilweko ntirweni wa hina wa kuxumayela.

 5. (a) Xana Jesu i wa hi “lipswitla” hi tindlela muni? (b) A kuwulawula ka tipswalo ku wa huma milonwini ya Hosi hi ndlela muni, niku hi nga ti karatelisa kuyini a ku lanzela xikombiso xakwe?

⁵ Gonza Tisimu 45:2. A Mitsalo yi wula zitsongwani nguvu xungetano hi kucuwukeka ka Jesu ka xiviri. Kota munhu wo mbhelela, handle ko kanakana i wa hi “lipswitla.” Hambulezo, a kusaseka kakwe ko dlunyateka ku wata hi lezi a nga hi munhu wo tsumbeka ka Jehova zilweni zontlhe. Tlhatakumbiri, Jesu i lo wulawula “timhaka ta tipswalo” a xikhati lexi a nga xumayela mahungu ya Mufumo. (Luka 4:22; Joh. 7:46) Xana hina wutsumbu ha ti karatela a ku lanzela xikombiso xakwe ntirweni wa hina wa kuxumayela ni ku zama ku wula magezu lawa ma to khumba timbilu ta vanhu ke? — Kol. 4:6.

 6. Xana Nungungulu i mu katekisisile kuyini Jesu “kala kupinzuka”?

⁶ Kota lezi Jesu a nga tirela Nungungulu hi mbilu yontlhe, Jehova i lo mu katekisa wutirelini gakwe laha misaveni a tlhela a mu chachazela anzhako ka kufa kakwe kota muphahlo. Mupostoli Paule i lo tsala lezi: ‘Laha Jesu a ngata kota munhu, i lo ti koramisa, a ingisa kala kufeni, ina, afa mhanzeni ya xanisa. Hi kota ya lezo Nungungulu i lo mu tlakusa nguvu, a mu nyika vito gi nga hehla ka mavito wontlhe; lezaku hi vito ga Jesu a madzolo ya vontlhe lava va nga le tilweni, ni laha misaveni, ni lahasi ka misava, ma ta mu khizamela, kasi a tirimi tontlhe ti fela ku wulela lezaku Jesu Kristu i Hosi, a dumiswa Nungungulu Dadani.’ (Fil. 2:8-11) Jehova i lo katekisa Jesu “kala kupinzuka” hi ku mu vuxa hi ka vafileko a mu nyika wutomi gi nga fiko. — Rom. 6:9.

 7. Nungungulu i totile Jesu ku hunza “vanakuloni” hi tindlela muni?

⁷ Gonza Tisimu 45:6, 7. Hi kota ya lezi Jesu a ranzako nguvu kululama, a venga ni xihi xi wa nga ta wa mu susela wudzunzo a Dadani wakwe, Jehova i lo mu tota kota Hosi ya Mufumo wa wuMessia. Jesu i lo totiwa hi “mafura ya litsako” ku hunza “vanakuloni,” ku nga tihosi ta ka Juda ta lixaka la Davida. Hi ndlela muni? Hi lezaku Jesu i totilwe hi Jehova wutsumbu. Ahandle ka lezo, Jehova i lo mu tota kota Hosi tlhelo Mupristi wa Hombe. (Tis. 2:2; Maheb. 5:5, 6) Tlhatakumbiri, Jesu a nga totiwangi hi mafura kanilezi hi moya wa ku basa, ni lezaku a wuhosi gakwe a hi ga laha misaveni kanilezi ga le tilweni.

 8. Zi nga wuliswa kuyini lezaku ‘Nungungulu xitshamu xa wuhosi xa Jesu,’ niku hikuyini hi nga kanakaniko lezaku a mufumo wakwe wu lulamile?

⁸ Jehova i yimisile a N’wana wakwe kota Hosi yakwe ya wuMessia le tilweni hi 1914. ‘A nhonga ya mufumo wakwe i nhonga ya nongameto,’ hikwalaho, a kufuma kakwe ku lulamile ni lezaku ku vuna vanhu vontlhe. A wufumeli gakwe ga wusumbulwa, kota lezi Nungungulu a nga ‘xitshamu xakwe xa wuhosi.’ Lezo zi wula ku Jehova hi yena xiseketelo xa mufumo wakwe. Ahandle ka lezo, a xitshamu xa wuhosi xa Jesu xa “kala kupinzuka.” A wu tizwi matshanza hi ku tirela Jehova na u rangelwa hi Hosi leyo ya ntamu yi yimisilweko hi Nungungulu ke?

9, 10. (a) Hi rini laha Kristu a nga boha a supado yakwe, niku i tekele ku yi tirisisa kuyini? (b) Xana Kristu wa ha ta yi tirisisa kuyini a supado yakwe ke?

⁹ Gonza Tisimu 45:3. Jehova i byela a Hosi yakwe lezaku yi ‘boha supado ya yona nyongeni,’ hi ku maha loko a mu chusa lezaku a yalwa ni vontlhe lava va kanetako a wuhosi ga Nungungulu ni ku neha kulamula Kakwe hehla kabye. (Tis. 110:2) Kota lezi Kristu a nga Hosi tlhelo Mulwi wa tiyimpi a nga hluliwiko, ve ngalo kakwe, “Nhenha nziwena.” I bohile a supado yakwe hi 1914, zonake a hlula Satani ni madimoni yakwe a gumesa a va hlongola le tilweni a va hoxa lahasi misaveni. — Kuv. 12:7-9.

¹⁰ Lawo ku’ve masangulo ntsena ya lezaku a Hosi yi khilela a haxi yiya kuhluleni. Ya hata mbhetisa a kuhlula ka yona. (Kuv. 6:2) Jehova wa ha ta neha kulamula hehla ka zipanze zontlhe za tiko ga Satani laha misaveni, ni lezaku Satani ni madimoni yakwe va fanele ku bohiwa. A xo sangula xi to loviswa i Babuloni loyi wa hombe, mufumo wa misava yontlhe wa wukhongeli ga mawunwa. I kungo ga Jehova a ku tirisa a tihosi ta politika lezaku ti lovisa a “xibhayi” lexi xa kubiha. (Kuv. 17:16, 17) Hi kulanzela, a Hosi tlhelo Mulwi wa tiyimpi yi taya mahlweni yi vukela a mafambisela ya politika ya Satani, yi ma lovisa maku bhi. Zonake Kristu, loyi a vitwako kambe ku “ngelosi ya nkele wa lieswila,” i ta mbhetisa kuhlula kakwe hi ku valela Satani ni madimoni yakwe nkeleni wa lieswila. (Kuv. 9:1, 11; 20:1-3) A hi woneni lezi a Tisimu 45 li zi profetisileko zona a zilo lezi zo hlamalisa.

11. Kristu i lwelisa kuyini a lisine?

¹¹ Gonza Tisimu 45:4. A Hosi tlhelo Mulwi wa tiyimpi a nga hlomi yimpi lezaku a khozisa matiko ni ku fumela vanhu. Ilwa yimpi yo lulama hi zigelo zo hlawuleka. I khilela haxa a lwela a lisine, kutikoramisa ni kululama. A lisine la hombe ka tontlhe leli li faneleko ku lwelwa hi leli laku Jehova i hosi wuakweni gontlhe. Satani i lo phikiza a wusumbulwa ga wuhosi ga Jehova a xikhati lexi a nga mu hluwukela. Kusukela kwalaho, a wuhosi lego gi lumbako Jehova yece ga ha bangiwa hi madimoni ni vanhu. Makunu xi chikele xikhati xa lezaku a Hosi ya Jehova yi totilweko yi lwela a lisine lelo la lezaku Jehova hi yena hosi wuakweni gontlhe kanwe ku mbhela.

12. A Hosi yi lwelwa ‘kutikoramisa’ hi ndlela muni?

¹² A Hosi kambe yi lwela ‘kutikoramisa.’ Kota N’wana wa Nungungulu a belekilweko yece, yena wutsumbu i nyikile xikombiso xi nene nguvu xa ku ti tsongahata ni ku ti koramisa ka wuhosi ga Dadani wakwe. (Isa. 50:4, 5; Joh. 5:19) Wontlhe a malanza yo tsumbeka ya Hosi leyi ma fanele ku lanzela xikombiso xakwe ni ku ti koramisa ka wuhosi ga Jehova zilweni zontlhe. Ntsena lava va mahako lezo hi vona va to vumelelwa ku hanya misaveni yiswa yi tsumbisiwako hi Nungungulu. — Zak. 14:16, 17.

13. Xana Kristu i lwelisa kuyini a “kululama”?

¹³ Kristu kambe i lwela “kululama.” A kululama loku a Hosi yi ku lwelako “kululama ka Nungungulu” — ku nga milayo ya Jehova xungetano hi za zi nene ni za kubiha. (Rom. 3:21; Deut. 32:4) Xungetano hi Hosi Jesu Kristu, Isaya i lo profeta aku: “A hosi yi ta fuma hi kululama.” (Isa. 32:1) A kufuma ka Jesu ku ta neha a “matilo maswa ni misava yiswa” zi tsumbisilweko, “lomu a kululama ku tshamileko kona.” (2 Ped. 3:13) A vahanyi vontlhe va misava leyo ya yiswa va ta layiwa lezaku va ti zwananisa ni milayo ya Jehova. — Isa. 11:1-5.

14. A canja ga xinene ga Kristu gi ta mahisa kuyini “mitiro yi rewukisako”? (Wona mufota kusanguleni ka nzima.)

¹⁴ A Hosi yiya mahlweni na yi bohile supado nyongeni ya yona. (Tis. 45:3) Kanilezi ku chikela xikhati lexi yi hlomulako supado yi yi khoma hi canja ga yona ga xinene. A mutsali wa tisimu i lo profeta aku: “A canja ga wena ga xinene gi [maha] mitiro yi rewukisako.” (Tis. 45:4) A xikhati lexi Jesu Kristu a nehako kulamula ka Jehova yimpini ya Har–Magedoni, i ta maha “mitiro yi rewukisako” hehla ka valala vakwe. A hi zi tivi a ku i ta tirisa matlhari muni kasi ku lovisa a tiko ga Satani. Kanilezi a ximaho lexi xi ta vanga kuchava ko tshisa timbilwini ta vaaki va misava lava va nga ingisiko a xitlharihiso xa Nungungulu xa ku ti veka hasi ka wufumeli ga Hosi. (Gonza Tisimu 2:11, 12.) Ka xiprofeto xakwe xungetano hi xikhati xa kugumesa, Jesu i wulile lezaku a vanhu va wa ta “titivala hi kuchava, ni ku langutela lezi zi tako tikweni; hakuva a mintamu ya tilo yi ta tsekatsekiswa.” I lo engeta aku: “Zonake va ta wona N’wana wa munhu na ata hi refu, a hi ni ntamu ni kungangamela ka hombe.” — Luka 21:26, 27.

15, 16. Hi vamani va tova nzeni ka “mabutho” lawa ma lanzelako Kristu na aya yimpini?

¹⁵ Laha gi tivisako a kuta ka Hosi hi “ntamu ni kungangamela ka hombe” lezaku yi ta lamula, a bhuku ga Kuvululelwa gi ngalo: “Nzi lo wona tilo na gi vululekile, ku woneka a haxi go basa, ni loyi a nga khilele ka gona i vitanwa Kutsumbeka ni [Lisine]; wa lamula alwa hi kululama. Ni mabutho ya le tilweni ma lo mu lanzela, na ma khilele mahaxi yo basa, na ma ambele a tinguwo to saseka ta wukene ti basileko tiku pa. Ku huma nonwini wakwe a supado yo kariha, leyi a ta ngaba matiko ha yona. I ta ma fumela hi nhonga ya xiketse; i ta kamela xigowolweni xa vinya ga zanga yi tshisako ya Nungungulu Nyamintamu.” — Kuv. 19:11, 14, 15.

¹⁶ Hi vamani va tova masochwa-kulobye ya Kristu, a “mabutho” ya le tilweni lawa ma mu lanzelako maya kulweni ke? Laha a nga boha supado yakwe hi khati go sangula a hlongola Satani ni madimoni yakwe le tilweni, Jesu i wa hi zinwe ni “tingelosi takwe.” (Kuv. 12:7-9) Zi wonekisa ku khwatsi yimpini ya Har–Magedoni, a mabutho ya Kristu ma ta patsa ni tingelosi to basa. Xana ku tava ni vanwani ahandle ka tingelosi ke? Jesu i tsumbisile lezi ka vamakabye vakwe va totilweko: “Loyi a hlulako, a kholeka mitirweni ya mina kala kugumesa, nzi ta mu nyika ntamu hehla ka matiko. I ta ma risa hi nhonga ya xiketse, a ma fayetela zipanzana khwatsi hi zibya za wumba; khwatsi hilezi na minawu nzi nga nyikiswa zona hi Dadani wa mina.” (Kuv. 2:26, 27) Hikwalaho, nzeni ka mabutho ya Kristu ya le tilweni ku tava ni vamakabye vakwe va totilweko, lava a ka xikhati lexo va to ngha va amukele a nchachazelo wabye wa le tilweni. A vafumeli-kulobye va tava tlhelweni gakwe a xikhati lexi a tatisako “mitiro yi rewukisako” na a risa matiko hi nhonga ya xiketse.

17. (a) A haxi go basa legi Kristu a khileleko gi yimela yini? (b) Ahati a supado ni wura ke?

¹⁷ Gonza Tisimu 45:5. A Hosi yi khilele a haxi go basa, gi yimelako a yimpi yo basa ni yo lulama mahlweni ya Jehova. (Kuv. 6:2; 19:11) Ahandle ka supado, yi na ni wura kambe. Hi gonza lezi: “Nzi lo cuwuka, nzi wona a haxi go basa; ni loyi a nga khilele hehla ka gona i wa hi ni wura; i lo nyikwa xidlodlo, i lo huma kota muhluli a yako kuhluleni.” Hi wumbiri ga zona, a supado ni wura zi yimela matlhari lawa Kristu a to ma tirisa kasi ku neha kulamula hehla ka valala vakwe.

18. Xana a “miseve” ya Kristu yi tava yo “kariha” hi ndlela muni?

¹⁸ Na a ku khwatsi o chula lisimu, a muyimbeleli wa tisimu i profeta lezaku ‘a miseve ya Hosi ya kariha, yi tlhava timbilwini ta valala vakwe’ yi tlhela yi maha ‘a matiko ma wela lahasi ka yona.’ Lava va delweko va ta mbambamela misaveni yontlhe. Jeremia i lo profeta aku: “Lava va delweko hi Jehova va ta mbambamela misaveni kusukela mbhirini kala ka yinwani mbhiri ya misava.” (Jer. 25:33) A xiprofeto xinwani xo fana ni lexi xi ngalo: “Nzi lo wona ngelosi na yi yimile gambyeni; yi lo kanyuluka hi gezu ga hombe yiku ka zinyanyani zontlhe zi purumako ndengelengeni: Tanani mu ta tsombana mubuzweni wa hombe wa Nungungulu. Mu taga a nyama ya tihosi, ni nyama ya tinduna, ni nyama ya tinhenha, ni nyama ya mahaxi ni ya lava va khileleko ka wona, ni nyama ya vontlhe lava va tlhatlhekileko ni tikhumbi, a vatsongwani ni vahombe.” — Kuv. 19:17, 18.

19. Xana Kristu ‘iya kuhluleni’ hi ndlela muni, niku i ta mbhetisisa kuyini a kuhlula kakwe?

¹⁹ Anzhako ka ku lovisa a tiko go biha ga Satani, Kristu ‘kungangameleni kakwe’ i ‘taya kuhluleni.’ (Tis. 45:4) I ta mbhetisa a kuhlula kakwe hi ku valela Satani ni madimoni yakwe nkeleni wa lieswila kala ku mbhela a Kufuma ka 1.000 wa Malembe. (Kuv. 20:2, 3) Lezi Diabolus ni tingelosi takwe va to ngha va fana ni loku va file, a vaaki va misava va ta ngha va tlhatlhekile ka kucetelo wa Satani, niku va ta zi kota ku ti koramisa hi kumbhelela ka Hosi yabye ya ntamu ni yo ngangamela. Hambulezo, na misava yontlhe yi nga se hunzulwa yiva paradise, va tava ni xigelo xinwani xa ku tsaka ni Hosi yabye ni vafumeli-kulobye va le tilweni. A ximaho lexo xo tsakisa hi ta xi kambisisa ka nzima yi lanzelako.