A Mufumo wu maha a kuranza ka Nungungulu misaveni

1, 2. a) Hikuyini zi nga ha karatako xikhati xinwani a ku wona Paradise kota nchumu wa lisine? b) Zini zi nga hi vunako a ku tiyisa a kukholwa ka hina zitsumbisweni za Nungungulu?

A MAKABYE wa xinuna a tsumbekileko i chikela mutlhanganweni, na a karele hi ku ngha a yimisene ni zikarato zo hambanahambana a siku lego. I xaniseka hi lezi a mulungu wakwe a karatako, a yimisanako ni zikarato za ku wundla ngango, ni lezi a babyelwako hi sati. A xikhati lexi a lisimu lo vulula mutlhangano li sangulako, yena i hefemuteka hi kutsaka hi lezi a zi kotileko ku chikela Salawini ya Mufumo kasi kuva ni vamakabye vakwe. A lisimu lelo li wulawula hi wutomi Paradiseni, niku a magezu ya lona ma mu kuca ku alakanyela a paradise, a ti wona na a hi kwaseyo. Yena wa li ranza nguvu lisimu leli hi kale, niku a xikhati lexi a yimbelelako zinwe ni ngango wakwe, a kutsumba loko ka mu chavelela.

² Xana wa tshuka u ti zwisa lezo? A kutala ka hina za tshuka zi hi humelela. Kanilezi, a lisine hi lezaku a wutomi mafambiseleni lawa ya kale ga zi kota ku hi tsanzekisa ku wona lezaku a Paradise legi gi tako ga lisine hakunene. Hi hanya ‘masikwini yo gumesa ya zikarato,’ niku a tiko legi ga hambana nguvu ni paradise. (2 Tim. 3:1) Zini zi to hi vuna a ku wona lezaku a wutomi paradiseni i nchumu wu to maheka hakunene ke? Niku, xana hi zi tivisa kuyini lezaku a Mufumo wa Nungungulu wu ta fumela vanhu vontlhe lokuloku ke? A hi wulawuleni hi ziprofeto zitsongwani za Jehova lezi a vanhu vakwe a zi wonileko ni ku tatiseka xikhatini xa kale. Hi ta tlhela hi alakanya lezi a ziprofeto lezo ni zinwani zo fana nazo zi tatisekisako zona zalezi hi ndlela yo hlamalisa. Hi kugumesa, na kukholwa ka hina ku tiyisilwe, hi ta wulawula hi lezi a ziprofeto lezo zi yelanisako zona ni wumanziko ga hina.

3. Xitsumbiso muni xi chaveleleko vaJuda lava va nga kari va hanya le Babuloni?

³ Hi nga alakanyela lezi a wutomi gi nga hi zona ka vaJuda va nga hi wukhumbini le Babuloni ka zana ga malembe ga wu 16 Mahlweni ka Nguva ya Hina. A kutala ka vona va kulele wukhumbini, a ku fana ni vapswali vabye, niku a wutomi gi wa binza. A vaBabuloni va wa va tseketsela hi lezi va nga kholwa ka Jehova. (Tis. 137:1-3) Hi makume ya malembe, a vaJuda vo tsumbeka va simamile ku khomelela ka xitsumbiso lexi xo tsakisa: Jehova i tsumbisile ku tlhelisa vanhu vakwe tikweni gabye. Jehova i wulile lezaku a xiyimo xi wa ta chukwata nguvu kwaseyo. I tlhelile a ringanisa a tiko ga Juda gi vuxetilweko ni simu ga Edeni — a paradise! (Gonza Isaya 51:3.) A zitsumbiso lezo zi mahelwe ku tiyisekisa a vanhu va Nungungulu, ni ku va mbheta a kukanakana loku va nga wa tava nako timbilwini tabye. Hi ndlela muni? Wona a ziprofeto zo kari zo kongoma.

4. Xana Jehova i tiyisekisile kuyini a vaJuda xungetano hi kuhlayiseka le tikweni gabye ga mabeleko?

⁴ Kuhlayiseka. A tikhumbi leto ti wa nga ta tlhelela paradiseni ga xiviri, kanilezi ti wa taya ka tiko ga le kule gi nga tshamile a 70 wa malembe na gi nga hlayisiwi, legi gi nga wonilwe hi vatsongwani xikari ka vona. Matikweni lawa a Biblia gi wulawulako hi wona ku wa tolovelekile a tinghala, mahlolwa, tiyingwe, ni zinwani zivanza. Kuzilava a hloko ya ngango yi wa ta ti wutisa lezi, ‘Nzi ta vikelisa kuyini a sati wa mina ni vana va mina? Ahati a tiyivu ni tihomu — nzi ta zi vikelisa kuyini?’ A kukarateka loko ku wa ta zwala. Kanilezi, alakanyela a xitsumbiso xa Nungungulu xi nga ka Isaya 11:6-9 ni lezi xi nga wa ta ngha xi chavelelisile zona vanhu lavo. (Gonza.) Hi magezu lawo yo sasekiselwa, Jehova i lo tiyisekisa a tikhumbi leto lezaku vona ni zifuyo zabye va wa ta hanya kutshamisekeni. Ku wuliwa lezaku a tinghala ti wa taga byanyi hakuva ti wa nga ta khandamula a zifuyo za vaJuda. A vatsumbekileko va wa nga tava ni xigelo xa ku chava zivanza lezo. Jehova i tsumbisile lezaku a vanhu vakwe va wa ta hlayiseka tikweni ga Juda gi vuxetilweko, hambu kova xiwuleni kutani makhwatini. — Ezek. 34:25.

5. Ziprofeto muni zi vunileko a tikhumbi ti nga kari ti tlhela kaya a ku tsumba lezaku Jehova i wa ta khatalela khwatsi a zilaveko zabye?

⁵ Kutala ka zakuga. Kuzilava ku wa ta humelela kunwani kukarateka. ‘Xana nzi ta zi kota ku wundla ngango wa mina tikweni gi vuxetilweko? Hi ta tshama kwihi? Xana hi ta kuma mitiro, niku xana yi tava chukwana ku hunza a mikhinyavezo ya seno wukhumbini hi xaniswako hi vakhozisi va hina?’ Hi ku tirisa a ziprofeto zi pimisilweko, Jehova hi wunene i lo hlamula a ziwutiso lezo kambe. Jehova i lo tsumbisa lezaku a vanhu vakwe va ingisako va wa ta niselwa tivula to khanzakanya; kasi a misava yi va milisela ‘pfuno wo xurisa.’ (Isa. 30:23) Xungetano hi tiyindlu ni ntiro wu bhinzulako, Jehova i tsumbisile lezi xungetano hi vanhu vakwe: “Loku va aka tiyindlu va ta tshama ka tona, ni loku va byala zivina va taga mihanzu ya zona. Va nga ta akela ku kasi vanwani va tshama lomo, va nga ta byalela ku kasi vanwani vaga mihanzu ya kona.” (Isa. 65:21, 22) Hakunene, a wutomi gi wa ta tsakisa hi tindlela to tala a ku hunza wukhumbini ga le Babuloni wa wuhedeni. Ahati a zikarato zabye za hombe ke — lezi zi nga va yisa wukhumbini?

6. Xana a vanhu va Nungungulu va wa xanisekile hi mababyi muni kusukela kale, niku zini lezi Jehova a tsumbisileko a tikhumbi leti ti nga kari ti tlhelela kaya?

⁶ Kutshamiseka ka moya. Na ka ha kiyela xikhati xo leha lezaku vaya wukhumbini, a vanhu va Nungungulu va babyile hi tlhelo ga moya. Hi ku tirisa muprofeti Isaya, Jehova i wulile lezi xungetano hi vanhu vakwe: “A hloko yontlhe ya babya, a mbilu yontlhe yi baviseka.” (Isa. 1:5) Hi tlhelo ga moya, vona va wa hi zikhumu ni ziwiri, hakuva va wa ti vala tindleve lezaku va nga ingisi a wusungukati ga Jehova, va tlhela va ti vala mahlo lezaku va nga woni a kuwonekela ka moya. (Isa. 6:10; Jer. 5:21; Ezek. 12:2) Loku ku hi lezaku lava va nga wa ta wuya hi wukhumbini va wa ta yimisana ni zikarato lezo, kutshamiseka muni va nga wa tava nako? Xana va wa nga ta tekela ku khunguvanyisa Jehova kambe? A xitsumbiso xa Jehova xi va nyikile kutiyiseka ku faneleko: “Hi siku lego a ziwiri zi tazwa a timhaka ta bhuku, ni mahlo ya zikhumu ma ta susiwa phume ma wona munyameni.” (Isa. 29:18) Hakunene, Jehova i wa ta chuma hi tlhelo ga moya a vanhu vakwe va nga tsayisilwe va guma va ti sola. Loku va simama a ku mu ingisa yena i wa ta va nyika wurangeli ni kuwonekela ku hanyisako.

7. Xana a zitsumbiso za Nungungulu ka vanhu vakwe va nga hi wukhumbini zi tatisekisile kuyini, niku hikuyini a kutatiseka loko ku faneleko ku tiyisa a kukholwa ka hina?

⁷ Xana Jehova i tatisile a zitsumbiso zakwe? A matimu ma hlamula a xiwutiso lexi. A vaJuda lava va tlheleleko tikweni gabye va lo katekiswa hi kuhlayiseka, kutala ka zakuga ni kutshamiseka ka moya. Hi xikombiso, Jehova i va vikele ka valala vabye va lomu ka wuakelwani lava va nga hi ni ntamu na va tele ku hunza vona. A zifuyo za vaJuda a zi giwangi hi zivanza. Lisine lezaku a vaJuda lavo va wonile a kutatiseka kutsongwani ka ziprofeto za paradise lezi a vavanuna vo kota Isaya, Jeremia, na Ezekieli va nga tsala — kanilezi a kutatiseka ka zona ku hlamalisile niku ku wa yelana ni lezi zi nga hi xilaveko xa vanhu va Nungungulu xikhatini lexo. Loku hi alakanyela lezi Jehova a maheleko vanhu vakwe xikhatini lexo, a kukholwa ka hina ku ta tiya nguvu. Loku ku hi ku a kutatiseka ko sangula ni ka kutsongwani ka ziprofeto ku hlamalisile, ahati a kutatiseka ka hombe loku ka ha tako ke? Wona lezi Jehova a hi mahelako inyamutlha.

8. I “tiko” muni legi a vanhu va Nungungulu va nga ka gona inyamutlha?

⁸ A vanhu va Jehova inyamutlha a va wumbi tiko ga xiviri, niku a va tshami ka wutshamu ginwe ntsena ga xiviri. Kanilezi, a maKristu ma totilweko ma wumba a tiko ga moya, a ‘Israeli wa Nungungulu.’ (Gal. 6:16) A vanghana vabye va “tiyivu tinwani” va patsana navo ka “tiko” ga moya, ku nga wutshamu go fananisa lomu va khozelako kona Jehova Nungungulu hi wumunwe. A wukhozeli lego hi gona a hanyela gabye. (Joh. 10:16; Isa. 66:8) I “tiko” ga lixaka muni legi Jehova a hi nyikileko? I paradise ga moya. Kwalomo ku tatiseka hi tlhelo ga moya a zitsumbiso za Nungungulu xungetano hi paradise ga le Edeni. Wona a zikombiso zo kari.

9, 10. a) Xana a xiprofeto xa Isaya 11:6-9 xi tatisekisa kuyini inyamutlha? b) Xikombiso muni xa kurula lexi hi xi kumako xikari ka vanhu va Nungungulu?

⁹ Kuhlayiseka. Ka xiprofeto xi tsalilweko ka Isaya 11:6-9, hi kuma mufananiso wo tsakisa xungetano hi kuzwanana ni kurula — xikari ka zihari za khwati ni vanhu zinwe ni zifuyo zabye. Xana a mufananiso lowo wa tatiseka inyamutlha hi tlhelo ga moya? Ina! Ka vesi 9, hi tiva a xigelo xa kuva a zihari lezo zi nga vangi zikarato: “Hakuva ku tiva Jehova ku tava ku enetile misava, khwatsi hi lezi a mati ma fenengetileko a kueta ka bimbi.” Xana a “ku tiva Jehova” ku hunzula a mapimo ya zihari? Ahihi, ku hunzuluswa a vanhu hi ku tiva a Nungungulu a Hunzeleleko Kutlakuka ni ku gonza ku pimanyisa a matshamela yakwe yo rula. Hikwalaho, ka paradise ga hina ga moya inyamutlha, ha wona a kutatiseka ko tsakisa ka xiprofeto lexo. Hasi ka Mufumo, a valanzeli va Kristu va gonza ku tsika a matshamela yabye ya tihanyi, ya wuhari, lezaku va hanya hi kurula ni kuzwanana ni vamakabye vabye va moya.

¹⁰ Hi xikombiso, lomu ka bhuku legi hi wulawulile hi mhaka ya kuva a maKristu ma nga ti ngheniseli ka za wupolitika — xigelo xa kona hi kuya hi Mitsalo ni tixanisa leti a vanhu va Nungungulu va yimisanako nato hi ku maha lezo. Xana a zi hlamalisi lezaku misaveni leyi ya tihanyi, ku kumeka “tiko” ga hombe ga vanhu lava va alako ku hlengela ka tihanyi ta tixaka tontlhe, hambu loku va hi mhangweni ya ku dawa? Hakunene lexo xiseketelo xo hlamalisa xa lezaku a vafumelwi va Hosi ya wuMessia va ti buza hi kurula ko kota loku ku tlhamuselweko hi Isaya! Jesu i huwelele lezaku a valanzeli vakwe va wa ta tiveka hi ku ranzana. (Joh. 13:34, 35) Nzeni ka bandla, Kristu hi lihlaza-mbilu i tirisa a ‘nanza gakwe gi tsumbekileko ni go tlhariha’ lezaku a gonzisa a maKristu wontlhe ya lisine a ku kombisa kurula, liranzo, ni wunene. — Mat. 24:45-47.

11, 12. I ndlala ya lixaka muni leyi yi sokolisako a tiko masikwini ya hina, kanilezi xana Jehova i wundlisa kuyini a vanhu vakwe hi zakuga zo tala?

¹¹ Kutala ka zakuga. A tiko ga sokola hi ndlala ya moya. A Biblia gi tlharihisile lezaku: “Ma hata masiku lawa nzi ta nga rumela a ndlala misaveni, na ku nga hi ndlala ya zakuga, kutani a tora go lava mati, kanilezi a ndlala yo lava timhaka ta Jehova.” (Am. 8:11) Xana a zisumbulwa za Mufumo wa Nungungulu za xaniseka hi ndlala zonawu? Jehova i profetile a kuhambana loku xikari ka vanhu vakwe ni valala vakwe: “A malanza ya mina ma taga, kanilezi nwina mu tava ni ndlala, a malanza ya mina ma tanwa, kanilezi nwina mu tazwa tora; a malanza ya mina ma ta tsaka, kanilezi nwina mu tava ni tingana.” (Isa. 65:13) Xana wa ku wona a kutatiseka ka magezu lawo?

¹² A zakuga za moya za khulunga a ku khwatsi i congo wu yako wu anama ni ku eta. A mabhuku ya hina ma seketelwako ka Biblia — zinwe ni tidrama ni tividiyu, mitlhangano ni migotsovanyano ya hina, ni mahungu ma haxiwako ka phajina ga hina ga Internet — zi maha congo wu nga nyimiko wa zakuga za moya tikweni legi gi fako hi ndlala. (Ezek. 47:1-12; Joe. 3:18) Xana a wu hlamali hi ku wona kutatiseka ka zitsumbiso za Jehova za kutala ka zakuga wutomini ga wena? Xana wa ti karatela kuga mezeni ya Jehova hi kukhanzakanya?

13. U ku wonisa kuyini a kutatiseka ka xitsumbiso xa Jehova xungetano hi kuvululwa ka mahlo ya zikhumu ni kuvululwa ka tindleve ta ziwiri?

¹³ Kutshamiseka ka moya. A wukhumu ni wuwiri ga moya zi mahile ntungu inyamutlha. (2 Kor. 4:4) Kanilezi, Kristu i kari a chuma mababyi misaveni yontlhe. Xana wa wona mahlo ya zikhumu ni tindleve ta ziwiri na zi vululeka? Loku ku hi ku wa tshuka u wona vanhu na va kuma wutivi ga lisine ga mhaka ya Nungungulu, va tsika mawunwa ya wukhongeli lawa ma nga va pfhupelisile ni ku va tsona kuzwa lisine, u wonile a kutatiseka ka xitsumbiso lexi: “Hi siku lego a ziwiri zi tazwa a timhaka ta bhuku, ni mahlo ya zikhumu ma ta susiwa phume ma wona munyameni.” (Isa. 29:18) Misaveni yontlhe, a vanhu va mazana ya makume ya mazana lembe ni lembe va chumiwa hi tlhelo ga moya. A munhu ni munhu loyi a humako Babuloni wa hombe a ti patsa na hina lezaku hi khozela ka paradise ga hina ga moya xikombiso xo tiya xa lezaku a zitsumbiso za Jehova za tatiseka!

14. Xana hi ta tiyisa a kukholwa ka hina loku hi ehleketa hi yini?

¹⁴ A xipimo xinwe ni xinwani xa bhuku legi xi na ni xikombiso xa ntamu xa lezaku Kristu i nghenisile valanzeli vakwe paradiseni ga lisine ga moya xikhatini lexi xa magumo. A hi simameni hi ehleketa hi tindlela to tala leti hi katekiswako hi tona paradiseni lego inyamutlha. Loku hi maha lezo, a kukholwa ka hina ka zitsumbiso za Jehova xungetano hi wumanziko ku ta simama ku tiya nguvu.

15. Hikuyini hi zi kotako ku tiyiseka lezaku a misava yi tava paradise?

¹⁵ A kungo ga Jehova cima ka kale ku hunzula a misava yiva paradise. I lo veka Adamu na Eva paradiseni, a va laya ku tata misava hi vana vabye va tlhela va hlayisa a zivangwa zontlhe za yona. (Gen. 1:28) Kanilezi Adamu na Eva va lo ti patsa na Satani kuhluwukeni va tlhela va tlhavela a vana vabye vontlhe a kungambheleli, xionho, ni kufa. Hambulezo, a kungo ga Nungungulu a gi cicangi. Loku ma wuliwa, a magezu yakwe ma tatiseka xontlhe xikhati. (Gonza Isaya 55:10, 11.) Hikwalaho, hi nga tiyiseka lezaku a vana va Adamu na Eva va ta tata a misava leyi va tlhela va yi fumela, va hlayisa a zivangwa za Jehova hi liranzo paradiseni gi to ngha gi tatile misava. Xikhatini lexo, a ziprofeto lezi zi sangulileko hi ku nyikwa a tikhumbi ta maJuda xungetano hi paradise zi ta tatiseka hi kumbhelela! Wona a zikombiso zi lanzelako.

16. Xana a Biblia gi tlhamuselisa kuyini a kuhlayiseka loku hi tova nako Paradiseni?

¹⁶ Kuhlayiseka. Hi magumo, a mufananiso wo khumba nguvu wu tlhamuselwako ka Isaya 11:6-9 wu ta tatiseka hi kumbhelela hi tlhelo ga xiviri. A vavanuna, vavasati, ni vanana va nga ta chava nchumu kontlhe lomu va to famba kona misaveni. A ku na munhu ge hambu xihari xi to va karata. Ti alakanyele na u wona a misava yontlhe na yi hi muti wa wena, lomu u to zi kota ku hlambela micongweni, mativeni, ni mabimbini; u tsemakanya zitsunga; ni ku fambafamba makhwatini na u nga chavi nchumu. Ni loku a gambo gi pela, u nga ta karateka hi nchumu. A magezu ma nga ka Ezekieli 34:25 ma ta tatiseka, lezaku zi koteka ku a vanhu va Nungungulu va “aka hi kurula lomu xiwuleni, va etlela ni lomu makhwatini.”

17. Hikuyini hi nga tiyisekako lezaku Jehova i ta khatalela khwatsi a zilaveko za hina loku a Mufumo wa Nungungulu wu ta fumela misava yontlhe?

¹⁷ Kutala ka zakuga. Alakanyela a xikhati lexi ku to kala ku nga hi na zilo zo kota wusiwana, ndlala, kutani tihlengeletano to khatalela zisiwana. A kutala ka zakuga za moya lezi a vanhu va Nungungulu va ti buzako hi zona inyamutlha xitiyisekiso xa lezaku a Hosi ya wuMessia yi ta gisa a vafumelwi va yona hi matlhelo wontlhe. A xikhati lexi Jesu a nga hi misaveni, i kombisile kutsongwani lezaku wa zi kota ku tatisa a zitsumbiso lezo, hakuva i gisile makume ya mazana ya vanhu va nga hi ni ndlala hi zipawana ni tinjhanjhi titsongwani. (Mat. 14:17, 18; 15:34-36; Mar. 8:19, 20) Loku a Mufumo wa Nungungulu wu ngha wu fuma misaveni yontlhe, a ziprofeto zo kota lexi zi ta tatiseka hi xiviri: “A timbewu ta nwina leti mu nga ti byala i ta ti nisela vula, ni zibaba zi humeswako hi pfuno wa masimu zi ta nanziha zi xurisa; a xikhatini lexo a mitlhambi ya nwina yi ta gela mikoveni ya hombe.” — Isaya 30:23.

18, 19. a) Xi ku khumbisa kuyini a xiprofeto xi tsalilweko ka Isaya 65:20-22? b) Xana a masiku ya hina “ma ta ringana ni masiku ya tisinya” hi ndlela muni?

¹⁸ Inyamutlha a vanhu vo tala a va ti woni na va zi kota kuva ni muti wa wu nene kutani ntiro wu bhinzulako ni ku tsakisa. Mafambiseleni lawa yo biha, a votala va alakanya lezaku va tira nguvu na va nga bhinzuli nchumu kasi ku vuna vona venyi ni mingango yabye, kuveni lava vo ganya ni va makangwa va kuma mabhinzu wontlhe. Alakanyela lezi a zilo zi to tshamisa zona loku a xiprofeto lexi xi tatiseka misaveni yontlhe: “Loku va aka tiyindlu va ta tshama ka tona, ni loku va byala zivina va taga mihanzu ya zona. Va nga ta akela ku kasi vanwani va tshama lomo, va nga ta byalela ku kasi vanwani vaga mihanzu ya kona; hakuva a masiku ya vanhu ma ta ringana ni masiku ya tisinya, ni vahlawulilweko va mina va ta tsakela mitiro ya mandla yabye.” — Isaya 65:20-22.

¹⁹ Zi wula yini ku a masiku ya hina “ma ta ringana ni masiku ya tisinya”? Loku u yima laha tshinyeni ga sinya ya hombe nguvu, xana wa khumbeka nguvu loku u alakanyela lezaku yi hanyile nguvu — kuzilava na yi byalilwe kale nguvu, mahlweni ka kupswaliwa ka vakokwani va vakokwani va wena? U nga ha alakanya lezaku loku u wo simama xiyinweni xa wena xo kala ku mbhelela, wena u wa tafa u siya a sinya leyo, yona yi simama ku hanya nguvu kuruleni kala u nga ha alakanyiwi. A hi kutsakisa ka wunene ga Jehova ga ku hi tiyisekisa lezaku le Paradiseni gi tako, a masiku ya hina ma ta tala nguvu, na hi hi kuruleni! (Tis. 37:11, 29) Ga hata siku legi hambu a tisinya leti to hanya nguvu ti to woneka ka hina kota byanyi gi milako gifa hi kuphindaphinda, kuveni hina hi simama ku hanya kala kupinzuka!

20. Xana a vafumelwi vo tsumbeka va Mufumo va ta zi kotisa kuyini ku kuma wutomi go mbhelela?

²⁰ Wutomi go mbhelela. Inyamutlha hontlheni ha khumbiwa hi mababyi ni kufa. Hi ndlela yo kari, hontlheni ha babya — hi thapelwe hi mababyi ya mahati ma vitwako xionho. A muri wa wona i nzhiho wa Kristu. (Rom. 3:23; 6:23) Loku a kari a fuma hi 1.000 wa malembe, Jesu ni vafumeli-kulobye va ta vuna vanhu lezaku va vuneka hi kumbhelela hi nzhiho lowo, ku fuviswa a matshamela wontlhe ma yelanako ni xionho ka vanhu vo tsumbeka. A xiprofeto lexi xa Isaya xi ta tatiseka hi kumbhelela: “A ku na muaki ni munwe a ta ngaku: Nza babya! A vanhu va akileko lomu va ta tsetselelwa zionho zabye.” (Isa. 33:24) Ehleketa hi xikhati lexi ku to kala ku nga ha hi na zikhumu, ziwiri, kutani zilema. (Gonza Isaya 35:5, 6.) A ku na mababyi lawa Jesu a to tsanzeka ku ma chuma, ku ngava ya nyama, ya mapimo, kutani ya mbilu. A vafumelwi vo tsumbeka va Mufumo va tava ni wutomi go mbhelela!

21. Zini zi to humelela a kufa, niku hikuyini u chavelelwako hi xitsumbiso lexo?

²¹ Ahati lezi zi humelelako loku munhu a nga kalamuki ka mababyi, ku nga wuyelo ga xionho — a kufa? Loye hi yena ‘nala wa hina wo gumesa,’ loyi a vanhu vontlhe va nga mbhelelangiko va to gumesa hi ku hluliwa hi yena. (1 Kor. 15:26) Kanilezi, xana a kufa i nala wa hombe nguvu ka Jehova? Wona lezi Isaya a zi profetileko: “I ta fuvisa kufa kala ku pinzuka; Hosi Nungungulu i ta hlangula mihloti tinghoheni tontlhe.” (Isa. 25:8) Xana wa xi wona a xikhati lexo? Ku nga ta ha lahliwa munhu, ku nga ta hava ni zilahla, ge hambu mihloti ya kubayiseka! Ku ta humelela zo hambana nguvu ni lezo — ku ta riliwa hi kutsaka a xikhati lexi Jehova a tatisako a xitsumbiso xakwe xo hlamalisa xa ku vuxa a vafileko! (Gonza Isaya 26:19.) Hi magumo, a zilonza zontlhe lezi zi vangilweko hi kufa zi ta hola.

22. Zini zi to humelela loku a Mufumo wa wuMessia wu mbhetile ku maha a kuranza ka Nungungulu misaveni?

²² Kugumeseni ka 1.000 wa malembe, a Mufumo wu ta ngha wu mbhetile ku maha a kuranza ka Nungungulu misaveni, zonake Kristu i ta tlhelisa a mufumo ka Dadani wakwe. (1 Kor. 15:25-28) A vanhu, na va mbhelele makunu, va ta ngha va longile ku yimisana ni xiringo xo gumesa lexi xi tova kona loku Satani a humesiwa hi nkeleni wa lieswila. Anzhako ka lezo, Kristu i ta guma a daya a nyoka leyo yo biha nguvu ni vaseketeli va yona. (Gen. 3:15; Kuv. 20:3, 7-10) Kanilezi, vontlhe lava va ranzako Jehova hi kutsumbeka va ta wuyelwa nguvu. Ko khwatsi a ku na ndlela ya ku tlhamusela khwatsi lezi zi to maheka a ku hunza a mitlhamuselo leyi yi nga lomu ka Biblia. Ku ta tatiseka a xitsumbiso xi nge a vatsumbekileko va ta nghena “kutlhatlhekeni ka kungangamela ka vana va Nungungulu.” — Rom. 8:21.

23, 24. a) Hikuyini a kutatiseka ka zitsumbiso za Nungungulu ku nga lisine? b) Zini u ti yimiseleko ku maha?

²³ A zitsumbiso lezo a hi kurinzela ka mahala, mixuvo, ge hambu miloro. A zitsumbiso za Jehova za tatiseka xontlhe xikhati! Hikuyini? Alakanya a magezu ya Jesu lawa hi wulawulileko hi wona ka xipimo xo sangula xa bhuku legi. I gonzisile valanzeli vakwe a ku khongela ka Jehova vaku: “A wute mufumo wa wena. Kuranza ka wena a ku mahiwe misaveni, kota lezi ku mahiwako le tilweni.” (Mat. 6:9, 10) A Mufumo wa Nungungulu a wu vangiwangi hi mapimo ya munhu. Mufumo wa lisine! Wa fuma le tilweni zalezi. Zezi ka hunza 100 wa malembe na wu kari wu tatisa a zitsumbiso za Jehova hi tindlela ti wonekako khwatsi bandleni ga wuKristu. Hikwalaho, ha zi kota ku tiyiseka lezaku a zitsumbiso zontlhe za Jehova zi ta tatiseka a xikhati lexi a Mufumo wa Nungungulu wu to ta fumela misava hi kumbhelela!

²⁴ Ha zi tiva lezaku a Mufumo wa Nungungulu wu tata. Ha zi tiva kambe lezaku a zitsumbiso zontlhe za Jehova zi ta tatiseka. Hikuyini? Hakuva A MUFUMO WA NUNGUNGULU WA FUMA! Kanilezi a munwe ni munwani wa hina i fanele ku ti maha a xiwutiso lexi, ‘Xana a Mufumo wa nzi fumela? A hi maheni zontlhe hi zi kotako kasi ku hanya kota vafumelwi vo tsumbeka va Mufumo lowo zalezi, lezaku hi vuneka hi kufuma ka wona ko mbhelela ni ko lulama kala kupinzuka!