Jesu a ramba Matewu

Andzhako ka loku Jesu a hanyisile wanuna loyi a nga file reve, i no simama kwale Kapernawume kusuhani ni Bimbi ga Galileya. A vanhu va nota kambe va ta mu talela, a se sangula ku va gondzisa. Ka siku gin’wani na a kari a fambafamba, i no wona Matewu, loyi a nga vitaniwa kambe ku hi Levhi, na a tshamile lomu ka yindlu ya ku hlengisela ka yona khupo. I no mu ramba, aku: ‘Ndzi landzele.’ — Matewu 9:9.

A ku fana na Pedro, na Andrewu, na Jakobe, na Johani, ko khwatsi yenawu Matewu i wa sina a ti tiva tigondzo ta Jesu ni zvihlamaliso lezvi a nga zvi mahile kwalomuya Kapernawume. Yenawu Matewu i no tekela ku vhumela cirambo ca Jesu. Lomu ka Ivhangeli yakwe, Matewu i wulile lezvi zvi nga mahekisa zvona; i te: “Yena [Matewu] i no suka,” a landzela Jesu. (Matewu 9:9) Matewu i wu tsikisile lezvo a ntiro wakwe wa ku hlengisa khupo a maha mupizani wa Jesu.

Hi ndzhako ka cikhati, Matewu i no maha festa ya hombe laha kaya kakwe, kuzvilava kasi ku bonga Jesu hi thomo legi a nga mu nyika ga ku mu ramba ku ava mupizani wakwe. Ahandle ka Jesu ni vapizani vakwe, Matewu i no ramba ni vanghana vakwe va kale, a ku patsa ni lava a nga tira navo ku hlengisa mikhupo. Va wa hlengisa khupo va nyika tihosi ta mufumo wa Roma ti nga zondiwa nguvhu. A mikhupo leyo, yi wa patsa khupo wa tingalava leti ti nga nghena tikweni legiya, ni ya mitlawa ya vanhu lava va nga famba hi maruwa yabye ni zvibya zvabye, ni ya zvilo zvi nga xaviwa ka matiko man’wani. A vaJudha laha va yileko va wa va wonisa kuyini a vahlengisi va khupo? Va wa va chepeta, hakuva zvikhati zvin’wani va wa tshuka va va xolola, hi ku va tekela mali yo tala ku hundza leyi yi nga laveka. Ahandle ka vahlengisi va khupo, Matewu i rambile ‘vawonhi’ kambe laha festeni yakwe. Lavo va wa hi vanhu va nga hi ni nduma ya ku maha zvilo zva ku biha. — Luka 7:37-39.

A cikhati leci a vaFarisi — va nga hi vanhu vo ti maha vo lulama — va nga wona Jesu laha festeni na aga ni vanhu lavo, va no wutisa vapizani vakwe vaku: “Hikuyini a mugondzisi wa n’wina a gako ni vahlengisi ni vawonhi ke?” (Matewu 9:11) Jesu i no vazwa, a se va hlamula aku: ‘Lava va hanyako a va lavi n’anga, kanilezvi ntsena lava va babyako. Fambani mu ya gondza lezvaku zvi wula yini le’ zvaku: Ndzi randza wuxinji, a ndzi randzi miphahlo. Hakuva a ndzi telangi ku ta vitana valulamileko, kanilezvi a vawonhi.’ (Matewu 9:12, 13; Hoseya 6:6) A vaFarisi va wo chovha a vapostoli va Jesu a cikhati va nga mu vitana a ku “mugondzisi”; hambulezvo, va gondzile cokari ka yena xungetano hi lezvi zvi lulamileko.

Kota lezvi Jesu a nga “landzelwa” hi vawonhi ni vahlengisi vanyingi, zvi wonekisa ku khwatsi Matewu i wa va rambile laha festeni yakwe kasi va ta gondzisiwa hi Jesu. (Marku 2:15) Jesu i wa lava ku va vhuna ku vava ni wunghana na Nungungulu. I wa hambene ni vaFarisi va nga ti maha vo lulama, va chepeta vanhu lavo. Yena i wa va zwela wusiwana a tlhela a va mahela wuxinji. A ku fana ni lezvi a dhokodhela a vhunako mubabyi lezvaku a hanya, Jesu i wa vhuna vontlhe va nga kari va babya hi tlhelo ga moya.

Jesu i va zwele wusiwana a tlhela a va mahela wuxinji a vahlengisi va khupo ni vawonhi. A hi ku khwatsi i wo tsaka hi zviwonho zvabye; kanilezvi, i wa fela ku va khatalela a tlhela a va vhuna hi tlhelo ga moya, a ku fana ni lezvi a nga maha ka lava va nga babya hi tlhelo ga nyama. Hi cikombiso, hi nga alakanya lezvi a nga mu zwelisa zvona wusiwana a wanuna loyi a nga babya hi hlokonho, a mu khumba aku: “Ndza zvi lava! Hanya.” (Matewu 8:3, NM) A hi chukwana ku hinawu hi ti karatela kuva vanhu vo zwela wusiwana, hi vhuna lava va xanisekako, nguvhunguvhu lezvaku vava ni wunghana na Nungungulu?