Lezi hi nga hlayisisako zona a kurula ni kubasa ka bandla

LEMBE ni lembe, a mazanazana ya vanhu vata ndlwini ya Jehova ya wukhozeli gi basileko kota ndlela yo tatisa a xiprofeto xa Biblia. (Mika 4:1, 2) A ho ku xalala hi ku va amukela ‘bandleni ga [Nungungulu]’! (Miti. 20:28) A vanhu lavo va gi nyika lisima a lungelo ga ku tirela Jehova zinwe na hina ni ku ti buza hi paradise ga hina go rula ni gi basileko. A moya wa ku basa wa Nungungulu ni wusungukati ga wutlhari gi kumekako Mhakeni yakwe za hi vuna ku simama hiva ni kurula ni ku hlayisa a kubasa ka bandla. — Tis. 119:105; Zak. 4:6.

² Laha hi tirisako a matshinya ya milayo ya Biblia, hi ambala a “munhu muswa.” (Kol. 3:10) A wumunhu lego ga giswa gi hi vuna a ku nga cheli kota hi zihoxwana za vanwani ni kuhambana ka wumunhu ga hina. A ku wona zilo hi mawonela ya Jehova zi hi vuna ku hlula a kucetelo wa tiko lowu wu zi kotako ku hi hambanyisa. Niku zi tlhela zi hi vuna a ku tira zinwe hi kuzwanana ni vamakabye va hina va nga matlhelweni wontlhe ya misava. — Miti. 10:34, 35.

³ Hambulezo, ka tshuka ku humelela zilo lezi zi nga colopetelako a kurula ni kuzwanana ka bandla. Hikuyini? A kutala ka zikhati zi humelela loku ku nga tirisiwi a wusungukati ga Biblia. Ha ha simama hilwa ni ku kubyekelela ka hina ka ku nga mbheleli. Hontlheni ha onha. (1 Joh. 1:10) A wokari a nga ha maha zilo zo biha lezi zi nga ha chakisako bandla hi tlhelo ga mahanyela kutani ga moya. Hi nga ha wula kutani ku maha zilo lezi zi zangarisako vanwani, hambu ku khunguvanyiswa hi magezu ni zimaho za vanwani. (Rom. 3:23) Loku lezo zi humelela, hi nga maha yini kasi ku zi lulamisa?

⁴ Hi liranzo, Jehova wa zi tiva lezaku zontlhe lezo zi nga tshuka zi humelela. A Mhaka yakwe yi nyika wusungukati ga lezi hi nga mahako loku ku humelela zikarato. A madota, lawa ma nga varisi va moya va liranzo, ma tshama na ma longile a ku nyika xivuno ka munwe ni munwani wa hina. Loku hi tirisa a wusungukati gabye ga Mitsalo, hi tava ni kuzwanana ku nene ni vanwani hi tlhela hiva ni wuxaka gi nene na Jehova. Loku hi layiwa kutani ku kawukiwa hi kota ya zokari, ngha hi tiyiseka lezaku lezo zi komba a liranzo leli a Dadani wa hina wa le tilweni a nga nalo hi hina. — Mav. 3:11, 12; Maheb. 12:6.

⁵ Ka zikhati zo kari, ka tshuka kuva ni kungazwanani kutani zikarato zo kala ku nyawula xikari ka ziro za bandla. A zikarato lezo zi fanele ku tekela ku lulamiswa hi moya wa liranzo. (Efe. 4:26; Fil. 2:2-4; Kol. 3:12-14) Kuzilava u ta pola lezaku a zikarato zo tala zi yelanako ni kuzwanana ka wena ni ziro za bandla zi nga lulamisiwa hi ku tirisa a wusungukati ga mupostoli Pedro gaku: “Pinyamelani kuranzana, hakuva a liranzo li khubhunyeta zionho zinyingi.” (1 Ped. 4:8) A Biblia gi ngalo: “Ha onha zikhati zo tala.” (Jak. 3:2, NM) Loku hi mahela vanwani lezi hinawu hi lavako ku mahelwa, a kutala ka zikhati hi ta tsetselela vanwani hi tlhela hi rivala lezi va hi maheleko. — Mat. 6:14, 15; 7:12.

⁶ Loku u wona lezaku a wokari i khunguvanyekile hi kota ya lezi u nga wula kutani ku maha, u fanele ku ya bhula naye handle ko hlwela. Alakanya lezaku a wuxaka ga wena na Jehova gonawu ga khumbeka. Jesu i nyikile vapizani vakwe a wusungukati legi: “Hikwalaho loku u humesa muphahlo wa wena laha alatini, u alakanya kona lezaku nakuloni i na ni mhaka na wena, siya a muphahlo wa wena mahlweni ka alati, u famba u ya wuyisana ni nakuloni kuranga, zonake wuya u ta humesa a muphahlo wa wena.” (Mat. 5:23, 24) Kuzilava mu no kala ku zwisisana. Loku zi hi tano, tshamani hasi mu bhula hi zona. A kubhulisana ku nene ka vontlhe lomu bandleni ka vuna lezaku ku ngavi ni kungazwanani ku tlhela ku lulamisa zikarato lezi zi humelelako hi kota ya kungambheleli.

⁷ Ka zikhati zo kari, a madota ma nga ha zi wona na zi laveka ku nyika wusungukati wokari kasi a cica kupima kakwe. A hi xontlhe xikhati zi ma olovelako a ku maha lezo. Paule i tsalele maKristu ya le Galatia, aku: “Vamakabye, loku a munhu a kumiwa xionhweni xo kari, nwina lava mu nga va moya, lulekani a wa kunghaho hi moya wa kuolova.” — Gal. 6:1.

⁸ Hi ku risa a ntlhambi, a madota ma nga vikela bandla ka timhango to tala ta moya ni ka zikarato za hombe. Ma zama lezaku a ntiro lowu ma wu mahelako bandla wu tatisa lezi Jehova a zi tsumbisileko hi ku tirisa Isaya, zaku: “Munwe ni munwani i ta kotisa wuchavelo loku moya wu bhubhutsa, a kotisa wuponelo ka xingulo; kukotisa a congo wa mati wutshanwini gi womileko; ni nzhuti wa ribye ga hombe tikweni gi nga ni tora.” — Isa. 32:2.

⁹ Mupostoli Paule i tlharihisile bandla lezaku gi ti wonela ka lava va nga hi ni mahanyela yo biha. I te ngalo: “Makunu ha mu laya, vamakabye, . . . lezaku mu tsawukana ni vamakabye vontlhe va fambako hi vilinganya, va nga hlayisi a gonzo leyi hi nga mu gonzisa yona.” I lo dlunyatisa a mhaka leyo hi ku tsala lezi: “Loku a hi kona munhu a nga ingisiko lezi hi wulako lomu ka papilo legi, tivani munhu loye, mu nga tlhangani naye, a kala aku koyo tingana. Hambu lezo mu nga mu hlayi kota nala, kanilezi mu lulekeni hi wumakabye.” — 2 Tes. 3:6, 14, 15.

¹⁰ Laha bandleni ku nga hava ni munhu a nga mahiko zionho za hombe lezi zi nga ha mu mahako a susiwa, kanilezi a kombisako lezaku a nga na xichawo hi milayo ya Nungungulu leyi yi faneleko ku fumela maKristu. A nga ngha a hi lolo ga hombe nguvu, wa ku solasola vanwani, kutani wo kala ku hlamba. Tlhatakumbiri, a nga ngha a hi munhu wa ku ti nghenisela ka zilo zi nga mu lumbiko. (2 Tes. 3:11) Kutani kuva munhu wo ranza ku hanya hi nyuko wa vanwani ni ku ti nghenisela ka mihlakano yi nga basangiko. A mahanyela lawo ma bihile nguvu laha ka ku ma nga chakisa bandla ma tlhela ma thapela maKristu manwani.

¹¹ A madota ma ta ranga hi ku zama ku mu vuna hi ku mu nyika a wusungukati gi seketelweko ka Biblia. Hambulezo, loku a simama a kanyisa a matshinya ya milayo ya Biblia hambu lezi a tlharihisilweko hi kuphindaphinda, a madota ma nga ha boha lezaku ku fanele ku vekiwa kanelo ya ku tlharihisa bandla. A madota ma fanele ku tirisa wutlhari a xikhati lexi ma bohako lezaku a hanyela go kari hakunene ga colopetela vanwani niku ga ringanelwa hi kanelo ya xitlharihiso. A mukaneli i ta nyika wusungukati gi faneleko xungetano hi mahanyela ya vilinganya, kanilezi a nga ta kumbuka a vito ga munhu loye. Hi ndlela leyo, lava va sinako va mu tiva va nga ta ha maha wunghana naye, hambu lezi va to simama va maha naye a mitiro ya moya, va mu ‘luleka hi wumakabye.’

¹² A ku tiya loku a ziro zo tsumbeka za bandla zi ku kombisako ku ta mu maha awa tingana hi lezi a mahako niku zi ta mu kuca ku cica. Loku zi hi laha kubaseni lezaku i tsikile a mahanyela yakwe ya vilinganya, a ka ha hi na xilaveko xa ku mu wona kota loyi a fambako hi vilinganya.

¹³ A ku nga cheli kota hi zihoxwana za vanwani kutani ku tekela ku va tsetselela a zi wuli lezaku a hi khatali hi zionho lezi hi mahelwako kutani ku ha tsakiswa hi zona. A hi zontlhe zionho hi zi mahako hi lezi hi nga vanhu va nga mbhelelangiko; niku a hi zi nene a ku ti vala mahlo ka zihoxo za hombe. (Levi 19:17; Tis. 141:5) A xivumelwano xa Nayo xi wa wula lezaku ku na ni zionho za hombe ni za zi tsongwani. Ni nyamutlha kambe za ha tshamisile zalezo.— 1 Joh. 5:16, 17.

¹⁴ Jesu i tlhamusele a ndlela ya ku lulamisa a zikarato za hombe lezi zi nga ha humelelako xikari ka maKristu. Ite: “Loku a makabye wa wena a ku onhele, [1] famba u ya mu kombisa nanzu wakwe na mu hi nwece. Loku a ku ingisa, u mu kumile a makabye wa wena. Kanilezi loku a nga ku ingisi, [2] famba ni munwani kutani va hi vambiri, kasi magezu wontlhe ma fela ku tiyiswa hi vakustumunyu vambiri kutani vanharu. Loku a ala ku va ingisa, [3] ku bike bandleni; ni loku a nga ingisi bandla, a mahe ka wena kotisa wamatiko ni muhlengisi.” — Mat. 18:15-17.

¹⁵ Kota lezi zi kombisiwako ka mufananiso lowu Jesu a nga gumesa a wu hlawutela ka Mateu 18:23-35, kuzilava a xinwe xa zionho zi tlhamuselwako ka Mateu 18:15-17 xi yelana ni mali kutani titshomba — ku ngava ku tsanzeka ku hakhela mangava kutani ku kanganyisa hi tindlela tinwani laha ti yileko ni ku chakisa a wumunhu ga wokari hi ku mu hembela.

¹⁶ Loku zi dlunyateka lezaku a makabye wo kari i ku mahele a xinwe xa lezi zi hlawutelwako laha hehla, u nga tsutsumeli ku kombela madota lezaku ma wulawula naye. Kota lezi Jesu a hi layileko, ranga hi ku ya wulawula ni loyi a ku onheleko. Zamani ku lulamisa a xikarato na mu hi nwece va vambiri, mu nga nghenisi munwani. Alakanya lezaku Jesu a nga te u fanele ku ‘famba khati ginwe ntsena.’ Hikwalaho, loku ka khati go sangula a nga vumeli a nanzu wakwe ni ku kombela ku tsetselelwa, u nga godoli, tlhela kambe. Loku zi koteka a ku lulamisa a xikarato xa nwina hi ndlela leyi, handle ko kanakana loyi a ku onheleko i ta ku bonga nguvu hi lezi u nga kala ku haxa a mhaka ya nwina kutani ku chakisa a wumunhu gakwe ga gi nene mahlweni ka bandla. Wenawu u ta ngha u “kumile a makabye wa wena.”

¹⁷ Loku loyi a ku onheleko a vumela xihoxo xakwe, a kombela ku tsetselelwa a tlhela a maha lezi zi lavekako kasi ku lulamisa lezi zi onhekileko, a ku na xilaveko xa ku yisa mhaka leyo mahlweni. Lisine lezaku a zihoxo za tshamela legi za hombe, hambulezo zi nga lulamisiwa hi muonhi ni loyi a onhelweko.

¹⁸ Loku uya ka makabye wa wena mu ya wulawula hi xihoxo xakwe “na mu hi nwece” kanilezi a nga ku ingisi, maha lezi Jesu a wulileko, “famba ni munwani kutani . . . vambiri” u ya wulawula kambe naye. A kungo ga lava u fambako navo ku ku vuna a ku tlhela u zwanana ni makabye wa wena. Zi chukwana a ku hlawula lava va wonileko mhaka leyo ni ku maheka, kanilezi loku ku nga hi na munhu a zi wonileko, u nga ha boha ku hlawula a munhu munwe kutani vambiri lezaku vava vakustumunyu va mabhulo ya nwina. Za koteka ku ngha va yi tiva a ndlela ya ku lulamisa a xikarato xa nwina ni ku wona lezaku xana hakunene ku mahilwe xihoxo ke. A madota lawa ma hlawuliwako ka ziyimo lezi, a ma woniwi kota vayimeli va bandla hakuva a ma hlawuliwangi hi hubye ya madota lezaku ma kustumunya a timhaka leto.

¹⁹ Kanilezi loku a simama a nga vumeli nanzu wakwe hambu lezi u ti karatileko u ya wulawula naye na mu hi nwece u tlhela u lava vakustumunyu vanwani — na zi ku karatela ku zi tsika zi hunza, famba ka madota u ya ma bikela a xikarato xa wena. Alakanya lezaku a kungo gabye ku hlayisa a kurula ni kubasa ka bandla. Hikwalaho, anzhako ka ku ma bikela zi tsike mandleni yabye u tlhela u tsumba Jehova. U nga tsiki a mahanyela ya vanwani ma ku khunguvanyisa kutani ku ku yivela a litsako leli u faneleko kuva nalo a xikhati lexi u tirelako Jehova. — Tis. 119:165.

²⁰ A varisi va ntlhambi va ta hlolisisa a mhaka leyo. Loku zi dlunyateka lezaku u onhelwe kanilezi loyi a ku onheleko a nga ti soli niku a nga zi lavi ku lulamisa lezi zi onhekileko, a kometi ya madota yi nga ha boha ku mu susa bandleni kasi va vikela ntlhambi ka kucetelo wa hava ni ku hlayisa a kubasa ka bandla. — Mat. 18:17.

²¹ Ku na ni zihoxo zaku a zi eneli a ku tsetselelwa hi loyi u mu onheleko ntsena. Ka zionho lezo ku patseka a wubhayi, kuhlengelwa ka masango hi wanuna ni wanuna kutani wasati ni wasati, wuhluwuki, ku khozela zifananiso, ni zinwani zionho za hombe. (1 Kor. 6:9, 10; Gal. 5:19-21) Kota lezi a zionho lezi zi vekako mhangweni a kubasa ka bandla hi tlhelo ga moya ni ga mahanyela, a madota ma fanele ku bikelwa a zionho zo khwatsi hi lezi ma tlhela ma zi lulamisa. (1 Kor. 5:6; Jak. 5:14, 15) A vokari va nga tshinelela a madota kasi ku ma bikela a zionho zabye wutsumbu kutani za vanwani. (Levi 5:1; Jak. 5:16) Kani a muonhi ha yece o tshinelela a madota kutani a madota mo byeliwa hi vanwani, a hubye ya madota yi fanele ku yimisa madota mambiri kasi ma hlolisisa a mhaka leyo khwatsi. Loku zi woneka lezaku hakunene lezi ma byelilweko zi mahekile, a hubye ya madota yi ta tlhela yi yimisa a kometi ya kulamula yi wumbiwako hi madota manharu hi wutsongwani ga kona kasi ma xuxa mhaka leyo.

²² A madota ma khatala nguvu hi ntlhambi niku ma zama ku wu vikela ka ni wihi nchumu wu nga wa ta wu bayisa hi tlhelo ga moya. Tlhatakumbiri, ma ti karatela ku tirisa a Mhaka ya Nungungulu hi wutlhari kasi ma kawuka ni wihi a onhileko ni ku mu vuna hi tlhelo ga moya. (Juda 21-23) Lezo zi zwanana khwatsi ni zileletelo lezi mupostoli Paule a nyikileko Timote a xikhati a nga mu tsalela lezi: “Nza ku hlambanyisa mahlweni ka Nungungulu, ni ka Kristu Jesu, loyi a ta nga lamula a vahanyako ni vafileko, . . . kawuka, u luleka, ni ku khongotela hi kutimisela kontlhe, ni ku gonzisa.” (2 Tim. 4:1, 2) A ku maha lezi zi nga ha lava xikhati xo tala, kanilezi zonawu xipanze xa ntiro wo karata lowu a madota ma nga nawo. A bandla ga yi bonga nguvu a mizamo yabye niku gi ma wona na ma ringanelwa hi ‘ku dzunziwa’ nguvu. — 1 Tim. 5:17.

²³ A kungo-tshinya ga kometi ya kulamula ku vuna muonhi lezaku a vuxeta a wumoya gakwe. Loku a muonhi a tsika madota ma mu vuna hi tlhelo ga moya, a kukawukwa loku ma to mu nyika xihundleni kutani mahlweni ka timboni leti ti nga hi kona kulamulweni kakwe, ku ta vuna yena wutsumbu ni lava va zi zwileko kasi vonawu va chava ku maha xionho. (2 Sam. 12:13; 1 Tim. 5:20) Loku a wokari a kawukiwa i fanele ku tlhela a tsikisiwa ku maha zokari lomu bandleni. A mahela legi gi ta mu vuna a ku ‘lulameta a tindlela’ takwe. (Maheb. 12:13) Hi kufamba ka xikhati i ta tlhela a kuma a malungelo yakwe loku zi dlunyateka lezaku makunu i hunzukile.

²⁴ Loku a kometi ya kulamula yi wona lezaku a muonhi wokari wa ti sola kanilezi lezi a zi mahileko zi ta tiveka bandleni kutani lomu a hanyako kona ni lezaku a bandla gi fanele ku ti wonela ka munhu loye, ku nga mahiwa xitiviso xo koma Mutlhanganweni wa Ntiro ni Mahanyela. A xitiviso lexo xi fanele ku tshamisa lezi: “Makabye [ximanyani] i kawukilwe.” A xitiviso lexi xi fanele ku pasisiwa hi mutlhanganyisi wa hubye ya madota.

²⁵ Ka ziyimo zo kari, a muonhi a nga ala a xivuno xa madota hi ku sihalala ka mahanyela yakwe ya hava. Za koteka ku a nga kombisi a “mitiro” yi kombako lezaku i hunzukile. (Miti. 26:20) Makunu zini zi faneleko ku mahiwa? Ka ziyimo lezo, a muonhi a nga ti soliko i fanele ku susiwa bandleni kasi a nga ha hlengeli ni vanhu va basileko va Jehova. A ku susa muonhi a nga ti soliko zi vikela bandla ka kucetelo wakwe wa hava kasi gi simama gi basile hi tlhelo ga moya ni ga mahanyela ni ku hlayisa a vito gi nene ga bandla. (Deut. 21:20, 21; 22:23, 24) Laha a ngazwa lezaku a wokari le bandleni ga Korinte i wa hi ni mahanyela ya tingana nguvu, mupostoli Paule i kucile a madota ya bandla lego lezaku ma nyikela “a munhu loye ka Satani, kasi . . . , a moya [wa bandla] wu fela ku hanyiswa.” (1 Kor. 5:5, 11-13) Paule i wulawulile hi maKristu manwani ya zana ga malembe go sangula ma nga susilwe hi lezi ma nga hluwukela lisine. — 1 Tim. 1:20.

²⁶ Loku a kometi ya kulamula yi boha lezaku a muonhi a nga ti soliko i fanele ku susiwa bandleni, yi fanele ku mu tivisa yi tlhela yi mu tlhamusela hi ku tirisa Biblia lezi zi mu mahako a susiwa. Loku a byelilwe, a kometi ya kulamula yi ta tlhela yi mu tlhamusela lezaku loku a alakanya lezaku a mhaka yakwe a yi xuxiwangi khwatsi, zonake a lava lezaku yi tlhela yi hloliwa kambe, i fanele ku tsala xikombelo a tlhamusela a zigelo zi mu mahako a lava ku a mhaka yakwe yi tlhela yi xuxiwa. I ta nyikwa a 7 wa masiku ntsena kasi ku maha lezo. Loku hakunene a yisa xikombelo, a hubye ya madota yi ta bika a mhaka leyi ka muwoneleli wa xipanze, kasi a hlawula a madota yo buva khwatsi lezaku ma tlhela ma xuxa a mhaka leyo. A Kometi leyi yi ta ti karatela ku xuxa a mhaka leyi nzeni ka viki ginwe loku hi hlaya kusukela ka siku legi yi nga amukela a xikombelo xa muonhi. Loku ka ha hlolisisiwa xikombelo, a xiboho lexi xi mahilweko hi kometi yo sangula a xi faneli ku tivisiwa bandleni. Nzeni ka xikhatanyana lexo, a muonhi i fanele ku suselwa malungelo yo kota ku khongela ni ku hlamula mitlhanganweni ni yinwani mitiro ya bandla.

²⁷ A xikombelo lexi xi nyika muonhi a lungelo ga ku tlhela a tlhamusela a mhaka yakwe. Hikwalaho, loku a nga yisi xikombelo lexo ha womu nzeni ka xikhati a nyikilweko, a madota ma ta mu lavetela niku loku zi tsanza, a bandla gi ta tivisiwa lezaku ximanyani i susilwe.

²⁸ Loku a muonhi a nga zi lavi ku maha xikombelo, a kometi ya kulamula yi ta mu tlhamusela lezaku i fanele ku ti sola yi tlhela yi mu byela lezi a faneleko ku maha kasi a wuyela. A ku maha lezo zi kombisa wunene niku za vuna a muonhi. Tlhatakumbiri, zi komba lezaku hi navela ku mu wona na a cica a mahanyela yakwe kasi a ringanelwa hi ku wuya hlengeletanweni ya Jehova. — 2 Kor. 2:6, 7.

²⁹ Loku zi laveka a ku susa a muonhi a nga ti soliko bandleni, ku fanele ku mahiwa a xitiviso xo koma xi wulako lezi: “[Ximanyani] a nga ha hi Mboni ya Jehova.” A ku na xilaveko xa ku engetela zinwani. A xitiviso lexi xi ta tlharihisa a ziro zo tsumbeka za bandla lezaku zi nga ha ti tlhanganyisi naye. (1 Kor. 5:11) A xitiviso lexi xi fanele ku pasisiwa hi mutlhanganyisi wa hubye ya madota.

³⁰ A magezu “ku ti susa bandleni” ma wula munhu a bapatizilweko loyi a wulako ha yece kutani ku kombisa hi mitiro lezaku a nga ha zi lavi ku vitaniwa kutani ku woniwa kota Mboni ya Jehova. A nga maha lezo hi ku ti patsa ni hlengeletano ya tiko leyi yi to lovisiwa hi Jehova Nungungulu hi lezi yi mahako a zilo lezi zi lwisanako ni tigonzo ta Biblia. — Isa. 2:4; Kuv. 19:17-21.

³¹ Xungetano hi lava va ti susileko bandleni masikwini yakwe, mupostoli Johani ite: “Va humele xikari ka hina, kanilezi va wa nga hi va hina; hakuva loku va wa hi va hina, ngha va simamisile zinwe na hina.” — 1 Joh. 2:19.

³² A munhu a ti susileko bandleni wa hambana nguvu ni muKristu a holileko hi tlhelo ga moya loyi a nyimileko ku hlengela ntirweni wo xumayela. A muKristu a nga ha hola hi lezi a nyimileko ku gonza a Mhaka ya Nungungulu hi kukhanzakanya kutani ku ngha a yimisana ni zikarato zo kari za munhu wutsumbu zi mu mahileko a nga ha hiseki ntirweni wa Jehova hambu ku ngha a xanisiwa hi kota ya kukholwa kakwe. A madota ni ziro zinwani za bandla zi ta simama ku nyika a xivuno xi lavekako ka muKristu loye a holileko. — Rom. 15:1; 1 Tes. 5:14; Maheb. 12:12.

³³ Kanilezi, xungetano hi loyi a hlawulileko ha yece a ku ti susa bandleni, ku fanele ku mahiwa xitiviso bandleni xi wulako lezi: “[Ximanyani] a nga ha hi Mboni ya Jehova.” A munhu loye i khomiswa zalezi hi va khomisako zona a vanhu va susilweko. A xitiviso lexi xi fanele ku pasisiwa hi mutlhanganyisi wa hubye ya madota.

³⁴ A munhu a susilweko bandleni kutani a ti susileko ha yece, a nga wuyela anzhako ka xikhati xo kari loku a komba lezaku hakunene wa ti sola niku i hunzukile ni lezaku wa zi lava ku tlhela a zwanana na Jehova. A madota ma maha khwatsi hi ku tsika xikhati xi ringanileko xi hunza na ma nga se wuyisela munhu a susilweko kutani a ti susileko kasi a komba lezaku hakunene wa ti sola. Hi kuya hi xiyimo zi nga ha lava lezaku ku hunza tihweti to tala, lembe hambu ni ku hunza. Loku a hubye ya madota yi amukela a xikombelo xa ku lava ku wuya bandleni, loku zi koteka, a kometi leyi yi nga xuxa a mhaka leyo yi fanele ku wulawula ni loyi kombelako. A kometi yi ta ti karatela ku wona lezaku xana ku na ni “mitiro” yi kombako lezaku i hunzukile ke, zonake yi boha ku mu wuyisa bandleni kutani ku nga mu wuyisi. — Miti. 26:20.

³⁵ Loku loyi a kombelako ku wuya a susilwe ka bandla ginwani, a kometi ya kulamula ya bandla legi a nga ka gona yi fanele ku tlhangana naye va bhulisana hi xikombelo xakwe. Anzhako ka lezo, a kometi leyo yi ta lava tindlela ta ku kumana ni hubye ya madota ya bandla legi a susilweko ka gona, yi ma bikela a xikombelo xa loyi a susilweko. A tikometi leti ta timbiri ti ta tirisana kasi ti kola a mahungu wontlhe ma lavekako lezaku ti maha a xiboho xi nene. Kanilezi, a xiboho xa ku wuyisela loyi a susilweko xi fanele ku mahiwa hi kometi leyi yi mu susileko. Loku a ziro zo kari za kometi leyi yi nga mu xuxa zi nga ha hi kona kutani loku zi suselwe malungelo, ku nga hlawuliwa a madota manwani ya bandla galegi a nga suselwa kona lezaku ma wumba a kometi.

³⁶ Loku a kometi ya kulamula yi tiyiseka lezaku loyi a susilweko wa ti sola niku i fanele ku wuya bandleni, yi ta maha xitiviso bandleni legi a suselweko ka gona. Loku a munhu loye a rurile aya ka bandla ginwani, a xitiviso lexi xa ku wuyela xi ta mahiwawu bandleni lego. Xi fanele ku wula lezi: “[Ximanyani] makunu i Mboni ya Jehova.” A xitiviso lexi xi fanele ku pasisiwa hi mutlhanganyisi wa hubye ya madota.

³⁷ A zionho za hombe zi mahiwako hi vanana va bapatizilweko zi fanele ku bikiwa ka madota. A xikhati lexi a madota ma xuxako a zionho lezi zi mahilweko hi vanana zi nene a ku xuxa na vapswali vabye va hi kona. A vapswali lavo va ta ti karatela ku tirisana khwatsi ni kometi ya kulamula, na va nga zami ku vikela nwanana wabye ka tsayiselelo leyi a yi lavako. Khwatsi hi loku yi xuxa a timhaka ta vanhu va hombe, a kometi leyi yi ta ti karatela ku kawuka ni ku vuna nwanana loye hi tlhelo ga moya. Kanilezi, loku a ala ku vuniwa i fanele ku susiwa bandleni.

³⁸ Zini zi faneleko ku mahiwa loku a vahuweleli va nga bapatizwangiko va wela xionhweni xa hombe? Kota lezi va kalako va nga se bapatizwa, a ku na ndlela ya ku va susa bandleni. Kanilezi, za koteka ku ngha va nga yi zwisisi khwatsi a milayo ya Biblia, hikwalaho a wusungukati gi nyikwako hi ndlela yi nene kuzilava gi nga ‘lulameta a tindlela ta mikonzo’ yabye. — Maheb. 12:13.

³⁹ Loku a muhuweleli a nga bapatizwangiko a womelela mahanyeleni yakwe yo biha hambu anzhako ka ku ngha a enzelwe hi madota mambiri ma ya zama ku mu vuna, a bandla gi fanele ku tivisiwa. Ku ta mahiwa xitiviso xo koma xi wulako lezi: “[Ximanyani] a nga ha hi muhuweleli a nga bapatizwangiko.” A bandla gi ta mu wona kota munhu wa tiko. Hambu lezi a nga kala ku susiwa bandleni, a maKristu ma fanele ku potsa ku maha wunghana naye. (1 Kor. 15:33) Niku, a mubiko wakwe wa ntiro wa simu wu nga ta ha amukelwa.

⁴⁰ Anzhako ka xikhati, loyi a nga nyimisiwa kuva muhuweleli (munhu wa hombe kutani nwanana) a nga ha navela ku tlhela ava muhuweleli. Loku a maha xikombelo lexo, a madota mambiri ma ta tlhangana naye ma bhulisana kasi ma wona a kukula kakwe hi tlhelo ga moya. Loku a ringanelwa hi ku tlhela ava muhuweleli, ku ta mahiwa xitiviso xo koma xi wulako lezi: “[Ximanyani] makunu muhuweleli a nga bapatizwangiko.”

⁴¹ Vontlhe lava va nga bandleni ga Nungungulu va nga ti buza hi zilo za moya lezi Jehova a nyikako a vanhu vakwe. A wuriselo ga hina ga moya gi nyukile khwatsi niku hi na ni mati yo tala ya lisine. Tlhatakumbiri, Jehova wa hi vikela hi ku tirisa lulamiselo legi gi rangelwako hi Kristu. (Tis. 23; Isa. 32:1, 2) Hambu lezi hi nga masikwini lawa ya gujeguje a hi chavi nchumu hakuva hi le paradiseni ya moya.

⁴² A xikhati lexi hi hlayisako a kurula ni kubasa ka bandla, ho tsika a kuwonekela ka lisine la Mufumo ku woninga. (Mat. 5:16; Jak. 3:18) Na hi katekiswa hi Nungungulu, hi tava ni litsako la ku wona a vanhu vo tala nguvu na va gonza hi Jehova va tlhela va mu tirela zinwe na hina.