Jehova wa chachazela lava va mu lavako hi mbilu yontlhe

1, 2. a) A liranzo li yelanisa kuyini ni kukholwa? b) Ziwutiso muni hi to wulawula hi zona?

A DADANI wa hina, Jehova, i tsumbisa ku katekisa malanza yakwe. Leyi yinwe ya tindlela leti a kombisako hi tona a liranzo lakwe hi hina, niku ha mu ranza “hakuva yena i lo ranga a hi ranza.” (1 Johani 4:19) Laha a liranzo la hina hi Jehova li yako li kula, a kukholwa ka hina kuya ku tiya niku hiya hi engetela ku tsumba lezaku Jehova wa va chachazela lava va mu ranzako. — Gonza Maheberu 11:6.

² Jehova wa chachazela! Lexo xipanze xa lisima xa lezi a nga zona ni lezi a mahako. Hikwalaho, a kukholwa ka hina ka Nungungulu a ku eneli loku hi nga kholwi lezaku wa chachazela lava va mu lavako hi mbilu yontlhe. Hikuyini? Hi lezaku “a kukholwa kutiyiseka ka hombe xungetano hi zilo lezi zi rinzelwako.” (Maheberu 11:1, Tradução do Novo Mundo) A kukholwa zi wula ku tiyiseka khwatsi lezaku Nungungulu i ta katekisa vanhu vakwe vo tsumbeka. Kanilezi, hi vunekisa kuyini hi ku tiva lezaku hi ta kuma nchachazelo? Jehova i chachazelisile kuyini a malanza yakwe ya kale ni ya masiku ya hina? A hi zi woneni.

 3. Xitsumbiso muni hi xi kumako ka Malaki 3:10?

³ Jehova Nungungulu i tsumbisa ku chachazela malanza yakwe lawa ma kholwako kakwe. I hi kuca ku mu mahela zontlhe zi nga ntanwini wa hina na hi tsumba lezaku i ta hi katekisa. Jehova i ngalo: ‘Nzi ringeni.’ A gumesa aku: “[Mu] wona loku nzi ta kala nzi nga mu vululeli a tinjhanela ta tilo nzi mu chululela a makatekwa yo tlhela mu vumala ni wutshamu go chela kona.” (Malaki 3:10) Hi komba lezaku ha bonga a makatekwa lawo loku hi vumela ku mu ringa kota lezi a hi kucako ku maha.

 4. Xini xi hi vunako ku tsumba a magezu ya Jesu ma nga ka Mateu 6:33?

⁴ Jesu i tsumbisile vapizani vakwe lezaku loku va rangisa a Mufumo, Nungungulu i ta va hlayisa. (Gonza Mateu 6:33.) Jesu i wulile lezo hakuva i wa zi tiva ku Nungungulu wa maha zontlhe lezi a tsumbisako. (Isaya 55:11) Hikwalaho, hinawu hi nga tiyiseka lezaku loku hi kholwa ka Jehova hi kumbhelela, i ta maha lezi a tsumbisako zaku: “Cima nzi nga ta ku tsika, hambu ku ku siya.” (Maheberu 13:5) A xitsumbiso lexo xa Jehova xi hi vuna ku tsumba magezu ya Jesu ma nga ka Mateu 6:33.

 5. Hikuyini a hlamulo wa Jesu ka Pedro wu hi tiyisako hontlheni?

⁵ Ka khati go kari, mupostoli Pedro i wutisile Jesu aku: “Hina hi siyile zontlhe, hi ku lanzela; a nchachazelo wa hina hi wihi ke?” (Mateu 19:27) Jesu a nga kawukangi Pedro hi kota ya xiwutiso lexo. Kanilezi, i no byela vapizani vakwe lezaku va wa ta chachazelwa hi kutikarata loku va ku mahileko. A vapostoli ni vanhu vanwani va kukholwa va ta fuma na Jesu le tilweni. Kanilezi Jesu i wulile ku hambu zezi wu kona nchachazelo. I te: “Ni wihi loyi a siyileko tiyindlu, kutani vanakulobye, kutani vamakabye, kutani raru, kutani nyine, kutani vanana, kutani zipetso hi kota ya vito ga mina, i ta kuma a za kutala ku hunza, i taga a tshomba ya wutomi ga pinzukelwa.” (Mateu 19:29) A valanzeli vontlhe va Jesu va kuma vapapai, ni vamamani, ni vamakabye, ni vana lomu bandleni nyamutlha. Handle ko kanakana lezo za lisima nguvu ku hunza ni xihi lexi va ti tsonileko hi kota ya Mufumo wa Nungungulu.

 6. Hikuyini Jehova a tsumbisako ku chachazela malanza yakwe?

⁶ Ahandle ka makatekwa yo tala lawa hi ma kumako zezi, hi rinzela makatekwa ya hombe nguvu xikhatini xi tako. (1 Timote 4:8) Jehova i tsumbisa ku chachazela malanza yakwe yo tsumbeka, niku a ku tiva lezo zi hi vuna ku timisela zikarato. Loku hakunene hi tiyiseka lezaku Jehova “wa chachazela lava va mu lavako,” hi nga simama hi tsumbekile. — Maheberu 11:6.

 7. A kutsumba ku fana ni xirikhiso hi ndlela muni?

⁷ Ka Kanelo yakwe ya le Xitsungeni, Jesu i te: “Tsakani, mu nengela nguvu, hakuva ngwa hombe a nchachazelo wa nwina le tilweni; hakuva va lo xanisisa lezo a vaprofeti lava va mu rangeleko.” (Mateu 5:12) A malanza yo kari ya Nungungulu ma ta kuma a nchachazelo wa wona le tilweni. A manwani ma ta kuma a nchachazelo wa wutomi ga pinzukelwa misaveni ya paradise. Lexo xigelo kambe xa kuva hi ‘tsaka ni ku nengela.’ (Tisimu 37:11; Luka 18:30) Kanilezi hontlheni, a kutsumba ka hina ku ngava “xirikhiso xa muhefemulo, lexi xi tsumbekileko ni ku tiya.” (Maheberu 6:17-20) A ku fana ni lezi a xirikhiso xi tiyisako ngalava loku ku hi ni xingulo, a kuva ni kutsumba ko tiya zi nga hi vuna ku yima hi tiya, hi nga tsekatseki. Ku nga hi nyika ntamu wa ku timisela loku hi kumana ni zikarato.

 8. A zitsumbiso za Jehova zi hungulisa kuyini kukarateka?

⁸ A kutsumba ka hina ku nga hi vuna ku hungula kukarateka. A ku fana ni lezi a tlhatlhangati wu holisako nyama yi bayisako, a zitsumbiso za Nungungulu zi rulisa mbilu yi karatekileko. Za tiyisa hlana a ku tiva lezaku Jehova i ta hi khatalela loku hi mu rulela nzhwalo wa hina. (Tisimu 55:22) Hi nga tsumba hi kutiya lezaku Nungungulu a nga maha za hombe “ku hunza zontlhe lezi hi zi kombelako.” (Va Le Efesusi 3:20) Jehova a nga ta hi vuna nguvu basi, kanilezi i ta hi vuna “nguvunguvu ku hunza zontlhe”!

 9. Hi nga tiyisekisa kuyini lezaku hi ta ma kuma a makatekwa ya Jehova?

⁹ Kasi hi kuma a nchachazelo, hi fanele ku kholwa ka Jehova hi kutiya hi tlhela hi ingisa zileletelo zakwe. Mosi i byelile a tiko ga Israeli aku: “Jehova i ta ku katekisa hi zinene a tikweni legi Jehova Nungungulu wa wena a ku nyikileko ku ya gi fumela, ni kuva tshomba ya wena; loku wa nga ingisa a gezu ga Jehova Nungungulu wa wena, u chela kota hi ku maha yontlhe milayo leyi nzi ku leletelako yona inyamutlha. Jehova Nungungulu wa wena i ta ku katekisa kota lezi a ku tsumbisileko.” (Deuteronome 15:4-6) Wa kholwa hakunene lezaku Jehova i ta ku katekisa loku u simama ku mu tirela hi kutsumbeka ke? U na ni xigelo xo zwala xa ku maha lezo.

10, 11. Jehova i mu chachazelisile kuyini Josefa?

¹⁰ A Biblia gi tsalelwe ku hi vuna. Loku hi gi gonza hi kuma zikombiso zo tala za ndlela leyi Jehova a nga chachazela hi yona a malanza yakwe ya kale. (Va Le Roma 15:4) Josefa xinwe xa zikombiso ka mhaka leyi. A kuranga i xavisilwe hi vamakabye vakwe kota khumbi. Hi kulanzela, a valelwa paxweni le Gipite hi kota ya sati wa nwinyi wakwe a nga mu lumbeta za hava. Xana Josefa i wa hi kule na Jehova a xikhati a nga hi paxweni? Ahihi! A Biblia gi ngalo: “Jehova i wa hi zinwe na Josefa; [a] mu kombisa wuxinji,” gi tlhela giku: “Jehova i wa hi zinwe naye ni zontlhe lezi a nga wa zi maha, Jehova i wo zi katekisa.” (Genesisi 39:21, 23) Hambu zikhatini lezo za zikarato, Josefa i simamile a rinzela Nungungulu hi lihlaza-mbilu.

¹¹ Anzhako ka malembe yo kari, Faro i humesile Josefa lomu paxweni, a mu maha wa wumbiri hi wukosi lomu Gipite. (Genesisi 41:1, 37-43) A xikhati lexi Josefa ni sati wakwe va nga pswala vana vambiri, “loyi wa matewula, Josefa i lo mu chula ku ngalo hi Manasse, aku: Nungungulu i nzi mahile nzi rivala kuxaniseka ka mina, ni zontlhe za le kaya ka dadani. Loyi wa nzisana i lo mu chula vito gaku hi Efraime, aku: Hakuva Nungungulu i nzi nyikile vanana lomu tikweni ga hlomulo wa mina.” (Genesisi 41:51, 52) Jehova i chachazele Josefa hi kutsumbeka kakwe, a ponisa vaIsraeli ni vaGipite ka ndlala ya hombe. Josefa i wa zi tiva kambe lezaku hi Jehova a nga mu chachazele ni ku mu katekisa. — Genesisi 45:5-9.

12. Jesu i zi kotisile kuyini ku simama a tsumbekile kuringweni?

¹² Jesu Kristu yenawu i simamile a ingisa Nungungulu nzeni ka zikarato zo tala, niku Jehova i mu chachazele. Xini xi nga mu vuna ku simama a tsumbekile? A Mhaka ya Nungungulu yi tlhamusela lezaku i timisele “hi kota ya kutsaka loku a nga vekelwe kona . . . , a nga khatali hi tingana” ta zona. (Maheberu 12:2) Handle ko kanakana Jesu i tsakile hi kuva a zi kotile ku basisa vito ga Nungungulu. Ive ni nchachazelo kambe wa ku tsakelwa hi Papai wakwe a tlhela a nyikwa malungelo yo tala. A Biblia gi wula lezaku “i tshamile hi tlhelo ga xinene ga xitshamu xa wuhosi xa Nungungulu.” Gi tlhela giku: “Nungungulu i lo mu tlakusa nguvu, a mu nyika vito gi nga hehla ka mavito wontlhe.” — Va Le Filipi 2:9.

13, 14. Jehova i zi wonisa kuyini lezi hi mu mahelako?

¹³ Hi nga tiyiseka lezaku Jehova wa nyika lisima zontlhe lezi hi mahako kasi ku mu tirela. Wa hi zwisisa loku hi nga ti tsumbi kutani hi kanakana ku hi nga zi kota ku maha ntiro wo kari. Wa khatala nguvu hi hina loku hi karatekile xungetano hi ntiro wa kutihanyisa kutani ndlela ya ku wundla ngango. Wa zi zwisisa kambe loku hi nga ha zi koti ku maha zontlhe lezi hi nga maha kale ntirweni wakwe hi kota mababyi kutani gome. Hi nga tsumba hi kumbhelela lezaku Jehova wa nyika lisima a kutsumbeka ka hina hambu loku hi hi zikaratweni. — Gonza Maheberu 6:10, 11.

¹⁴ Alakanya kambe lezaku Jehova ‘wazwa mikhongelo.’ Loku hi khongela ka yena, i ta hizwa. (Tisimu 65:2) “A Dadani wa wuxinji ni Nungungulu wa kuchavelela kontlhe” i ta hi nyika zontlhe lezi zi lavekako kasi hi tshama kusuhani naye. A zikhati zinwani a nga ha tirisa vamakabye va hina kasi ku maha lezo. (2 Va Le Korinte 1:3) Jehova wa tsaka loku hi zwela vanwani. “Loyi a hawukelako zisiwana i pembisa ka Jehova; yena i ta chachazelwa hi zimaho zakwe za zi nene.” (Mavingu 19:17; Mateu 6:3, 4) Hikwalaho, loku hi kombisa wuhana, hi vuna vamakabye va hina, Jehova i zi wonisa ku khwatsi ho mu ceneka zilo lezo. I tsumbisa ku hi chachazela hi wunene.

15. I nchachazelo muni lowu wena u wu rinzelako? (Wona mufota kusanguleni ka nzima.)

¹⁵ A maKristu ma totilweko ma rinzela ku amukela “a xidlodlo xa kululama,” wu nga nchachazelo wu tako hi ka Jesu. (2 Timote 4:7, 8) Hambulezo, a zi wuli ku a wu wa nchumu mahlweni ka Nungungulu loku u nga hi na kutsumba loko. A timiliyoni ta “tiyivu tinwani” ta Jesu ti rinzela hi mahlo yo pswhuka a nchachazelo wu tako wa wutomi ga pinzukelwa misaveni ya paradise. Misaveni leyo, “va ta xalaliswa hi kurula ka hombe.” — Johani 10:16; Tisimu 37:11.

16. A bhuku ga 1 Johani 3:19, 20 gi hi chavelelisa kuyini?

¹⁶ A zikhati zinwani hi nga tshuka hi ti wona na hi nga mahi za hombe ntirweni wa Jehova, kutani hi nga ha ti wutisa ku xana Jehova wa tsaka hi lezi hi mahako ke. Hi nga tlhela hi ti wona na hi nga ringani ku kuma ni wihi nchachazelo. Kanilezi hi nga tshuki hi rivala lezaku “Nungungulu wa hombe ku hunza timbilu ta hina, wa zi tiva zontlhe.” (Gonza 1 Johani 3:19, 20.) Loku hi tirela Jehova hi kota ya kukholwa ka hina ni ku mu ranza, hi nga tiyiseka lezaku i ta hi chachazela, hambu loku lezi hi mahako zi wonekisa ku khwatsi a zi tati canja. — Marku 12:41-44.

17. Hi wahi a makatekwa yo kari lawa hi chachazelwako hi wona zezi?

¹⁷ Hambu masikwini lawa yo gumesa ya tiko go biha ga Satani, Jehova wa katekisa vanhu vakwe. I hi nyika wutivi ga hombe ni kurula kota xipanze xa ntlawa wa vamakabye misaveni yontlhe. (Isaya 54:13) Kunene, kota lezi Jesu a tsumbisileko, Jehova wa hi chachazela zezi hi ngango wa hombe wa vamakabye misaveni yontlhe. (Marku 10:29, 30) Lava va lavako Nungungulu hi mbilu yontlhe va chachazelwa kambe hi kurula ka hombe, ni kuxalala, ni kutsaka. — Va Le Filipi 4:4-7.

18, 19. A malanza ya Jehova ma ti zwisa kuyini hi makatekwa lawa ma ma amukelako?

¹⁸ A malanza ya Jehova misaveni yontlhe ma chachazelwa hi makatekwa yo saseka nguvu ma tako hi ka Dadani wa hina. Hi xikombiso, Bianca wa le Alemanya i ngalo: “A nzi zi koti ku bonga Jehova zi enela hi lezi a nzi vunisako zona zikaratweni za mina a tlhela ava zinwe na mina siku ni siku. A tiko a gi khomeki niku gi tele hi vilinganya. Kanilezi a xikhati nzi tirisanako na Jehova, nzi tizwa na nzi hlayisekile mandleni yakwe. Khati ni khati nzi ti tsonako zokari kasi ku mu tsakisa, i nzi nyika makatekwa ya tsanza-vahlayi.”

¹⁹ Ehleketa kambe hi Paula wa le Canadá, loyi a xanisiwako hi xikarato xa hombe xa longo. I wula lezaku a xiyimo xakwe xa mu valela ku fambafamba, hambulezo a xi mu valeli ku xumayela. I ngalo: “Nzi lonzowota tindlela to hambanahambana ta ku xumayela to kota ku tirisa telefone kutani ku nyika wukustumunyu ga xitshuketi. Kasi ku ti tiyiseta, nzi tshama ni kaderno wu nga ni mitsalo ni timhaka ta lomu ka mabhuku ya hina leti nzi tshamako hi ku ti kambela. Nzi wu vitana ku i “Kaderno wa mina wa wutomi.’ A kumbhela ntamu za xikhatanyana loku u tshama na u alakanya a zitsumbiso za Jehova. Jehova i tshama a longile ku hi vuna, ni ka xihi xiyimo hi nga ka xona.” Kuzilava a xiyimo xa wena xi hambene xi lexi xa Bianca kutani Paula. Hambulezo, kuzilava wa alakanya tindlela to kari leti Jehova a ku chachazelako hi tona wena ni lava u hanyako navo. Handle ko kanakana, zi nene nguvu ku ehleketa hi lezi Jehova a ku chachazelisako zona zezi ni lezi a to ku chachazelisa zona xikhatini xi tako!

20. Zini hi nga zi rinzelako loku hi simama ku maha zontlhe hi zi kotako kasi ku tirela Jehova hi kutsumbeka?

²⁰ U nga tshuki u rivala lezaku a mikhongelo ya wena yo huma mbilwini yi tava ni “nchachazelo wa hombe.” Tiyiseka lezaku anzhako ka ‘loku u mahile a kuranza ka Nungungulu,’ u ta “kuma lezi zi nga tsumbisiwa.” (Maheberu 10:35, 36) Hikwalaho, a hi simameni ku tiyisa kukholwa ka hina ni ku maha zontlhe hi zi kotako kasi ku tirela Jehova. Ha tsumba lezaku Jehova i ta hi chachazela! — Gonza Va Le Kolosi 3:23, 24.