A litsako wutomini — Jesu i komba a ndlela ya ku li kuma

KOTA lezi hi zi wonileko ka nzima yi nga hunza, Jesu i wa hi ni litsako wutomini. Hikwalaho loku hi lava kuva ni litsako wutomini, hi fanele ku lanzela xikombiso xakwe ni ku ingisa wusungukati gakwe.

Hi lisine, Jehova i hi khongotela ku maha zalezo, kota lezi wu kombako a mutsalo lowu laha hehla. A ku famba kota lezi Jesu a nga fambisa zona zi patsa ku lanzela xikombiso xakwe ni tigonzo takwe ka zontlhe hi zi mahako wutomini. A ku maha lezo zi ta hi vuna ku tsakelwa hi Nungungulu hi tlhela hi kuma litsako wutomini.

Jesu i gonzisile matshinya ya milayo lawa ma nga hi vunako a ku fambisa lezi yena a fambisileko zona. A kutala ka matshinya lawo ya milayo hi nga ma kuma ka Kanelo yakwe ya le Xitsungeni. A hi woneni a yo kari ya matshinya lawo ya milayo ni lezi hi nga ma tirisisako zona wutomini ga hina.

LEZI A TSHINYA LEGI GA NAYO GI VUNISAKO ZONA KU KUMA LITSAKO WUTOMINI:

Jesu i kombile lezaku a vanhu va pswaliwa na va hi ni xilaveko xa ku tiva Nungungulu. Hi xuva ku tiva a mihlamulo ya ziwutiso zo kota lezi: Hi hanyela yini? Hikuyini a vanhu va xanisekako? Xana Nungungulu wa hi khatalela hakunene? Xana a vanhu va simama ku hanya anzhako ka loku va file? Hi na ni xilaveko xa ku tiva a mihlamulo ya ziwutiso lezo kasi hiva ni litsako wutomini. Jesu i wa zi tiva lezaku i nchumu wunwe ntsena wu nga zi kotako ku nyika mihlamulo yo tsumbeka ya ziwutiso lezo — ku nga Mhaka ya Nungungulu. Na a khongela ka Dadani wakwe, Jesu i te ngalo: “A mhaka ya wena zinene.” (Johani 17:17) Xana a Mhaka ya Nungungulu hakunene yi nga hi vuna ku tatisa a xilaveko xa hina xa moya?

XIKOMBISO XA ZILO ZI MAHEKILEKO:

Kota yena muyimbeleli wa hombe ntlaweni wakwe wo tiveka nguvu, Esa i wa hi ndleleni ya ku maha muchayi wa hombe wa rock. Hambulezo, Esa i wa nga hi na litsako lo mbhelela. Yena i ngalo: “Hambu lezi zi nga nzi xalalisa a ku chaya ni ntlawa wa mina, nzi wa ti wona na nzi kiyelelwa hi xokari wutomini ga mina.” Kanilezi, anzhako ka xikhati xo kari, Esa i lo tivana ni Mboni ya Jehova. Esa i ngalo: “Nzi lo mu maha ziwutiso zo tala. A mihlamulo yakwe yi seketelwako ka Mitsalo yi nzi khumbile nguvu, hikwalaho nzi lo vumela ku gonza a Biblia naye.” Lezi Esa a nga zi gonza ka Biblia zi mu khumbile mbilu zi tlhela zi mu kuca ku hendleleta wutomi gakwe ka Jehova. Esa i tlhamusela lezi: “A kale, a wutomi ga mina gi wa hi ga timhaka ni zikarato xikhati xontlhe. Nyamutlha nza xi tiva lexi nzi hanyelako xona.”a

LEZI A TSHINYA LEGI GA NAYO GI VUNISAKO ZONA KU KUMA LITSAKO WUTOMINI:

A wuxinji gi patsa ku kombisa tipswalo ka vanwani, ku va mahela wunene ni ku va zwela wusiwana. Jesu i kombisile wuxinji ka lava va nga hi ni xilaveko. Hi ku kuciwa hi tipswalo to eta, Jesu i wa ti nyiketela ku tlhatlhisa vanhu ka kuxaniseka kabye. (Mateu 14:14; 20:30-34) Loku hi pimanyisa Jesu hi kuva va wuxinji, hi engetela litsako ka wutomi ga hina, hakuva lava va kombisako wuxinji ka vanwani va kuma litsako kota wuyelo ga kona. (Mitiro 20:35) Hi nga kombisa wuxinji ka vanwani hi magezu ya hina ni zimaho za hina za zi nene, hi ku vuna lava va nga ni xilaveko. Xana a ku kombisa wuxinji za hi engetela litsako hakunene?

XIKOMBISO XA ZILO ZI MAHEKILEKO:

Maria ni nuna wakwe Carlos, zikombiso za vanhu va wuxinji. A raru wa Maria i felwe hi sati, niku ka malembana lawa a nga ha zi koti ku suka laha mubhedini. Maria na Carlos va mu tekile va ya tshama naye kasi va khatalela khwatsi a zilaveko zakwe. Ku na ni masiku yo tala va kalako va nga etleli hi kota ya yena, niku ka makhati manwani zi lava ku tlhela va tsutsuma naye vaya xipitali loku a diabeti yakwe yi mu sangula. Kota kuwula kabye, va tshuka va karala hakunene. Kanilezi va tsaka, kota lezi Jesu a wulileko, hi ku tiva lezaku va khatalela khwatsi a zilaveko za raru wa Maria.

LEZI A TSHINYA LEGI GA NAYO GI VUNISAKO ZONA KU KUMA LITSAKO WUTOMINI:

Xana a kuva munhu a hlotako kurula zi engetelisa kuyini litsako? Loku hi ti karatela kuva ni kurula ni vanwani, hi hanyisana khwatsi ni lava va hi ranzelako. Zi nene kuva hi lanzela a wusungukati legi ga Biblia: “Loku zi maheka, ni loku nwina mu zi kota, tshamani hi kurula ni vanhu vontlhe.” (Va Le Roma 12:18) A magezu “vanhu vontlhe” ma patsa a ziro za ngango ni vanhu vanwani lava kuzilava va nga hiko makholwa-kulori. Xana a ku hanya hi kurula ni “vanhu vontlhe” za engetela litsako wutomini ga hina hakunene?

XIKOMBISO XA ZILO ZI MAHEKILEKO:

Wona tshango ga wasati wo kari a vitwako Nair. Hi malembe yo tala, Nair i kumene ni kutshikelelwa loku ku nga ringa wuzikoti gakwe ga kuva wa kurula, nguvunguvu laha ngangweni wakwe. Kusukela 15 wa malembe nzhako, a xikhati lexi a nuna wakwe a nga mu tsika, i wundla vana vakwe yece. A munwe wa vana vakwe i wa hi mudzahi wa timbangi niku a kutala ka zikhati i wa mu dzukisela a tlhela a dzukisela ni makabye wakwe wa xisati. Nair i ngalo lezi a nga zi gonza lomu ka Biblia hi zona zi mu nyikako ntamu wa ku a hlota kurula hambu ka ziyimo lezo. I ti karatela ku nga kanetisani kutani ku holova ni munhu. I ti karatela ku kombisa wunene a tlhela a zwela wusiwana vanwani ni ku zwisisa a ziyimo zabye. (Va Le Efesusi 4:31, 32) Nair wa kholwa lezaku a ku gonza ku hlayisa kurula za mu vuna ku hanyisana khwatsi hi laha zi kotekako hi kona ni ziro za ngango zinwe ni vanhu vanwani.

Loku hi lanzela wusungukati ga Jesu ga wutlhari, hi ta kuma litsako wutomini. Kanilezi kasi hiva ni litsako la lisine wutomini, hi fanele ku tiva kambe lezi a wumanziko gi tova zona. Ahandle ka lezo, hi nga li kumisa kuyini litsako wutomini na hi zi tiva lezaku hi ta gumesa hi ku khosahala, hi babya hi tlhela hifa? Hambulezo, leli hi lona a lisine la misava leyi hi hanyako ka yona.

Kanilezi, ku na ni mahungu yo saseka! Jehova i na ni makatekwa yo tala nguvu a ma vekelako lava va ti karatelako ku “famba kota lezi [Jesu] a nga fambisa zona.” Jehova i tsumbisile lezaku lokuloku i ta neha misava yiswa yo lulama, laha a vanhu vo tsumbeka va to hanya hi kuyelana ni kungo gakwe go sangula — ku nga ku hanya kala kupinzuka na va hi ni wutomi go mbhelela. A Mhaka yakwe yi ngalo: “Langutani, a tabernakeli ga Nungungulu gi kona xikari ka vanhu; i ta tshama navo, vona va tava vanhu vakwe, ina Nungungulu wutsumbu i tava navo, ava Nungungulu wabye. I ta kulula mihloti yontlhe mahlweni yabye. Ku nga ha ta va kona kufa, hambu ni hlomulo, kutani kurila ni kubayisa; hakuva a zilo zo sangula zi hunzile.” — Kuvululelwa 21:3, 4.

Maria wa 84 wa malembe, loyi a kumbukilweko ka nzima yo sangula, wa tsaka hi lezi a nga ni kutsumba ka ku wona kutatiseka ka magezu lawa. Wena ke? Xana wa zi lava a ku tiva zinwani xungetano hi “wutomi legi gi nga wutomi hizinene” — legi gi tova kona hasi ka Mufumo wa Nungungulu? (1 Timote 6:19) Loku zi hi tano, kombela Timboni ta Jehova xipanzeni xa wena kutani ku tsalela a vahumesi va revista legi.b