“Fambani, mu va maha vapizani a matiko wontlhe”

1, 2. Ziwutiso muni zi vukako hi kota ya magezu ya Jesu ma nga ka Mateu 24:14?

KANI va vumela lezi hi xumayelako kani va hi vukela, a kutala ka vanhu va vumela lezaku a Timboni ta Jehova kota ntlawa ta tiveka nguvu hi ntiro wa tona wa kuxumayela. Kuzilava u tshukile u kuma vanhu wutirelini ga wena, va wula lezaku a va vumeli lezi hi zi kholwako hambulezo va na ni xichawo hi hina hi kota ya ntiro lowu hi mahako. Kota hi zi tivako, Jesu i profetile lezaku a mahungu yo saseka ya Mufumo ma wa ta xumayelwa misaveni yontlhe. (Mat. 24:14) Kanilezi hi zi tivisa kuyini lezaku a ntiro lowu hi mahako wu tatisa a xiprofeto xa Jesu? Xana ho ti kulisa loku hi wula lezaku hi hina hi mahako a ntiro lowo?

² A mitlawa yo tala ya wukhongeli yi ti byela lezaku yi xumayela a Ivangeli, kutani mahungu yo saseka. Hambulezo, a kutala ka zikhati lezi va mahako ku bhula ni munhu xungetano hi vona wutsumbu, ku fambisa khozo, kutani ku haxa mahungu ka televizawu kutani Internet. A vanwani va wulawula hi minyikelo leyi va mahako kasi ku vuna lava va welweko hi timhango kutani mizamo leyi va mahako ya ku vulula zipitali ni zikola. Lezo zi famba kala kwihi loku hi zi ecanyisa ni lezi Jesu a nga laya vapizani vakwe lezaku va zi maha?

 3. Hi kuya hi Mateu 28:19, 20, zilo muni za mune lezi a valanzeli va Jesu va faneleko ku maha?

³ Xana a vapizani va Jesu va wa fanele ku kondla mawoko va rinzela lezaku a vanhu va va tela? Ne ni kutsongwani! Anzhako ka loku a vuxilwe hi ka vafileko, Jesu i lo byela mazanazana ya vapizani vakwe aku: “Fambani, mu va maha vapizani a matiko wontlhe, mu va bapatiza . . . ; mu va gonzisa a ku gonga zontlhe lezi nzi mu layileko zona.” (Mat. 28:19, 20) Hikwalaho, ku na ni mune wa zilo zi faneleko ku mahiwa. Hi fanele ku maha vapizani, hi va bapatiza, ni ku va gonzisa. Kanilezi, hi xihi xo ranga ka zontlhe? Jesu i te: “Fambani”! Xungetano hi xileletelo lexi, a tlhari yo kari yo tlhamusela Biblia yi te: “A ku ‘famba’ wutihlamuleli ga mukholwa munwe ni munwani, hambu loku ku hi ku tsemakanya ruwa kutani bimbi.” — Mat. 10:7; Luka 10:3.

 4. A kuva “vakukuti va vanhu” zi patsa yini?

⁴ Xana Jesu i wa lava lezaku a mupizani munwe ni munwani a ti mahela lezi a zi kotako, kutani i wa wulawula hi tsima gi xaxametilweko ga ku xumayela a mahungu yo saseka? Kota lezi a munhu munwe a nga wa ta kala a nga zi koti kuya ka “matiko wontlhe,” a ntiro lowu wu wa ta lava lezaku va patsana va tira hi wumunwe na va tele. Jesu i kombile lezo a xikhati a nga ramba a vapizani vakwe lezaku va maha “vakukuti va vanhu.” (Gonza Mateu 4:18-22.) A kukukuta loku a nga ku wula laha ku wa nga hi ka mukukuti munwe wo tirisa mika ni xukwa, loyi a tshamako a rinzela kala kuta njhanjhi yi taga. Kanilezi ku wa hi ka ku tirisa likoka — wu nga ntiro wo binza lowu a zikhati zinwani wu lavako kutirisana ka votala. — Luka 5:1-11.

 5. Ziwutiso muni za mune zi lavako hlamulo, niku hikuyini?

⁵ Kasi ku tiva lava va xumayelako a mahungu yo saseka nyamutlha kota kutatiseka ka xiprofeto xa Jesu, hi fanele ku hlamula mune wa ziwutiso:

• Mahungu muni ma faneleko ku xumayelwa?

• Xini xi faneleko ku hi maha hi xumayela?

• Mamahela muni ma faneleko ku tiriswa?

• A ntiro wa kuxumayela wu fanele ku famba kala kwihi, niku kala rini?

A mihlamulo ya ziwutiso lezi yi ta hi vuna ku tiva lava va mahako a ntiro lowo wu to hanyisa vanhu, yi tlhela yi tiyisa a xiboho xa hina xa ku timisela ka wona hi kutsumbeka. — 1 Tim. 4:16.

 6. Xini xi ku tiyisako lezaku a Timboni ta Jehova ti xumayela a mahungu ma faneleko?

⁶ Gonza Luka 4:43. Jesu i xumayele “a ivangeli ya Mufumo,” niku i lava lezaku a vapizani vakwe va maha zalezo. Hi vamani va xumayelako mahungu lawo ka “matiko wontlhe”? A zi lavi ku kala hi hulumetela — Timboni ta Jehova toce. Hambu lava va hi vukelako, a vokari va yi vumela mhaka leyi. Hi xikombiso, a paderi wo kari wa murumiwa i tshukile a byela Mboni yo kari lezaku i hanyile ka matiko yo tala niku ka ginwe ni ginwani ga wona i wa wutisile Timboni lezaku mahungu muni ti xumayelako. I hlamulo muni ti mu nyikileko? I te ngalo: “Vontlhe va wa hi zipumbu nguvu laha ka kuza va hlamula nchumu wunwe vaku: ‘Mahungu yo saseka ya Mufumo.’” Kanilezi, wutshanwini ga kuva “zipumbu,” a Timboni leto ti wo wulawula hi wumunwe, zi nga zalezi zi lavekako ka maKristu ya lisine. (1 Kor. 1:10) Niku ti wa longoloka ni mahungu lawa ma nga ka A Murinzeli i huwelela a Mufumo wa Jehova. A revista legi gi kona hi 254 wa tirimi, niku hi xiringaniso ku gandliwa xipimo xa 59.000.000 wa tikopiya ta ginwe ni ginwani gi humesiwako, lezi zi gi mahako giva gona revista gi hangalakileko nguvu misaveni yontlhe.

 7. Hi zi tivisa kuyini lezaku a vafundisa va wuKristu ga mawunwa a va xumayeli a mahungu ma faneleko?

⁷ A vafundisa va wuKristu ga mawunwa a va xumayeli a Mufumo wa Nungungulu. Loku va tshuka va wulawula hi Mufumo lowo, a kutala kabye va wula lezaku i tshamela go kari ga lomu mbilwini ya muKristu. (Luka 17:21) A va vuni vanhu a ku zwisisa lezaku a Mufumo wa Nungungulu mufumo wa le tilweni lowu Jesu Kristu a nga Hosi ya wona, lowu wu to mbheta a zikarato zontlhe za vanhu wu tlhela lokuloku wu susa a wubihi gontlhe misaveni. (Kuv. 19:11-21) Wutshanwini ga lezo, va hlawula ku alakanya Jesu hi siku ga Khisimuso ni Pasika. Zi wonekisa ku khwatsi a va tivi nchumu hi lezi Jesu a to maha kota Murangeli muswa wa misava. Kota lezi va nga tiviko a mahungu lawa va nga fanele ku xumayela, a zi hlamalisi lezi va kohlwako kambe a xigelo lexi va faneleko ku maha hi xona ntiro lowo.

 8. Hi xihi a xigelo xa hava xa ku maha a ntiro wa kuxumayela?

⁸ Xini xi faneleko ku hi maha hi xumayela? A hi faneli ku xumayela hi ku lava ku hlengeleta mali kutani ku aka tiyindlu to chanza. Jesu i byelile vapizani vakwe aku: “Mu amukele hi matsenya, nyikani hi matsenya.” (Mat. 10:8) A Mhaka ya Nungungulu a yi faneli ku xavisiwa. (2 Kor. 2:17; 1 Tim. 6:5) Lava va xumayelako a mahungu lawo a va faneli ku ti lavela bhinzu ka ntiro lowu va mahako. (Gonza Mitiro 20:33-35.) Hambu lezi ku nga ni xileletelo lexi xo dlunyateka, a tichechi to tala ti xengwa hi ku wungeletela mali kutani ku zama ku tiyisa chechi hi tlhelo ga timali. Va fanele ku holela mufundisa ni vatiri vanwani va talela ga cima. A kutala ka zikhati, a varangeli va tichechi ta wuKristu ga mawunwa vaza va maha vanyatimali. — Kuv. 17:4, 5.

 9. A Timboni ta Jehova ti kombisa kuyini lezaku ti xumayela hi xigelo xi faneleko?

⁹ Hi xihi a xiyimo xa Timboni ta Jehova mhakeni ya mihlengo? A ntiro wa tona wu seketelwa hi minyikelo ya kuziranza. (2 Kor. 9:7) A ku tshuki ku mahiwa mihlengo tiSalawini tabye ta Mufumo kutani migotsovanyanweni. Hambulezo, a nwecemu basi, a Timboni ta Jehova ti mbhetile 1,93 wa tibiliyoni ta tihora kuxumayeleni ka mahungu yo saseka ti tlhela ti fambisa 9 wa timiliyoni ni ku hunza ta zigonzo za Biblia hi hweti. Na a wulawula hi ntiro wa Timboni ta Jehova, a mukambisisi wo kari wa mahungu i wulile lezi: “A kungo ga tona ga hombe ku xumayela ni ku gonzisa. . . . A ku na mufundisa, lezi zi hlayisako mali yo tala.” Makunu xini xi hi mahako hi xumayela? Hi magezu ma tsongwani, hi maha ntiro lowu hi kuziranza hi kota ya ku ranza Jehova ni muakelane wa hina. A moya lowo wa ku tira hi kuziranza wu tatisa xiprofeto xi nga ka Tisimu 110:3. (Gonza.)

10. Mamahela muni lawa Jesu ni vapizani vakwe va ma tirisileko kasi ku xumayela?

¹⁰ Jesu ni vapizani vakwe va tirisile mamahela muni kasi ku xumayela a mahungu yo saseka? Va wa yela vanhu ni kwihi lomu va nga kumeka kona — lomu kufambeni ni lomu mitini. A ntiro wa kuxumayela wu wa patsa ku hlota vanhu va timbilu ti nene hi muti ni muti. (Mat. 10:11; Luka 8:1; Miti. 5:42; 20:20) Hi mahela lego gi longoloxilweko va wa kombisa ku kala va nga hi na xihlawulela.

11, 12. Mhakeni ya ku xumayela mahungu yo saseka, a mizamo ya wuKristu ga mawunwa yi hambanisa kuyini ni leyi ya vanhu va Jehova?

¹¹ A tichechi ta wuKristu ga mawunwa to yini mhakeni leyi? A kutala ka zikhati a ziro za chechi zi tsaka hi ku tsika ntiro wontlhe wa kuxumayela mandleni ya vafundisa lava va holako. Kanilezi wutshanwini ga kuva “vakukuti va vanhu,” zi wonekisa ku khwatsi a vafundisa va wuKristu ga mawunwa va karatekela nguvu ku kala va nga luzi a “tinjhanjhi” leti va sinako va hi nato. Lisine lezaku a vafundisa va tshuka va zama ku vanga moya wo kari wa wuvangeli. Hi xikombiso, kusanguleni ka lembe ga 2001, Papa João Paulo II i wulile lezi ka papilo go kari: “A malembe wontlhe, nza tala ku phindaphinda ku wulawula hi ku maha wuvangeli giswa. Nza tlhela nzi phinda . . . Hi fanele ku vuxa nzeni ka hina a kukholwa ku vurako ka Paule, loyi a ngaku: ‘Khombo ka mina loku nzi nga kaneli Ivangeli.’” A papa loye i loya mahlweni a wula lezaku a ntiro lowu “a wu faneli ku tsikelwa ntlawa wa ‘titlhari’ kanilezi wu fanele kuva wutihlamuleli ga ziro zontlhe za Vanhu va Nungungulu.” Kanilezi vanhu vangani va lanzelako wusungukati lego?

¹² A Timboni ta Jehova ke, to yini mhakeni leyi? Hi tona toce ti xumayelako lezaku Jesu i kari a fuma kota Hosi kusukela 1914. Ti nyika nguvu lisima a ntiro wa kuxumayela, kota lezi Jesu a layileko. (Mar. 13:10) A bhuku go kari gi wulawulako hi wukhongeli gi ngalo: “Ka Timboni ta Jehova, a wurumiwa [ntiro wa kuxumayela] gi hunza zilo zontlhe le’zinwani.” Na a tshaha magezu ya Mboni yo kari, a mutsali wa bhuku lego i loya mahlweni aku: “Loku va famba va kumana ni munhu wa ndlala, xiwunza, ni mababyi, va zama ku mu vuna, kanilezi a va tshuki va rivakelwa lezaku a ntiro wa vona wo ranga ku bika mahungu ya moya xungetano hi kugumesa ka tiko loku ku tako ni kuhanyiswa loku ku vilelekako.” A Timboni ta Jehova ti simama ti huwelela mahungu lawo, hi mamahela lawa Jesu ni vapizani vakwe va nga ma tirisa.

13. A ntiro wa kuxumayela wu fanele ku famba kala kwihi?

¹³ Jesu i tlhamusele lezi a ntiro wa kuxumayela wu nga wa ta hangalakisa zona hi ku wula lezaku a mahungu yo saseka ma ta kanelwa “misaveni yontlhe.” (Mat. 24:14) A vapizani va fanele ku mahiwa ka “matiko wontlhe.” (Mat. 28:19, 20.) Zi te dlunya lezaku i ntiro wa misava yontlhe.

14, 15. Xini xi tiyisako lezaku a Timboni ta Jehova ta tatisa a xiprofeto xa Jesu xungetano hi kukula ka ntiro wa kuxumayela? (Wona mifota kusanguleni ka nzima.)

¹⁴ Kasi ku zwisisa lezi a Timboni ta Jehova ti tatisisako zona a xiprofeto xa Jesu xungetano hi lezi a ntiro wa kuxumayela wu nga wa ta hangalakisa zona, a hi woneni zilo zi tsongwani ntsena. Ku na ni xipimo xa 600.000 wa vafundisa ka tixaka to hambanahambana ta wukhongeli le Estados Unidos, laha ku nga ni xipimo xa 1.200.000 wa Timboni ta Jehova. Misaveni yontlhe a chechi ya Katolika yi na ni vapaderi vo hunzanyana 400.000. Makunu, ehleketa hi ntsengo wa Timboni leti ti mahako a ntiro wa ku xumayela a Mufumo. Misaveni yontlhe, ku na ni xipimo xa 8 wa timiliyoni ta vatiri va kuziranza lava va xumayelako ka 240 wa matiko. Ku mahiwa ntiro wo hlamalisa nguvu, lowu wu nehako wudzunzo ni wudumo ka Jehova! — Tis. 34:1; 51:15.

¹⁵ Kota Timboni ta Jehova, hi xuva ku chiketa mahungu yo saseka ka vanhu vo tala nguvu hi laha zi kotekako hi kona na ku nga se chikela a kugumesa. Hi xigelo lexo, hi maha ntiro wa hombe wa ku hunzulusela ni ku humesa mabhuku ma seketelwako ka Biblia. Ka nyikelwa timiliyoni ta mabhuku, ni marevista, ni ziphephana, ni zirambo za gotsovanyano ni za Xialakanyiso ka vanhu na va nga hakheli nchumu. Hi humesa mabhuku yo tala hi xipimo xa 700 wa tirimi ni kuhunza. Ku humesilwe xipimo xa 200 wa timiliyoni ni kuhunza ta tikopiya ta Tradução do Novo Mundo hi xipimo xa 130 wa tirimi ni ku hunza. Ka lembe gi nga hunza goce, hi humesile xipimo xa 4,5 wa tibiliyoni ta mabhuku ma seketelweko ka Biblia. Ka saite ya hina ya nayo, ku na ni mahungu ya 750 wa tirimi ni kuhunza. Hi wihi ntlawa wunwani wa vaxumayeli wu mahako ntiro wo fana ni lowo?

16. Hi zi tivisa kuyini lezaku a Timboni ta Jehova ti nawo a moya wa Nungungulu?

¹⁶ A ntiro wa kuxumayela lowu wu profetilweko wu wa ta mahiwa kala rini? Jesu i wulile lezaku a ntiro lowu wa misava yontlhe wu wa ta simama kala masikwini yo gumesa, ‘hi kona ku nga wa ta chikela a kugumesa.’ Hi wihi ntlawa wunwani wa wukhongeli wu simamako ku xumayela mahungu yo saseka masikwini lawa yo gumesa ya zimaho za hombe ke? A vokari hi va kumako wutirelini va tshuka vaku: “Hina hi na ni moya wa ku basa, kanilezi nwina mu maha a ntiro wa kona.” Kanilezi xana a kuva hi zi kota ku timisela ntirweni lowu a hi xikombiso xa lezaku hi nawo a moya wa Nungungulu ke? (Miti. 1:8; 1 Ped. 4:14) A mitlawa yo kari ya wukhongeli yata na yi ringisa ku maha lezi a Timboni ta Jehova ti mahako xontlhe xikhati, kanilezi a mizamo yabye a yi tali ku tsuwukelwa hi gambo. A vanwani va nghenela mitiro yi wuliwako lezaku mitiro ya wurumiwa hi xikhatana xo kari va gumesa va ti tlhelela ka mitiro yabye ya siku ni siku. A vanwani kambe va nga ha ringa ku famba hi muti ni muti, kanilezi va xumayela yini? A hlamulo wa xiwutiso lexi wu komba ziku dlunya lezaku a va mahi ntiro lowu wu sangulilweko hi Kristu.

17, 18. a) Hikuyini hi nga tiyisekako lezaku a Timboni ta Jehova hi tona ti xumayelako a mahungu yo saseka ya Mufumo nyamutlha? b) Hikuyini hi zi kotako ku simama hi maha a ntiro lowu?

¹⁷ Makunu, hi vamani hakunene va xumayelako a mahungu yo saseka nyamutlha? Hi nga wula hi kutiya hiku: “Timboni ta Jehova!” Hikuyini hi tiyisekako hi ndlela leyo? Hi lezaku hi xumayela a mahungu ma faneleko, ma nga mahungu yo saseka ya Mufumo. Hi kuya lomu vanhu va nga kona, hi tirisa a mamahela ma faneleko kambe. A ntiro wa hina wa kuxumayela wu mahiwa hi xigelo xi faneleko — ku nga liranzo, wutshanwini ga bhinzu. A ntiro wa hina hi wona wu hangalakileko nguvu, wu chikela ka vanhu va matiko wontlhe ni tirimi tontlhe. Niku hi nga ta nyima ku maha ntiro lowu. Hi ta simama hi wu maha lembe ni lembe kala ku chikela a kugumesa.

¹⁸ Za hi hlamalisa nguvu hakunene lezi zi mahiwako hi vanhu va Nungungulu zikhatini lezi zo tsakisa nguvu hi hanyako ka zona. Kanilezi zi kotekisa kuyini zontlhe lezo? Mupostoli Paule i hlamula xiwutiso lexi ka papilo gakwe ka va le Filipi aku: “Hi Nungungulu a vangako ka nwina a kuxuva ni kutira, hi kota ya wunene gakwe.” (Fil. 2:13) Ngha hina hontlhe hi simama ku nyikwa ntamu hi Dadani wa hina wa liranzo a xikhati lexi hi mahako zontlhe hi zi kotako kasi ku tatisa a wutireli ga hina. — 2 Tim. 4:5.