Jesu a va nyika wusungukati gin’wani ga lisima

Jesu i wa ha hi ku maha mufananiso kasi ku gondzisa vapizani vakwe lezvi va nga fanele ku ti wonisa zvona. I te va wa fanele kuva vo ti koramisa, va ti wona kota vanana, va nga ti laveli cikhundla. I tlhelile aku va wa fanele ku ‘amukela a n’wanana tsongwani hi vito gakwe’, lezvo zvi wa tava ku amukela Jesu kambe. — Matewu 18:5.

Laha a nga tlhamusela lezvo, ku wa nga hi kale a vapizani vakwe na va holovisene hi ku lava ku tiva loyi a nga wa hombe laha kabye. Hikwalaho, kuzvilava va zvi wonile Jesu na o va kawuka. Makunu, mupostoli Johani i no guma a kumbuka zvilo zvi nga ha hi ku maheka. I no byela Jesu aku: ‘Hi wonile munhu na a humesa madhimoni hi vito ga wena; hi mu no mu betela, hakuva a nga hi landzeli.’ — Luka 9:49.

Ku ngava lezvaku Johani i wo pimisa ku a vapostoli hi vona voce va nga hi ni fanelo ya ku hanyisa van’wani va tlhela va hlongola madhimoni ke? Loku zvi hi lezvo, hikuyini a wanuna loye wa muJudha a nga kari a zvi kota ku hlongola madhimoni? Ko khwatsi Johani i wa pimisa ku a wanuna loye a nga faneli ku maha zvihlamaliso hakuva i wa nga fambafambi na Jesu ni vapostoli vakwe.

Jesu i no wula zvilo zvi nga hlamalisa Johani. I te: ‘Mu nga mu beteli, hakuva a ku na munhu a mahako zvirewukiso vitweni ga mina, a zvi kotako ku hatlisa a wulawula kubiha hi mina. Hakuva loyi a nga hi vhukeliko i yima na hina. Hakuva kani hi wihi a ta nga mu nyika khokho ga mati a kunwa, hi lezvi mu nga va ka Kristu, hizvinene ndziku ka n’wina, a nga ta lahlekelwa hi nchachazelo wakwe.’ — Marku 9:39-41.

Zva dlunyateka lezvaku zvi wa ngazi zvi lava ku a wanuna loye a fambafamba na Kristu kasi zvi woneka ku i yima naye. A bandla ga wuKristu gi wa nga se wumbiwa, makunu loku a wanuna loye a nga fambafambi na Jesu zvi wa nga wuli ku o mu vhukela, ne i wa nga vhuvhumisi wukhongeli ga mawunwa. Kunene, a wanuna loye i wa kholwa vitweni ga Jesu. Niku lezvi Jesu a nga wula, zvi komba ku i wa ta chachazelwa.

Hi tlhelo gin’wani, yi wa tava mhaka ya hombe loku a wanuna loye i wa no khunguvanyisiwa hi lezvi a vapostoli va nga wula kutani lezvi va nga zvi maha. Jesu i te: “Kani hi wihi a khunguvanyisako mun’we wa lava vatsongwani va kholwako ka mina, zvi ngava chukwana ka yena lezvaku a ribye ga cigayo gi khonekwa nhan’wini yakwe, a rikhiswa bimbini.” (Marku 9:42) Jesu i no guma aku a vapizani vakwe va fanele ku susa ni cihi, hambu wova nchumu wa lisima nguvhu wo kota woko, nenge kutani tihlo, loku wu wa pengisa. Hakuva i chukwana ku nghena Mufun’weni wa Nungungulu na va nga hi na nchumu lowo wa lisima, a ku hundza kuva nawo kanilezvi va hoxiwa Gehena (Nkova wa Hinome). Zvi wa nga karati ku a vapostoli va zvi zwisisa ku Jesu i wa wula kuloviswa ka pindzukelwa, hakuva ko khwatsi va wa wu tiva a nkova lowo wu nga hi kusuhani ni Jerusalema, lomu a chaka gi nga hiselwa kona.

Jesu i no tlhela a va tlharihisa aku: ‘Ti woneleni lezvaku mu nga kanyisi ni mun’we wa lava vatsongwani; hakuva ndza mu byela, lezvaku a tingilozi tabye le tilweni ta wona cikhati contlhe a nghohe ya Papayi wa mina loyi a nga le tilweni.’ Jesu i no guma a fananisa a Papayi wakwe ni wanuna a nga ni 100 wa tiyivhu, kasi ku komba lezvi Papayi wakwe a va nyikisako zvona lisima lava vatsongwani. I te loku ku lahleka yivhu yin’we, a wanuna loye i siya leti ta 99 a famba a lava leyi yi nga lahleka, niku loku a yi kumile i tsaka a khoma ni tilo hi yona a ku hundza lezvi a tsakisako zvona hi leti ta 99. A gumesa aku: ‘A hi kurandza ka Papayi wa n’wina loyi a nga le tilweni, lezvaku ku lahleka ni mun’we wa lava vatsongwanyani.’ — Matewu 18:10, 14.

Jesu i no guma a kuca vapizani vakwe, kuzvilava hi lezvi va nga tshuka va holovisana hi ku lava ku tiva loyi a nga wa hombe laha kabye, aku: “Tshamani ni munyu ndzeni ka n’wina, mu hi ni kurula mun’we ni mun’wani.” (Marku 9:50) A munyu wu nandzihisa zvakuga. A munyu wo fananisa wonawu, wu vhuna munhu lezvaku a wula zvilo zva ku a mun’wani zvi mu olovela ku zvi amukela, niku lezvo zvi nga maha ku kuva ni kurula — loku ku nga hava loku a vanhu va holovisana. — Va Le Kolosi 4:6.

A lisine hi ku a vanhu va ta tshuka va tsuwulelana tihwembe, makunu Jesu i kombile ndlela yo lulamisa mazunga. I te: “Loku a makabye wa wena a ku wonhele, famba u ya mu kombisa nandzu wakwe na mu hi n’wece. Loku a ku ingisa, u mu kumile a makabye wa wena.” Ahati loku a nga ingisi ke? Jesu i no nyika wusungukati legi: “Famba ni mun’wani kutani va hi vambiri, kasi magezu wontlhe ma fela ku tiyiswa hi vakustumunyu vambiri kutani vanharu.” Loku lezvo zvonawu zvi tsandza, va fanele ku ‘bikela bandla’ — ku nga ku byela madhota ya bandla, lawa ma nga ni ntamu wa ku maha ciboho. Ahati loku a muwonhi a nga ma ingisi na wonawu? Jesu i te: “A mahe ka wena kotisa wamatiko ni muhlengisi” — ku nga vanhu va ku a vaJudha va wa nga mahi wunghana navo. — Matewu 18:15-17.

A madhota ma fanele ku xuxa mhaka leyo hi ku landzela a Mhaka ya Nungungulu. Loku ma maha ciboho ca ku a munhu loye i na ni nandzu niku i fanele ku kawukiwa, a ciboho ca wona ci komba leci ci sinako ci mahilwe le tilweni, kutani lezvi zvi ‘bohilweko ni le tilweni’. Kanilezvi loku ma wona lezvaku a nga na nandzu, a ciboho ca wona ci komba leci ci sinako ci mahilwe le tilweni, kutani lezvi zvi ‘tlhatlhilweko ni le tilweni.’ A zvileletelo lezvo Jesu a nyikileko vapizani vakwe, zvi wa ta vhuna nguvhu a cikhati leci a bandla ga wuKristu gi nga wa ta wumbiwa. Mhakeni leyo yo bindza ya ku xuxa munhu, Jesu i te: “Laha ku tlhangeneko vambiri kutani vanharu vitweni ga mina, kwalaho ndzi kona cikari kabye.” — Matewu 18:18-20.