A vapizani va Jesu va wa nga ti tsoni zvakuga!

Ka cikhati leco, Johani Mubhabhatisi i wa vhalelwe paxweni kusukela loku Jesu a gile Phasika ga 30 Nguveni ya Hina. Johani i wa lava ku a vapizani vakwe va landzela Jesu. Kanilezvi, kala ka cikhati leco ku nga ha kiyela hweti lezvaku a vhalelwa, a vapizani vo kari va wa nga se sangula ku landzela Jesu.

Makunu, laha gi nga kari gi chikela a Phasika ga lembe ga 31 Nguveni ya Hina, a vapizani vo kari va Johani va noya ka Jesu va ya mu wutisa lezvi: “Hikuyini hina ni vaFarisi hi tala ku yila, kasi a vapizani va wena a va yili?” (Matewu 9:14) A vaFarisi va wa yila kutani ku ti tsona zvakuga kota mukhuwo wa wukhongeli. Hi ndzhako ka cikhati, Jesu i no hlawutela mufananiso wa muFarisi wo kari wo ti maha wo lulama, loyi a nga maha mukombelo aku: “Nungungulu, ndza ku bonga hi lezvi ndzi nga fananiko ni van’wani vanhu; . . . Ndzi yila kumbiri hi vhiki”. (Luka 18:11, 12) Kuzvilava a vapizani va Johani vonawu va wa ti tsona zvakuga hi ku landzela mukhuwo lowo, kutani kota ndlela ya ku rila Johani hi lezvi a nga vhalelwe paxweni. Ahandle ka lezvo, a vapizani va Johani va wa ti wutisa a ku hikuyini a vapizani va Jesu va nga kala va nga ti tsoni zvakuga, kuzvilava na va lava ku vonawu va rila Johani a nga vhalelwe paxweni!

Jesu i no hlamula hi ku nyika cikombiso, aku: “A vanghana va noivho a va na cigelo ca ku rila loku a ha hi zvin’we navo, a hi zvona ke? Kanilezvi cata cikhati leci va to tekelwa a noivho, hi kona va to ti tsona zvakuga.” — Matewu 9:15, NM.

Johani i wa sina a wulawulile hi Jesu kota muteki kutani noivho. (Johani 3:28, 29) Makunu, ka cikhati leco Jesu a nga ha hi zvin’we ni vapizani vakwe, va wa nga ti tsoni zvakuga. Hambulezvo, a cikhati leci a nga wa tafa, a vapizani vakwe va wa ta rila, ne va nga lavi ni kuga zvakuga. Lezvo zvi wa ta cica a cikhati leci Jesu a nga wa ta vhuxiwa hi ka vafileko. Va wa nga ta hava ni cigelo ca ku rila; kanilezvi va wa to tsaka makunu.

Hi kulandzela, Jesu i no hlawutela a mifananiso yimbiri aku: “A ku na munhu a tsemako nguwo ya yiswa a rungela laha ka nguwo ya kale a maha ciziva, hakuva a ciziva leco ci ta handzula a nguwo leyo ya kale yi engetela ku handzuka. A ku na munhu kambe a chelako vhinyo ya yiswa lomu ka cibya ca bhebhe ga kale. Hakuva loku a maha lezvo, a bhebhe lego gi ta handzuka, a vhinyo yi halaka ni cibya ca kona ci wonheka. Kanilezvi a vanhu va chela vhinyo ya yiswa lomu ka cibya ca ciswa.” (Matewu 9:16, 17, NM) Zvini lezvi Jesu a nga lava ku gondzisa?

I wa lava ku a vapizani va Johani va zwisisa ku a va faneli ku rindzela lezvaku a vapizani vakwe va womelela ka mikhuwo ya wukhozeli ya kale ya ciJudha, yo kota ku ti tsona zvakuga. Jesu a nga telangi ku ta vhuna vanhu lezvaku va simama ka wukhozeli ga kale gi hundzelweko ne ku ta chela ciziva ka mikhuwo ni zvihena zva wukhozeli gi nga hi kusuhani ni ku hoxiwa. A wukhozeli legi Jesu a nga kuca vanhu a ku va hanya gi gona gi wa nga yelani ni ciJudha ca masikwini lawo ni mikhuwo ya cona yi nga yimisilwe hi vanhu. Hi ndlela leyo, i wa nga zami ku chela ciziva ca ciswa laha ka nguwo ya kale, kutani ku chela vhinyo ya yiswa lomu ka cibya ca bhebhe ga kale, gi womileko.