Wasati a hanyileko hi ku henya nguwo ya Jesu

A cikhati leci Jesu a nga hi le Dhekapoli, kuzvilava a vaJudha va nga hanya mbhirini ya Bimbi ga Galileya, hi le N’walungu wa Mupela-gambo, va no zvi tiva ku i kawukile bimbi, a nyimisa moya wa hombe, a tlhela a hanyisa wanuna a nga hi ni dhimoni. Makunu laha a nga tlhela le Galileya, va no tekela ku zvi tiva. Laha mbhirini ya bimbi ku no tlhangana vanhu vo tala kasi va hoyozela Jesu. Ko khwatsi lezvo zvi mahekile Kapernawume. (Marku 5:21) Laha a nga kari a huma hi lomu ngalaveni, va wo mu cuwukisela, na va rindzela ku wona lezvi a to maha.

A mun’we wa lava va nga rindzela Jesu, hi Jayiro, a nga hi murangeli wa sinagoga. Jayiro i no tekela ku ya khizamela Jesu a mu khongotela hi kuphindaphinda aku: “A nhanyana wa mina i lava kufa; tana u ta mu tlhateka mandla, kasi . . . a hanya.” (Marku 5:23) Jesu i no vhumela ku ya hanyisa nhanyana wa Jayiro wo randzeka nguvhu. — Luka 8:42.

Laha Jesu a nga kari aya kaya ka Jayiro, ku no humelela nchumu wun’wani wo khumba mbilu. A kutala ka lava va nga kari va mu landza va wa tsakile nguvhu, hi lezvi va nga lava ku mu wona na a maha cihlamaliso cin’wani. Kanilezvi, ku wa hi ni wasati mun’we a nga karateka hi kota ya mababyi yakwe.

Makunu ku wa hundza 12 wa malembe a wasati loye wa muJudha na a xaniseka hi ku huma nkhata. I wa rendzelekele ka vadhokodhela a lava ku vhuniwa a tlhela a mbheta mali yontlhe hi ku maha lezvi va nga mu leletela — zvontlhe zvi tsandza. Hi lisine, a mababyi yakwe ma no “endzeleka”. — Marku 5:26.

A mababyi ya wasati loye ma wa mu mbhetile ntamu niku ma wa dhanisa kambe. Hi tolovelo, a munhu a nga ni mababyi lawa a nga wulawuli hi wona lomu ka vanhu. Ahandle ka lezvo, a wasati a nga kari a huma nkhata, i wa nga hlazvekangi hi kuya hi Nayo wa Mosi. Ni wihi a nga mu henya kutani ku henya nguwo yi donelweko nkhata, i wa fanele ku basisiwa. Hambulezvo, i wa tava a nga hlazvekangi kala ni gambo. — Levhi 15:25-27.

A wasati loye i wa “zwile” a ku ku na Jesu. Makunu i wo famba a mu lavetela. Kota lezvi a nga kala a nga hlazvekangi, i no kokomela hi lomu ka vanhu, a nyanimela hi laha a nga zvi kota hi kona, na a ti byela lezvi: ‘Loku ndzi nga khumba tinguwo takwe ntsena, ndzi ta hanyiswa.’ Zvalezvi a nga henya a machakafula ya nguwo ya Jesu, i no tekela kuzwa lezvaku a nkhata a wa ha humi — azwa lezvaku ‘i hanyile nghumbi yakwe.’ — Marku 5:27-29.

Jesu i no wutisa vanhu aku: “Himani a ndzi khumbileko ke?” U alakanya ku a wasati loye i ti zwisile kuyini laha a nga zvizwa? Pedro i no hlamula Jesu, hi ndlela yo khwatsi o mu kawuka, aku: “Hosi, a zvidlemo zva ku tsimbeketa, ni ku ku manya.” Makunu hikuyini Jesu a nga lava ku tiva loyi a nga mu henya? I no tlhamusela aku: “I kona a ndzi khumbileko; hakuva ndzi zwile a ntamu wu humele ka mina.” (Luka 8:45, 46)

Laha a wasati loyi a nga wona lezvaku zvi tivekile, i no khizamela Jesu, na a chava ni ku rurumela, a tekela ku wula lisine laha mahlweni ka vanhu vontlhe. I no tlhamusela lezvi zvi nga kari zvi mu babya ni lezvaku makunu i hanyile. Jesu i no mu chavelela aku: “N’wananga, a kukholwa ka wena ku ku hanyisile; famba hi kurula, u hanyiswa nghumbeni ya wena.” — Marku 5:34.

Lezvi zvi komba khwatsi lezvaku Jesu — loyi a hlawulilweko hi Nungungulu kasi ku fumela misava — i na ni lirandzo, ni tipswalo; wa khatala hi vanhu niku i na ni ntamu wa ku va vhuna kambe.