A katekisa tipawa ti tala, a va kuca ku va ti wonela comelo

A cikhati leci Jesu a nga hi Dhekapoli le Mutsuwuka-gambo wa Bimbi ga Galileya, i no yelwa hi vanhu vo tala. Va wa lava ku a va gondzisa a tlhela a va hanyisa. Va no famba ni zvirundzu kutani mindzhava ya hombe yi nga hi ni timbuva.

Andzhako ka cikhati co kari, Jesu i no byela vapizani vakwe aku: ‘Ndza ci zwela wusiwana a cidlemo, hakuva masiku manharu makunu na va tshamile na mina, na va nga hi na zvakuga. Loku ndzi va tlhelisa makaya kabye na va hi ni ndlala, va ta sika ndleleni; hakuva a van’wani vata hi le kule.’ A vapizani va no mu wutisa vaku: ‘Hi nga zvi kuma kwihi a zvibaba laha ciwuleni zva ku xurisa vanhu lava ke?’ — Marku 8:2-4.

Jesu i no va wutisa aku: “Zvibaba zvingani mu nga nazvo ke?” A vapizani vaku: “I ntlhanu ni zvimbiri, ni zvidluwanyana zvi tsongwani.” (Matewu 15:34) I no byela vanhu va tshama lomu ka byanyi, zvonake a teka tipawa leto ta 7 ni tinjhanjhi ta kona a khongela ka Nungungulu, a gumesa a nyika vapizani vakwe va phakela vanhu. A 4000 wa vavanuna, ni vavasati ni vanana lava nga hi kona, vontlhe va noga va xura zvi tlhela zvi sala. Va no rolela lezvi zvi nga sele va tata 7 wa zvirundzu zva hombe. A zvo ku hlamalisa!

Jesu i no byela vanhu lezvaku va hangalaka, a gumesa a tsemakanya bimbi hi ngalava ni vapizani vakwe vaya Magadhani, ku nga hi le Mupela-gambo wa Bimbi ga Galileya. Loku a hi seyo, a vaFarisi ni ntlawa wo kari wa vaSadhusi va no mu ringa hi ku mu kombela ciwoniso ca le tilweni.

Kota lezvi Jesu a nga zvi tiva lezvi va nga zvi pimisa, i no va hlamula aku: ‘Laha na gi pelile mu ngalo: Yi taca, hakuva a tilo gi pswhukile. Ni laha mixweni muku: Ku ta dzindza nyamutlha; hakuva a tilo gi pswhukile gi phuma. Ma zvi tiva ku tsotsela a tshamela ga tilo, kanilezvi ma tsandzeka ku tsotsela zvikombiso zva zvikhati.’ (Matewu 16:2, 3) Jesu i no gumesa a va byela lezvaku va wa nga ta wona ciwoniso, ahandle ka leci ca Jona.

Jesu ni vapizani vakwe va no nghena lomu ka ngalava va kongoma Bhetsaidha, le N’walungu wa mbhiri ya bimbi hi tlhelo ga Mutsuwuka-gambo. Laha va nga kari va famba, a vapizani va Jesu va no alakanya lezvaku a va tekangi tipawa to enela. Va wa no teka yin’we basi. Jesu i no alakanya vaSadhusi lava va nga wumba a ntlawa wa va ka Herodhi, ni vaFarisi lava a nga ha hi ku bhula navo, zvonake a tlharihisa vapizani vakwe aku: “Tlharihani, mu ti wonela a comelo ga vaFarisi ni comelo ga ka Herodhi.” A vapizani va no lahleka, va se tsutsumela ku pimisa lezvaku a comelo lego, i wa wula tipawa leti va nga ti rivakelwe. Laha Jesu a nga wona ku a va zvi zwisisangi, i no va wutisa aku: “Hi yini mu wulawulisanako hi lezvi mu nga hiko na zvibaba ke?” — Marku 8:15-17.

Phela Jesu i wa ha hi ku vhuna vanhu vo tala lezvaku vaga tipawa va xura. Makunu, a vapizani vakwe va wa fanele ku zvi zwisisa ku yena i wa nga karateki hi lezvi va nga kala va nga hi na tipawa. Hikwalaho, i no va wutisa aku: “A mu alakanyi nchumu ke? Laha ndzi nga khemelela a ntlhanu wa zvibaba cikari ka 5000 wa vanhu, zvirundzu zvingani mu nga tata hi matlhatlha ke?” Va no hlamula vaku: “I khume ni zvimbiri.” Jesu i no tlhela a va wutisa aku: Ahati “laha ndzi nga khemelela a ntlhanu ni zvimbiri cikari ka 4000 wa vanhu, zvirundzu zvingani mu nga tata hi matlhatlha ke?” Va tlhela va hlamula vaku: “I ntlhanu ni zvimbiri.” — Marku 8:18-20.

Jesu i no guma a va wutisa aku: “Hikuyini mu nga pimiko lezvaku a ndzi wulangi ka n’wina hi zvibaba?” I no engeta aku: “Tlharihani a comelo ga vaFarisi ni vaSadhusi.” — Matewu 16:11.

A vapizani va no gumesa va zvi zwisisa. A comelo gi wa tiriselwa ku vilisa zvilo ni ku kukumukisa tipawa. Jesu i wo fananisa comelo ni wukanganyisi. I wo tlharihisa a vapizani vakwe lezvaku va ti wonela lezvi a “vaFarisi ni vaSadhusi” va nga kari va gondzisa, lezvi zvi nga wonha vanhu. — Matewu 16:12.