Jesu a va gondzisa kuva ni mawonela ma nene hi titshomba

Laha Jesu a nga kari aga lomu ndlwini ya muFarisi, ku nota vanhu vo tala va ta mu rindzela lahandle. Lezvo zvi wa mahekile le Galileya kambe. (Marku 1:33; 2:2; 3:9) Laha Judhiya makunu, a kutala kabye va wa lava ku mu wona ni ku muzwa na a gondzisa. A tshamela lego, gi wa hambene nguvhu ni ga vaFarisi lava a nga kari aga navo.

A magezu ya Jesu yo sangula loku a humile, mave ya lisima nguvhu ka vapizani vakwe. I te: ‘Tlharihelani a comelo ga vaFarisi, legi gi nga wuxengeteli.’ I wa sina a va tlharihisile hi mhaka leyi. Kanilezvi, hi kota ya lezvi zvi nga maheka lomu ndlwini, i wonile lezvaku zva lisima nguvhu a ku hatla a va nyika kambe a wusungukati legi. (Luka 12:1; Marku 8:15) Kuzvilava a vaFarisi va wa zama ku fihla wubihi gabye hi ku ti maha vakhozeli va Nungungulu. Kanilezvi, va wa fanele ku paluxiwa hakuva a vanhu va wa hi khombyeni hi kota yabye. Jesu i no tlhamusela aku: “A ku na cilo ci fenengetilweko, ci ta nga kala ku funungulwa, ni leci ci fihlilweko ci ta nga kala ku tibyiwa.” — Luka 12:2.

Kuzvilava a kutala ka lava nga randzele Jesu va wa hi va lomu Judhiya, niku zva koteka ku va nga mu zwangi a cikhati a nga gondzisa le Galileya. Hikwalaho, i no phinda timhaka-tshinya ta lezvi a nga gondzisile. I no kuca vontlhe va nga mu ingisela, aku: “Mu nga chavi lava va dayako miri, kanilezvi na va nga hi na ntamu ku maha nchumu kambe.” (Luka 12:4) Khwatsi hi lezvi a nga mahile, i no tlhela a khanyisa lisima la ku a vapizani vakwe va tsumba lezvaku Nungungulu i ta va hlayisa. Va wa fanele ku kholwa ka N’wana wa munhu kambe va tlhela va zvi zwisisa ku Nungungulu a nga va vhuna. — Matewu 10:19, 20, 26-33; 12:31, 32.

Hambulezvo, ku no guma ku humelela wanuna a nga hi ni cikarato co kari, aku: “Mugondzisi, laya . . . [a makabye wa mina] lezvaku a avana na mina a tshomba.” (Luka 12:13) A Nayo wa Nungungulu wu wa laya lezvaku a n’wana wa matewula a kuma ciavelo ci wuyetilweko kumbiri loku va avana tshomba. Ka mhaka leyo, ku wa nga hi na kubangana. (Dhewuteronome 21:17) Kanilezvi, zvi wonekisa ku khwatsi a ndota leyi yi wa lava zvo hundza lezvi yi nga hi ni fanelo yo zvi kuma. Jesu i no ala ku yimelela wokari laha kabye; a mu wutisa aku: “I sawe, himani a ndzi vekileko a kuva mulamuli ni muavanyisi cikari ka n’wina ke?” — Luka 12:14.

I no gumesa a va nyika wusungukati legi vontlhe, aku: “Tlharihani, mu chava a timbilu ta makangwa; hakuva a wutomi ga munhu a nga gi kumi hi wunyingi ga zvilo lezvi a nga nazvo.” (Luka 12:15) Kani a munhu i ganyile ku kota kwihi, i tafa a zvi siya. Jesu i no guma a khanyisa mhaka leyi hi ku hlawutela mufananiso wu tlhelako wu komba lisima la kuva ni vito gi nene mahlweni ka Nungungulu.

I te: ‘A simu ga munhu wo kari . . . [wo ganya] gi no pfuna . . . nguvhu; i no alakanya mbilwini yakwe, aku: Ndzi ta maha yini, hakuva a ndzi na wutshamu ga ku hlengeletela kona a mavele ya mina? Aku ngalo: Ndzi ta maha lezvi: Ndzi ta hahlula a zvigurumbu zva mina, ndzi aka zva hombe; hi laho ndzi ta nga hlengeletela kona a mavele ya mina wontlhe ni zvilo zva mina. Ndzi taku ka muhefemulo wa mina: Muhefemulo, u hlengeletele a zvilo zvinyingi zvo enela malembe yo tala; humula, uga, unwa, u tsaka. Kanilezvi Nungungulu aku ngalo kakwe: Phuphulu ndzi wena, a wusiku legi a muhefemulo wa wena wu ta vitaniwa wu suka ka wena, zvonake a zvilo lezvi u zvi veketeleko zvi ta lumba mani ke? Zvinghaho ni loyi a ti veketelelako a tshomba, na a nga . . . [ganyangi mahlweni] ka Nungungulu.’ — Luka 12:16-21.

Zvi wa koteka ku a vapizani va Jesu ni van’wani va nga kari va muzwa va phasiwa hi ntlhamu wa ku hlongolisela kutani ku hlengeletela titshomba. Hambu mitiro ya siku ni siku zvi wa koteka ku yi va colopetela ku tirela Jehovha. Hikwalaho, Jesu i no phinda a wusungukati ga gi nene legi a va nyikileko a cikhati a nga Kanela laha Citsungeni.

I te: “Mu nga karatekeli a kuhanya ka n’wina, lezvaku mu taga yini; hambu ni mimiri ya n’wina, lezvaku mu ta ambala yini. . . . Hi nga cuwukani zvikunguwa; a zvi byali, hambu ni ku tshovela; a zvi na gomba hambu ni zvigurumbu, kanilezvi Nungungulu wa zvi wundla; kasike n’wina mu hundza nguvhu tinyanyani! . . . Langutani a makon’wa, lezvaku ma kulisa kuyini: A ma swuli, hambu ni ku khata; kasi lezvo ndziku ka n’wina: Hambu Solomoni hi kungangamela kakwe kontlhe a nga bombangi kota gin’we ga wona. . . . Mu nga lavi lezvi mu ta ngaga, ni lezvi mu ta nganwa, kambe mu nga kanakani. A . . . [Papayi] wa n’wina wa zvi tiva lezvaku zva laveka ka n’wina; . . . lavani a Mufumo wakwe, zvonake lezvi zvilo zvi ta engetelwa ka n’wina.” — Luka 12:22-31; Matewu 6:25-33.

Himani a nga wa ta lava Mufumo wa Nungungulu? Jesu i no komba lezvaku va wa nga tava vanhu vo tala — va wa tava “ntlhambi wu tsongwani” wa vanhu vo tsumbeka. Hi kufamba ka cikhati, hi ta tiva lezvaku i 144 000 basi. Zvini va to zvi kuma? Jesu i tsumbisile lezvi: A Papayi ‘wa n’wina i ta mu nyika Mufumo.’ A vanhu lavo va wa nga ta veka kupima lomu ka ku hlengeletela titshomba laha misaveni, leti zvi kotekako ku ti tshuka ti yiviwa hi makhamba. Kanilezvi, a timbilu tabye ti wa tava ka ‘tshomba ya le tilweni leyi yi nga mbheliko’, lomu va to ya fuma na Kristu. — Luka 12:32-34.