Murangeli wa masochwa a nga kombisa kukholwa ka hombe

Andzhako ka loku Jesu a kanele laha Citsungeni, i noya dhoropeni ga Kapernawume. Loku a chikele, i no telwa hi madhota yo kari ya vaJudha; ma nga rumilwe hi wanuna wo kala a nga hi muJudha. A wanuna loye i wa hi murangeli wa masochwa ya Roma.

A murangeli loye wa masochwa i wa hi ni citiri a nga ci randza nguvhu, ci nga kari ci babya zva mahati. Hambu lezvi a murangeli loye wa masochwa a nga hi wamatiko, i no kombela Jesu lezvaku a mu vhuna. A vaJudha lava va nga rumilwe va no byela Jesu lezvaku a citiri ca wanuna loye ci ‘etlele lomu ndlwini, ci file reve,’ niku ca “xaniseka nguvhu.” (Matewu 8:6) A madhota lawo ya vaJudha ma no wula magezu ya ku tiyisekisa Jesu lezvaku a murangeli loyi wa masochwa wa ringana ku vhuniwa. Ma te: “Wa [gi] randza a tiko ga hina; hi yena a nga hi akela a sinagoga ga hina” kambe. — Luka 7:4, 5.

Jesu i no tekela ku suka ni madhota lawo vaya kaya ka murangeli wa masochwa. Laha va nga hi kusuhani ni kuchikela, a murangeli loye wa masochwa i no rumela vanghana vakwe ka Jesu kasi va ya mu byela ku i te: “Hosi, u ngazi u ti karata, hakuva a ndzi munhu wo kala ndzi ku amukela ndlwini ya mina. Hi zvezvo zvi nga ndzi maha ndzi ti wona na ndzi nga ringanelwi hi kuta ka wena.” (Luka 7:6, 7, NM) Hi nga wona kutikoramisa ka wanuna loyi a nga tolovele ku ruma basi! Lezvo zvi kombile lezvaku i wa hambene nguvhu ni vaRoma laha va yileko, lava va nga tolovela ku xanisa zvitiri zvabye. — Matewu 8:9.

A murangeli loye wa masochwa, i wa zvi tiva ku a vaJudha va wa nga gelani ni vamatiko. (Mitiro 10:28) Kuzvilava hi zvona zvi nga mu kuca ku byela vanghana vakwe lezvaku va ya byela Jesu vaku a munghana wa hina i te: Wena “wula gezu basi, a nandza ga mina gi ta hanya.” — Luka 7:7, NM.

Laha Jesu a ngazwa lezvo, i no hlamala aku: “Ndza mu byela ndziku: Hambu lomu Izrayeli a ndzi se kuma munhu a nga ni kukholwa ka hombe ko fana ni loku.” (Luka 7:9, NM) Loku a vanghana va murangeli wa masochwa va tlhelile kaya, va no ya kuma lezvaku a citiri cakwe ci nga babya nguvhu, ci hanyile.

Zvalezvi Jesu a nga hanyisa citiri leco, i no londzowota cimaho leco a wula magezu ma nga tiyisekisa lezvaku a vamatiko lava va nga ni kukholwa va ta katekisiwa, aku: ‘A vanyingi va tata hi Mutsuwuka-gambo ni Mupela-gambo, va ta tshama na Abrahama, na Isaka, na Jakobe, Mufun’weni wa tilo’. Ahati a vaJudha vo kala kukholwa ke? Jesu i te ‘va ta hoxiwa “lahandle le munyameni; laha [a] mikosi yi ta ngava kona ni kugetsela ka meno.” — Matewu 8:11, 12.

Lezvo zvi wa komba lezvaku a vaJudha lava va nga kala ku londzowota thomo legi gi nga ranga giya ka vona, ga ku Fuma na Kristu, va ta luza. Kanilezvi, a vamatiko va ta amukelwa va fuma na Jesu “Mufun’weni wa tilo”.