Jesu a gondzisa ku khongela ni leci ci nga ca lisima laha ko amukela vapfhumba

Le Mutsuwuka-gambo wa ndzhelelo wa Citsunga ca maOlivha, ku wa hi ni cidhoropana ci nga vitaniwa ku i Bhetaniya. Ci wa hi ka pfhuka wa 3 wa tikilometro kusukela Jerusalema. (Johani 11:18, NM) Jesu i noya kwale Bhetaniya, le kaya ka vanghana vakwe Marta, na Mariya, ni makabye wabye Lazaru. Loku a chikele, va no mu amukela khwatsi.

A ku endzelwa hi Mesiya gi wa hi thomo ga hombe nguvhu. Makunu Marta i wa lava ku mu mahela mafundza. Hikwalaho, i no sangula ku longisela mafanjara. Laha Marta a nga kari a longisela, a makabye wakwe Mariya i no tshama laha ka Jesu a mu ingisela. Loku ku hundzile cikhatana, Marta i no byela Jesu aku: ‘Hosi, a wu khatali hi lezvi a . . . [makabye wa mina] a ndzi tsikako ndzi tira ndzoce ke? Mu byele a ndzi vhuna.’ — Luka 10:40.

Jesu a nga mu kawukangi Mariya. Kanilezvi, i no mu nyika wusungukati Marta hi lezvi a nga karateka ku hundza mpimo hi zvilo zva nyama. I te: ‘Marta, Marta, u karateka ni ku vilela hi le’zvinyingi, kasi [lezvo] cilo cin’we ntsena ci lavekako. Mariya i hlawulile a ciavelo co saseka, leci ci ta nga kala ci nga tekiwi ka yena.’ (Luka 10:41, 42) Jesu i wa khanyisa lezvaku zvi wa nga laveki ku Marta a mbheta cikhati co tala na a longisela zvakuga zva mihlowo-hlowo. Ku wo laveka zvakuga zvitsongwani basi.

Lezvi Marta a nga lava ku maha zvi wa hi zvi nene. I wo lava ku mu amukela khwatsi a mupfhumba wakwe. Kanilezvi, lezvi a nga kari a gingiriteka a longisela zvakuga, i wo luza zvilo zva lisima nguvhu — ku nga ku gondzisiwa hi N’wana wa Nungungulu! Jesu i no khanyisa lezvaku lezvi Mariya a nga zvi maha zvi nene nguvhu, hakuva zvi wa ta mu vhuna hi masiku yo leha. Hinawu hi gondza nchumu wa lisima nguvhu lowu hi nga faneliko ku wu rivala.

Ka khati gin’wani, Jesu i no gondzisa nchumu wun’wani, wonawu wu nga wa lisima nguvhu. A mupizani wo kari i no mu kombela aku: “Hosi, hi gondzise ku khongela, kota lezvi Johani a nga gondzisa vapizani vakwe.” (Luka 11:1) Ku wo hundza cipimo ca lembe ni khihlanya Jesu na a gondzisile a mhaka leyi ka Kanelo yakwe le Citsungeni. (Matewu 6:9-13) Hambulezvo, kuzvilava a mupizani loye i wa nga hi kona ka khati lego. Hikwalaho, Jesu i no phinda a timhaka-tshinya a gumesa a hlawutela mufananiso kasi ku khanyisa lisima la ku khongela hi nga tsiki.

I te: “Loku mun’we wa n’wina a hi ni xaka, aya ka gona cikari ka wusiku, a yaku ka gona: Ndzi pembe zvibaba zvinharu; hakuva a xaka ga mina ga muendzi gi hambukele ka mina, a ndzi na nchumu ca ku mu fihluta ha cona. Loyi a nga lomo ndlwini a hlamula, aku: U nga ndzi karati; hakuva a livati li vhalilwe, ni vanana va mina va etlele masangweni na mina; a ndzi zvi koti ku vhuka ndzi ku nyika. Ndziku ka n’wina: Hambu a wa nga ta zvi . . . [lava] ku vhuka a mu nyika, hi lezvi a nga xaka gakwe, kanilezvi hi kota yo kurumeta kakwe, i ta vhuka a ta mu nyika zvontlhe lezvi a zvi lavako.” — Luka 11:5-8.

Jesu i wa nga wuli lezvaku Jehovha a nga zvi lavi ku hlamula loku a munhu a kombela, a ku fana ni xaka ga laha ka mufananiso wakwe. Kanilezvi, i wo komba lezvaku lezvi hambu munhu wo kala a nga zvi lavi ku vhuna munghana wakwe, a zako a mu vhuna loku a kombela a nga tsukuli, a Papayi wa hina wa lirandzo i ta hlamula mikhongelo yo huma mbilwini ya malandza yakwe yo tsumbeka! Jesu i no simama, aku: “Ndza mu byela ndziku: Simamani ku kombela mu ta nyikiwa; simamani ku lava mu ta zvi kuma; simamani ku gongondza mu ta vhululelwa. Hakuva ni wihi loyi a kombelako wa nyikiwa, ni wihi loyi a lavako wa zvi kuma, ni wihi loyi a gongondzako i ta vhululelwa.” — Luka 11:9, 10, NM.

Jesu i no guma a dlunyatisa mhaka yakwe hi ku fananisa munhu na Jehovha, aku: ‘Hi wihi papayi cikari ka n’wina, loku a n’wana wakwe a mu kombela cibaba, a ta nga mu nyika ribye ke? Ni loku a kombela cidluwani, i ta mu nyika nyoka ke? Kutani loku a kombela a tandza, i ta mu nyika a hume ke? Makunu loku n’wina, na mu bihile, mu tiva a ku va nyika a zvinyikiwo zvo saseka a vanana va n’wina, a Papayi wa n’wina wa le tilweni a nga ta hundzeleta, a ku nyika a moya wa ku basa ka lava va mu kombelako ke?’ (Luka 11:11-13) Lezvo zvi hi tiyisekisa ku a Papayi wa hina wa le tilweni i ti yimisele ku ingisela mikhongelo ya hina a tlhela a hi nyika lezvi zvi lavekako!