Jesu aga ni mufarisi

A cikhati leci Jesu a nga hi lomu Judhiya i noya kaya ka muFarisi wo kari a nga mu rambile lezvaku a yaga naye. (Luka 11:37, 38) Na va nga se sangula kuga, a muFarisi loye i no landza mukhuwo wabye, a hlamba mandla kala lomu ka zvisungunyu. Kanilezvi Jesu a nga mahangi lezvo. (Matewu 15:1, 2) Lisine ku zvi wa nga tshovi Nayo wa Nungungulu loku munhu a hlamba mandla kala lomu ka zvisungunyu, kanilezvi zvi wa nga hi Nayo wa Nungungulu.

A muFarisi loye i no hlamala laha a nga wona ku Jesu a nga landzangi mukhuwo lowo. Jesu i no zvi tiva ku i wa hlamala, a se: ‘Kunene n’wina vaFarisi mu hlazva lahandle ka gombe ni ngelo; kanilezvi lomu ndzeni mu tele hi kuyiva ni kubiha. Zvipumbu ndzi n’wina, loyi a nga maha zva lahandle, a nga mahangi zva lomu ndzeni ke?’ — Luka 11:39, 40.

A ku ranga hi ku hlamba mandla loku a munhu a lava kuga a hi yona yi nga hi mhaka. Kanilezvi, a wufarisi ga wukhongeli hi gona gi nga hi cikarato. A vaFarisi ni van’wani va wo landzela mukhuwo wa ku hlamba kala lomu ka zvisungunyu, kanilezvi va wa nga basisi timbilu tabye — ti wa bihile. Hikwalaho, Jesu i no va nyika wusungukati legi: ‘Nyikani zvinyikiwo ka zvisiwana hi lezvi zvi nga zva lomu ndzeni; zvonake zvontlhe zvi tava zvi hlazvekile ka n’wina.’ (Luka 11:41) Lelo lisine la hombe nguvhu! A munhu i fanele ku nyika hi ku kuciwa hi lirandzo, na ku nga hi ku fela ku a van’wani va mu wonisa ku khwatsi i lulamile.

A hi ku khwatsi a muFarisi loye i wa nga nyiki. Jesu i te: “N’wina vaFarisi . . . mu nyikela a zva wukhume ka minte ni rue ni khubyanyi wontlhe, kasi mu tsika nongameto ni kurandza ka Nungungulu; kanilezvi mu wa fanele ku maha lezvi, na mu nga tsikangi ku humesa le’zvo ranga.” (Luka 11:42) A Nayo wa Nungungulu wu wa laya lezvaku va nyikela zva wukhume ka lezvi va nga tshovela. (Dhewuteronome 14:22) Lezvo zvi wa patsa minte ni rue ni matsawu man’wani kutani zvin’wani va nga byala zva ku chela lomu ka zvakuga kasi ku zvi nandziha. Ka zvilo lezvo, a vaFarisi va wa nyikela zva wukhume futsi — va nga hundzisi ne va nga kengezi. Makunu, ahati loku zvita mhakeni ya Milayo leyi yin’wani ya lisima ke, yo kota ku maha zva kululama ni kutikoramisa? — Mika 6:8.

Jesu i noya mahlweni aku: “Khombo a give ka n’wina vaFarisi; hakuva mu randza a zvitshamu zva le mahlweni masinagogeni, ni kuloswa wutshan’wini go hlengeletana. Khombo a give ka n’wina; hakuva mu fanana ni zvilahla zvi nga wonekiko; lezvi vanhu va zvi kandzihelako va nga zvi tivi.” (Luka 11:43, 44) Lisine futsi, zvi wa koteka ku a vanhu va kandzihela zvilahla lezvo va gumesa va kumeka va nga basangi hi kuya hi Nayo. Jesu i no tirisa mhaka leyo kasi ku khanyisa lezvaku a vaFarisi a va basangi, kanilezvi zvi wa nga woneki. — Matewu 23:27.

A mugondzisi wo kari wa Nayo i no khala aku: “Mugondzisi, hi ku wula lezvo wa hi rukatela na hinawu kambe.” Zva dlunyateka ku a wanuna loye i wa hi cikhumu, i wa nga zvi woni ku a va zvi koti ku vhuna vanhu. Makunu Jesu aku: “Khombo a give ni ka n’wina vagondzisi va Nayo; hakuva mu rwexa vanhu a mindzhwalo yo bindza; kasi n’wina wutsumbu a mu vhumeli ku henya mindzhwalo leyo hi litiho lin’we la n’wina. Khombo a give ka n’wina; hakuva ma aka a zvilahla zva vaphrofeti lava va nga dawa hi . . . [vapapayi] va n’wina.” — Luka 11:45-47.

A mindzhwalo leyi Jesu a nga yi wula ku wa hi mikhuwo ya kuhlawutelwa ni lezvi a vaFarisi va nga wu tlhamuselisa zvona Nayo wa Nungungulu. A vavanuna lavo va wa koxa lezvaku a vanhu va landzela mikhuwo leyo yo bindza; hi ndlela leyo, va va bindzisela kuhanya. A vakokwani vabye va dele vaphrofeti va Nungungulu, kusukela ka Abheli zviya mahlweni. Makunu vona va wo pimanyisa a moya ni hanyela ga vakokwani vabye — hi ku maha ku khwatsi vo dzundza vaphrofeti lavo, va aka zvilahla zvabye va tlhela va zvi sasekisela. Ahandle ka lezvo, va wa zama ku daya muphrofeti wa Nungungulu, loyi wa hombe ka vontlhe. Makunu Jesu i te a cizukulwana leco ci wa ta lamuliwa hi Nungungulu. Lezvo zvi mahekile andzhako ka 38 wa malembe, hi 70 Nguveni ya Hina.

Jesu i no simama, aku: ‘Khombo a give ka n’wina, vagondzisi va nayo; hakuva mu susile a pfhungulo ya wutivi; n’wina wutsumbu a mu nghenangi, ni lava va nga kari va nghena mu va . . . [betele].’ (Luka 11:52) A vavanuna lavo va wa fanele ku gondzisa Mhaka ya Nungungulu. Kanilezvi, va wo vhalela vanhu lezvaku va yi tiva va tlhela va yi zwisisa.

A vaFarisi ni vagondzisi va Nayo va no kwata. Laha Jesu a nga kari a suka, va no mu vhukela va mu maha zviwutiso zvo tala. Va wa nga wutiseli ku a ta va gondzisa. Kanilezvi, va wa lava ku mu phasa, a wula zvilo zva ku va ta mu nyika nandzu va mu khoma.