Xini lexi hakunene xi nga xa lisima?

KA SIKU go kari, ku lota wanuna a ta wulawula na Jesu. I wa zi tiva lezaku Jesu wa tiva nguvu, hikwalaho, i te ngalo kakwe: ‘Mugonzisi, byela makabye wa mina lezaku a nzi avela zilo lezi a nga nazo.’ A wanuna loye i wa alakanya lezaku i fanele ku kuma zilo zo kari za makabye wakwe.

Loku ku wa hi wena Jesu, na u hlamulile yini? — Jesu i lo wona lezaku a wanuna loye i wa hi ni xikarato. Kanilezi, a xikarato xakwe ku wa nga hi ku lava lezi a makabye wakwe a nga hi nazo. A xikarato xa wanuna loye hi lezaku i wa nga xi tivi lexi hakunene xi nga xa lisima wutomini.

A hi ehleketi hi lezi: Xini xi faneleko kuva xa lisima ka hina? Xana kuva ni zilo zo tala zo hlakana hi zona, tinguwo ta tiswa, kutani zilo zinwani zo fana ni lezo? — Ahihi, ku na ni nchumu wo kari wu nga wa lisima nguvu. Niku lexo xigonzo lexi Jesu a nga lava ku gonzisa. Hikwalaho, i lo hlawutela mufananiso wa wanuna wo kari a nga rivakelwe Nungungulu. Wa zi lava ku wuzwa? —

A wanuna loye i wa ganyile nguvu. I wa hi ni masimu ni wutshamu go hlengeletela kona zakuga. A zilo lezi a nga byalile zi lo pfuna nguvu. I wa nga ha hi na wutshamu ga ku chela zontlhe a nga tshovele. Makunu, i wa ta maha yini? I lo ti byela lezi: ‘Nzi ta hahlula a matshamu ya mina ya ku hlengeletela zakuga, nzi aka ya hombe; zonake nzi ta hlengeletela zakuga za mina zontlhe ni zilo za mina za zi nene ka matshamu lawo ya maswa.’

A wanuna loye wa ku ganya i wa alakanya lezaku lezo zi wa hi wutlhari. I wa alakanya lezaku i wa tlharihile nguvu hi ku hlengeletela zilo zo tala. I lo ti byela lezi: ‘Nzi hlengeletele zilo zo tala. Nzi ta zi tirisa hi malembe yo tala. Makunu zezi nzi nga humula. Nzi taga, nzinwa, nzi tlhela nzi tsaka.’ Kanilezi, ka lezi a wanuna loye wo ganya a nga zi alakanya, ku wa ni nchumu wo kari wu nga kala wu nga hi wu nene. Wa zi tiva ku i nchumu muni? — I wa alakanyela ga yena ntsena ni kutitsakisa. I wa rivakelwe Nungungulu.

Hikwalaho, Nungungulu i lo byela wanuna loye wo ganya, aku: ‘Wanuna nzi wena wa xipumbu. Nyamutlha ni wusiku u tafa. Makunu a zilo lezi u zi hlengeleteleko zi ta sala na mani ke?’ Xana a wanuna loye wo ganya i wa ta tirisa zilo lezo na a file? — Ahihi, a zilo lezo zi wa ta sala ni munwani. Jesu i lo wula lezi: ‘Zi tshamisile zalezo ka loyi a ti hlengeletelako tshomba, na a nga ganyangi mahlweni ka Nungungulu.’ — Luka 12:13-21.

A wu zi lavi ku fana ni wanuna gayani wo ganya, a hi zona? — Lexi yena a nga xi lava wutomini gakwe ku wa hi kuva ni titshomba to tala. Lexi hi xona xi nga hi xikarato xakwe. I wa nga kolwi hi zilo. Kanilezi, i wa nga ‘ganyangi mahlweni ka Nungungulu.’

A vanhu vo tala inyamutlha va fana ni wanuna loye wa ku ganya. Va tshama hi ku lava zinwani. Kanilezi, lezo zi nga vanga zikarato za hombe. Hi xikombiso, u na ni zilo zo kari zo hlakana hi zona? — Zilo muni? Nzi byele. — Ahati loku a munghana wa wena a hi ni bhola kutani xibhonekana hambu a nchumu wunwani u kalako u nga hi nawo? Zi wa tava zi nene a ku kurumeta vapswali va wena lezaku va ku xavela? —

Ka zikhati zinwani a nchumu wo hlakana hi wona wu ngava wa lisima nguvu. Kanilezi, ku nga maheka yini hi kufamba ka xikhati? —

Wu maha wa kale. Wu nga goheka, zonake u nga ha wu lavi kambe. Hi lisine, u na ni nchumu wa lisima ku hunza zilo zo hlakana hi zona. Wa wu tiva ku i nchumu muni lowo? —

Wutomi ga wena. A wutomi ga wena ga lisima nguvu, hakuva loku u nga hi nago, a wu nge zi koti ku maha nchumu. Kanilezi, kasi u hanya ku laveka lezaku u maha lezi zi tsakisako Nungungulu, a hi zona? — Hikwalaho, i chukwana hi nga fani ni wanuna gayani wo ganya na a hi xipumbu, loyi a nga rivakelwe Nungungulu.

A vanana a hi vona voce va nga mahako zilo za wupumbu a ku fana ni wanuna gayani wa ku ganya. Ni vanhu vo tala va hombe, va mahawu. A vokari xikari kabye xontlhe xikhati va lava zilo zo hunza lezi va nga nazo. Kuzilava va na ni zakuga zo enela siku lego, tinguwo ta ku ambala, ni wutshamu go hanya kona. Kanilezi va lava zinwani. Va lava tinguwo to tala. Niku va lava kuva ni tiyindlu ta hombe. Kanilezi a zilo lezi zi dura nguvu. Hikwalaho, va tira nguvu kasi ku kuma mali yo tala. Niku a xikhati lexi va yi kumako nguvu, va engetela ku yi lava nguvu kambe.

A vanhu vo kari va hombe va mbheta a xikhati xo tala na va tira kasi va kuma mali, laha ka kuza va nga kumi ni xikhati xa ku tshama ni ngango wabye. Niku a va na xikhati xa ku tirela Nungungulu. Xana a mali yabye yi nga va maha va ngafi? — Ne ni kutsongwani! Va nga zi kota ku tirisa a mali yabye na va file? — Ahihi. Zi tshamisile lezo hakuva a vafileko a va zi koti ku maha nchumu. — Mutshawuteli 9:5, 10.

Lezo zi wula ku zi bihile a kuva ni mali? — Ahihi. A mali hi nga yi tirisela ku xava zakuga ni tinguwo. A Biblia gi wula lezaku ya vikela. (Mutshawuteli 7:12, NM) Kanilezi loku hi ranza mali, zi nga hi vangela zikarato za hombe. Loku hi yi ranza hi ta fana ni wanuna gayani wo ganya na a hi xipumbu loyi a nga ti hlengeletelela titshomba, kanilezi na a nga ganyangi mahlweni ka Nungungulu.

Xana zi wula kuyini a ku ganya mahlweni ka Nungungulu? — Zi wula ku rangisa Nungungulu wutomini ga hina. A vanhu vo kari va wula lezaku va kholwa ka Nungungulu. Va alakanya lezaku a ku kholwa hi zona ntsena zi lavekako. Kanilezi xana hakunene va ganyile mahlweni ka Nungungulu? — Ahihi, va fana ni wanuna gayani wo ganya loyi a nga rivakelwe Nungungulu.

Jesu a nga tshukangi a rivakelwa a Papai wakwe wa le tilweni. A nga zamangi ku ti hlengeletelela mali yo tala. Niku i wa nga hi na titshomba to tala. Jesu i wa xi tiva lexi hakunene xi nga hi xa lisima wutomini. Wa xi tiva ku xini? — Ku ganya mahlweni ka Nungungulu.

Hi nga nzi byela, hi nga maha yini kasi hi ganya mahlweni ka Nungungulu? — Hi nga ganya mahlweni ka Nungungulu hi ku maha lezi zi mu tsakisako. Jesu i te ngalo: “Xontlhe xikhati nzi maha lezi zi mu xalalisako.” (Johani 8:29) Nungungulu wa tsaka loku hi maha lezi a lavako lezaku hi maha. Nzi byele, u nga maha yini kasi ku tsakisa Nungungulu? — Hi zona, u nga gonza Biblia, uya mitlhanganweni ya wuKristu, u khongela ka Nungungulu, ni ku vuna vanwani lezaku va mu tiva. Lezo hi lezi hakunene zi nga za lisima wutomini.

Kota lezi Jesu a nga ganyile mahlweni ka Nungungulu, Jehova i lo mu katekisa. I lo chachazela Jesu hi ku mu nyika wutomi ga pinzukelwa. Loku hi fana na Jesu, Jehova i ta hi ranza a tlhela a hi katekisa hinawu. Hikwalaho, hi fanele ku maha zontlhe hi zi kotako kasi hi fana na Jesu, hi nga tshuki hi fana ni wanuna gayani a nga rivakelwe Nungungulu.