Hi vamani va to vuxiwa? Niku va ta hanya kwihi?

HI KUYA hi lezi hi gonzileko ka Zipimo 34 ni 35, vanhu vangani va vuxilweko hi ka vafileko hi gonzileko hi vona? — I ntlhanu wa vona. Va wa hi vanana vangani? — Vanharu. Niku loyi wa wumune i jaha. U alakanya lezaku lezo zi komba yini? —

Zi komba lezaku Nungungulu wa ranza vanana. Kanilezi, i ta vuxa a vanhu vo tala kambe va fileko. Xana Nungungulu i ta vuxa a vanhu lava va nga maha za zi nene basi? — Lisine ku i ta vuxa a vanhu va va nene. Hambulezo, ku na ni vanhu vo tala lava va ngafa na va nga gonzangi lisine xungetano hi Jehova Nungungulu ni N’wana wakwe. A vanhu lavo va mahile zilo zo biha hi lezi va nga gonzisilwe zilo za hava. Makunu u alakanya lezaku Jehova i ta vuxa a vanhu vo fana ni lavo ke? —

A Biblia gi ngalo: “Ku tava kona a kuvuka ka valulamileko ni va nga lulamangiko.” (Mitiro 24:15) Hikuyini lava va nga lulamangiko, kutani va nga kala ku maha za zi nene, va to vuxiwa hi ka vafileko? — Hi lezaku a va tshukangi va gonza xungetano hi Jehova ni lezi a lavako lezaku a vanhu va zi maha.

Xana a vanhu va ta vuxiwa rini hi ka vafileko? — Alakanya a xikhati lexi Lazaru a ngafa zonake Jesu a tsumbisa Marta a makabye wa Lazaru, aku: “A makabye wa wena i ta vuka.” Marta a hlamula aku: ‘Nza zi tiva lezaku i ta vuka hi ka vafileko hi siku go gumesa.’ (Johani 11:23, 24) Xana Marta i wa lava ku wula yini a xikhati lexi a nga wula lezaku Lazaru i ta vuka “hi siku go gumesa”? —

Marta i wa zwile a xitsumbiso xa Jesu xaku: ‘Vontlhe va nga le zilahleni va ta huma.’ (Johani 5:28, 29) Hikwalaho, “a siku go gumesa,” xikhati lexi vontlhe va nga maalakanyweni ya Nungungulu va to tlhela va hanya. A siku lego go gumesa, a hi siku ga 24 wa tihora. Gi tava ga 1.000 wa malembe. Xungetano hi siku lego, a Biblia gi ngalo: ‘Nungungulu i ta lamula vanhu va nga laha misaveni.’ Xikari ka vanhu lava a to va lamula ku tava ni lava va to vuxiwa hi ka vafileko. — Mitiro 17:31; 2 Pedro 3:8.

Hi nga alakanyela lezi gi to tsakisisa zona a siku lego! Ka siku lego go leha ga 1.000 wa malembe, a vanhu va tsanza-vahlayi lava va fileko, va ta tlhela va hanya. A wutshamu legi lava va to vuxiwa hi ka vafileko va to hanya ka gona, Jesu i gi vitana ku i Paradise. A hi wone a ku a Paradise lego gi tava kwihi niku gi ta tshamisa kuyini.

Na ku kiyela kwalomo ka tihora tinharu kasi Jesu afa laha ka mhanze ya xanisa, i lo wulawula hi Paradise ni wanuna loyi a nga hi kusuhani kakwe laha ka sinya. A wanuna loye i wo dawa hi kota ya wugevenga a nga gi mahile. Kanilezi, laha a xigevenga lexo xi nga wona Jesu xi tlhela xizwa lezi a vanhu va nga kari va wulawula xungetano hi yena, a xigevenga lexo xi lo sangula ku kholwa ka Jesu. Hikwalaho, a wanuna loye i lo wula lezi: ‘Nzi alakanye loku u chikela mufunweni wa wena.’ Jesu i lo hlamula lezi: “Hizinene nziku ka wena nyamutlha: U tava na mina Paradiseni.” — Luka 23:42, 43, NM.

I wa lava ku wula yini Jesu a xikhati lexi a nga wula lezo? Kasi gi tava kwihi Paradise? — Alakanyela lezi: Gi wa hi kwihi a Paradise go sangula? — Alakanya lezaku Nungungulu i vekile Adamu na Eva, lomu paradiseni kwalaha misaveni. A paradise lego, gi wa vitaniwa a ku i simu ga Edeni. Lomu ka simu lego ku wa hi ni zihari, kanilezi zi wa nga bayisi munhu. Niku ku wa hi ni tisinya to tala ti nga pswala mihanzu yo nanziha nguvu, ni congo wa hombe. Gi wa hi wutshamu ga gi nene nguvu a ku hanya ka gona! — Genesisi 2:8-10.

Hikwalaho, a xikhati lexi hi gonzako lezaku a xigevenga lexo xi tava Paradiseni, hi fanele ku alakanyela kwalaha ka misaveni yaleyi, na yi mahilwe wutshamu go saseka kasi ku hanya ka yona. Xana Jesu i tava Paradiseni kwalaha misaveni zinwe ni wanuna loye a nga hi xigevenga? — Ahihi. Wa zi tiva ku hikuyini a to kala a ngavi kona? —

A nga tava kona hakuva Jesu i tava le tilweni na a fumela Paradise laha misaveni kota Hosi. Hikwalaho, Jesu i tava zinwe ni wanuna loye hi lezi a to mu vuxa hi ka vafileko a tlhela a khatalela zilaveko zakwe. Kanilezi, hikuyini Jesu a to tsika a wanuna loye a nga hi xigevenga a hanya Paradiseni? — A hi kume hlamulo wa kona.

Na xi nga se wulawula na Jesu, xana a xigevenga lexo xi wa tiva zokari xungetano hi kungo ga Nungungulu? — Ahihi, xi wa nga tivi nchumu. Xi mahile zilo zo biha hakuva xi wa nga tivi lisine xungetano hi Nungungulu. Paradiseni, a wanuna loye i ta gonzisiwa xungetano hi kungo ga Nungungulu. Zonake i ta nyikiwa xikhati xa ku komba lezaku wa mu ranza Nungungulu hi ku maha kuranza Kakwe.

Xana a vanhu vontlhe va to vuxiwa hi ka vafileko va ta hanya Paradiseni kwalaha misaveni? — Ahihi, a hi vontlhe. Wa zi tiva a ku hikuyini? — Hakuva a vokari va ta vuxiwa hi ka vafileko kasi va ya hanya na Jesu le tilweni. Va ta fumela a Paradise laha misaveni kota tihosi, na va hi zinwe na Jesu. A hi wone a ku hi zi tivisa ku yini lezo.

Ka wusiku gakwe go gumesa, Jesu i lo byela vapostoli vakwe aku: ‘Le ndlwini ya Papai wa mina le tilweni, ku na ni wutshamu ginyingi kasi ku hanya ka gona, niku nza famba nziya mu longiselela wutshamu.’ Zonake Jesu i lo va tsumbisa lezi: “Nzi ta wuya kambe, nzi ta mu teka muta ka mina; kasi laha nzi nga kona, mu fela kuva kona na nwinawu.” — Johani 14:2, 3.

Xana Jesu i yile kwihi a xikhati lexi a nga vuxiwa hi ka vafileko? — Hi zona, i tlhelele tilweni kasi a ya tshama zinwe ni Papai wakwe. (Johani 17:4, 5) Hikwalaho, Jesu i lo tsumbisa a vapostoli vakwe ni valanzeli vanwani lezaku i ta va vuxa hi ka vafileko kasi va tava zinwe naye le tilweni. Zini va to maha na Jesu le tilweni? — A Biblia gi wula lezaku a vapizani vakwe, lava va to vuxiwa “kuvukeni ko sangula,” va ta hanya le tilweni va tlhela va fumela a misava ‘kota tihosi zinwe na Jesu hi 1.000 wa malembe.’ — Kuvululelwa 5:10; 20:6; 2 Timote 2:12.

Vangani va to vuxiwa “kuvukeni ko sangula” va tlhela va ya fuma zinwe na Jesu kota tihosi? — Jesu i lo byela a vapizani vakwe aku: “Nwina ntlhambi wu tsongwani mu nga chavi; hakuva kuranza ka raru wa nwina a ku mu nyika mufumo.” (Luka 12:32) A ‘ntlhambi lowo wa wu tsongwani,’ ku nga lava va vuxelwako a ku ya hanya zinwe na Jesu le Mufunweni wakwe wa le tilweni, i ntsengo wo kari wu pimilweko. A Biblia gi komba lezaku i “144.000” wa vanhu va to vuxiwa laha misaveni vaya tilweni. — Kuvululelwa 14:1, 3.

Vanhu vangani va to hanya Paradiseni laha misaveni? — A Biblia a gi wuli a ku vangani. Kanilezi, a xikhati lexi Adamu na Eva va nga hi le sinwini ga Edeni, Nungungulu i wa va byelile lezaku vava ni vana va tata misava. Lisine lezaku a va zi kotangi ku maha lezo. Kanilezi, Nungungulu i ta tatisa a kungo gakwe ga lezaku a misava yi tala hi vanhu va va nene. — Genesisi 1:28; Isaya 45:18; 55:11.

Hi nga alakanyela lezi zi to tsakisisa zona a ku hanya Paradiseni! A misava yontlhe yi ta saseka nguvu! Ku ta hanya a zinyanyani, zihari, tisinya to saseka, ni tixaka tontlhe ta zitsangi. I hava a tozwa ku bayisa hi ku babya niku i hava a tofa. A vanhu vontlhe va ta maha vanghana. Loku hi lava ku hanya kala kupinzuka Paradiseni, hi fanele ku sangula ku ti longisela zezi.