Jesu a vhuxa Lazaru

Loku Jesu a kumene na Marta na Mariya kusuhani ni Bhetaniya, va no guma vaya cilahleni ca Lazaru. A cilahla leco ci wa hi mhako yi nga vhalilwe hi ribye. Loku va chikele, Jesu i te: “Susani ribye.” Marta i wa nga zvi zwisisi ku Jesu i lava ku maha yini, hikwalaho i no wulawula na a karatekile aku: “Hosi, makunu wa nuha, hakuva mune wa masiku na a file.” Jesu aku: “Xana a ndzi ku byelangi ndziku, loku u kholwa u ta wona a wukulu ga Nungungulu ke?” — Johani 11:39, 40.

Loku va wumbulutile ribye, Jesu i no cuwuka tilweni a khongela, aku: Papayi “ndza ku bonga hi lezvi u ndzi zwile. Ndza zvi tiva lezvaku wa ndzizwa cikhati contlhe; kanilezvi ndzi wula lezvi hi kota ya cidlemo leci ci yimileko laha, kasi va fela ku kholwa lezvaku hi wena u ndzi rumileko.” Lezvi Jesu a nga maha mukhongelo, zvi mahile ku lava va nga hi kona va zvi zwisisa ku lezvi a nga lava ku maha, i wa ta zvi maha hi ku vhuniwa hi ntamu wa Nungungulu. Jesu i no guma a vitana hi gezu ga hombe aku: “Lazaru, huma!” Lazaru a se huma futsi, na a tsondzelelwe zvitarapo lomu ka mawoko ni lomu ka minenge; a nghohe yakwe na yi vhalilwe hi nguwo. Jesu aku: Mu tlhatlheleleni, “mu mu tsika a famba.” — Johani 11:41-44.

Ku wa hi ni vaJudha vo tala va nga tile va ta chavelela Mariya na Marta. Makunu laha va nga zvi wona, va no kholwa ka Jesu. Kanilezvi a van’wani va no tekela ku vhuthu, va ya hlawutela vaFarisi lezvi Jesu a nga mahile. Zvonake a vaFarisi ni vapristi va hombe — lava va nga wumba hubye ya hombe ya kulamula ya vaJudha — va no maha mutlhangano. Cikari ka hubye leyo, ku wa hi ni Mupristi wa hombe wa ku hi Kayafasi. A vokari vabye va no khala hi ku vhumala ni co maha, vaku: “Hi ta maha yini? A munhu loyi i maha zviwoniso zvinyingi. Loku hi mu tsika a maha lezvo, a vanhu vontlhe va ta kholwa ka yena; zvonake a vaRoma va ta ta hi tekela a wutshamu legi ni tiko ga hina.” (Johani 11:47, 48) A vavanuna lavo va wa zwile wukustumunyu ga vanhu vo tala va nga wonile Jesu na a maha “zviwoniso zvinyingi”. Hambulezvo, a mitiro leyi Nungungulu a nga kari a maha hi ku tirisa Jesu yi wa nga va tsakisi. Leci ci nga hi ca lisima kabye ku wa hi zvikhundla zvabye basi.

A vaSadhusi va no vhaliwa minomu hi lezvi Lazaru a nga vhuxilwe hi ka vafileko, hakuva va wa nga kholwi lezvaku a munhu a nga vhuka. Makunu Kayafasi, a mun’we wa vaSadhusi lavo, i no guma aku: “N’wina a mu tivi nchumu, hambu ni ku pima lezvaku zvi mu sasekele lezvaku munhu mun’we a fela vanhu, kasi a tiko gontlhe gi nga lovi.” — Johani 11:49, 50; Mitiro 5:17; 23:8.

Kayafasi i wa hi mupristi wa hombe. Maku lezvi a nga wula a nga ‘wulangi’ na zvi sukela ka yena — kanilezvi i no tirisiwa hi Nungungulu. Hi magezu lawo, Kayafasi i wo komba lezvaku Jesu i fanele ku dawa; hakuva i wa chava ku a vanhu va tsika ku landzela varangeli va wukhongeli ga ciJudha. Hambulezvo, lezvi Kayafasi a nga phrofeta zvi kombile lezvaku a kufa ka Jesu ku wa ta vhulula ndlela ya ku a vaJudha ni vontlhe “vana va Nungungulu lava va hangalakileko” va tlhatlhiswa. — Johani 11:51, 52.

Kayafasi i wa dele a tlhela a kokela. I zvi kotile futsi a ku kucetela hubye lezvaku yi maha makungo ya ku daya Jesu. Xana Nikodhemusi, loyi a nga tsakela Jesu, i yile a ya mu hlevela a ku va lava ku mu daya? Kani i mu tlharihisile, kani a nga mu tlharihisangi, Jesu i no tekela ku suka lomu Jerusalema kasi a nga dawi na ci nga se chikela a cikhati leci Nungungulu a nga ci yimisile.