“Nza Mu Ranza Dadani”

1, 2. Zini lezi mupostoli Johani a nga zi komba xungetano hi wusiku go gumesa legi a vapostoli va nga hi na Jesu?

A WANUNA a khosaheleko i peta a penisela yakwe lomu ka tinta, a kupima kakwe na ku tele hi kualakanya. A vito gakwe hi Johani, niku hi yena a mupostoli wa Jesu Kristu wo gumesa loyi a ha hanyako. Zalezi, na a hi kwalomu ka tanga ya 100 wa malembe, Johani i tlhelisa kupima kakwe kwalomo ka ntlhanu wa makume ni makume mambiri ya malembe ka wusiku gi nga rivalekiko — a go gumesa legi yena ni vapostoli-kulobye va nga hi zinwe na Jesu mahlweni ka kufa Kakwe. Na a rangelwa hi moya wa ku basa wa Nungungulu, Johani wa zi kota ku alakanya a tlhela a tsala a zimaho hi ndlela yi tlhamuselekako khwatsi.

² Ka wusiku lego, Jesu i zi vekile kubaseni lezaku lokuloku i wa ta dawa. Johani hi yena yece a kombako xigelo xa kuva Jesu a wulile lezaku i wa ta hunza hi ka magumo lawo yo tshisa: “Zi maheka kasi tiko gi fela ku zi tiva lezaku nza mu ranza Dadani, ni lezaku nzi maha lezi Dadani a nzi layileko. Vukani, a hi sukeni laha.” — Johani 14:31.

 3. Xana Jesu i kombisile kuyini lezaku i wa ranza Dadani wakwe?

³ “Nza mu ranza Dadani.” A xi kona xinwani xi nga karata Jesu a ku hunza lezo. A hi lezaku yena i wa tshama hi ku phindaphinda a magezu lawo. Hakunene, ka Johani 14:31 hi kona koce lomu ka mitsalo ya Biblia hi kumako Jesu na a kombisa a liranzo lakwe hi Dadani wakwe hi kukongoma loko. Hambulezo, Jesu i wa hanya hi magezu lawo. A liranzo lakwe ha Jehova li wa woneka siku ni siku. A kutiya-hlana ka Jesu, a kuingisa, a kutimisela kakwe zontlhe zi wa hi xikombiso xa liranzo lakwe hi Nungungulu. A wutireli gakwe gontlhe gi wa susumetiwa hi liranzo leli.

4, 5. Xana a Biblia gi vuvumisa a liranzo la lixaka muni, niku ku nga wuliwa yini hi liranzo la Jesu ha Jehova?

⁴ Inyamutlha, a vo kari va nga ha alakanya lezaku a liranzo i gome. Va nga ha alakanya a tisimu ta liranzo, kuzilava hambu a kuhlakana loku zinwani zikhati ku zwananiswako ni liranzo la wanuna ni wasati. A Biblia hakunene ga wulawula hi liranzo la wanuna ni wasati, hambu lezi gi zi mahako hi ndlela ya xichawo a ku hunza lezi li alakanyiswako zona makunu. (Mavingu 5:15-21) Hambulezo, a Mhaka ya Nungungulu yi yisa nguvu kupima ka linwani lixaka la liranzo. A liranzo leli a hi kuswa hi kunavela ntsena kutani kutizwa ka xikhatanyana; ge hambu tshamela ga ku nga tizwi, kutani ndlela ya filozofia yi yelanako ni kuzwanana. Lona li patsa a mbilu ni kupima. A liranzo lelo li huma hi le mbilwini ya munhu, li fumelwa hi kuyelana ni matshinya ya milayo yo tlakuka nguvu, niku li kombiswa hi ntiro wu akako. Hakunene a hi tshamela go hehuka. “A liranzo cima li nga ta fuva,” ku wula a Mhaka ya Nungungulu. — 1 Va Le Korinte 13:8.

⁵ Ka vanhu vontlhe lava va hanyileko, Jesu i wa hi yena a nga ranza nguvu Jehova a ku hunza vontlhe. A nga kona a nga hunza Jesu hi ku tatisa magezu lawa a nga ma tshaha kota milayo ya hombe ka yontlhe ya Nungungulu: “U ta ranza Hosi Nungungulu wa wena hi mbilu ya wena yontlhe, ni muhefemulo wa wena wontlhe, ni kupima ka wena kontlhe, ni ntamu wa wena wontlhe.” (Marku 12:30) Xana Jesu i li hlakulelisile kuyini a liranzo lelo? Xana i li hlayisisile kuyini a liranzo lakwe ha Nungungulu na li tiyile a xikhati lexi a nga hi misaveni? Niku hi nga mu pimanyisisa kuyini?

6, 7. Xana hi zi tivisa kuyini lezaku a bhuku ga Mavingu 8:22-31 gi wulawula hi N’wana wa Nungungulu, ku nga hi ntsena a tshamela ga wutlhari?

⁶ Xana wa tshuka u maha ntiro wo kari ni munghana zonake u wona lezaku nwina va vambiri mu mahile vanghana va chukwana, ni va hombe nguvu hi kota ya lezo? A ximaho lexo xo tsakisa xi nga ha ku vuna a ku zwisisa a liranzo leli li hlakulelweko hi Jehova ni N’wana wakwe a belekilweko yece. Hi kumbukile a bhuku ga Mavingu 8:30 hi kuphindaphinda, kanilezi a hi kambisiseni khwatsi a mavesi lawa ma ranzelako a vesi legi. Lomu ka vesi 22 kala 31, hi kuma a kuhlawutelwa ka wutlhari gi fananiswako ni munhu. Xana hi zi tivisa kuyini lezaku a magezu lawa ma wula a N’wana wa Nungungulu?

⁷ Ka vesi 22, a wutlhari gi ngalo: “Jehova i lo nzi vanga kusanguleni ka ndlela yakwe, hi mahlweni ka mitiro yakwe ya kale.” A xinwani xo hunza a wutlhari ntsena xi fanele ku patseka laha, hi lezaku a wutlhari cima a gi ‘vangiwangi.’ Gona cima a gi vangi ni masangulo hakuva Jehova i kona xikhati xontlhe niku yena i sina a tlharihile. (Tisimu 90:2) Hambulezo, a N’wana wa Nungungulu i wa hi “matewula ya zivangwa zontlhe.” Yena i vangilwe, ive wo sangula ka mitiro yontlhe ya Jehova. (Va Le Kolosi 1:15) A N’wana i vile kona a mahlweni ka misava ni matilo, kota kuhlawutela ka Mavingu. Niku kota Gezu, Muwulawuli wa Nungungulu, ive xikombiso xo mbhelela xa wutlhari ga Jehova. — Johani 1:1.

 8. Xana wu wa hi wihi a ntiro wa N’wana xikhatini xa kuvakona kakwe na a nga seva munhu wa nyama, niku zini hi faneleko a ku zi alakanya a xikhati lexi hi hlamalako a zivangwa?

⁸ Xana wu wa hi wihi a ntiro wa N’wana nzeni ka xikhati xi nga hiko na ku hlayiwa mahlweni ka kuva ata misaveni? A vesi 30 gi hi byela lezaku i wa hi tlhelweni ga Nungungulu kota “xigogo xa mitiro.” Xana lezo zi wula yini? A bhuku ga Va Le Kolosi 1:16 ga tlhamusela: “A zilo zontlhe zi vangilwe ha yena, le tilweni ni laha misaveni, . . . zontlhe zi vangilwe hi yena, zi vangelwa yena.” Hikwalaho Jehova, a Muvangi, i lo tirisa N’wana wakwe, a Xigogo xa Mitiro, kasi ku vanga zilo zontlhe zinwani — kusukela ka zivangwa za moya le tilweni kala ka wuako gontlhe gi wonekako, ka misava ni tixaka ta yona to tsalangana ta kuhlamalisa ta tisinya ni zihari, kala ka xivangwa xo tlakuka nguvu laha misaveni: a munhu. Ka matshamela manwani, hi nga fananisa a kutirisana xikari ka Dadani ni N’wana ni loku a mutsali wa zithombe za tiyindlu a nga nako ni meseri, kutani muaki, loyi a mahako lezaku a mitiro ya mutsali yi tatiseka. A xikhati lexi hi hlamaliswako hi xilo xinwe ni xinwani xa kuvanga, hakunene hi nyika wudzunzo ka Mutsali wa Hombe wa Zithombe. (Tisimu 19:1) Hambulezo, hi nga ha alakanya kambe hi kutirisana ka simasima ni ko tsakisa xikari ka Muvangi ni ‘xigogo xakwe xa mitiro.’

9, 10. (a) Xini xi nga tiyisa a kubohana xikari ka Jehova ni N’wana wakwe? (b) Xini xi nga tiyisako a kubohana ka wena ni Dadani wa wena wa le tilweni?

⁹ Loku a vanhu vambiri va nga mbhelelangiko va tira nguvu zinwe, a zikhati zo kari za va karatela a kuva va zwanana. Lezo a hi zona zi mahekileko ka Jehova ni N’wana wakwe! A N’wana i tirile a malembe ya tsanza-vahlayi ni Dadani wakwe niku i wa “tsaka xontlhe xikhati mahlweni kakwe.” (Mavingu 8:30) Ina, yena i wa nengela hi kuva zinwe ni Dadani wakwe, niku lezo zi wa zwiwa hi vona va vambiri. Hakunene, a N’wana i kalile a fanana nguvu ni Dadani wakwe, a gonza a ku pimanyisa a matshamela ya Nungungulu. Makunu, a zi hlamalisi lezaku a kubohana ku nga kona xikari ka N’wana ni Dadani ku lo tiya nguvu! Hi kufaneleko, kona ka zi kota ku vitwa lezaku xiboho xa liranzo xa kale nguvu ni xo tiya nguvu ka zontlhe wuakweni gontlhe.

¹⁰ Hambulezo, xana lezo zi nga wula yini ka hina? U nga hazwa lezaku cima a wu nge zi koti a ku aka kubohana loko na Jehova. Hakunene, a nga kona ka hina a nga ni xikhundla xo tlakuka xo fana ni xa N’wana. Hambulezo, hina hi na ni lungelo go hlamalisa. Alakanya lezaku Jesu i wa hi ni kuzwanana ka laha kusuhani ni Dadani wakwe hi ku tira zinwe Naye. Jehova hi liranzo i hi nyika lungelo ga kuva “zitiri-kulobye.” (1 Va Le Korinte 3:9) Kota lezi hi lanzelako xikombiso xa Jesu wutirelini, xontlhe xikhati hi fanele ku alakanya lezaku hi zitiri-kulobye na Nungungulu. Hikwalaho, a kubohana ka liranzo loku ku hi tlhanganyisako na Jehova ka kula ku tiya nguvu. Xana ku ngava ni lungelo go hunza legi?

11-13. (a) Hikuyini zi vunako a ku alakanya liranzo kota nchumu wu hanyako, niku xana jaha Jesu i hlayisisile kuyini a liranzo lakwe ha Jehova na li tiyile? (b) Xana a N’wana wa Nungungulu i kombisile kuyini a kukhatala hi ku gonza hi ka Jehova, mahlweni ni nzhako ka kuta misaveni kota munhu wa nyama?

¹¹ Hi ka tindlela to tala, za vuna a ku alakanyela hi liranzo mbilwini ya hina kota nchumu wu hanyako. A ku fana ni xitsangi, a liranzo li lava ku hlayisiwa ni ku khatalelwa kasi li kula ni ku nyuka. Loku li nga khatalelwi, li nga hlayisiwi, la wuna li tlhela lifa. Jesu a nga li wonelangi hasi a liranzo lakwe ha Jehova. I lo li hlayisa na li tiyile ni ku nyuka xikhati xontlhe a nga hi laha misaveni. A hi woneni a ku i zi mahisile kuyini.

¹² Alakanya kambe hi xikhati lexi jaha Jesu a nga wulawula hi kutiya tempeleni le Jerusalema. Alakanya a magezu yakwe ka vapswali vakwe va nga karatekile: “Mu wa nzi lavela yini ke? Xana mu wa nga zi tivi lezaku nzi fanele a kuva nzi hi ndlwini ya Dadani ke?” (Luka 2:49) Kota lezi a nga ha hi jaha, zi woneka ku khwatsi Jesu i wa nga se alakanya nchumu xungetano hi kuvakona kakwe na a nga seva munhu wa nyama. Hambulezo, a liranzo lakwe hi Dadani wakwe, Jehova, li wa hi lo eta. I wa zi tiva lezaku a liranzo lelo li wa kombisiwa hi wukhozeli. Hikwalaho ku wa nga hi na wutshamu ginwani laha misaveni legi gi nga tsakisa nguvu Jesu a ku fana ni yindlu ya wukhozeli gi basileko ya Dadani wakwe. Yena i wa xuva a ku tshama lomo, i wa nga zi lavi ku suka kona. A ku hunza lezo, yena i wa nga hi mucuwukiseli ntsena. I wa navela nguvu a ku gonza xungetano hi Jehova ni ku kombisa lezi a nga zi tiva. A kutizwa loko a ku sangulangi a xikhati lexi a nga hi ni 12 wa malembe, ge hambu ku gumesa tangeni leyo.

¹³ Xikhatini xa kuvakona kakwe na a nga seva munhu wa nyama, a N’wana i wa gonzile ka Dadani wakwe hi kuxuva ka hombe. A xiprofeto xi tsalilweko ka Isaya 50:4-6 xi komba lezaku Jehova i nyikile a N’wana wakwe a gonziselelo yo hlawuleka xungetano hi ntiro wakwe kota Messia. Hambu lezi a gonziselelo leyo yi nga patsa a ku gonza xungetano hi kuxaniseka ko kari loku ku nga wa ta mu wela kota A Totilweko wa Jehova, a N’wana i gonzile hi kuxuva ka hombe. Anzhako ka kuva Jesu a tile misaveni zonake a kula ava munhu wa hombe, yena i simamile a xuva a kuya ndlwini ya Dadani wakwe ni ku hlengela ka wukhozeli ni ka gonzo leyi Jehova a nga lava ku yi wona na yi vuvumiswa lomo. Hikwalaho a Biblia gi bika a kutsumbeka ka Jesu ka kuvakona tempeleni ni sinagogeni. (Luka 4:16; 19:47) Loku hi lava ku hlayisa a liranzo la hina na li hanya ni ku tiya ha Jehova, hi fanele ku pinyamela kuva kona mitlhanganwini ya wuKristu, laha hi khozelako kona Jehova hi tlhela hi etisa a wutivi ni ku mu tsakela.

14, 15. (a) Hikuyini Jesu a nga kari a hlota a kuva yece? (b) Xana a mikhongelo ya Jesu ka Dadani wakwe yi kombisisile kuyini liranzo ni xichawo?

¹⁴ Jesu kambe i hlayisile a liranzo lakwe ha Jehova na li tiyile hi ku khongela hi kukhanzakanya. Hambulezi a nga hi wanuna wa wunghana, na a hi wo toloveleka, za dlunyateka lezaku i wa nyika lisima a kuva yece. Hi xikombiso, Luka 5:16 i ngalo: “Yena i lo famba xiwuleni, a ya khongela.” Hi kufanana, Mateu 14:23 i wula lezi: “Laha na a tlhelisile zidlemo, i loya xitsungeni na hi yece ku ya khongela. Gi lohlwa na hi kwalaho yece.” Jesu i hlotile a kuva yece ka makhati lawa ni ka manwani, na ku nga hi lezaku i wa hi munhu wo ti tsawukanyisa kutani ku venga a ku pangalatana ni vanwani, kanilezi ihakuva yena i wa lava kuva yece na Jehova, kasi ku wulawula ni Dadani wakwe hi mukhongelo na a tlhatlhekile.

¹⁵ A xikhati lexi a nga kari a khongela, Jesu zinwani zikhati i wa tirisa a magezu “Abba, Dadani!” (Marku 14:36) Le masikwini ya Jesu, “Abba” gi wa hi gezu gi nga tiriselwa “dadani” hi ndlela ya liranzo, na gi tirisiwa ngangweni. Gi wa tala kuva xikari ka magezu yo ranga lawa a nwanana a nga ma gonza. Kanilezi gi wa kombisa xichawo. Hambulezi a gezu legi gi nga kombisa a liranzo la N’wana na a wulawula ni Dadani wakwe a ranzekako, gona kambe gi wa kombisa xichawo xo eta hi xikhundla xa Jehova xa wudadani. Hi kuma a kuzwanana loko ka liranzo ni xichawo mikhongelweni yontlhe ya Jesu yi tsalilweko. Hi xikombiso, lomu ka Johani 17, mupostoli Johani i lo tsala a mukhongelo wo leha ni wa mbilu yontlhe lowu Jesu a wu mahileko ka wusiku Gakwe go gumesa. Hi lisine za hi khumba mbilu a ku gonza a mukhongelo lowo niku za lisima lezaku hi wu pimanyisa — hakunene na ku nga hi hi ku phindaphinda a magezu ya Jesu, kanilezi hi ku kuma tindlela ta ku wulawula ni Dadani wa hina wa le tilweni na zi sukela mbilwini hi xikhanzakanya xa laha hi zi kotako ha kona. A ku maha lezo ku ta hlayisa a liranzo la hina ha yena na li hanya ni ku tiya.

16, 17. (a) Xana Jesu i kombisisile kuyini a liranzo lakwe ka Dadani wakwe hi magezu? (b) Xana Jesu i kombisisile kuyini a wuhana ga Dadani wakwe?

¹⁶ Kota lezi hi zi wonileko kusanguleni, Jesu a nga phindaphindangi ku wula lezaku “nza mu ranza Dadani.” Hambulezo, a zikhati zinyingi yena i kombisile a liranzo lakwe hi Dadani wakwe hi magezu. Hi ndlela muni? Jesu wutsumbu i te ngalo: “Nza ku khesa Dada, Hosi ya tilo ni misava.” (Mateu 11:25) A xikhati hi nga gonza a Xipanze 2 xa bhuku legi, hi wonile lezaku Jesu i wa ranza ku dumisa a Dadani wakwe hi ku vuna vanhu lezaku va Mu tiva. Hi xikombiso, yena i fananisile Jehova ni dadani loyi a nga hi ni kuxuva ka lezaku a tsetselela n’wana wakwe wa kulahleka laha ka kuza a rinzela a kuchikela ka jaha lego gi nga ti solile, a mu wona hi le kule, a mu tsutsumela a tlhela a mu wukarela. (Luka 15:20) Himani a nga wa ta gonza a vesi lego handle ko khumbiwa hi xikombiso xa Jesu xa liranzo la Jehova ni kutsetselela?

¹⁷ Zikhati zo tala Jesu i dumisile a Dadani wakwe hi kota ya wuhana Gakwe. I tirisile xikombiso xa vapswali va nga mbhelelangiko kasi ku komba a kutiyiseka ka lezi a Dadani wa hina a to hi nyikisa zona a moya wa ku basa lowu hi wu lavako. (Luka 11:13) Jesu kambe i wulawulile hi kutsumba loku Dadani a ku nyikako hi matsenya. Jesu hi kuxuva i tlhamusele a kutsumba kakwe wutsumbu ka ku tlheliselwa ka wutshamu go kari reveni ga Dadani wakwe le tilweni. (Johani 14:28; 17:5) I lo byela valanzeli vakwe xungetano hi kutsumba loku Jehova a nga ku hunzisela “ntlhambi wu tsongwani” wa Kristu — ku nga kuya tshama tilweni ni ku hlengela ku fuma Mufunweni wa wuMessia. (Luka 12:32; Johani 14:2) Niku i khongotele a xigohi xi nga kari xifa hi kutsumba ka wutomi Paradiseni. (Luka 23:43, NM) A ku wulawula hi wuhana ga hombe ga Dadani wakwe hi tindlela leto hakunene ku vunile Jesu lezaku a hlayisa liranzo lakwe ha Jehova na li tiyile. A valanzeli vo tala va Kristu va wonile lezaku a ku na xinwani xi tiyisako a liranzo labye ha Jehova kutani a kukholwa kabye ka yena a ku hunza ku wulawula ha yena ni kutsumba loku a ku nyikako lava va mu ranzako.

18. Hi yihi a ndlela ya lisima ka tontlhe leyi hi faneleko ku lanzela Jesu ha yona, niku hikuyini?

¹⁸ A ka tindlela tontlhe leti hi faneleko ku lanzela Jesu ha tona, a ku na leyi yi nga ya lisima nguvu a ku hunza leyi: Hi fanele ku ranza Jehova hi mbilu ya hina yontlhe, ni muhefemulo, ni kupima, ni ntamu wa hina wontlhe. (Luka 10:27) A lipimo la liranzo lelo a li ntsena laha ka kueta ka kutizwa ka hina kanilezi li laha ka lisine la mitiro ya hina kambe. Jesu i wa nga tsaki ntsena hi kuzwa liranzo hi Dadani wakwe, ge hambu ku wula ntsena lezaku “nza mu ranza Dadani.” Yena i te ngalo: “Zi maheka kasi tiko gi fela ku zi tiva lezaku nza mu ranza Dadani, ni lezaku nzi maha lezi Dadani a nzi layileko.” (Johani 14:31) Satani i wa phikizile ku ngalo a ku na munhu loyi a nga wa ta tirela Jehova hi ku kuciwa hi liranzo. (Joba 2:4, 5) Kasi ku nyika a hlamulo wa chukwana ka yontlhe hi laha zi kotekako ha kona ka zilumbeto za Satani zo biha nguvu, Jesu hi kutiya-hlana i loya mahlweni a komba a tiko lezi a nga ranzisa zona a Dadani wakwe. I lo ingisa laha ka kuza a nyikela wutomi gakwe. Xana u ta mu lanzela Jesu? U ta komba a tiko lezaku hakunene wa mu ranza Jehova Nungungulu?

19, 20. (a) Hi zihi a zigelo lezi zi hi mahako hi lava kuva kona mitlhanganwini ya wuKristu hi kukhanzakanya? (b) Xana hi fanele ku xi wonisa kuyini a xigonzo xa hina wutsumbu, a kuehleketa, ni mukhongelo?

¹⁹ Hi na ni xilaveko xa hombe xa moya xa ku kombisa liranzo lelo. Hikwalaho Jehova i mahile malulamiselo ya lezaku hi mu khozela hi ndlela leyi a liranzo la hina hi Dadani wa hina li hlayisekako ni ku tiyiswa ha yona. A xikhati lexi u yako mitlhanganwini ya wuKristu, zama ku alakanya lezaku u kona seyo kasi ku khozela Nungungulu wa wena. A matshamela ya kukhozela loko ma patsa a ku ti tlhanganyisa mukhongelweni wa mbilu yontlhe, kuyimbeleleni ka tisimu ta kudumisa, kuingiseleni hi kuchela-kota, ni ku hlamula loku zi koteka. A mitlhangano leyo kambe yi ku nyika lungelo ga ku kuca maKristu-kuloni. (Maheberu 10:24, 25) A ku khozela Jehova xontlhe xikhati mitlhanganwini ya wuKristu ku ta ku vuna a ku ya u tiya nguvu liranzweni la wena ha Nungungulu.

²⁰ Hi kufanana, a liranzo la hina li ta tiya hi ku maha xigonzo xa Biblia xa munhu wutsumbu, ku ehleketa, ni ku khongela. Alakanyela lezi kota tindlela ta kuva wece na Jehova. A xikhati lexi u gonzako a Mhaka yi tsalilweko ya Nungungulu ni ku ehleketa hi yona, Jehova o ku nyika a kupima kakwe. Laha u khongelako, wo mu vululela a mbilu ya wena. Alakanya lezaku a mukhongelo a wu patsi ntsena a ku kombela zilo ka Nungungulu. A mukhongelo kambe i lungelo ga ku bonga Jehova hi kota ya makatekwa lawa u ma kumako ni ku mu dumisa hi kota ya mitiro yakwe yo hlamalisa. (Tisimu 146:1) Hi kuengetela, a ku dumisa Jehova laha kubaseni hi kutsaka ni kuhiseka hi yona ndlela ya chukwana ya ku bonga Jehova ni ya ku komba lezaku wa mu ranza.

21. Xana a liranzo ha Jehova li na ni lisima kuya chikela kwihi, niku zini zi to kambisiswa ka zipimo zi lanzelako?

²¹ A liranzo ha Nungungulu hi yona mhaka-tshinya ya kutsaka ka wena ka pinzukelwa. Hi zona zontlhe lezi Adamu na Eva va nga fanele ku zi hlota kasi ku humelela — niku hi wona a nchumu wa wunwe lowu va tsikileko a ku wu hlakulela. Hi xona xilo xa lisima nguvu lexi u xi lavako kasi ku hlula a xikarato xihi ni xihi xa kukholwa, u ala xiringo xihi ni xihi, ni ku timisela nzhingo wihi ni wihi. Hi lona li nga la lisima nguvu kasi kuva mulanzeli wa Jesu. Hakunene, a liranzo ha Nungungulu li yelana ni ku ranza vanhu-kulori. (1 Johani 4:20) Ka zipimo zi lanzelako, hi ta kambisisa lezi Jesu a kombisileko zona a liranzo lakwe hi vanhu. Ka xipimo xi lanzelako, hi ta wulawula hi lezaku hikuyini a vo tala va wonileko Jesu na a hi wo tshineleleka.