Xana Jehova wa ku khatalela hakunene?

“A ku tizwa na nzi nga vuni nchumu kuzilava hi kona ku nzi karatelako nguvu a ku ku hlula kasi nzi tshinela ka Nungungulu.” Lezo zi wulilwe hi wasati wo kari loyi zi nga mu karatela a ku kholwa lezaku Jehova a nga tshuka a kuma xigelo xa ku mu khatalela. Xana wenawu wa tshuka u ti zwisa lezo? Loku zi hi tano, u nga ha ti wutisa lezi, ‘Xana Jehova futsi wa khatala hi munwe ni munwani wa vakhozeli vakwe?’ A hlamulo wa kona i ina! Hi kuma xiseketelo xa lezaku Jehova wa khatala hi hina ka magezu ya Jesu. — Gonza Johani 6:44.

Xana i te yini Jesu, loyi a mu tivako khwatsi Jehova zinwe ni kuranza kakwe a ku hunza vontlhe vanhu ke? (Luka 10:22) Jesu i tlhamusele lezi: “A ku na munhu a zi kotako kuta ka mina, loku a nga kokiwi hi Dadani loyi a nzi rumileko.” Hikwalaho, a hi nge mahi a valanzeli va Kristu — hi tlhela hi maha vakhozeli va Dadani wa hina wa le tilweni, Jehova — loku hi nga kokiwi hi Jehova wutsumbu. (2 Va Le Tesalonika 2:13) Loku hi zwisisa lezi Jesu a nga wula, hi ta wona a xikombiso xa lezaku Nungungulu wa hi khatalela.

Xana zi wula yini a ku Jehova a hi koka? A gezu ga xiGreki legi gi hunzuluselweko ku ‘ku koka’ ga tiriswa kambe laha ka likoka la zidluwani. (Johani 21:6, 11) Xana Jehova i hi koka na hi nga zi lavi, a hi kurumeta a ku mu tirela? Ahihi. Jehova i hi nyikile a kutlhatlheka ka lezaku hi ti hlawulela, hikwalaho a nga hi kurumeti a ku vulula a mbilu ya hina. (Deuteronome 30:19, 20) A tlhari yo kari yi zi tlhamusela hi ndlela leyi: “A ku na xikhomo xa lahandle ka livati la mbilu ya munhu. Yi vululiwa hi lomu nzeni.” Jehova i hlola a timbilu ta tibiliyoni ta vanhu misaveni, na a lava vanhu lava va zi lavako ku mu tirela. (1 Kronekele 28:9) Loku a kuma a munhu wa tshamela lego, Jehova o mu khumba mbilu. Hi ndlela muni?

Hi liranzo Jehova i koka a mbilu ya munhu loyi a nga ni ‘kutiyimisela ku nene.’ (Mitiro 13:48) Jehova i maha lezo hi tindlela timbiri — hi mahungu yo saseka ya Biblia, lawa ma hi khumbako, zinwe ni moya wakwe wa ku basa. Loku Jehova a wona a mbilu leyi yi tsakelako a lisine la Biblia, yena i tirisa a moya wakwe wa ku basa lezaku a vuna a munhu loye a kuva a zwisisa ni ku tirisa a lisine la Biblia wutomini gakwe. (1 Va Le Korinte 2:11, 12) Ahandle ka ku vuniwa hi Nungungulu, zi wa nga ta koteka kuva valanzeli va lisine va Jesu ni kuva malanza yo hiseka ya Jehova.

Makunu, a magezu ya Jesu ma tsalilweko ka Johani 6:44 ma hi gonzisa yini xungetano hi Jehova Nungungulu ke? Jehova i koka vanhu hi ku wona a zilo za zi nene lomu timbilwini tabye ni lezi a khatalako hi munwe ni munwani wabye. A ku zwisisa a lisine lelo li tiyisako zi chavelele a wasati loyi a kumbukilweko kusanguleni. Yena i te ngalo: “A kuva nanza ga Jehova i lungelo ga hombe nguvu legi munhu a nga gi kumako. Niku Jehova i nzi hlawulile kuva nanza gakwe, hi xigelo lexo nzi wa lisima mahlweni kakwe.” Wena ke? Xana a ku tiva lezaku Jehova wa khatalela a munwe ni munwani wa vakhozeli vakwe za ku kuca a ku vulula livati la mbilu ya wena?