Ingisa a Varisi va Jehova

1, 2. Hikuyini Jehova a ti fananisako ni murisi?

JEHOVA i ti fananisa ni murisi. (Ezek. 34:11-14) Lezo za lisima hakuva za hi vuna a ku zwisisa lezi Jehova a nga zona. A murisi wa liranzo i na ni wutihlamuleli gontlhe ga ku hlayisa a ntlhambi wu nga mandleni yakwe kasi a tiyivu leto ti simama ti hanya ni kuva ni wutomi gi nene. I ti yisa ka wuriselo go nona gi nga ni zibuka za mati (Tis. 23:1, 2); a ti risa mumu ni wusiku (Luka 2:8); a ti vikela ka zivanza (1 Sam. 17:34, 35); a rwala leti ta ha hiko ku pswaliwa (Isa. 40:11); a languta leti ti lahlekileko a tlhela a bhandicha tiyivu leti ti bayisilweko. — Ezek. 34:16.

² Kota lezi a vanhu va Jehova va xikhatini xa kale va nga hanya lomu ku nga tele hi varimi ni varisi, a zi va karatelangi a ku zwisisa mhaka leyi ya ku fananisa Jehova Nungungulu ni murisi wa liranzo. Va wa zi tiva khwatsi lezaku a ntlhambi wu fanele ku hlayisiwa ni ku khatalelwa kasi wu anza. Zi tano ni ka vanhu hi tlhelo ga moya. (Mar. 6:34) Loku a vanhu va nga hlayisiwi ni ku rangelwa khwatsi hi tlhelo ga moya va xaniseka. Va pepetseka ni ku nga lanzeli mahanyela ma nene  —  khwatsi hi lezi a “tiyivu ti nga hiko na murisi” ti hangalakako. (1 Tih. 22:17) A ku hambana ni lezo, Jehova i khatalela zilaveko za vanhu vakwe hi liranzo.

 3. Zini hi to wulawula hi zona ka nzima leyi?

³ A ku fananisa Jehova ni murisi zi na ni tlhamuselo hambu xikhatini lexi. Jehova wa ha simama ku hlayisa vanhu vakwe vo fana ni tiyivu. A hi woneni lezi a rangelisako zona a tiyivu takwe ni ku ti nyika zontlhe lezi ti zi lavako nyamutlha. Hi ta gonza kambe lezi a tiyivu ti faneleko ku hlamulisa zona a kukhatala loku ka Jehova ka liranzo.

 4. Hi wihi ntiro lowu Jesu a nga nawo kuhlayiseni ka tiyivu ta Jehova?

⁴ Jehova i yimisile Jesu kota Hloko ya bandla ga wuKristu. (Efe. 1:22, 23) Kota “murisi nene,” Jesu i pimanyisa a xikombiso xa Dadani wakwe xa kukhatala, makungo, ni matshamela. Jesu i zile a “nyikela kuhanya kakwe hi kota ya tiyivu.” (Joh. 10:11, 15) Hi nga wona a xikatekiso lexi a vanhu va nga naxo hi kota ya muphahlo wa Kristu! (Mat. 20:28) Kunene, a kungo ga Jehova hi lezaku “ni wihi loyi a kholwako [ka Jesu] a nga lovi, kanilezi ave ni wutomi ga pinzukelwa”! — Joh. 3:16.

5, 6. (a) Hi vamani lava Jesu a va yimisako lezaku va hlayisa a tiyivu takwe, niku xana a tiyivu ti fanele ku maha yini kasi ti vuneka hi lulamiselo legi? (b) Hi xihi a xigelo xa hombe ka zontlhe xi hi mahako hi xuva ku ingisa a madota ya bandla?

⁵ Xana a tiyivu ti hlamulisa kuyini ka Jesu Kristu, a Murisi Nene? Jesu i te ngalo: “A tiyivu ta mina ta ingisa a gezu ga mina; mina nza ti tiva, ta nzi lanzela.” (Joh. 10:27) A ku ingisa a gezu ga Murisi Nene zi wula ku lanzela wurangeli gakwe zilweni zontlhe. Lezo zi patsa ku tirisana ni varisi va moya lava a va yimisako. Jesu i lo komba lezaku a vapostoli ni vapizani vakwe va wa ta yisa mahlweni a ntiro lowu yena a nga wu sangula. Va wa ta “gonzisa” ni ‘ku gisa tiyivana ta Jesu.’ (Mat. 28:20; gonza Johani 21:15-17.) Kota lezi a mahungu yo saseka ma nga kari ma hangalaka ni lezi a ntsengo wa vapizani wu nga engeteleka, Jesu i lo maha malulamiselo ya lezaku a maKristu ma buvileko ma risa mabandla. — Efe. 4:11, 12.

⁶ A xikhati lexi a nga wulawula ni madota ya bandla zaneni ga malembe go sangula le Efesusi, mupostoli Paule i lo komba lezaku a moya wa ku basa wu va yimisile kota madota kasi ku risa a bandla ga Nungungulu. (Miti. 20:28) Zi tano ni ka madota ya maKristu nyamutlha, hakuva wonawu ma yimiswa hi ku lanzela zileletelo za Mitsalo yi pimisilweko hi moya wa ku basa. Hikwalaho, a ku ingisa madota ya maKristu zi komba lezaku hi na ni xichawo ha Jehova na Jesu, a Varisi va hombe ka vontlhe. (Luka 10:16) Hakunene, lexi hi xona xigelo xa hombe ka zontlhe xi hi mahako hi xuva ku ti koramisa ka madota. Hambulezo, ku na ni zinwani zigelo zi hi mahako hi ti koramisa.

 7. Xana a madota ma ku vunisa kuyini lezaku u hlayisa kuzwanana ku nene na Jehova?

⁷ A xikhati lexi a madota ma nyikako zileletelo ka maKristu-kulobye, ma nyika wusungukati ni magezu yo tiyisa hlana ma seketelweko ka Biblia kutani ka matshinya ya milayo ya Biblia. A kungo gabye a xikhati lexi va nyikako wurangeli a hi ku bethela muthetho wa lezi a vamakabye vabye va faneleko ku hanyisa zona. (2 Kor. 1:24) Wutshanwini ga lezo, a kungo gabye ku nyika maKristu-kulobye a zileletelo za lomu Mitsalweni kasi ku ma vuna ku maha ziboho za zi nene, ni ku vuvumisa a kurula ni nongameto lomu bandleni. (1 Kor. 14:33, 40) A magezu lawa yaku, a madota ma “rinzela a mihefemulo” ma wula ku ma xuva ku vuna a xiro xinwe ni xinwani xa bandla lezaku xiva ni kuzwanana ku nene na Jehova. Hikwalaho, ma ta hatlisela ku nyika xivuno loku ma wona lezaku a makabye wo kari wa xinuna kutani wa xisati i laha kusuhani ni ku hambuka, kutani ku i hambukile. (Gal. 6:1, 2; Juda 22) Xana lezi a hi zigelo zo zwala za kuva hi ingisa lava va rangelako ke? — Gonza Maheberu 13:17.

 8. Xana a madota ma wu vikelisa kuyini a ntlhambi wa Nungungulu?

⁸ Mupostoli Paule, loyi yenawu a nga hi murisi wa moya, i lo tsalela vamakabye vakwe va le Kolosi aku: “Ti woneleni lezaku a munhu a nga dzuki a mu koka hi tigonzo ta wutlhari ga hava, hi ku lanzela a mikhuwo ya vanhu, ni mintamu yo sangula ya misava, na ku nga hi ka Kristu.” (Kol. 2:8) A xitlharihiso lexi xi hi komba a xinwani xigelo xa xi nene xa kuva hi ingisa a wusungukati ga Biblia legi hi nyikwako hi madota. Ma vikela ntlhambi hi ku tshama na ma wonelela a vamakabye vabye ka munhu wihi ni wihi loyi a nga wa ta onha a kukholwa kabye. Mupostoli Pedro i lo tlharihisa xungetano hi “vaprofeti va mawunwa” ni “vagonzisi va mawunwa” lava va nga wa ta zama ku “kucetela a mihefemulo leyi yi nga tiyangiko” ka zilo za hava. (2 Ped. 2:1, 14) A madota ya xikhati lexi ma fanele ku nyika zitlharihiso zo fana ni lezi, loku zi laveka. Kota vavanuna va maKristu va buvileko, va tiva zotala wutomini legi. Tlhatakumbiri, na va nga se yimiswa kota madota, va kombisile lezaku va yi zwisisa khwatsi Mitsalo ni lezaku va ringanelwa hi ku gonzisa lezi zi nga zi nene. (1 Tim. 3:2; Tit. 1:9) Kota vavanuna va buvileko, va nga ni kuringanisela, ni wutlhari ga Biblia va zi kota ku nyika a wurangeli gi nene ka ntlhambi.

 9. Xana Jesu i gi rangelisa kuyini a bandla ga wuKristu nyamutlha ni ku gi gisa?

⁹ Hi ku tirisa a hlengeletano yakwe, Jehova i nyikela zakuga zo tala za moya ka malanza yakwe misaveni yontlhe. A wusungukati go tala ga Biblia gi kumeka ka mabhuku ya hina. Tlhatakumbiri, ka zikhati zinwani a hlengeletano yi nyikela zileletelo hi ku kongoma ka madota ya bandla, ku ngava hi mapapilo kutani zileletelo zi nyikiwako hi vawoneleli va fambafambako. Hi tindlela leto, a tiyivu ti kuma wurangeli go dlunyateka.

10. I nzhwalo muni lowu a varisi va moya va nga nawo xungetano hi lava va hambukileko ntlhambini ke?

¹⁰ Hi tlhelo ga moya, a madota ma na ni nzhwalo wa ku vikela, ku anwisa, ni ku hlayisa a lihanyo la ziro za bandla, nguvunguvu lezi zi nga ti bayisa kutani lezi zi babyako hi tlhelo ga moya. (Gonza Jakobe 5:14, 15.) A vokari xikari ka vanhu lavo za koteka ku ngha va hambukile ntlhambini ni ku nga ha mahi mitiro ya wuKristu. Ka mhaka leyo, xana a dota go khatala gi wa nga ta maha zontlhe zi nga ntanwini wa gona kasi ku lavetela a yivu yinwe ni yinwani yi lahlekileko zonake gi kuca a yivu leyo lezaku yi tlhelela ntlhambini, ku nga bandla ke? Handle ko kanakana gi wa ta maha! Jesu i te ngalo: “A hi kuranza ka Raru wa nwina loyi a nga le tilweni, lezaku ku lahleka ni munwe wa lava va tsongwanyani.” — Mat. 18:12-14.

11. Hikuyini a vokari zi nga ha va karatelako a ku lanzela wurangeli ga madota?

¹¹ Jehova na Jesu Varisi va mbheleleko. Kasike, a varisi va nyama lava Kristu a va nyikileko a ntiro wa ku rangela bandla a va nghaho. A vokari zi nga ha va karatela a ku lanzela a wurangeli ga madota hi kota ya mhaka leyi. A vanhu lavo va nga ha alakanya lezi: ‘Phela a madota vanhu va nga mbhelelangiko a ku fana na hina. Hikuyini hi faneleko ku ingisa a wusungukati gabye?’ Lisine lezaku a madota a ma mbhelelangi. Hambulezo, hi fanele kuva ni mawonela ma nene hi zihoxo zabye ni gome gabye.

12, 13. (a) Ku nga wuliwa yini hi zihoxo za vokari lava Jehova a va tirisako ka zikhundla za wuwoneleli? (b) Hikuyini ku tsalilweko a zihoxo za vavanuna lava va nga hi ni zikhundla za wurangeli lomu ka Biblia?

¹² A Biblia a gi fihli ne ni kutsongwani a zihoxo za lava Jehova a va tirisileko kasi ku rangela vanhu vakwe xikhatini xa kale. Hi xikombiso, Davida i wa totilwe kota hosi ni murangeli wa Israeli. Hambulezo, i lo wela xiringweni a tlhela ava ni nanzu wa wubhayi ni kudaya. (2 Sam. 12:7-9) Hi nga ehleketa kambe hi mupostoli Pedro. Hambu lezi a nga nyikilwe wutihlamuleli ga hombe bandleni ga wuKristu ka zana ga malembe go sangula, i lo maha zihoxo za hombe. (Mat. 16:18, 19; Joh. 13:38; 18:27; Gal. 2:11-14) Kusukela ka Adamu na Eva kala nyamutlha, a ku na ngava ni munhu wo mbhelela ahandle ka Jesu.

¹³ Hikuyini Jehova a nga laya vatsali va Biblia lezaku va tsala zihoxo za vavanuna lava a nga va nyikile ntiro? A xinwe xa zigelo hi lezaku Nungungulu i mahile lezi kasi ku komba ku wa zi kota ku tirisa a vavanuna va nga mbhelelangiko lezaku va rangela vanhu vakwe. Kunene, xontlhe xikhati i maha lezo. Hikwalaho, a hi faneli ku cuwuka a kungambheleli ka lava va hi rangelako nyamutlha kota xigelo xa ku ti yimelela hi va ngurangurela kutani ku ala wurangeli gabye. Jehova i lava lezaku hi kombisa xichawo ka vamakabye lavo ni ku va ingisa. — Gonza Eksodusi 16:2, 8.

14, 15. Hi gonza yini ka lezi Jehova a bhulisanisileko zona ni vanhu vakwe xikhatini lexo?

¹⁴ Za lisima a ku ingisa lava va hi rangelako nyamutlha. Ehleketa hi lezi Jehova a nga bhulisanisa zona ni vanhu vakwe zikhatini zo nonoha za kaleloko. A xikhati lexi a vaIsraeli va nga suka Gipite, Nungungulu i lo va nyika zileletelo hi nomu wa Mosi na Aroni. Kasi va pona a ntungu wa wukhume, a vaIsraeli va wa fanele ku ingisa xileletelo xa Jehova xa lezaku va daya xifuyo vaga zonake va tota a nkhata wa kona timhanzeni ta laha nyangweni ta tiyindlu tabye. A xileletelo lexi a va xi kumangi kota gezu go huma hi le tilweni. Va wa fanele ku demba ndleve ka madota ya Israeli lawa wonawu ma nga kuma zileletelo lezo zo kongoma hi ka Mosi. (Ekso. 12:1-7, 21-23, 29) Ka ziyimo lezo, Mosi ni madota va wa tira kota vahunziseli va zileletelo za Jehova ka vanhu vakwe. A madota ya maKristu nyamutlha ma maha ntiro wa lisima wo fana ni lowo.

¹⁵ Za koteka ku ngha wenawu u alakanya hi makhati manwani yo tala matinwini ya Biblia lawa Jehova a nga nyikela a zileletelo zo ponisa vanhu vakwe hi ku tirisa vanhu va nyama kutani tingelosi. Ka makhati wontlhe lawo, Nungungulu i zi wonile na zi hi chukwana ku hlawula a vanhu vo kari lezaku va mu yimela. A mitsumi leyo yi lo wulawula hi vito gakwe, yi byela vanhu vakwe lezi va nga fanele ku maha kasi va pona ka makhombo. Xana a hi zi woni lezaku Jehova a nga maha zilo zo fana ni lezo le Har–Magedoni? Kunene, ni gihi dota nyamutlha gi nga hlawuliwa hi Jehova lezaku gi mu yimela kutani ku yimela hlengeletano yakwe, gi fanele ku ti wonela nguvu lezaku gi nga hunzeleti ka wuhloko legi gi nyikilweko.

16. I “gezu” muni legi hi faneleko ku demba ndleve ka gona?

¹⁶ A vanhu va Jehova va wumba “ntlhambi munwe” wu nga ni “murisi munwe,” ku nga Jesu Kristu. (Joh. 10:16) Jesu i wulile lezaku i wa tava zinwe ni vapizani vakwe ‘masiku wontlhe kala kugumelweni ka xikhati.’ (Mat. 28:20) Kota Hosi ya le tilweni, i wonelela zontlhe zi mahekako lezi zi to yisa kulamulweni ka tiko ga Satani. Kasi hi simama na hi bohene ni kutshamiseka ntlhambini wa Nungungulu, hi fanele kuzwa a ‘gezu lenzhako ka hina,’ legi gi hi byelako a ndlela leyi hi faneleko ku famba hi yona. A “gezu” legi, gi patsa lezi a moya wa ku basa wa Nungungulu wu zi wulako hi ku tirisa Biblia ni lezi Jehova na Jesu va zi wulako hi ku tirisa lava va va yimisileko kota varisi va nga hasi kabye. — Gonza Isaya 30:21; Kuvululelwa 3:22.

17, 18. (a) Hi gihi a khombo legi gi xiyelelako a ntlhambi, kanilezi kutsumba muni hi nga nako? (b) Hi ta wulawula hi yini ka nzima yi lanzelako?

¹⁷ Ku wuliwa lezaku Satani wa fambafamba “kota nghala leyi yi dzumako, a hlota loyi a ta nga mu khadamula.” (1 Ped. 5:8) A ku fana ni xivanza lexi xi lambileko hi ndlala, i xiyelela ntlhambi na a rinzela lezaku ku vululeka mole kasi a khadamula loyi a nga tlharihangiko kutani loyi a hambukako. Lexi hi xona a xigelo xa hombe ka zontlhe xi faneleko ku hi maha hi tshama kusuhani nguvu ni ntlhambi wontlhe ni ka “Murisi ni Muhlayisi wa mihefemulo ya [hina].” (1 Ped. 2:25) Xungetano hi lava va to pona a kuxaniseka ka hombe, Kuvululelwa 7:17 i ngalo: “A Yivana [Jesu] . . . yi tava murisi wabye, yi va hletela tihlobyeni ta mati ya wutomi; Nungungulu i ta hlangula mihloti yontlhe mahlweni yabye.” Hi nga wona a kusaseka ka xitsumbiso lexi!

¹⁸ Lezi hi gonzileko hi ntiro wa lisima wa madota ya maKristu kota varisi va moya va nga hasi ka Kristu, i chukwana hi wutisa lezi: Xana a vavanuna lava va yimisilweko va nga zi tivisa kuyini lezaku va hlayisa tiyivu ta Jesu hi ndlela yi nene? A hlamulo wa kona hi ta bhula hi wona ka nzima yi lanzelako.