Hikuyini hi alakanyako a kufa ka Jesu?

Mónica: Gi cile, Sara. Nzi tsakile nguvu hi kuva u tile ka xialakanyiso xa kufa ka Jesu Kristu ka viki gi nga hunza.a U wu wonisile kuyini a mutlhangano lowuyani?

Sara: Nzi tsakile nguvu hi kuva seyo, kanilezi kasi ku wula lisine a nzi zi zwisisangi zontlhe zi nga wulawuliwa. Nza zi tiva lezaku a vanhu vo tala va nyika nguvu lisima a kupswaliwa ka Jesu xikhatini xa Khisimuso a ku hunza a ku alakanya a kufa kakwe. U nga tlhela u nzi tlhamusela kambe lezaku, hikuyini zi nga ni lisima nguvu a ku alakanya a kufa ka Jesu?

Mónica: Lisine futsi, a vanhu vo tala vaga a Khisimuso. Kanilezi, a Timboni ta Jehova ti wona lezaku a siku ga lisima nguvu legi ti faneleko ku gi alakanya, kufa ka Jesu. Loku u hi ni xikhati, nzi wa ta tsakela ku hi vuxeta a lisima ni xigelo xa kuva hi maha lezo.

Sara: Nzi naxo.

Mónica: Hi magezu yo koma, a Timboni ta Jehova ti alakanya a kufa ka Jesu, hakuva hi zalezo a leleteleko a valanzeli vakwe lezaku va zi maha. Ehleketa hi lezi zi humeleleko ka wusiku ga mahlweni ka kufa ka Jesu. Wa alakanya ku tshuka u zwile zokari xungetano hi zakuga zo hlawuleka a gileko ni vapizani vakwe vo tsumbeka?

Sara: U wula a Xilalelo xo Gumesa?

Mónica: Hi zona, xi vitaniwa ku Xilalelo xa Hosi kambe. Na va kari vaga a xilalelo lexo, Jesu i lo va nyika a zileletelo zo dlunyateka a vapizani vakwe. Xana u nga lera a magezu yakwe ma nga ka Luka 22:19?

Sara: Ina. Me ngalo: “I lo teka xibaba, laha na a bongile, i lo xi khema, a va nyika, aku: Lexi hi miri wa mina, lowu wu nyikelwako nwina; mahani lezo, mu nzi alakanya ha zona.”

Mónica: Nzi bongile. Wona a xileletelo xa Jesu ka magezu yo gumesa ya vesi legi: “Mahani lezo, mu nzi alakanya ha zona.” Niku xikhatanyana mahlweni ka ku leletela a valanzeli vakwe lezaku va mu alakanya, Jesu i lo zi veka kubaseni lezi va nga lava ku zi alakanya xungetano hi yena. I lo wula lezaku a wutomi gakwe gi wa ta nyikelwa kasi ku vuneka a valanzeli vakwe. Jesu i lo kombisa a maalakanyo lawa hi magezu yo fana, hi laha ma tsalilweko ha kona ka Mateu 20:28. A vesi legi gi ngalo: ‘A N’wana wa munhu a nga telangi ku ta tirelwa, kanilezi a ku ta tirela, ni ku nyikela kuhanya kakwe a kuva nzhiho wa ku tirula vanyingi.’ Hi ku komisa, hi zalezo zi mahako a Timboni ta Jehova ti tlhangana lembe ni lembe xialakanyisweni xa kufa ka Jesu — kasi ku alakanya a muphahlo lowu Jesu a wu nyikeleko. A kufa kakwe ku nga wula wutomi ka vanhu vontlhe va ingisako.

Sara: Nzazwa vanhu na wula lezaku Jesu i lofa kasi hi kuma a wutomi. Kanilezi, kasi ku wula lisine, a nzi se zi zwisisa a ku hi kuma wutomi hi ndlela muni.

Mónica: A hi wena wece, Sara. A mhaka ya nzhiho lowu Jesu a wu nyikeleko kota muphahlo, yinwe ya timhaka to eta nguvu. Kanilezi, yinwe ya timhaka to saseka nguvu kambe ti nga lomu ka Mhaka ya Nungungulu. E, nzi tlhelako nzi rivakelwa, xana wa hi ni xikhatanyana?

Sara: Nza hi naxwanyana.

Mónica: Zi sasekile. Nzi lerile a hloko ya mhaka yi wulawulako hi nzhiho, niku zezi nzi ta zama ku ku tlhamusela hi ndlela yo olova.

Sara: Eyo.

Mónica: Kasi ku zwisisa a ku xini nzhiho, a kusangula hi fanele ku tiva lezi Adamu na Eva va nga zi vanga a xikhati lexi va nga onha le sinwini ga Edeni. Kasi ku hi vuna a ku zwisisa lezi zi patsekako ka mhaka leyi, a hi gonze zinwe Va Le Roma 6:23. U nga lera a vesi legi?

Sara: Ina. Gi ngalo: “A hakhelo ya kuonha hi kufa, kanilezi a xinyikiwo xa Nungungulu hi wutomi ga pinzukelwa ha Jesu Kristu a Hosi ya hina.”

Mónica: Nzi bongile. A hi kambisise magezu lawa. A kusangula, wona lezi a vesi legi gi sangulisako zona: “A hakhelo ya kuonha hi kufa.” Lowu i nayo wo olova ku wu zwisisa lowu Nungungulu a nga wu yimisa kusanguleni ka matimu ya vanhu — a hakhelo kutani tsayiselelo wa xionho kufa. Kanilezi hi lisine, kusanguleni i hava a nga hi muonhi. Adamu na Eva va vangilwe na va mbhelele, niku a vana vabye vontlhe va wa ta pswaliwa na va mbhelele. Hikwalaho, ku wa nga tava ni xigelo xaku a munhu wo kari afa. Adamu na Eva ni pswalo wabye wontlhe va wa hi ni kurinzela a ku hanya a wutomi go tsakisa kala kupinzuka. Kanilezi kota lezi hi zi tivako, lezo a zi mahekangi, a hi zona?

Sara: Hi zona. Adamu na Eva va loga a hanzu lowu wu nga beletelwa.

Mónica: Ina. Niku a xikhati lexi Adamu na Eva va nga maha lezo — va wo hlawula kungaingisi Nungungulu — zonake va onha. Hi lisine, va lo hlawula kungambheleli, va maha vaonhi. A kuhlawula loko ku wa nga ta neha makhombo ya hombe ka Adamu na Eva ntsena, kanilezi ni ka pswalo wabye wontlhe.

Sara: U lava ku wula yini?

Mónica: Kuzilava nzi nga tirisa a mufananiso wo kari. Nza ha ku maha xiwutiso, xana wa zi ranza a ku maha tipawa?

Sara: Ina! Nza zi ranza.

Mónica: A hi alakanye ku u hi ni pani ga gi nene ga giswa ga ku woca tipawa. Kanilezi, na u nga se gi tirisa giwa lahasi gi phateka nguvu. Makunu, zini zi to humelela a pawa yinwe ni yinwani yi nga wa ta wociwa ka pani lego? Xana tonawu a tipawa ti wa nga ta phateka?

Sara: Hi lisine, ti wa ta phateka.

Mónica: Hi ndlela yo fana, a xikhati lexi Adamu na Eva va nga hlawula a ku nga ingisi Nungungulu, va lo “phateka,” kutani ku chakiswa, hi xionho ni kungambheleli. Niku kota lezi va nga maha vaonhi na va nga seva ni vana, a vana vabye vontlhe va wa ta pswaliwa ni “kuphateka” kaloko. Vontlhe va wa ta pswaliwa ka xiyimo xa xionho. Lomu ka Biblia a gezu, “xionho” a gi wuli ntsena a ximaho xa kona kanilezi ni xiyimo lexi xi hi thapeleko. A wuyelo ga kona hi lezaku hambu lezi mina na wena hi nga kala hi nga se pswaliwa, a xikhati lexi Adamu na Eva va nga onha na hi nga mahangi nchumu xa kubiha kambe, lezi va nga zi maha zi mahile lezaku a vana vabye lava va nga wa ta pswala, zinwe na hina ni vana va hinawu, hi pswaliwa na hi thapelwe hi kungambheleli ni xionho lexi xi mahako lezaku hi gumesa hifa. Kota lezi hi gonzileko ka Va Le Roma 6:23, a tsayiselelo wa xionho kufa.

Sara: Lezo ko khwatsi a zi lulamangi. Hikuyini a vanhu vontlhe va nga wa ta xaniseka hi xikhati xo leha hi kota ya xionho xa Adamu na Eva?

Mónica: A wu hembi. Zo khwatsi a zi lulamangi futsi. Kanilezi ku na ni zilo za hombe zi patsekako zo hunza lezo. Hi kota ya kululama kakwe ko mbhelela, Nungungulu i lo boha lezaku Adamu na Eva vafa hi kota ya xionho xabye, kanilezi hina vana vabye a nga hi tsiki na hi nga hi na kurinzela ko kari. Nungungulu i vululile ndlela ya lezaku hi huma ka xikarato lexi. Hi laho a nzhiho wa Jesu wu nghenako kona. Tlhela u wona kambe Va Le Roma 6:23. Anzhako ka kuva gi wulile lezaku “a hakhelo ya kuonha hi kufa,” a vesi legi gi tlhela giku: “Kanilezi a xinyikiwo xa Nungungulu hi wutomi ga pinzukelwa ha Jesu Kristu a Hosi ya hina.” Hikwalaho, a kufa ka Jesu hi kona ku hi vululelako a ndlela ya kuva hi tlhatlhiswa ka xionho ni kufa.b

Mónica: Ku na ni mhaka yinwani yi nga kwalaha ka vesi legi nzi lavako ku ku komba.

Sara: I mhaka muni?

Mónica: Wona lezaku a vesi legi gi ngalo: “A xinyikiwo xa Nungungulu hi wutomi ga pinzukelwa ha Jesu Kristu a Hosi ya hina.” Makunu loku ku hi lezaku hi Jesu a xanisekileko a tlhela a hi fela, a nyikela a wutomi gakwe hi kota ya hina, hikuyini a vesi legi gi nge a nzhiho “xinyikiwo xa Nungungulu”? Hikuyini ku nga hiko, “xinyikiwo lexi Jesu a xi nyikeleko”?c

Sara: Um. A nzi zi tivi.

Mónica: Nungungulu i vangile Adamu na Eva, niku hi yena va nga mu onhela, a xikhati lexi va nga kala ku ingisa le sinwini ga Edeni. I bayisekile nguvu a xikhati lexi a vana vakwe va vambiri vo sangula va nga mu hluwukela. Kanilezi, Jehova i lo tekela ku yimisa ndlela yo lulamisa a mhaka leyo.d I lo maha lezaku a xinwe xa zivangwa zakwe za moya xita laha misaveni, xi ta hanya kota munhu wo mbhelela, zonake hi kugumesa xi nyikela a wutomi ga xona kota nzhiho, ku nga muphahlo lowu wu tirulako. Hikwalaho, hakunene a lulamiselo ga nzhiho xi wa hi xinyikiwo xi tako hi ka Nungungulu. Ku na ni xigelo xinwani xi mahako lezaku a nzhiho ku hi lulamiselo ga Nungungulu. U tshukile u alakanyela lezi Nungungulu a ti zwisileko zona a xikhati lexi Jesu a ngafa?

Sara: Ko khwatsi ahihi.

Mónica: Nzi wona zilo zo hlakana hi zona laha kaya. Zi komba ku u na ni vanana.

Sara: Ina, nzi na ni vambiri — mufana ni nhanyana.

Mónica: Kota mupswali, nyimanyana u alakanyela lezi a Dadani wa Jesu wa le tilweni, Jehova Nungungulu, a ti zwisileko zona ka siku legi Jesu a nga dawa. I ti zwisile kuyini a xikhati a nga cuwuka a N’wana wakwe hi le tilweni na a khomiwa, a tseketselwa, a tlhela a biwa? Ahati laha a N’wana wakwe a nga kari a belelwa laha ka mhanze zonake va mu tsika kwalaho kasi afa hi kutsongwani-kutsongwani ke?

Sara: I bayisekile nguvu. Nzi wa nga se tshuka nzi zi alakanyela!

Mónica: Hi lisine, za karata a ku wula khwatsi lezi Nungungulu a nga ti zwisa zona ka siku lego. Kanilezi ha zi tiva lezaku i na ni kutizwa, niku ha zi tiva kambe lezaku hikuyini a ngaza a tsika zontlhe lezo zi maheka. Zi tlhamuselwa hi ndlela yo saseka ka mutsalo wo tiveka nguvu, ku nga Johani 3:16. Xana u nga lera?

Sara: Ina. Wu ngalo: “Nungungulu i lo ranza tiko kota lezi, a kala a nyikela a N’wana wakwe a belekilweko yece, kasi ni wihi loyi a kholwako kakwe a nga lovi, kanilezi ave ni wutomi ga pinzukelwa.”

Mónica: Nzi bongile. Tlhela u wona a vesi legi laha gi sangulako. Gi ngalo: “Nungungulu i lo ranza tiko.” A liranzo hi lona a pfhungulo ya kona. A liranzo li lo kuca Nungungulu lezaku a rumela a N’wana wakwe ata laha misaveni kasi a ta hi fela. Hi lisine a nzhiho, ku nga muphahlo wu tirulako, xikombiso xa hombe xa liranzo a ku hunza zontlhe. Niku hi zalezo zi mahako a Timboni ta Jehova ti tlhangana lembe ni lembe xialakanyisweni xa kufa ka Jesu. Xana a kuvuxeta loku ku ku vunile?

Sara: Ina. Nzi bongile hi kuva u ti nyikile xikhati xa kuvuxeta mahungu lawa na mina.